LALIT azut so lavwa ansam ar Les Verts Fraternels pu ki ena enn ful linfo an Kreol lor MBCTV

06.02.2026

KOMINIKE LALIT 

Kifer MBC-TV ankor difiz so Biltin linformasyon prinsipal pandan peak time an Franse? Kifer lor MBC pena enn Biltin Linformasyon Kreol ki kuver evennman onivo nasyonal ek internasyonal an detay parey kuma seki an Franse? Kimanyer langaz Franse ankor tuzur dominn linformasyon prinsipal lor televizyon nasyonal MBC?

Lang Kreol li premye lang nasyonal Moris, samem lang ki plis ki 90% popilasyon plis servi e konpran avek plis presizyon. Ki li dan vilaz, lor lakot, dan lavil, ki li dan Rodrig, Agalega, parmi Chagosyin, nu tu koz e konpran Kreol. Pa kapav kontiyn ena linformasyon an Kreol lor MBC-TV ki pli kurt e ki mwin elabore, ki seki ofer an Franse, sirtu dan ler ena plis dimunn lakaz. Sa li inakseptab e anormal.

Kan ekut Biltin linformasyon an Kreol lor MB-CTV li sonn kuma enn fay tradiksyon, kuma enn rezime bakle journal Franse e ki pa respekte lozik intern langaz Kreol. Nu panse ki inn ler pu Televizyon nasyonal ofer enn Biltin linformasyon konple, plis detaye dan langaz lepep Repiblik Moris.   

Dan moman kot nuvo ladireksyon MBC pe promuvwar liberte dexpresyon lor so diferan senn zot ti bizin donn plis lespas nu lang nasyonal, Kreol, e tret li avek plis respe ek dinite.  Kan nu pe al selebre nu 58an lindepandans inn ler pu donn lang Kreol plas santral ki li bizin okipe dan tu linstitisyon Leta e lezot lespas ofisyel. Kumsa ki nu pu buz divan e kontiyn prosesis dekolonizasyon bann linstitisyon Leta. 

Cindy Clélie

pu LALIT

5 Fevriye 2026