Jean Claude Bibi rann omaz a kamarad Ram Seegobin

03.02.2026

Transkripsyon omaz prononse par Jean Claude Bibi avan kremasyon kamarad Ram Seegobin Zedi 29 Zanvye

Bonzur tu dimunn.

Ram, nu tu konn li, avan tu kuma enn militan politik, enn Morisyin.

Gramatin mo pe get inpe bann komanter lor so lamor. E, buku dir, avek rezon, “Li ti enn gran Morisyin”.

Li extreman inportan kan nu rann omaz a Ram. Nu bizin dir, avantu, li pa ti Morisyin selman. Avantu, li ti enn imen lor enn planet. E, li ti interes li a tu dimunn lor sa planet la. Li ti enn internasyonalist. Pa zis problem, pa zis explwatasyon, pa zis lamizer a Moris, remarke ki ti interes li. Li ti interese ar tu lamizer, tu explwatasyon, tu linzistis atraver lemond. Li ti interese a Listwar sa lemond la. A Listwar tu bann lalit, dan Lafrik, dan Lerop, dan Lazi, partu. Ki lalit bann zenes, ki lalit bann fam, tu, li ti amenn so kontribisyon.

Pu li fer sa, mo’nn aprann, li ti met linportans lor filozofi, lor ideolozi, lor analiz. Sa ki explik so lonete. Li sey konpran, li analize, li etidye apre li devlop enn program pu pran aksyon, pu lite. Sesa ki li finn fer tut long so lavi. Li pa’nn kuyonn personn. Li pa’nn promet personn. Kuma u tuzur kone, li’nn explike se par limem, travayer par limem pu emansipe. Zame li ti panse pu ena sover, pu ena lider. Dan tut listwar, u pu truve. Se revolt esklav ki amenn liberte. Se zame lider. Seki lepep fer, kapav fer, li’nn fer. Li’nn fer tu keseswa atraver LPT. Atraver seki li’nn ekrir. Atraver reynon, sindika. Kree komye sindika atraver Moris. Se zot respe. Sesa ki Ram ete. 

Kan nu koz Ram, nu bizin koz Parti LALIT. Ram pa ti fer sa parski li ti Ram. Li ti konpran bizin enn parti, ankor neseser pu bann anplwaye, pu bann travayer, pu bann ki sufer linzistis. Sa li pu tuzur daktyalite pa zis a Moris me tultan partu.

Zot konn Ram otan ki mwa … [emosyone] Salam Ram!