Trump ek Netanyahu Deklar Lager Ilegal kont Liran – LALIT denonse
28.02.2026
Prezidan USA Donald Trump finn deklar lager kont Liran. So zandarm Israel ki li finn large pu avoy premye misil kont Liran. Sa lager la ilegal. Agresyon li enn krim deger, premye krim deger. E sa agresyon kont Liran li agresyon kri. Sa lager pena okenn rezon, ni pretex. Li tu sinpleman enn lanpir ki pe grene, degringole, fer dominer. Ti-mama Trump dir so bi lager se pu anpes Liran ena akse a matyer nikleer, sipa zarm nikleer. Ti-mama li dir li fini demoli Liran so prodiksyon nikleer. Ti-mama li dir fode pa Liran ena misil pu defann li kont Israel. Ti-mama li dir Liran pena drwa ena alye dan rezyon. Ti-mama li dir Liran furni terorist, kan li anfet enn pei ki finn lite kont pli gran terorist, kuma Al Qaeda ek ISIS. Ti-mama, Trump dir se li, pa lepep Liran, ki bizin deside ki rezim ena dan Liran. Me, li kler ki li pa finn gayn okenn desizyon Kongre Leta Zini pu fer lager. Li kler ki pa finn gayn okenn rezolisyon Nasyon Zini pu li deklar lager. Li kler dan tu sondaz 2/3 Amerikin kont enn tel lager kont Liran. Sel verite: Lobi pro-Israel li finans 2/3 manb Kongre, e Israel ule sa lager la. Bi iltim Israel se pu morsele Liran, kuma li finn e pe morsele Palestinn, Liban, Sudan, ek Lasiri.
Anplis, ankor enn fwa, Leta Zini kupab enn krim deger adisyonel, seki apel “perfidi”, setadir instal enn latrap atraver zafer kuma negosyasyon pu lerla fer tret, atake.
Trump finn deza fer tret anver so prop elektora: dan so kanpayn elektoral li ti promet “lafin lager sanfin” (the end to forever wars). Zordi li finn deklans so “Firi epik”, enn nom osi imoral ek ridikil ki “shock and awe” (sok ek lorer) kont Irak.
Fas a tu sa imoralite, tu sa ilegalite, Liran, par kont, pe azir dapre lalwa internasyonal self-defenns. Li finn dir li pu defann li, e li pu sible plas kot ena baz Amerikin, navir Amerikin, osi byin ki kont-atake kont Israel.
USA ek Israel finn atak sib dan 6 lavil dan Liran.
Liran finn reponn ar explozyon dan pei kot ena baz USA, setadir Kuwait, Bahrain, UAE, Qatar, Larabi Saudit.
LALIT dir Guvernman Moris bizin pran pozisyon kont sa agresyon par Leta Zini ek Israel kont Liran, e bizin met angard kont servi teritwar Repiblik Moris dan sa agresyon ilegal la.
LALIT
