Ki li ule dir kan enn pei Eberz enn Baz militer lor so Teritwar?
16.03.2026
Lager Leta Zini kont Liran fer nu tu realize ki exakteman li sinifye kan enn pei, kuma Repiblik Moris par exanp, pe anfet kupab fer kan li eberz enn baz militer Amerikin lor so teritwar. Si pei ki proprieter baz militer la, li agreser ilegal, kuma Lamerik ete, si pei proprieter kupab krim siprem dan lalwa internasyonal, setadir "agresyon", lerla li ule dir ki pei ki eberz baz la, li osi, li enn agreser. Li osi li kupab krim siprem.
Zordi pei kuma UAE, avek so Dubai ek so Abu Dhabi, Bahrain, Kuwait, Oman, Larabi Seodit ek Qatar, zot tu eberz baz militer. Depi tu sa baz la, Leta Zini Lamerik finn fer agresyon kont Liran. Lamerik finn fer krim siprem, deklans enn lager san rezon.
Alor, Repiblik Moris, dirize par ant-ot Premye Minis Ramgoolam, VPM Bérenger ek Atorne Jeneral Glover, bizin realiz danze sa Trete pu eberz enn tel baz militer lor nu teritwar, Diego Garcia. Aster, lalwa internasyonal fer li kler ki Chagos, inklir Diego Garcia, li form parti Repiblik Moris. Zot paret pa konsyan ki zot-mem zot pe pran responsabilite krim deger, krim kont limanite, par fer sa kalite kontra la lor nom pei. Pa zis sa, zot pe pran responsabilite sa masak ki Leta Zini pe inflize lor lepep Liran. Pa zis sa, zot pe expoz lepep Moris a enn retalyasyon akoz nu pe propoze pu vinn perpetrater tu sa krim la, inklir "krim siprem". ("the supreme international crime".)
LALIT fer enn apel a Guvernman pu pran enn pozisyon ferm kont sa agresyon Leta Zini. Kumsa omwin dan sa moman kan pankor siyn enn Trete vander Diego Garcia, omwin nu ena enn posizyon antan ki Leta. Ler inn vini pu aret tini labuzi ruz, atann lamone disan (blood money) Rs10 milyar. Fek selebre Lindepandans 58 an. Bizin azir lor prinsip, kuma enn pei suvrin.
