Pozisyon Lider Lopozisyon ek Premye Minis lor Zenosid Israel e lor Agresyon USA-Israel
23.03.2026
Lider Lopozisyon Joe Lejongard, ki enn “kreatir konstitisyonel” – pu sit feu Sir Seewoosagur – ti fer enn deklarasyon inportan dan so diskur kot Sunni Razvi Society pu Eid. Li ti fer sa diskur inportan dan prezans lansanb lidership Leta Repiblik Moris, an-okirans, Prezidan Repiblik Gokhool, Premye Minis Ramgoolam, Lemer Port Louis Hosenally ek Spiyker Lasanble Nasyonal Aumeeruddy.
Li ti denons atak Israel lor Leta Palestinn, e finn spesifye asarnman Israel kont lepep Palestinyin dan Gaza, e li finn dir: “Pu mwa setenn zenosid.” Sa, li enn deklarasyon inportan depi Lider Lopozisyon.
Li finn donn detay definisyon “zenosid”. Li finn akiz “seki pli for inn fer dominer pa kont enn larme, me finn fer dominer kont lepep antyer”. “Malerezman, sa pe kontiyne,” li dir.
Lider Lopozisyon Lejongard kontinye par azute ki sa lane la, an 2026, Israel ansam ar Leta Zini finn atak Liran. Li dir sakenn kapav ena so lopinyon lor Guvernman Liran, me, li dir, e sa osi li inportan, “Par ki drwa enn Leta atak enn lot pei?” E li finn denons asasinasyon USA ek Israel plis ki 100 tifi lekol primer dan zot lekol. Komye dimunn, li finn dimande, pe truv lamor tulezur dan Mwayenn Oryan. “Israel finn fer preske 1,000 mor dan Liban”.
Pei ki ena puvwar militer, Lejongard kontinye, “pe permet zot fer seki zot anvi.” Zot pe vinn “seyner deger”. “Zot finn anlev Prezidan Venezuela, pran kontrol petrol”, rod “met presyon lor Prezidan Kibin pu li ale”. Lejongard apel sa “enn nuvo form de kolonyalism”. Li azute, “Li pa ditu bon pu popilasyon mondyal. Ki dan Liran, Venezuela, Kiba, nu bizin rekonet ki zot organiz eleksyon, kuma nu fer dan nu pei. Isi osi nu tann koze maltrete, antan ki ‘Stupid Island’”. Li kontinye, “Chagos pu nu, Diego li pu nu,” “Nu bizin fer nu respekte, pa seki Amerikin dir nu aksepte”.
Par kont, Premye Minis Ramgoolam
Ramgoolam, par kont, fer referans a “gran lager dan Mwayin Oryan. Setenn “trazedi inkrwayab”. Li deplor bom lor lekol ki tuy zanfan, e met lanfaz ki perpetrater la, ki Ramgoolam pa nome par zot nom, fer sa pandan Ramadan.
“Parey kuma Irak, eski sa lager la ti inportan, la la la?” Ramgoolam dimande. Remarke ki pena exakteman denonsyasyon.
Zis kan u krwar li pa pu idantifye okenn perpetrater, li anfet idantifye Israel par enn fraz kot li dir li soke ki “Pep ki finn pas dan olokarst kapav pe infliz destriksyon lor imin kumsa?” Lerla, li fer enn detur, kuma li abitye fer, sann kut la, lor linite ki ena lafors, akoz divizyon ki ena lager, tu dimunn anfet dimunn, etc. Me, lor tipti diferans, li dir, zot “kumans tuy zot kamarad.” Lerla ki li dir “Setenn zenosid ki pe arive, e bizin kondane”. Alor, li pe dir kiksoz enn zenosid – li pa 100% kler si li pe koz lor Israel, me si wi, li efektivman reysi dir “bizin kondane”.
Alor, Lider Lopozisyon, enn kreatir Konstitisyonel, divan enn parter reprezantan Leta, finn pran enn pozisyon kler. Premye Minis finn kumans kas so silans radyo, me, li pa byin kler ki li pe dir.
Li ti-a bon Lider Lopozisyon poz enn PNQ, kot li met so pozisyon kler dan so introdiksyon pu Kestyon la, kuma dan sa diskur la, me sannkut la dan Lasanble Nasyonal, e li dimann Ramgoolam met lor rikord ki li ti ule dir zur Eid, e ki so pozisyon ete, lor 2 zafer: Premye Minis Ramgoolam bizin spesifye eski Israel pe komet zenosid, dapre li? E si wi, li fini dir “bizin kondane”. Alor, eski li pu inskrir nom Repiblik Moris dan ka ki Sid Afrik finn met divan ICJ kont Israel pu zenosid? Kumsa nu pei zwenn Netherlands ek Iceland ki fek azut zot nom zur nu Lindepandans, setadir 12 Mars.
Premye Minis Ramgoolam bizin spesifye eski Leta Zini ek Israel “agreser” dan sa lager kont Liran. Lider Lopozisyon finn fer kler ki li krwar wi. E dan LALIT, nu rapel Premye Minis, ki krim “agresyon” li konsidere kuma “krim siprem” dan lalwa internasyonal, e ti site dan Prose Nuremburg, kot ti ziz krim pandan Olokarst ki Premye Minis Ramgoolam finn mansyone dan so diskur.
