LALIT finn adres enn let direkter MBC pu ki ena enn ful Biltin Linformasyon an Kreol lor MBC

09.02.2026

[Nu pe pibliye Konteni let la.]

M. Alain Gordon-Gentil

Direkter Zeneral MBC

Royal Rd

Moka

5 Fevriye 2026

Ser Alain Gordon-Gentil,

Nu pe anvoy u kopi kominike LALIT finn tire pu zwenn nu lavwa  ansam ar Les Verts Fraternels pu dimann enn ful Biltin Linformasyon Kreol lor MBCTV.

Kuma u kone LALIT depi nu nesans pe travay e milite pu ki lang Kreol pran plas ki bizin antan ki premye lang nasyonal, dan tu linstitisyon Leta. U sirman pu rapel kan feu Ram Seegobin ek Lindsey Collen lor nom LALIT ti ekrir u le 30 Desam 2024 kan u ti fek vinn Direkter-Zeneral MBC, nu ti suliyn kontribisyon politik LALIT dan lalit pu rekonet “ linportans kreol antan ki langaz maternel dan kognisyon ek pu presizyon reflexion”. Parski langaz li avantu nu zuti, antan ki imin, nu servi pu reflesi, pu konpran lemond andan ek andeor nu.

Anfet an Zanvye, Mauritius National Human Rights Commission, ti invit 2 manb LALIT, Lindsey Collen ek mo-mem pu enn sesyon travay lor lyin ant drwa imin ek langaz Kreol kot nu finn partaz lide e diskit, antrot, lor kot langaz imin sorti, ki ete langaz kreol, lor drwa imin e liberte anprann dan nu  lang maternel. Nu dispoze ena enn rankont avek u pu koz lor sa kalite size otur lang Kreol.

Salitasyon kordyal,

Alain Ah Vee

pu LALIT