Sitiasion Politik UK – Reform UK, Your Party, ek lorganizasion grassroots
29.11.2025
Sitiasion politik dan UK ase angwasan ansemoman. Parti Reform UK, enn parti dextrem drwat, antet sondaz pou prosenn eleksion depi plizir mwa. Pa mal dimounn dan lagos pe dir ki li for probab Reform pou pran pouvwar an 2029.
Ena 1 mwa edmi desela, ti ena enn lamars fasis plis ki 100,000 dimounn dan sant Lond. Zot finn desann lor sime pou met presion lor gouvernman pou redwir imigrasion e pou deport plis imigre. Imigre zot bouk emiser ladrwat dan Rwayom Ini, e lakoler ki boukou dimounn ena kont sistem, li kanalize ver imigre.
Anmemtan, parti opouvwar, Labour, pe zwe sa zwe popilis, pe apiy lor politik anti-imigrasion. Par exanp zot fek anonse ki zot pou pran, konfiske posesion bann refizie ki rant dan UK pou vande – koumadir sa pou rezoud problem ki UK pe fer fas. Depi plizir kote alor, groupman politik, ant ladrwat ek lextrem drwat, pe alimant sa dife la.
Enn lot kote, sa lakoler ki prezan dan sosiete, sa lenerzi la – ki an parti sorti depi gran gran mouvman solidarite pou Palestinn dernie 2 lane – li pe donn nesans e ranforsi bann dinamik degos. Par exanp, lorganizasion RS21 – dan lekel mo enn manb – pe grandi pli rapidman ki zame avan. Brans East London pe divize an 3 brans dan diferan kote Les Lond. Lezot lorganizasion Marxis, kouma Revolutionary Communist Party (RCP), osi pe grandi rapidman.
Dan Green Party, enn parti popiler ki vasilye ant lagos ek ladrwat lor diferan kestion, Zack Polanski, enn sosialis ki revandike ki bizin aboli propriete lakaz, finn pran lidership resaman. Anba Polanski, Green Party pe vinn plis degos lor boukou isyu. Dernie sondaz mo’nn trouve montre ki Green Party deziem parti plis popiler dan Rwayom Ini, apre Reform, ek devan 2 parti istorik Angle, Travayis ek Konservater.
Lot kote, ena Your Party. Enn formasion degos, ki sosialis ek radikal. Kan finn anonse ki Zarah Sultana ek Jeremy Corbyn, 2 ex-manb parti Travayis ki bien popiler, ti pe zwenn ansam dan formasion sa nouvo parti la, plis ki 800,000 dimounn finn siyn zot nom onnlaynn pou dir ki, kan parti la pou kree, zot pou rantre. Li ti ena enn potansiel pou vinn enn parti sosialis popiler pou premie fwa depi plizir deseni.
Malerezman, akoz lager interpersonel ant Corbyn ek Sultana (ek lezot manb enn lidership ki napa finn eli), kreasion parti la finn maye dan enn dezord inimazinab. Enn long zistwar, me parti esansiel seki Sultana finn ouver membership, plizir dizenn milie dimounn finn rantre, peye, e apre Corbyn finn dir ki Sultana pa ti gayn drwa fer sa, finn dir ki li pou amenn li lakour, e apre Sultana finn menas amenn li osi lakour li ...
Zot finn fann enn dal istorik. Inimazinab.
Poblem dan lidership finn plizoumwin rezoud apre detrwa semenn, me boukou dimounn finn perdi lespwar. Boukou zenn ki ti pou potansielman organize avek Your Party finn al ar bann Greens. Boukou anzeneral finn retom lor propagann depi ladrwat ki dir ki lagos pa konn organiz zot mem.
RS21 li fer parti labaz militan Your Party, ek mem isi, malgre nou pe kontiyn organize pou ranforsi parti la e pous li ver lagos, boukou manb pe blaze. Ansemoman, avan founding conference lafin Novam, Your Party pe organiz lasanble rezional. Mo bann kamarad ki finn ale pe dir ki deza ena enn mank demokrasi ek transparans, e pa paret ki sa founding conference pou kapav amenn demokrasi neseser pou ki Your Party tini enn laliyn sosialis.
Kikfwa ena enn posibilite sap Your Party depi lame bann teknokrat e fer li vinn vremem enn parti demas, me li pe paret plis inprobab toulezour.
Atraver Rwayom Ini, plizir groupman organik finn emerze pou form fondasion grassroots Your Party. Dan Lond, par exanp, sak rezion ena plizir brans. Labaz lorganizasion la li sa, ek malgre ena enn dekonexion bien inkyetan ant sa labaz la ek lidership, se isi ki potansiel pou pouvwar popiler ete. Dan RS21, nou pe organize avek tandans plis degos dan labaz la. Nou bi se pou servi Your Party kouma enn veikil pou organiz lamas dimounn. Dan sa kad la nou pe kontinie.
ST
