Rankont LALIT ek abitan lakaz lamyant avek Jinyor Minis Joanna Bérenger lor ranplasman lakaz lamyant

14.01.2026

Mardi, LALIT finn ena enn rankont avek Jinyor Minis Lanvironnman, Joanna Bérenger antan ki prezidan komite interministeryel lor lakaz lamyant. Dan rankont la, ti ena manb LALIT Rajni Lallah, Rada Kistnasamy ek abitan lakaz lamyant Danny Le Merle, Guy Silvio, Damiantee Beesoonuth.

Rajni Lallah portparol LALIT finn fer enn rezime listorik lalit pu ranplas lakaz lamyant depi 2002 vini mem ziska zordi. Pandan sa peryod la, linn dir ki finn ena diferan rapor lor nesesite  pu pa expoz lasante dimunn ki viv dan lakaz lamyant  dan diferan site EDC dan pei. Sa bann lakaz ki ti konstrir dan lane 60, reprezant enn menas a lasante pu abitan. Rajni Lallah finn sit Rapor Dr Sibartie (2006), Rapor Truth and Justice Commission (2011), Rapor Ombudsperson for Children (2018), tusa rapor la koz etablir ki leta bizin ranplas lakaz lamyant pu na pa expoz abitan danze potansyelman mortel pu lasante ki lamyant reprezante.

Kote politik Rajni finn explike kimanyer apartir 2015, guvernman ek Leta finn pran langazman pu ranplas lakaz lamyant. Me tu sa bann plan-la pa finn abuti par mank volonte politik. Li finn explik ki finn plizyer aksyon, inklir de gran manifestasyon an 2018, organize par komite konzwin Abitan lakaz lamyant – LALIT ki finn amenn sa langazman Leta pu ranplas lakaz lamyant. Lokdawn Kovid 2020 ek 2021 finn anplis vedir ki abitan finn expoze a danze lasante 24er lor 24 akoz zot finn bizin “Res Lakaz” dan lakaz lamyant. An 2022, guvernman finn alafin alwe Rs 800 milyon pu ranplasman lakaz lamyant, Sa ti reprezant enn viktwar apre kanpayn  mobilizasyon komite konzwin LALIT-Abitan ti amene. Me ziska zordi okenn lakaz lamyant pankor ranplase. 

Rajni Lallah finn  trwa propozisyon irzan pu komite Interministeryel konsidere;

1. Ki, Guvernman azir vit e tret lakaz lamyant kuma enn problem lasante piblik. Ki  Lotorite met enn notis ofisyel pu ranplas lakaz lamyant pu rezon “lasante piblik”. E anmemtan met enn kalandriye landrwa par landrwa pu demolisyon ek ranplasman lakaz lamyant ki li rann piblik e ki kominike a abitan atraver biro CAB dan tu landrwa kot ena lakaz lamyant.

2.  Ki guvernman na pa pas par prosedir afidavit kot bizin rod tu zeritye sak lakaz. Sa li  rann ranplasman lakaz kan ena lakaz zeritye inposib. Dayer seksyon 8 Konstitisyon deza fer provizyon pu sa kalite prosedir-la kan lasante piblik menase. Se finalman dimunn ki finn res dan lakaz lamyant lor letan ki plis a-risk. Alor se vizavi zot ki Leta ena plis responsabilite.

3. Ki Guvernman idantifye abitan lakaz lamyant ki pli vilnerab, setadir seki malad, seki plis aze ek zanfan, e al delavan ranplas zot lakaz enn fwa.

Jinyor Minis Joanna Bérenger finn pran not nu bann propozisyon ki li pu transmet a komite interministeryel ki pe zwenn sa Vandredi la.