Malgre ki Lanpir US pe grene li ankor ase For pu inpoz lor Nasyon Zini – Zenosid Blog 80
01.12.2025
[Version Angle pibliye le 20.11.25]
Rezolisyon ki USA finn propoze dan Konsey Sekirite Nasyon Zini 2803 lor Gaza, 17 Novam dan New York kapav deklar kuma enn pli gran krim dan listwar. Sa vot la kapav fini par ena konsekans enorm. Li pena lintansyon aret lokipasyon ilegal Israel lor Palestinn. Okontrer li enn tantativ dezespere, dernye faz pu kontinye. Li pa paret pu reysi, me li paret pu infliz plis sufrans lor Palestinyin. E usi lor Pep dan Liban, Lasiri, ek lezot peyi vwazin ki Israel bonbarde regilyerman. Rezolisyon la viz pu met dibut enn “Bord Lape” avek lintansyon permet lokipasyon e zenosid kontinye. Li pe kree enn “lafors stabilizan” pu dezarm konbatan rezistans olye dezarm perpetrater zenosid. Sa reflet enn Lemond anbalao.
E, vot dan Konsey Sekirite montre nu, ankor enn fwa, “banalite lemal”, kuma Hannah Arendt dekrir lor Alman inplike dan komet zenosid kont Pep Zwif dan bann lane 1940. Zis USA ek Leta Israel ki kapav sa kantite sadik pu vinn delavan avek enn plan usi sadik, ki uvertman vyol lalwa internasyonal. E lerla 12 peyi dan Konsey Sekirite vot anfaver, pa parski zot sadik me parski zot kapon. Zot pa kapav reflesi u azir dan enn fason indepandan depi lezot Leta pwisan. E zot usi form parti sa birokrasi ki pa buze. Apre ki de peyi, Lasinn e Larisi, finn gayn sertin konsesyon vag, me vital dan draftaz Rezolisyon la, omwin zot finn ena desans pu abstenir. Zot finn realiz gravite konsekans sa vot la, me zot pa finn anpes li. Amandman zot finn amene omwin ronz striktir baz kolonialism Oksidantal. E seki etranz dan sa “rezolisyon” la, inklir lefet li vag, ki rann li preske san sinifikasyon permet pa donn baking par abstansyon.
Rezolisyon zisteman reflet realite lemond zordi: Trump pe depas so limit inperyalis e li inprevizib, anmemtan li anture ar neo-konservater Zionis ki “kontrol” li. Mem si li pli pwisan, Lanpir la pe deza grene. USA dan enn tirbilans intern ar; larme ki pe invair diferan lavil, gran mazorite lider politik ki finn demaske pu lefet ki oligark pro-Amerikano-Israelyin finn pey zot. US so politik etranzer vasiye kuma mood enn tiran ki amerde. Trafik Epstein pe expoz enn puritir profon dan klas dirizan Lanpir. Azut sa avek rezo kriminel explwatasyon-sexyel Dominic Strauss-Kahn e deklin Loksidan vinn kler.
Larisi ek Lasinn santi ki zot ni kapav servi zot veto respektiv etan done zot finn insiste lor de sanzman inportan; ni zot inn vot rezolisyon la, ki res kolonyal e kont lalwa internasyonal. Sa de peyi la finn usi pran an konsiderasyon inaminite peyi Arab e preske-inaminite mazorite peyi-Mizilman. Kuma solda zuzu, zot aliyne deryer plan absird Trump ki pe presipit ver sime infernal enn Riviera dan Gaza ar kazino e domenn IRS avek zonn lib pu lizinn hitek andeor vizyon, dan aryer plan.
Rezolisyon vedir ki Israel pran posesyon lamwatye Gaza. Savedir enn “lafors militer internasyonal” indepandan depi Nasyon Zini, pu intervenir dan Gaza militerman. Swadizan kont muvman rezistans ki dirize par Hamas inklir Fron Popiler pu Liberasyon Palestinn, Fron Demokratik pu Liberasyon Palestinn, Jihad Islamik ek lezot. Ki sa nuvo “lafors stabilizasyon” la pu kapav fer, ki IDF pa finn kapav fer dan de-an avek tu zarm Amerikin ki Biden ek Trump finn kapav furni? Hamas finn reazir rezonab par dir, ki li pa pe return zarm ar okenn lafors arme non-Palestinyin. Rezolisyon la bizar parski li adopte Trump so Konsey guvernman kolonyal pu kontrol Gaza, ki prezide par Donald Trump limem, limem ki perpetrater zenosid dan Gaza e limem furniser prinsipal zarm pu komet zenosid. Ki kalite absirdite nu pe bizin sibir?
E krim la li sa rezolisyon Konsey Sekirite Nasyon Zini, ki anretur, pu akseler defet so instigater,
Lanpir Amerikin-Israelyin. Lanpir pe puri depi andan peyi, e depi andeor.
Andan Lanpir, moralite dimunn pe puri dan orzi ek abi sexyel, santaz ek extorsyon ki liye avek servis sekre de u trwa peyi. Rezo santaz trafik-sexyel-zanfan Epstein expoz lider politik Amerikin ek Israelyin dan otdesizyon puvwar kuma Prezidan Clinton ek Trump, Sekreter Trezor kuma Larry Summers, Guverner Deta Amerikin kuma Bill Richardson. Premye Minis Ehud Barrack avek konplisite top biznesmenn, bankye byin infliyan. E profeser liniversite kuma Alan Derschovitz depi sa de peyi ki inplike dan diferan fason dan sa rezo la. Enn Prins Britanik finn “kareman” perdi so Rwayote – enn kitsoz preske inposib. Li lepok kot preske tu kitsoz inposib arive. Huti finn fer Trump rekile, e mem fer li disosye depi Israel. Trump finn fann lodkoloynn deryer zorey enn ansyin Al Qaeda e lider ISIS pu ansarz Lasiri sa ti arive kan li ti pe kontrol White House par anil prim lor so latet dan enn fason pa ti atan. Trump ti invant enn zistwar pu dir ki Maduro dan Venezuela enn baron-diyler-ladrog e li finn rekile e dakor pu koz ar li aster. Sa finn fer li gayn tit “teroris” e vinn enn menas pu sekirite nasyonal. Trump so prim 50milyon dolar lor latet Maduro finn anvole. Servis sekre tulede Leta ek Grand Bretayn paret inplike, dan enn fason u enn lot dan rezo Epstein, usi. Tusala pankor kler, si sa finn met dibut pu fer santaz politik dan pli otnivo ubyin finn met dibut pu fer extorsyon larzan.
Kan met tusala ansam ar lezot rezo-kriminel-seksyel ki inplik Kandida Dominique Straus-Kahn dan Eleksyon Prezidansyel Franse 2010-2011, ki sondaz ti pe donn gaynan kont Sarkozy. Li finn reysi evit purswit zidisyer dan enn enorm rezo prostitisyon otnivo e sarz vyolan abi seksyel. Sa peryod la, li ti an sarz FMI. Nu truv puritir ki pe kasyet andan dan Lanpir Kolonyal Loksidan agonizan. Li pa zoli pu gete.
Andeor Lanpir, tu kalite puritir finn pran plas. Trump aksepte enn bar lor, valer Rs1,300,000 ek enn revey Rolex depi oligark Swiss ki ti vizit li. Lerla li bes tarif Swiss sorti 39% vinn 15%. Preske inposib, me li fer li. Dan so dernye manda li ti aksepte 117 kado ki li pa finn rann piblik, ek zot ti vo 8.7 milyon Rupi. Lalwa US dir, li ilegal pu aksepte kado personel ki ena enn valer plis ki $480. Trump finn aksepte otur 117 kado. Inposib, me li finn arive. Trump finn aksepte enn jet $400 milyon ki pe vinn nuvo “Air Force One” depi Fami Rwayal Qatar. Inposib, me li fini arive.
Rezolisyon ki finn propoze par USA-Israel vyol lalwa Internasyonal ek pa servi prosedir normal sistem UN. Li tantativ pu prolonz lokipasyon ilegal Israel e ekzers puvwar lor teritwar Palestinn ek rezyon la antye. Me Konsey Sekirite antye kuma enn sinp formalite donn so benediksyon u finn kontant zotmem res lwin, espere ki enn tel rezolisyon telman revoltan pu kolaps dan so prop absirdite. Byin posib Rezolisyon la kapav fer samem.
Anpremye USA finn fer Larabi Saodi ek Lafrans sutenir so taktik avek enn rezolisyon ki limem vyol lalwa internasyonal. Lerla Trump finn fer tu dimunn al Lezip pu tom dan so plan, ek aster Konsey Sekirite UN finn adopte Plan fu Trump. Mem kan Lasinn e Larisi reysi gayn amandman ki permet zot abstenir olye vot kont ek servi zot veto, sa montre nu ki zot pa dan enn pozisyon pu gayn ase sutyin pu zot prop plan alternativ. Lasinn finn seye avek Deklarasyon Beijing boner sa lane la. Prezidan Kolonbi finn seye avek rezolisyon “Inifye Pu Lape” ki ti pu avoy enn “lafors proteksyon” pu inpoz lafin lokipasyon e respekte zizman ICJ. Balans puvwar militer ek zeo-politik ankor dan enn fason preker ki favoriz USA ek Loksidan, mem kan so Lanpir pe grene.
Alor, USA pe sey inpoz sa “solisyon” inzis ek kolonyal la lor UN pu sutenir zenosid ki Israel pe komet kont Palestinyin. Lerla Trump kapav fer gran nwar, “Sa pu res kuma enn pli gran lakor dan Listwar Nasyon Zini, ki pu diriz ver plis Lape partu dan Lemond, ek li enn moman Istorik!”. Plan Lape Trump ek Israel resanble “silans anyo”: obzektiv exterminn Pep Palestinyin.
Antretan vale meprizab ki apel Lotorite Palestinyin inn fer enn deklarasyon, met kondisyon ki rezolisyon la bizin met anpratik “dan enn fason irzan e imedyat”. Seki absird se ki Minis prinsipal Israel, Ben G’vir, zis apre finn donn lord swivan dan zot ka: “Minister Sekirite Nasyonal, Itamar Ben-Gvir finn fer apel pu asasinn ofisye senior Lotorite Palestinyin si Konsey Sekirite UN apruv rezolisyon Internasyonal Lafors Stabilizasyon.” [Mo pe sit lagazet lel-drwat Israel, Jerusalem Post.]
Alor, nu bizin kontinye met presyon lor Guvernman Ramgoolam—lor depite ki reste u lor seki kite – pu sanz so pozisyon, pu aret toler Israel ek degrad so stati diplomatik.
Ramgoolam finn deza fer sa avan. Li bizin fer li aster la usi. Guvernman bizin anpes viziter Israelyin rant dan nu peyi eksepte si zot tir afidavi pu dir ki zot pa finn u pena lyin avek Lafors Defans Israelyin u lezot seksyon militer, pu ki nu pena viziter kriminel deger isi.
Pa tom dan propagann: Israel pe kontinye so zenosid kont Palestinyin, dan tulede Gaza e Wes Benk. Sese-lefe li enn pretex. Israel finn asasinn otur wit Palestinyin par zur dan Gaza depi sese-lefe 10-Oktob-2025 inn kumanse. Dan Wes-Benk, zenosid pe kontinye, plis ki 1,000 dimunn finn asasine depi Oktob 2023, ek par milye finn bizin sove depi zot lakaz.
Israel bizin pey pu rekonstriksyon Palestinn. Zizman ICJ bizin respekte pu ki zenosid arete pu premye fwa depi 1947-8. Me lokipasyon usi bizin arete, bizin permet refizye returne, bizin pey konpansasyon. Warant ki ICC finn tire pu aret lider Israelyin bizin met anviger.
Lindsey Collen,
Tradiksyon CC ek AA
pu LALIT
