Ramgoolam bizin rapel Minis Ramful a-lord
22.04.2026
Minis Zafer Etranzer Ritesh Ramful, kan li ti al Leta Zini resaman pu al kurbe, rod lavantaz pu patron ki vann "prodwi" kuma zako ek triko dan kad African Growth and Opportunities Act (AGOA), li finn fer enn deklarasyon inakseptab. Anfet seki li finn dir lor MBC TV li kareman enn negasyon realite politik konsernan relasyon Repiblik Moris ar lezot pei. Paret Minis Ramful pe telman trakas sa "blood money" pu vann Diego pu 99 an, ki li pe al fer erer grav.
Anfet Minis Ramful finn vinn fer serman ki Moris pa alye ni ar Lasinn, ni ar Liran.
Dan LALIT, nu pa konpran. Seki nu kone se Moris ti enn-de premye pei ki rekonet Repiblik Popiler Lasinn, kote diplomatik, e anmemtan finn adopte "One China Policy". Moris osi ena lyin diplomatik de-long-dat ar Repiblik Islamik Liran, e lyin ti ranforsi atraver enn seri lakor ki ti fer ant 2022 ek 2026.
Eski Minis Ramful pe "repudiate", setadir niye e rezet relasyon Repiblik Moris ar sa 2 pei la? Kifer? Anmemtan Minis zir so "sinserite" anver Leta Zini, ki okip teritwar Moris ilegalman.
Dan LALIT, nu krwar Moris bizin res non-aliyne. Anmemtan, bizin swiv lalwa internasyonal.
Sa li sirtu inportan dan enn lepok kot USA-Israel pe fer enn lager-dagresyon kont Liran, setadir li e imoral e osi ilegal.
Fode pa enn Minis al Washington, kuma Minis Ramful dan so reynion avek M. Christopher Landau, Deputy Secretary of State, raporte lor MBC le 20 Avril, dir "Mo'nn sezi lokazyon pu montre ki Moris, li ni enn alye Lasinn ni enn alye de Liran. Par exanp, Moris, sel pei pa finn siyn Belt and Road Initiative de bann Sinnwa (sic)." Eski Minis Ramful pe met Moris an-danze par sanz politik etranzer?
Guvernman Ramgoolam bizin ramenn Minis Ramful a-lord. Okontrer, dan enn moman difisil pu Repiblik Moris, sirtu kote aprovizyonnman an manze debaz, li enn moman pu reser nu lyin ar enn pei kuma Lasinn. Kan Liran su enn atak militer ilegal, osi byin ki su sanksyon ilegal, nu ti bizin solider ar Liran.
Alain Ah Vee ek Rajni Lallah, pu LALIT.
22 Avril 2026.
