MISSIE MOUSTASS ANKOR PE TRENE DEOR

10.12.2025

ENN GUVERNMAN ELI LOR BAZ KANPAYN ANONIM MANIPILE

LALIT ti dir, alepok, ki enn Guvernman ki pu emerze apre enn eleksyon kot vinker la finn fye, pu so viktwar, lor rol enn “anonim” apel “Misye Moustass”, li pu enn Guvernman ki reprezant enn danze pu sosyete Moris. E li finn vinn vre. Zame enn Guvernman finn vinn inpopiler enn sel ku, kumsa. Zame.

Tanto, mem zur eleksyon zeneral, setadir le 9 Novam, lavey kawnting, LALIT ti predir lor so websayt ki pu ena “enn guvernman byin, byin danzere – apre enn tel kanpayn ki zot finn amene ... kot finn fye, anplas lor enn program, lor enn seri odyo anonim ...e ... finn fer li par sey redwir lamas dimunn an ‘zombi’ ki pu ekut enn anonim dan enn band-desine, enn anonim ki ena baking pa-kone-ki-pwisans”. 

E ziska ler pankor ena okenn muv Guvernman pu kone kisannla deryer sa interferans anti-demoratik dan prosesis elektoral. 

Guvernman ti oredi amelyor Komisyon Danket ki Jugnauth ti met dibut. O-kontrer, Ramgoolam finn al revok Commission of Enquiries Act, an antye, e kumsa li finn tuy lanket ki Jugnauth ti met dibut.

Apre enn an opuvwar, Ramgoolam, Bérenger, Duval, Subron klerman montre ki zot ule lamas dimunn konpletman bliye rol destrikter demokrasi enn “Missie Moustass”. 

E, dimunn ki finn konplote pu fer sa interferans dan eleksyon zeneral, zot tu ankor lamem. 

Kimanyer sa tigit demokrasi nu ena, dan sistem kapitalist, pu sirviv enn tel atak lor integrite kanpayn elektoral? 

Antuka, seki kupab fer sa travay anonim danzere la, zot kupab kraz tu prinsip demokratik. E zordi zot tuzur ena proteksyon rezim aktyel, setadir proteksyon sa kat lider parti opuvwar. 

Mem kan konteni grav finn expoze par Missie Moustass, e konteni paret klerman vre, kuma vyolans polisyer extrem, evidaman li pa mem itil dan Lakur, parski pena temwin. Missie Moustass enn-de anonim, sa. Ziz, avek rezon, fini transe. Tu so “revelasyon”, zot pa evidenns. Zot zis ena valer enn “rimer”. Sa vedir enn koze danzere. 

Bilan sa Guvernman la, apre enn banane, li pa nanyin apar “ranplas MSM”, enn move Guvernman, avek nuvo Lalyans, ki li, li move, li osi. Sa ti bi prinsipal Ramgoolam, Bérenger, Duval, Subron: “BLD”. E zot finn mintenir li, ziska ler. 

Viktwar nuvo Guvernman, li akoz MSM ti enn move Guvernman. 

Me lanpler sa viktwar nuvo Guvernman, li gras-a Missie Moustass.