Deklarasyon lor lager Agresyon US-Israel kont Liran e pu demann plant manze lor later tablisman fas a menas kriz alimanter- Intervansyon Alain Ah Vee
17.04.2026
Nu pe pilliye transkripsiyon intervansyon ki reprezantan Lalit, Alain Ah Vee ti fer yer apre ki ti remet Deklarasyon a Premye Minis lor Agresyon US-Israel kont Liran e pu demann plant manze lor later tablisman fas a menas kriz alimanter. (Nu pu rapel viziter lor nu paz fb ki ti ena problem son dan video kan Alain Ah Vee ti pe intervenir).
Intervansyon Alain Ah Vee
Aksyon ki nu finn fer zordi li enn aksyon kolektif atraver enn Deklarasyon an Komin adrese a Guvernman ki nu finn remet dan biro Premye Minis Guvernman L’Alliance du Changement.
Sa aksyon kolektif la li enn mwayin opoz sa lager dagresyon USA-Israel kont Liran. Nu demand li spesifik- nu bizin rant dan prosesis pu plant manze lor later tablisman.
Kifer sa aksyon zordi se parski nu dan enn moman byin byin danzere. Sa lager la li riske zeneralize ek dire lor letan. Nu pe kumans sibir so bann lefe. Nu bizin veye ki Guvernman Repiblik Moris azir dan enn fason ferm, lor prinsip ek ki li veye ki lintere lepep Moris pa menase. Mezir ki Guvernman pe pran li siperfisyel, insifizan! Zot pa koresponn a gravite sityasyon nu pe viv. Zordi mem nu tann dir pri lesans, diesel dezyem fwa pe monte, pri dipin fini monte, pri gaz pe monte, finn anons ki pri elektrisite pu monte 1Me. Nu pe deza sibir lefe kriz. Li enn lager ki pe dikte lekonomi dan lemond. Enn sistem an kriz, li enn sistem dan leral, li pe antrenn popilasyon lemond ver dezas, izolasyon, destriksyon. Fode pa nu vinn viktim, sarye fardo sistem kapitalis.
Nu bizin mobilize aster lamem pu ki nu prepare fas a enn sityasyon ki kapav agrave byin vit sinon nu kapav al dan enn sityasyon dezarwa ki kapav al dan enn sityasyon ankor pli difisil pu peyi. Ena 4 pwin lor nu demand;
1. Depi plizir mwa diferan lorganizasyon isi prezan nu pe kontinye insiste pu fermtir baz Diego Garcia. Nu santi kinn ariv ler pu nu met tu nu pwa pu ferm baz militer Amerikin-UK lor Diego. Li enn baz ki reprezant enn menas permanan lager lor nu latet. Nu bizin kapav asim nu suvrennte, asire ki nu ekzers tu nu suvrennte lor totalite nu teritwar kot ena sa baz militer lor Diego. Dan enn sityasyon kriz nu bizin gete a ki pwin nu indepandan dan enn sityasyon kriz. Nu bizin gete ziska ki pwin nu kapav depandan lor numem pu fer fas. Fer 58an depi ki nu finn gayn lindepandans me nu ankor depånn lor desizyon extern ki afekte nu peyi. Par egzanp si nu anvi deside lor enn Plan Nasyonal Lozman sa seri mezir la depann lor disponibilite nu later. Bizin asire ki later Moris li aksesib pu asir sekirite alimanter-ase sifizan pu asir bezwin debaz popilasyon. Diego-Chagos li enn but later inportan sirtu so lamer inportan pu devlopman. Me nu pena desizyon lor la, li su kontrol Leta Zini ek Grand Bretayn. Fode pa nu vinn kuma Guvernman ki pe rod lamone disan. Nu bizin viz met ase presyon pu ferm baz USA-UK lor Diego Garcia.
2. Nu dimann ki Guvernman sutenir ka kinn mete lakur internasyonal LaHay kont zenosid ki Israel pe perpetre dan Gaza Palestinn. Sa li byin inportan ki ena deza 2 peyi, Iceland ek Laoland ki finn azut zot nom dan keys kont Leta Israel kinn al kraz tu infrastriktir, asasinn par milye dimunn, zanfan ek zot pe kontinye detrir lavi dimunn dan Gaza. Ek seki pli grav zot pe akseler lokipasyon, akseler kolonizasyon. Alors nu bizin gard antet ki fer plis ki 75an depi ki Palestinn su lokipasyon Israel. Li inportan ki nu sutenir Lepep Palestinyin dan zot konba ki tutafe lezitim, legal pu ki zot usi ena drwa suvrennte lor totalite zot teritwar ek zot pa sufer sa zenosid ki pe perpetre zordi. Pa zis dan Gaza asterla dan Wes Benk, lor teritwar Palestinn ek pe mem etann dan Lesid Liban. Sa li byin byin grav, ena ruling Nasyon Zini ki byin kler lor la. Kan enn peyi kuma Moris met a dispozisyon lezot Leta kuma Lamerik ek Grand Bretayn enn but nu teritwar, seki zot fer ar nu teritwar nu ena enn responsabilite ladan. Lakur internasyonal kler lor la, se Moris ki ena suvrennte lor totalite teritwar Chagos. Alors si Lamerik pe servi enn but nu teritwar pu al bonbard lezot peyi, nu konplis enn agresyon. Ek nu bizin rapel ki Desam lane dernye Trump ti deza menase ki li pu al atak Liran depi nu teritwar. Nu pena kontrol lor sa teritwar la, nu pa kone ki zot pe fer ar li. Eski par egzanp pe ravitay sumarin nikler, bato deger ek eski avyon ki pe al bonbarde dan Mwayin Oryan ek Liran pe pas par Diego. Nu pena okenn kontrol lor la. Nu riske al vinn konplis enn belizeran dan enn lager ki nu pa finn deside. Nu pa anger kont Liran nu. Li byin byin grav nu pa pe asim nu responsabilite lor sa but nu teritwar ki apel Chagos. Fode pa Guvernman al rant dan pyez kolonyalis UK-US ki zot pe instale pu fer nu parti prenan dan zot stratezi destrikter dan zot lager agresyon.
4. Mo ti kontan felisit tu sindika ek lasosyasyon ki finn asosye ar sa demand ki pe vini depi lontan. Sindika finn diskit lor kestyon sekirite alimanter. Nu dan enn sityasyon byin byin kritik, nu pa prodir preske nanryin. Nu inport 80% tu seki nu konsome. Nu dan enn sityasyon deger ki riske prolonze, nu kapav mank buku zafer debaz pa zis manze, mem gaz. Me manze li esansyel. Ek nu ena ase later pu prodir manze. Me nu bizin kone ki stratezi adopte. Nu bizin get gran. Nu dan enn sityasyon deger, nu dan enn irzans kot tu dimunn pu sufer parski pena manze. Nu demand prinsipal seki nu pe dimann Guvernman fors tablisman servi 30% so later pu plant manze, manze debaz kuma may, pistas, pomdeter, Finn deza plante avan. Nu finn mem deza prodir diri dan Moris, ena buku nu kapav plante. Etan done tablisman ena infrastriktir neseser, ena tu fasilite ek mem ena infrastriktir lizinn kinn ferme. Nu kapav servi sa infrastriktir la pu proses legim, fri ek transform zot, met dan bwat ek kan ena anplis ekporte. Sa nu santi enn priorite. Nu panse bizin usi servi presyon lor propriete lotel pu ki investi dan enn lindistri lapes, kot met fasilite pu nu ena nu prop bato lapes. Nu ena 2.3 milyon kilomet kare siperfisi ki pa pe servi kuma bizin. Akoz nu dan enn sityasyon lager Guvernman bizin al byin vit dan bann mezir pu akseler prosesis dekolonizasyon pu ki nu ena plis kontrol lor sekirite alimanter, suvrennte anterm manze pu asir byinet lepep ek non pa enn stratezi ekonomik ki al dan lintere enn minorite gran kapitalis ki fer IRS delix, morl ki pe betonn later ki ti kapav servi pu prodiksyon alimanter. Bizin enn politik konstriktif ek pa destriktif. Repiblik Moris bizin konstrir dan lintere lepep. Ala nu demand. Aster nu bizin fer forsing pu lorganizasyon alabaz zwenn sa muvman pu vremem kapav tini ferm pu kapav travers kriz ki riske dezintegre nu sosyete.
(Transkrir CC)
