Nuvo Danze pe Agrandi depi krim Israel-USA dan Palestinn ek andeor – Blog Zenosid 82
07.04.2026
[Versyon an Angle pibliye le 2 Avril 2026]
Detrwa zur avan ki mo konpaynon-lavi Ram Seegobin desede 28 Zanvye, mo ti drafte sa lartik la pu Blog Zenosid No.82: “Mo finn atann ziska mo konpran enn nuvo moman avan mo ekrir enn nuvo ‘blog zenosid’. E sa nuvo moman finn bulvers mwa amezir li pe derule. Li pli devastater ki mo ti redute.”
Aster plis ki de mwa plitar, kan mo pe repran kuraz avek inpe kudme depi mo kamarad, depi mo vwazin dan Ragoo Lane, ek kamarad dan LALIT, nu kamarad an komin ek konesans partu dan lemond, mo pa mem kone presizeman ki egzakteman mo ti truv devastater dan sa moman la.
Alor, zordi mo pe rediz enn ‘nuvo blog zenosid’, kuma abitye avek kudme kamarad – li enn zefor grup, mo rapel kamarad lekter, ki mo ekrir parski mo enn ekrivin mo sipoze – me dimunn ki ti abitye diskit lide avek mwa avan mo ekrir, ek lerla lir e chek sak draf blog ziska sannla, dimunn ki ti abitye la avek mwa nepli akote mwa aster.
Alor, anu repran kot nu ti ete depi 26 Desam, dan enn moman ‘pli devastater ki mo ti redute’.
Mwa, kuma ou, kapav ena lide ki sa devastasyon ki mo ti pe fer referans la ete, dan bakgrawn, spekt danze iminan Trump ek Netanyahu ki pe prepar enn lofansiv definitif pu bonbard Liran. E nu konsyan ki kantite devastater sa pu ete, ek ki kalite prepare Liran finn prepare pu riposte kont Israel ek kont baz militer US ki Leta Golf eberze pu menas Liran.
E anmemtan nu kone ki zenosid Israel pe kontiyne kont Palestinyin par so sifokasyon Gaza, asasinasyon kontini, ek lasas Palestinyin depi zot lakaz dan Wes Benk ek Zerizalem Les anmemtan ki tortir pe kontinye dan prizon Israelyin.
E li dan sa kad la, avek konesans tusala ki mo finn obzerv ipokrizi Trump ki pretann met li dan kote lalwa internasyonal avek kreasyon absird ek danzere ‘Bord Lape’ dan Lezip, dan enn seremoni makab sumisyon ek destriksyon transparan lalwa ek tradisyon internasyonal.
Ki enn lanpir ki pe kolaps ek ekrule pa pu fer! Li pu ‘detrir net’, ‘amenn deliz lamor ek destriksyon,’ ‘bonbard ou ziska return ou ansyin lepok laz Ros’. Li finn mem torpiy enn bato Iranyin pre Sri Lanka kan li ti lor sime retur apre invitasyon Lenn dan enn expozisyon militer. Ki kalite barbari ki nu pa finn truve. Israel ek USA kont Gaza ankor pe kontinye, me lor enn pli gran lesel. E mem kont Hamas, USA ek Israel pa finn ganye.
E seki Trump so swiver pa pu dir lor Lanperer so Nuvo Linz! Ki kalite zoli so seve ete. Ki kantite li pe fer byin kan li pe pran komandman lager ! Ki kalite zoli so plan lasal danse pu White House ete. E zot finn ofer li “kado”. Kado sekre. Petrol. Gro jet prive.
Tulede seki lanpir fer ek seki so swiver dir ek fer tulde vremem devastater.
E anfet Trump finn met dibut so nuvo kanpayn bonbardman par dabor organiz negosyasyon avek Liran. Sa fwa la diskisyon finn amenn bon rezilta. Zot ti dan Zenev, ek atraver lider Oman, e enn fwa ankor finn kuyonn Iranyin, enn nuvo trayizon Amerikin. USA ek so exekiter asasina, Israel, finn lerla kontinye zet bom, apartir 28 Fevriye 2026, enn mwa apre mo premye laliyn pu sa Blog la, lor Teran.
Premye zot finn asasinn Ayatollah ek so fami. Enn krim deger. Ubyin de krim deger. Li enn krim deger kan komet asasina lider enn lot peyi. Asasinn so fami ek asosye pros otur li ek sivil, enn lot krim deger. Lerla enn-er-tan u dezertan-pli tar, zot asasinn 180 dimunn dan enn lekol primer, preske tu ti-zanfan. Kan seki finn sirviv premye bonbardman, ti rasanble dan enn lasal lapriyer, USA larg enn dezyem bom. Tipti tom pu plis ki enn santenn zanfan 7-12an. Sa usi enn krim deger. Enn kalite krim deger lepli inyob. Pena mo pu sa. Kuma zot finn fer tutlong zenosid.
Me, kan met tusala ansam, sa latak USA-Israelyin enn lot peyi li pa zis enn krim deger, me dapre lalwa internasyonal li finn, depi Nuremberg, klasifye kuma “krim internasyonal siprem”. Depi sa, tu lezot krim swiv.
Kan servi desepsyon, pu kapav atak enn peyi dan negosyasyon lape, li enn krim deger; apel sa ‘krim perfidi’.
Destriksyon infrastriktir sivil li enn krim deger. USA ek Israel finn bonbard apepre 600 lekol ek 300 lopital u infrastriktir lasante. Antu 85,000 infrastriktir sivil finn andomaze u detrir. E nomb sivil ki finn asasine dan Liran li enorm.
Alor, zenosid ki USA ek Israel pe komet, ek ankor pe komet dan enn ritm pli lant, li seki nu finn ankor e ankor apel ‘pli pir krim parmi tu krim’ dapre lalwa internasyonal. E asterla samem de kriminel lager la, ki nu pa finn kapav kontrole, finn vinn enn lager agresyon, ‘krim siprem’ lalwa internasyonal.
USA, gro-lebra sa tandem la, ena, sepandan, ansam ar so konplis Israel, ki finn fer fas lopozisyon kuraze depi grup arme rezistans dan Palestinn, par Hezbollah dan Liban, par Huti u Ansar Allah dan Yemen, Rezistans Irakyin, ek aster la par Lepep ek Leta Iranyin. E usi par dimunn partu dan Lemond ki pe opoz USA ek Israel zot lager agresyon dan manifestasyon, petisyon ek aksyon tu kalite. Israel pe gayn move bate.
E USA, ki pe depann lor so baz militer ki eberze par Leta Golf, finn bizin bat retret depi tu so baz militer. Amerikin depi bann baz finn evakye dan lotel e kan dan diferan Leta Golf, ki lerla finn vinn sib aktiv kuma enn parti enn Leta ki finn vinn belizeran, finn bonbarde par Liran.
Guvernman Ramgoolam-MMM-Duval-Subron finn sinpleman met Repiblik Moris dan mem pozisyon sumisyon ek danzere Leta peyi Golf. Parmi sa sis Leta Golf ki spesyalman abzek ena Kuwait, Bahrenn, Larabi Saodit ek, seki plis koronpi dan tu Emira Arab Ini (inklir so Dubai ek Abu Dhabi) finn vinn pyon Izraelyin. Moris pa bizin rant an konpetisyon dan rol eberz baz milter US lor nu later. Moris bizin sinpleman dir USA ek UK ferm zot baz militer. Dapre lalwa internasyonal, enn peyi ki eberz baz enn lot peyi kupab lager agresyon, krim siprem, li limem egalman kupab sa krim deger la.
Antretan, armada USA finn bizin bat retret lor plis ki 800 kilomet dan Losean Indyin, zis pu evit misil Iranyin. E wi, Liran ena misil ipersonik, ki USA pankor ena.
USA ek Israel dezespere dan sa lager la kot sakenn ena so prop bi militer ki diferan, pe met zot tulede lor rebor enn presipis militer. Li enn imilyasyon pu Israel ki sipozeman pli gran ‘siper-pwisans’ dan lemond ek destriksyon so ‘militer invinsib’ ki asterlamem lor azanda.
E sa amenn fantom enn lager nikleer pli pre ankor.
Alor, Guvernman Morisyin bizin byin fer atansyon. Ramgoolam ek Glover finn montre konplisite ar sa masinn lager terib USA-Israel, mem kan li finn kumans so dezintegrasyon total, kan so lanpir pe kolaps.
Nu tu kone ki Liran, kuma li ti promet, finn sinpleman ferm detrwa Ormuz pu tu bato peyi lennmi (pu peyi ki ena baz militer me ki pa finn donn instriksyon kler pu USA pa servi zot). Sa pe pus pri petrol monte an fles, parski enn-sinkyem petrol lemond pas laba. Liran pran enn som larzan ar tu bato ki ule pas laba. Sa larzan la, ki deza an operasyon, bizin peye ar larzan Lasinn Yuan, pa an dolar Amerikin.
Kan Huti referm detrwa dan lanbusir Lamer Ruz setadir lor simin ver Kanal Suez, pu ena enn lot rezon pu pri petrol monte. Enn-tyer petrol lemond pas atraver sa detrwa la, Bab-el- Mandab. Lot lamwatye petrol lemond li Amerikin. Me pri pu fer lepep Amerikin turn kont so Guvernman parski ena telman buku dimunn ki bizin rul loto pu al travay.
Enn-tyer fertilizan lemond, pas atraver mem Detrwa Ormuz. Osi byin ki enn bon kantite helium ki neseser pu chips pu gran revolisyon AI ki Loksidan pe deza kree enn ‘bil spekilatif’. Li pa pu naryin ki, osi boner ki 1977, dan magazinn mansyel Lalit Deklas, nu ti deza, lepok Shah opuvwar dan Liran, koz lor sa de Detrwa la kuma enn pwin-etrangleman.
Dan Moris, nu pu bizin, ansam avek tu sindika, vinn avek demand stratezik pu lape ek sekirite alimanter. E enn fwa ki nu tu inn tom dakor lor la, lerla buz lor plis demand imedya, kuma ferm nu lepor ek lespas aeryin anver peyi agreser ek seki pe komet zenosid, osi byin ki demand pu kontrol pri lor tu manze, ek kontrol pli strik lor kapitalis ki stok manze ek lezot prodwi esansyel dan zot godam.
Nu pe viv moman extremman chalennjing. Nu tu bizin gard latet kalm, leker konpatisan ek buku plis refleksyon stratezik.
Nu ena pu sov numem depi nu lider kapitalis ek pro-kapitalis. Nu ena pu donn kudme sov Palestinn, Liban, Yemen, ek Liran. E lalwa internasyonal. Sov seki ti meyer, ek fini avek parti kolonyal ki ti tultan la, ek ki asterla pe expoze avek enn kriote terib. Nu finn ariv enn pwin sanzman mazer: depi ezemoni kapitalis Oksidantal ver enn lemond milti-sant. Si USA ek Israel gayn sa rwand la, nu pu dan marenwar pu enn long letan. Si Liran ek so alye-inklir lepep tu peyi lor planet-ganye, lerla nu pu ena pu travay pu rekonstrir enn nuvo form koperasyon par pran seki meyer dan lepase avek nu. E si li enn kalite dro, nu bizin gard nu stamina, e kontinye lite. Gard antet, ki zom macho fuka kapav fer planet exploze, fini sivilizasyon imin ki zot lider Loksidan zame ti sivilize, dan enn lager nikleer total.
Pu konklir, mo pe kapav kontinye, malgre mo lapert ek lurder mo leker, pa zis konsyan lapert Lepep Gaza, leres Palestinn ek aster Liban, usi, me akoz dimunn otur mwa. Enn kup, ki viv pre kot mwa, zis apre fineray Ram, finn vizit mwa avek zot ti baba. Alor, anmemtan ki ena lamor, ena usi lavi. Nu kuzinn 102an, Didi Daneshwaree, ti sonn Ram lor so portab detrwa zur apre lamor Ram pu prezant exkiz ki li pann kapav vinn lanterman, ek dimann mwa rann li enn vizit. Alor Kisna ek mwa nu finn al vizit li landime. Li ti literalman pu plis ki enn demi syek, enn figir anblematik Moris so Muvman Fam vibran.
E tu dimunn ki finn vinn lanterman, seki finn telefone, ekrir, avoy mesaz WhatsApp, vizit mwa ek konsol mwa ek konsol sakenn, so fami, kamarad ek kamarad militan pu dese Ram, zis pu fini par dir ki se sa ki finn rann li pli fasil pu mwa fer fas, ek pu nu tu. Li pa ki nu pa mank Ram. Me so kontribisyon kontinye viv. E so sans limur kan nu rapel so jok ek so replik kontinye fer nu kas gran riye.
Lindsey Collen, pu LALIT
Tradiksyon CC avek kudme AA
