Kot Agresyon USA-Israel pe Amenn nu

19.03.2026

Lemond antye – Repiblik Moris inklir – li afekte par sa lager ki enn agresyon ki Leta Zini ek Israel finn lanse kont Liran. Kan Trump ek kriminel deger Netanyahu al bonbard Liran, Trump gayn sok so lavi – limem admet – kan Liran riposte par atak baz militer Amerikin Kuwait, Bahrain, UAE, Larabi Saudit, enn apre lot. Purtan tu sef Liran ti dir se sa ki zot pu fer si zame USA-Israel atak li. Trump gayn dezyem sok so lavi kan Liran met enn blokis kont tu navir pei lennmi kot Detrwa-Dormuz. Purtan tu sef Liran ti dir zot pu fer sa, si zame USA-Israel fer enn lager agresyon. E, Leta Zini ek Israel finn fer li. La, nu 18 yem zur sa lager la. 

1. Li dabor enn lager ilegal, kot Leta Zini ek Israel pe komet “krim siprem” dan lalwa internasyonal. Zot ti deklans enn lager agresyon san rezonnman. 

2. Zot finn deklans lager ar enn dezyem krim deger, apar krim agresyon san rezon: li apel krim deger “perfidi”, savedir “lager tret”. Tu dimunn kone ki selman kan negosyasyon tase, lerla u al ver lager. U pa nek servi negosyasyon kuma enn “latrap” pu pyez u lennmi, non! Leta Zini pe vinn enn “leta bandi” kuma Israel. 

3. Trwazyem krim deger, se depi premye vole bombardman, kot Israel ti asasinn sef deta. Enn krim deger sa. U pa fer li akoz li ule dir u pe detrir fason plitar negosye lape. Anmemtan, zot asasinn enn seri sef dan laparey deta ansam dan reynion ar Ayatolah la. Sa osi enn krim deger. 

4. Katriyem, e li enn lorer, Leta Zini finn bombard enn lekol primer pu tifi, e finn tuy 170 tifi plis zot profeser ek paran. Apre premye bonbardman la, kan profeser ti pe sey reyni tifi sirvivan dan enn lasal pu evakyasyon, Leta Zini finn larg enn dezyem bom lor zot. Sa finn azir kuma enn insinerasyon, finn bril zot ziska lasann. Ondire, Leta Zini pe azir exakteman kuma Israel fer dan Gaza. 

5. Antretan, Lind ti invit enn bato Iranyin apel Dena partisip dan enn exersis militer ansam ar delegasyon buku diferan pei, inklir Leta Zini. Dernye ler Leta Zini anil so partisipasyon, e li zis al torpiy Dena kan li prekot Sri Lanka lor so sime retur. Enn lot krim deger. E li azut ankor enn krim deger lor la. Li napa al sap marin sirvivan lor sa bato deger Iranyin la. Li les zot pu nwaye. Erezman Sri Lanka finn reysi sap enn 30-enn sirvivan. 

Prezidan Trump ek kriminel-deger wannted Netanyahu finn kontiyne azut ankor krim-deger lor krim-deger.

Zot bonbard lekol ankor, lopital par duzenn, istasyon lapolis – ki enn infrastriktir ki pa militer – landrwa rezidansyel, flat, elektrisite, sit nikleer, stokaz e prodiksyon petrolye, e mem enn instalasyon pu desalinasyon, ki finn kup dilo pu enn 30-enn ti-vilaz. Sak sa atak la enn krim deger. 

Azanda USA, azanda Israel

Li 18yem zur zordi depi sa lager agresyon kumanse, le Samdi 28 Fevriye. Dan Seminar 2-zur LALIT semenn dernyer, nu ti poz nu lakestyon ki azanda sa lanpir USA ek so alye Israel? Nu finn met lager dan kontex istorik. Sa lartik baze lor papye lor sa tem la, e lor diskisyon ki ti swiv.

Premye kontex se lager dan Ikrenn ki finn dire pandan 4 long banane. Lamas dimunn dan Ikrenn finn bizin fwir par milyon. Li enn lager ki LOTAN (Leta Zini ek Lerop) finn deklanse kont Larisi, atraver so proxi, Ikrenn. Leta Zini finn servi sa lager la pu li an-mem-tan amenn larwinn ekonomik lor Lerop. Trump finn servi lager pu dornt e kontrol Lerop. Lager la osi kantonn Larisi dan lager, pu ki li pena marz demanev kan Leta Zini atak so alye, Liran. E, malgre ki Leta Zini ena enn vize stratezik pu sey anpes Larisi ek Lasinn fer enn blok kont Leta Zini, lager dan Ikrenn finn ena lefe lekontrer: Larisi ek Lasinn finn raprose, amizir BRICS pe sey pran nesans.

Dezyem kontex pu lager USA ek Israel kont Liran, e li liye pli direkteman ankor, ena zenosid Israel pe fer kont Palestinn pandan plis ki 2 an, avek konplisite total USA, limem ek Loksidan. Zenosid finn, e pe kontiyne, kont totalite Palestinn, setadir Gaza ek Wes-bennk inklir Zerisalem Es. 

Vize Israel

Israel viz pu dominn Mwayin Oryan, setadir pli presizeman “Lazi Delwes”. Israel viz ezemoni dan so rezyon. Israel viz seki li apel “Gran Israel”, an Angle “Greater Israel”, ki inklir tu teritwar depi Larivyer Nil zis Larivyer Efret, akoz bondye finn sanse donn zot kontra later, sipaki kan. Sa bi Israel, kan li fer lager agresyon kont Liran.

Israel, atraver so lobi dan Leta Zini e dan pei Lerop, li finn reysi dikte, enn dan lot, so prop bi lor totalite Loksidan – e dan zenosid kont Palestinn, e aster dan lager kont Liran, e osi kont Liban.

Trwazyem kontex, se Leta Zini dan tu kalite difikilte ekonomik inimazinab, antan ki lanpir. Li ena $39 trilyon det. Li imans. Seki pe prodir dan Leta Zini li pa sifi pu ranburs pa zis det la, me lintere lor sa det la. Leta Zini pu bizin kumans pran prete pu re-peyman so lintere. Sa, li sime ver bankrut, sa. Tusala li rezilta de-indistrializasyon lekonomi Leta Zini. Li finn vinn enn lekonomi “finansye” (labank, lasirans, stok exchennj, li pa “prodir” nanyin) e “rantye” (baze lor lavant later, e lavant drwa lor sofwer, lavant data, lavant prodwi sirveyans ek espyonaz, etc.)

Su presyon sa kriz ekonomik, Trump so muv militer, li finn e pe sey fors Lerop aste zarm ar Leta Zini pu sey relans so prodiksyon ekonomik an-zeneral. Trump pe fors Lerop met kapital dan enn masinnri deger – pu Ikrenn, e osi dan Lwes Azi. 

Alor, tusala pu dir Leta Zini lor bor fayit. E kuma nu tu kone, depi 50-an, lemond antye finn fye lor Dolar USA pu lesanz deviz, e pu stokaz deviz. Leta Zini finn abiz sa sistem la, finn inprim so Dolar US, depans li, ziska li obor fayit. Asterla, Dolar US li-mem li an-difikilte. Ena tarif dabor, e lerla sa debulman militarist pu sey sap li. Me, li pa pe marse.

Lepep Kont sa Lager la

Ena imans manifestasyon dan tu lavil dan Leta Zini e dan Loksidan partu kont sa lager la. Parey kuma lepep ti opoz, e tuzur opoz zenosid USA-Israel kont Palestinn, lepep osi opoz sa lager la. Tu sondaz montre sa. 

Dan sa moman inpopilarite Trump ek tu Guvernman dan Loksidan, pe gayn devwalman, vag apre vag, seki dimunn apel “Epstein Fayl”. Seki tu dimunn pe truve se dan leker reyn USA lor lemond ena enn rezo kriminel, ki anmemtan finansye, anmemtan politik, e ki rule otur blakmel, enn kote 5-su ki baze lor abi sexyel abominab kont zenn tifi ek garson ek zenn fam, lot kote sa-mem 5-su la. Ala-sirfas skandal ena barbari sexyel, anba ena krim politik, krim striktirel dan sistem kapitalist. Li enn serk dirizan anmemtan dekadan, kriminel, e ki azir avek inpinite total. Ena Prezidan Trump, kote Repiblik, inplike ladan, ansam ar so fam. Ena Prezidan Clinton, kote Demokrat, inplike ladan, li osi. Ena Ehud Barak, ansyin Premye Minis e sef servis sekre Israel, ki plin ladan. Ena Ghislaine Maxwell, ki so papa ti enn sef servis sekre Israel, ladan. Ena sef pli gran labank dan lemond, kuma Goldman Sachs ladan. Ena enn ansyin Minis Finans Britanik e Anbasader UK Mendelsohn ladan. Sef pli gran liniversite dan lemond kuma Harvard ek MIT, san-kont Prins ek lezot rwayote puri, depi partu kote, lot lot. Li enn rezo ki fer per. 

Leta Zini so repitasyon finn degrade dan enn lot fason ankor. Kan li finn kumans met sanksyon kont tu kalite pei, sanksyon ilegal byin suvan – kont Liran, kont Larisi, kont Kiba, kont Venezuela – li finn al pli lwin. Li finn kumans kokin fon suvrin diferan pei ki su sanksyon. Li kareman kokin kas enn pei ki truve dan so labank, akoz Dolar ki servi pu deviz internasyonal. Zot finn kokin tu lor Venezuela. Zot finn kokin fon suvrin Larisi, Lirak, Liran, ale-mem. 

E, ar tarif barbar, Leta Zini finn al gat so prop repitasyon enn kran anplis. 

Ki li sanksyon, ki li tarif, lamas dimunn dan pei sib, li bizin peye. Li kuma enn tax regresif ki Leta Zini pe inpoze. 

Me, li pa sifi pu Leta Zini inpoz sanksyon ek tarif lor lezot pei, kot li atak prodiksyon. Sa levye ekonomik pa ase. Li finn sey, e reysi a enn sertin mezir, desim Nasyon Zini. Nasyon Zini ki enn instans milti-lateral kot tu pei ena drwa egal. Leta Zini ek Israel pe sey demantel li. Zot espes “Bord Lape” avek Trump alatet pe mem ena tupe sey ranplas Konsey Sekirite Nasyon Zini. Leta Zini finn azir kuma enn buldozer ki finn bez fu, kan li pe rod kraz lalwa internasyonal pu li kontiyn inpoz so “full spectrum domination”, “dominasyon 360 degre”. 

Alor, zordi Leta Zini ek Israel ena rekur kareman ar levye militer pu sey inpoz sa dominasyon la. E, zot pe fer li kan zot lanpir pe grene, akoz li lor rebor bankrut. 

Rapel, e sa nu byin kone akoz Diego Garcia: USA ena 800 baz militer andeor so teritwar. Sa rezo baz la, reprezant so lafors militer, e li reprezant seki pe bankrut li ekonomikman akoz li pena lemwayin gard tu sa baz la. Dayer Liran fini atak, e mem detrir, buku baz dan pei Golf akoz Leta Zini pe servi zot pu atak Liran: Bahrain, Kuwait, Qatar, USA, osi byin ki dan Zordani ek Lirak. 

Lager kont Liran

Leta Zini pe atak Liran depi 1979 vini-mem. An 1979, lepep Liran finn fer enn sulevman kont enn rezim ki Leta Zini ti met dibut an 1953, atraver enn ku-deta kont Guvernman Mosadeq ki ti anplas, e ki ti eli. Leta Zini ek UK ti ule kontrol petrol Liran. E zot finn perdi sa kontrol lor petrol an 1979. 

Lane dernye, pandan negosyasyon ar Liran, Israel ek Leta Zini finn atak Liran enn premye fwa. Sa ti deklans lager 12 zur. Leta Zini ti kraz 3 santral nikleer sivil, pa militer. Trump ti dir Liran so prodiksyon nikleer ti “oblitere”, setadir “aneanti”. Me, lerla, kan Liran reysi resezi apre sa premye “perfidi” la, li finn infliz telman sok lor Israel so instalasyon militer, ki Israel ek Leta Zini finn al plede ar Liran pu enn sese-lefe. Liran finn dakor.

An Fevriye, ena 2yem negosyasyon kumanse. Ankor enn fwa, Liran ti anplin negosyasyon avek sa 2 mamluk la, Witkoff ek Jared Kushner. Diskisyon ti pe prosede pozitivman sanse. 1) Liran fode pa devlop bom nikleer – me sa evidan parski Trump dir fini “aneanti”. 2) Fode pa Liran ena misil. Sa li ridikil. 3) Fode sanz rezim, met enn ki Trump kontan. Sa osi li depas ridikil. Tuzur Israel pe dikte ki bi lager, e Leta Zini sanse swiv. Zot tom enn lakor. Liran dir li pa pu ena zarm nikleer zame, e li pa pu ena okenn iranyom pu fer nikleer. Kan Ali Khamenei ek so lekip konseye pe zwenn dan so biro pu pran desizyon, Leta Zini tuy li ek so lekip konseye ek so fami. Krim deger.

Kan USA-Israel lans zot lager agresyon, dan lespas 2-ertan, Liran riposte. E li azir dan enn fason sible. Sible net. Li sible 2 kalite sit – kont baz Amerikin dan pei Golf, baz ki laba pu anserkle Liran e ki finn atak Liran, e li sible sit militer dan Israel. Li byin presi, Liran. Li viz pei ki eberz baz USA ki atak li. So mesaz: Si u eberz enn baz Amerikin lor u teritwar, u pe atir lamerdman. Evidaman. Li lozik. Sa li enn leson pu nu dan Repiblik Moris. 

Liran viz baz USA lor Bahrain. La, li atak so sistem radar. Sa sistem la, li ti azir kuma lizye ek zorey sistem defans USA ek Israel pu Mwayin Oryan net. Ti azir kuma lizye-zorey. Nepli. Li fini sible, met KO. 

Liran viz baz USA lor Qatar. Sa baz la li lizye-zorey Centcom USA, setadir so “komann santral” pu so militer dan sa rezyon la. Li osi, KO.

Remarke ki ena osi sertin atak kont pei Golf ki fer par Israel, avek bi pu sem lazizani, ubyin pu fors Trump res dan lager, kan Trump pe deza rod sime bat retret. An Angle, apel sa enn atak “false flag”. Israel pretann ki atak la fer su pavyon Liran, kan anfet li su pavyon Israel. Ena azan Mossad ki finn arete dan 2 plas diferan ki ti pe organiz sa. 

Zordi li finn vinn kler ki Israel ena zarm nikleer. Sa li enn zafer ki Leta Zini tultan finn pretann ki li pa kone. Ena enn lalwa Amerikin ki rann tu led militer ar Israel totalman ilegal si zame li ena bom nikleer. Asterla, tu sa mansonz la expoze. 

Lot zafer ki expoze, tu sa dirizan monarsik ki reyne dan pei Arab, ki ti pey Leta Zini enn ta larzan pu gard baz lor so later lor fos promes pu defann li. Baz Amerikin pa pe futi defann tu sa pei Golf kot zot ete la, e sa pa ti zot bi. Zot la pu defann Israel, pu defann Lamerik. Asterla, tu sa Sheik ki reyne kuma lerwa finn expoze kuma payason Leta Zini ek Israel. Alor, zot peye, me pena defans. Okontrer, zot atir lager lor zot-mem, akoz prezans baz ki pe agres enn lot pei, an-okirans Liran. 

Lezot alye payason kuma Sid Kore ek Zapon, zot osi, zot truve ki defans ki Leta Zini finn inpoz lor zot, kan ena problem dan Mwayin Oryan, Leta Zini zis pran sa zarm la, amenn Mwayin Oryan, pu defann li ek so koloni Israel! Ankor payason. 

Asterla, kan Liran fer seki li ti anonse li pu oblize fer, li bar tu navir avek prodwi petrolye pu so lennmi depi Detrwa-Dormuz, Trump dir li pu eskort petrolye, li. Me, so sef militer dir li, pa posib. Lerla Trump al fer bikmanga partu-partu, e tu pei refiz ale – so Lalmayn, so UK, so Lafrans, so Zapon, so Ostrali, so Kanada, etc, etc. Alor, pri petrol pe monte fles, e pu kontiyn monte fles. Lasinn gayn prodwi petrolye akoz pu li gayn drwa travers Detrwa-Dormuz. Dayer li gayn buku depi Larisi. Ramgoolam ti krwar fasil, li pu gayn prodwi petrolye pu Moris depi Lind. Me, Modi finn al rann so lekor ridikil, anbras Netanyahu lavey sa agresyon ilegal la, alor pa sir Lind pu gayn buku faver depi ni Liran ni Larisi. Dayer, Lind pu mank prodwi petrolye, li. Moris, li tro kurbe divan USA, li tro rod “lamone disan” ar Britanik ek Amerikin, li per pu al get Larisi pu petrol. Zis depite Nouveaux Democrates, Lider Nouveaux Democrates, Khushal Lobine ki finn fer sa propozisyon evidan la.

Lager kumans elarzi

Israel finn kumans pilonn Liban asterla, kumans fer kuma li fer dan Gaza. Kifer? Akoz natirelman Hezbollah finn lev ar Israel kumans avoy misil Israel. 

E antretan, Israel ek Leta Zini persiste ar zot zenosid dan Gaza, e ar zot anexasyon sistematik Wes-bennk. 

Zordi ena buku defi divan nu. Nu bizin kontrol sa 2 leta bandi la, USA ek Israel. “Nu”, se lepep lemond, atraver nu prop Guvernman, e sirtu si Guvernman pa azir, atraver nu prop klas travayer onivo mondyal. Travayer Genoa fini montre nu, sirtu doker laba. Zot refiz fer manitansyon zarm pu Israel. 

Alor, nu bizin sutenir revandikasyon Liran ki finn donn notis USA pu kit Mwayin Oryan. Li bizin lev pake, ale. ferm tu so baz, ale. Baz militer USA pena so plas ni Mwayin Oryan, ni isi Repiblik Moris lor nu later, Diego. 

Remarke, kontrol lor kan lager arete li nepli dan lame USA ek Israel. Apre, 2-ertan Liran ti pran sa kontrol la, kan li met lizye-zorey baz militer KO dan tu sa pei Golf la.

Prezidan Liran Masoud Pezeshkian finn met 3 kondisyon pu li, Liran, aret lager.

1. Respekte drwa pu Liran existe.

2. Pey domaz pu agresyon ilegal.

3. Kominote internasyonal bizin furni langazman ki nepli pu ena agresyon kont Liran par sa 2 leta bandi la. 

Witkoff sipoze pe al Israel sa semenn la. Sirman Israel pu dir li ki “so” plan. 

Li pe vinn deplizanpli evidan ki “bi Israel” li pa mem zafer ki “bi USA”. 

Trump su buku presyon:

- So lekonomi pe kontiyne plonze.

- Kan pri petrol monte, lamas dimunn ki sutenir Trump e ki al travay dan vann ek 4x4 lev ar li. 

- Lepep Amerikin pa pe dakor ek sa lager.

- So port-avyon Gerald Ford pe gayn problem makalpayn, lerla dife abor. Petet ena sabotaz par solda araze.

- Sef anti-teroris, enn nomini Trump mem, finn demisyone akoz lager.

Alor, Trump pe rod enn sime sorti. Li ule kapav dir, “Mo finn gayne, pli gran viktwar dan listwar limanite,” lerla li sorti dan lager, akoz li pe gayn bate. Pu fer sa, Trump pe sey ris alye ar li. Pa pe futi. Lerla li pe sey met biz-biz ant Larisi ek Lasinn par negosye diyl separe ar zot lor lezot zafer. Pa kone sipa li pu reysi.

Si Trump sorti, posib lerla ki kriminel deger Netanyahu ek so Guvernman pu ena rekur ar so bom nikleer. Sa enn danze iltim. 

Alor, dan sak pei nu ena nu devwar pu aret tu sa danze la, e pu kal lelan sa Leta Zini ek Israel, tulde dan diferan fason dan sa moman danzere kot zot dan leral. 

Isi, nu ena pu fors nu Guvernman azir par prinsip, e fer apel pu ferm baz Diego. Nu ena pu fer Guvernman fors tablisman plant manze lor, dizon, enn-tyer so later, pu inpe sekirite alimanter. Nu ena pu organiz elektrisite par soley ek divan avek enn vites extra-ordiner pu diminye nu depandans lor lenerzi inporte.

Kumsa, nu ena pu anmemtan fors Guvernman pran pozisyon kont sa 2 pei bandi la, USA ek Israel.

Alor, nu ena pu dres zot, garde!

[Sa lartik baze lor papye par Ragini Kistnasamy dan Seminar LALIT, e lor diskisyon ki ti swiv ek enn-de epdeyt.] Transkrir 18 Mars 2026

Redite 19 Mars; Port-Avyon Keb\nnedy ranplase par Gerald Ford