Rol UK-USA-Israel dan Instabilite Konstan
23.10.2025
Apre nu lartik lor “instabilite konstan” dan politik Repiblik Moris, nu finn gayn 2-3 reket depi lekter nu sayt e Facebook pu nu elabor lor rol UK-USA dan agrav instabilite politik konstan la. UK-USA pa zis agrav sa instabilite konstan ki tultan ena, me li sey asire anmemtan ki li enn kalite instabilite ki oblize turn-an-ron, turn-an-ron, san fer okenn veritab progre.
Natirelman ena ase surs instabilite konstan andan dan enn sosyete osi inegal ki sosyete kapitalis Repiblik Moris, ki desann direkteman depi enn lekonomi baze lor travay par esklav e lerla par angaze, avan li vinn “esklav lapey”.
Sa lartik la pu lor sa eleman “instabilite konstan” ki “anplis” e ki vinn depi andeor sosyete Moris ki provoke par ansyin kolon Britanik, dan so faz inperyalist aktyel kot li ansam ar USA, e ki asontur asire ki “sanzman” vedir selman turn-an-ron (1). Nu dernye lartik su tit “Instabilite Konstan dan Guvernman PT-MMM-ND-RA - ennde Refleksyon dan LALIT” - 20 Oktob (2) – explik enn surs instabilite ki sorti enn laspe Konstitisyon Moris, e enn lot surs instabilite ki sorti dan lefet ki suvan ena “lalyans” opuvwar plito ki “parti” ki omozenn.
Sa vedir, dapre LALIT, ena lezot akter, akter andeor sosyete Moris, akter byin pwisan, ki, zot osi kontribiye dan instabilite konstan dikote zeo-politik. E zot fer li par expre.
Kifer UK-USA interese pu perdi zot letan nuri instabilite dan enn pei kuma nu Repiblik? Repons la sinp. UK-USA truv zot dan moman kot zot pe finaliz zot nuvo kad legal pu prolonz zot kolonizasyon enn parti teritwar Repiblik Moris, setadir Chagos an antye, e an-partikilye zot pe asir zot kontrol total lor Diego Garcia, limem. Sa semenn la, nu dan drol sityasyon “kolonyal” kot lavenir Repiblik Moris finn definir par enn lalwa Britanik ki ti pase divan zot Parlman laba. E pankor fini, House of Lords bizin osi vote. Lerla, nu, nu kumsidire tuzur enn koloni, nu lavi tuzur afekte par seki zot vote laba dan “metropol”.
Tusala pu dir, UK-USA dan prosesis delika “aste” depi Leta Moris “lexersis suvrennte” lor Chagos, e “aste” kontrol total lor Diego Garcia, kot zot ena zot baz militer telman inportan pu zot ezemoni zeo-politik mondyal. Li inportan terib dan enn lepok kot zot ezemoni zeo-politik pe kumans fele, krake. E, kuma tu dimunn kone, “ezemoni” ubyin kontrol absoli, li enn zafer ki, kan li kumans zis fele morso, krake morso, sa sifi pu asire ki li grene net. Li zis enn kestyon letan.
Alor, UK-USA, avek zot alye Israel liye ar zot, dan moman kle dan zot listwar global. Zot pe azir an mod panik.
Zot kone zot lanpir pe grene, alor zot pe vinn pli vyolan dan zot lager dan Mwayin Oryan kot zenosid akselere pandan 2 an, finn ralanti a zenosid peti-fe, e kot enn nuvo agresyon militer lor Iran li pa lwin. Lamerik tuzur dan NATO ki pe lager kont Larisi atraver so proxi, Likrenn. Anmemtan zot fini rant dan enn lager komersyal ki Trump finn deklare kont Lasinn. San mansyonn zot agresyon preske tulezur kont Venezuela.
Alor, dan Moris, nu, lamas dimunn an-antye, nu bizin devlop matirite politik ase pu rekonet kan UK-USA-Israel pe azir dan politik Repiblik Moris. Nu bizin rekonet kan zot pe, dan zot prop lintere zeo-politik, azir pu provok plis “instabilite konstan”, sirtu enn kalite instabilite ki asire ki politik Moris turn-an-ron, gard oligark opuvwar. Zot finn deza fer li, e zot pe tuzur fer li. Nu bizin rekonet li. Ala bi sa lartik la: pu nu rekonet kan enn akter politik dan nu pei pe azir dan lintere UK-USA.
Nu travay ideolozik kumanse par omwin realize ki UK-USA (e mem osi zot alye Israel), zot ena lintere favoriz “instabilite konstan” e zot pu kontiyn favoriz “instabilite konstan” dan enn pei ki zot santi zot oblize dornte, kuma Repiblik Moris. Nu bizin rekonet ki servis sekre Britanik, li liye depi 77 banane ar servis sekre Israel ek osi ar servis sekre Amerikin. Zot form parti “leta permanan”, setadir servis sivil ek servis militer (2), e zot travay ansam kuma mam-kole.
UK-USA, kan zot fer sa kalite “luvraz” dan pei exteryer kuma Moris, zot pa fer li par zot-mem. Zot servi dimunn dan Moris pu fer li: politisyin, zurnalist, fran-masonnri, akademik, sindikalist, bloger, ONG, zenn, “lapres” kuma enn institisyon, e zordi-zur anonim, inkoni, espes Tit-Alber avek bul lizye blenk kuma Misye Moustass, ubyin li kapav atraver fenomenn kuma Tuni Minnwi swa nerport-e-kwa.
Avan Lamerik ti fye lor so Servis sekre CIA pu Travay Sal
Dan lepase, USA ti pe servi so servis sekre CIA kare-kare pu rant dan enn pei, e ansam ar akter lokal tripot zot “sanzman rezim”. Me, kan CIA so repitasyon finn rwine kan dimunn finn kone lor tu so asasina lider politik, trafik ladrog, finansman tu kalite milis fasist, tusa, Lamerik finn pandan enn bon but letan kumans enn nuvo sistem. Li finn fye plito lor USAID plis, e finn mem an 1983 met dibut National Endowment for Democracy pu, ant-ot, fer travay sanzman rezim ki CIA ti ena monopol tripote avan. Kumsa USA finn finans zot “pulin” dan diferan pei kot zot ule “sanz rezim” pandan dernye 2-3 deseni.(3)
Revolisyon “kuler”
Sa fason organiz “sanzman rezim” ti devlope for-for apre kolaps USSR. Leta Zini, atraver sirtu finans e kontrol azanda ONG ek lapres dan enn pei, zot finn orkestre “revolisyon kuler”. Swa tu dimunn trap kiksoz kuler roz, sipa oranz, sipa enn fler, vinn dibut dan sant lavil. Lerla avek inpe sekus ekonomik, zet enn rezim, instal enn ki anfaver USA. Kumsa zot finn fer manipilasyon pu devir rezim dan buku pei dan ex-USSR amizir pe konverti depi sistem Sovyetik e avan ki lamas dimunn kree so prop sistem demokrasi nuvo. Enn apre lot, Lamerik finn vir rezim opuvwar. Sa finn kilmine dan Ikrenn, kot Lamerik finn mem master-maynd enn ku-deta an 2014. Zot ti organiz sa ku-deta kont Prezidan ki ti elir demokratikman. Zot ti fer li atraver enn konplo Adzwin Sekreter Deta Amerikin Victoria Nuland, ansam ar Anbasader USA dan Ikrenn Geoffrey Pyatt ek Vis Prezidan anba Obama sa lepok la ki ti ansarz Ikrenn Joe Biden.(4)
Rezilta? Enn rezim ki ena lyin ar lextrem drwat fasizant finn pran puvwar dan Likrenn, e finn, apartir sa moman la, vinn enn proxi pu lager kont Larisi. Pei Ikrenn, ariv 2025, finn detrir preske net. Likrenn finn sibir plis ki trwa-zan lager, kot NATO finn servi li kuma proxi pu sey anserkle Larisi. Larisi finn kareman refize ena zarm nikleer NATO lor so frontyer, ki telman pre ki Larisi pa pu gayn ase letan protez so lepep si NATO tire depi Likrenn. Tu arsitektir pu lape ti baze, depi Lager Frwad vini-mem, lor sa prinsip Leta Zini ek USSR ena letan sifizan pu defann si ena enn atak nikleer. Sa-mem manyer ki politik “deterenns” finn marse. Me, Leta Zini finn kas sa lakor la, finn elarzi NATO dan pei otur Larisi, enn pei apre lot, kuma enn gran tret, pandan 20-25 dernye lane, e finalman, kan ariv Likrenn, Larisi finn dir “Sa, non!”
Servi Vre Lakoler Gen-Z
Leta Zini finn osi akseler so kanpayn pu koronp zenes dan pei kot li ule linfliyans. Zenn ki zot dekret kuma “lider zenn”, e antrenn kuma “lider zenn”, atraver ofer “vizit” peye dan Lamerik. Zot organize pu amenn “zenn lider” Lamerik pu ris zot dan ziron Lanbasad USA, kan zot returne. Tu dernyeman Leta Zini finn azir inpe partu dan lemond atraver mont latet “Zenn dan Gen Z” kont “zenerasyon o-puvwar”, purvi pena enn program politik.
Servi Gen-Z, vinn Apre vole Sekter e Jennder
Avan sa, Leta Zini ti ankuraz sirtu politik kominal. Li ti viz kree divizyon sekter. So bi: anpes devlopman baze lor linite lamas travayer oprime kont sistem kapitalist. Me kan sa travay la finn expoze kuma danzere, plito rasist e kolonyal, san lavenir apar bagar, Leta Zini finn kumans finans e ankuraz politik baze sann kut la lor “egalite jennder”. Sa vedir zot sey organiz fam pu fam monte alinteryer yerarsi kapitalist existan. Sa osi, Lamerik pe asire ki li enn lorganizasyon ki zame pa remet an-kestyon sistem kapitalist, ni mem so striktir yerarsi patriarkal. Sa osi fini expoze kuma enn stratezi plito turn-an-ron, parey kuma stratezi baze lor ekni. Alor, depi inpe letan, travay sal Amerikin li finn ariv truv enn nuvo dadak pu monte: “zenn”.
Trump Re-Kumans Donn Monopol Lanbasad US ek CIA
Asterla, ena nuvo devlopman ankor. Kan Trump vinn opuvwar, li kareman ferm robine USAID depi kumansman lane. Trump fer sa anparti akoz Lamerik lor bor bankrut alor li pe kup depans avek enn tronsonez.
Anparti Trump fer sa pu return ver fye direk lor CIA pu so politik “sanz rezim” ki li pa kontan.
Trump pe fer sa zordi dan ka so anserkleman Venezuela, par exanp. Laba, Trump viz pran kontrol Venezuela pu gayn kontrol lor so rezerv petrol. Venezuela so rezerv petrol pli gran dan lemond. Alor, pu fer sa Lamerik akiz Prezidan Maduro eleksyon trike. Kan so tantativ ku-deta 2020 fware, Trump sann kut la akiz Maduro fer “trafik ladrog”. Pu ki trafik ladrog kapav “zistifye” ki Lamerik al fer tu kalite asasina ilegal, Trump dekret “komers ladrog” kuma enn “aktivite terorist”. Kumsa Trump donn lord zis kareman al tuy dimunn dan 7 ti-bato prekot Venezuela, enn apre lot, san mem kone kisannla ladan, ni mem kot zot pe ale, ni mem ena exibit pu pruve ki zot kargo la ti ete, nanyin. Li enn krim deger. Alor, CIA inn returne dan so travay sal o-kler.
Li enn lepok danzere.
Dan Moris
Dan ka Moris, lor zafer itiliz trafik ladrog dan politik, nu ti deza tann alegasyon farfeli depi dimunn antrene par servis spesyal Israeli, an-okirans Bruneau Laurette, san okenn prev, kumkwa Wakashio ti pe koste ar brizan pu fer enn livrezon ladrog ar politisyin opuvwar dan rezim Jugnauth.
Nu ti deza kone ki lanbasad USA finn sutenir manifestasyon Laurette-Subron atraver enn text lor so websayt. Dayer Leta Zini pa ti mem obzekte kan manifestasyon la terminn divan so laport! Si LALIT ule enn manifestasyon ki bizin pas dan nerport ki lari pre laba, zot obzekte anplas-anplas.
Alor, nu bizin rekonet li kuma “palab” kan dimunn dir ki enn imans navir kuma Wakashio finn koste prekot brizan pu livre ladrog. Li absird. Tu dimunn deza kone ki ena GPS zordi, e transbordman ladrog fer o-larz. Nu bizin kapav idantifye palab la, sirtu bizin idantifye palab ki sirkile dan lintere kree instabilite pu nanyin. Nu bizin get lintere ki servi. Nu bizin cheke sipa li servi lintere UK-USA, dan enn lepok kot zot pe rod gard zot kontrol lor Repiblik Moris akoz zot baz. Bi Leta Zini li suvan zis pu fer so but pu lev enn listeri demas. Kumsa li kareman anpes enn veritab program politik, sirtu enn program pu sosyalism, baze lor lintere klas travayer. Kumsa, Leta Zini obliz politik turn an-ron, fu enn guvernman deor, lerla fu nuvo guvernman deor, lerla fu trwazyem la deor, me san zame devlop enn program politik ki deplizanpli buku dimunn pa zis konpran, me angaz zot pu defann.
Nu terminn sa lartik la ar trwa fe ki finn kumans emerze resaman. Zot interesan.
Pavyon USA lor enn Kominike Depres
Remarke, kan ena enn kominike depres su tit “Urgent Press Release” 12 Oktob lor paz ofisyel anfaver sulevman dan Madagaskar tire par “Gen Z Malagasy Mauritius”, ena trwa pavyon dan zot lantet. Ena pavyon Madagaskar, normal dizon; ena pavyon Repiblik Moris, egalman normal dizon; e, inkrwayab me vre, ena osi pavyon Leta Zini USA. Ki sa sa sa?
Sa montre nu kimanyer pavyon Lamerik, mem su rezim diktater Trump, reysi mont dadak lor zenn ki, avek rezon, pe proteste dan Madagaskar. E li finn mem mont dadak lor enn grup anonim dyaspora Madagaskar dan Repiblik Moris. E Leta Zini fer sa ziska enn tel pwin ki zot “pulin” met pavyon Lamerik lor zot kominike depres.
Servi Kupir kuran, dilo, problem weyswater, kup Innternet
Remarke, osi, dan pei kot Lamerik furni “instabilite”, suvan enn zafer ki agrav lakoler existan la, li kan kumans gayn kupir servis esansyel kuma kupir kuran. Kwinsidans? Nu kone ki Paul Bérenger, kan li Premye Minis Akting, li ti paret ena enn fobi kupir kuran.
Semenn dernye enn ansyin solda US Special Operations, lerla li finn fer mersener ala-sold laparey deta USA, finn donn temwaynaz lor so tantativ ku-deta dan Venezuela an 2020 lor nom USA. Li dan enn intervyu lor Grayzone. Sa ku-deta fware la ti inklir plan daksyon, enn sertin moman, pu fer lamas dimunn pli ankoler par provok kupir elektrisite, e kupir dan furnitir dilo. Kumsa viz pu fer plis dimunn desann dan lari, pu ki pei vinn inguvernab, ku-deta vinn posib. Kumsa enn Junta militer ti viz sezi puvwar. Me, sanzman rezim premye tantativ ti fware. Lepep Venezuela tuzur tro organize, kote politik. Zot ena enn program ki reste depi Revolisyon Bolivar kan Chavez ti organize pu nasyonaliz sekter petrol.
Kote problem dilo, li enn veritab problem Moris dan buku rezyon. Remarke, enn sertin moman, Laurette, kan li ti pe mont so atak kont ansyin rezim MSM, ti kumans organiz dimunn pu desann dan lari dan Sid-Es kan ti ena problem dilo grav laba. Dan LALIT, nu pa pe dir dimunn bizin pa desann dan lari. Bizin desann dan lari. Me, nu bizin ena matirite politik pu kone kan nu pe manipile par dimunn ki pe azir kuma azan kit pwisans inperyalist. Nu bizin rapel li pli fasil pu sanz nu Guvernman ki pu nu sanz Guvernman Leta Zini si li gayn puvwar isi, atraver so “pulin”. Nu ena zis pu mezir grander problem ki Palestinyin pe gayne akoz Israel finn reysi etablir enn zandarmri Oksidantal dan Mwayin Oryan.
Kote kupir elektrisite, kupir dilo, etc, nu finn osi truve ki “zarm masif” dan sa seri la, li kan fini provok enn rezim a enn tel pwin atraver asarnman lor rezo sosyal kont li, ki Guvernman al fer erer taktik grav, al kup rezo sosyal net. Sa suvan sifi pu baskil puvwar. Nu finn truv sa dan ka Missie Moustass dan Moris, e dan ka Nepal fek la. Nu tu telman depandan lor rezo sosyal – pu nu kontak sosyal, nu organizasyon familyal, seki nu aste, seki nu ekute e lir – ki kan kup rezo sosyal, nu bez fu. Lerla, seki pe provok listeri demas, li satisfe.
Alor, deryer buku sulevman “zenn”, ki Amerikin apel “Generation Zee” ubyin “Gen Z”, ankoler kont sistem kapitalist, nu osi kapav gayn prezans aktif lanbasad Leta Zini. Leta Zini viz anpes ki zenn atenn zot obzektif anti-kapitalis. Madagaskar pa enn eksepsyon.
UK-USA pe viz Anpes Pei Koste tro pre ar Lasinn
Remarke osi ki, ki li Nepal, ki li Madagaskar, ki li Marok, tule trwa pei, mem zot paret pena nanyin an-komin, ena enn zafer ki liye zot: tuletrwa ena lakor fini negosye ar Lasinn dan kad Lasinn so plan “Belt and Road Initiative”, a plan komersyal. USA tir lavantaz si li destabiliz sa kalite Guvernman ki ena sa lyin ar Lasinn konstaman – purvi li asire ki sulevman la na pena enn program politik sosyalist. Li sifi si li antrav relasyon ar Lasinn, mem akurterm. Sa se bi Leta Zini ladan.
Remarke kimanyer zordi Atorne Jeneral Gavin Glover, kan lextrem drwat Britanik akiz Moris ena relasyon tro pros ar Lasinn, pe aprann reazir par fer serman Moris pa pu ena mem kalite relasyon ar Lasinn ki li ena ar UK-USA!! Lerla, Minis Angle sit Gavin Glover landime dan Parlman Britanik. Ondire Kabine Britanik finn pas komann pu enn tel kominike. Pli kurbe ki sa, tu meurs.
Sa Vedir Zis “Desann dan Lari” pa Sifi – Bizin enn program
Alor, pu ki ena veritab sanzman, pa zis sa kalite slogan ki “Alliance du Changement” finn balanse divan nu lizye, nu bizin buku plis matirite politik ki zis fer “tu dimunn desann dan lari”. Fode nu organiz klas travayer ase pu ki li kapav – lor sayt kuma dan so kartye – defann enn program politik rezone e andetay, enn program dan lekel li aprann kontribiye atraver so veritab lider alabaz lor sayt, lider alabaz dan kartye, dimunn ki Lanbasad Lamerik pa kone, e pa zame pu futi kone.
Pena sime kupe. Pu veritab sanzman, bizin enn tel degre lorganizasyon politik ki u kapav bare kont tu sa konplo ki inperyalis tultan ena. So konplo suvan ase anfantin. Si ekut sa misye ansarz ku-deta manke USA dan Venezuela an 2025, u gayn enn lide. Li parey kuma mersener Bob Denard. Li ti enn konplo anfantin ki finn amenn li opuvwar dan Komor. Li ti pe travay pu enn espes konsortyom Lafrans-Sid Afrik Aparteid. Li finn res opuvwar atraver dimunn Komor li nome, 1978 ziska 1989. Alor, enn rezim met opuvwar par mersener ti opuvwar pu plis ki 10 banane. Li ti re-sezi puvwar an 1995 – li pa kler kisannla ti pe pey li – e sann kut la, Lafrans finn tir li. Rezilta tu sa instabilite konstan la, Lafrans finn fer enn referenndem ilegal dan enn sel lil Komor, Mayotte an 2009, kareman kokin Mayotte, apel li enn “departman” Lafrans!
Nesesite Devlop Matirite Politik baze lor enn Program Rezone
Tusala pu dir li pa fasil, me li pa inposib pu organize politikman pu fer fas pa zis nu Guvernman – ki koronpi, ki azir dan lintere kapitalis, ki pa okip servis kuma dilo, elektrisite, weyswater ase byin – e pu osi fer fas sa lanpir USA-UK-Israel, enn lanpir dan prosesis tonbe.
Bizin batir enn muvman konsyan, baze lor lintere klas travayer, otur enn program rezone – tusala bizin zwenn ar sa dezir profon dan dimunn oprime pu viv dan laliberte, dan egalite e dan lazistis.
Matirite politik inklir kapasite pu de-zwe manev politik kuma “Misye Moustass” ki ti zwe kuma enn feyton bizar avan dernye eleksyon zeneral. Lefet ki pankor expoz kisannla deryer sa manipilasyon kanpayn elektoral, li res enn danze pu nu tu pu lavenir. Li vedir ena enn danze par divan pu demokrasi tukur dan Moris. Kimanyer pu fer enn lot eleksyon kan nu pankor kone kisannla finn fos dernye eleksyon par enn kanpayn anonim kumsa? Enn anonim finn definir azanda pu kanpayn elektoral, depi premye zur kanpayn, ziska dernye zur. Si nu pankor met lord pu dernye manipilasyon grotesk azanda nasyonal, nerport ki kuyon pu zis pibliye tu kalite insanite tulezur? Asterla avek zeneralizasyon AI, sa pu rann li pli fasil ankor pu turn nu an burik?
Danze Missie Moustass “Anonim” ki Determinn Azanda Politik enn Eleksyon
Nu pankor gayn temwin ki dibut ar so anrezistreman Missie Moustass? Alor enn kapon anonim, enn espes fantom, finn kontrol derulman kanpayn elektoral zur par zur, e nu pankor kone kisannla? Nu pa pe mem gete. Jugnauth ti met enn Komisyon Danket. Kapav li ti enn Komisyon Danket bidon. Me, li pa ti telman “bidon” ki Guvernman Ramgoolam finn per li. Li finn vit-vit aboli lalwa Komisyon Danket net, met enn lot. Kumsa Komisyon danket lor Missie Moustass finn disparet dan enn tru dan liniver.
Eski nu telman bet dan Moris ki nu krwar enn “whistle-blower” li res anonim pu de-bon? Enn Whistle-blower li pa zame dibute, temwayne? Fode dimunn ena kuraz. Progre napa fer atraver kapon, ni anonim, ni azan pei inperyalist. Fode ena transparans. Fode nu rezet tu sa anfantiyaz kot anrezistreman san temwin li kapav desid azanda enn eleksyon demokratik, anplas lamas dimunn dan Repiblik Moris met so prop azanda. Enn azanda dan enn eleksyon li enn program politik konsyan.
Dan Moris nu bizin devlop matirite politik ase pu depas omwin sa kalite anfantiyaz kuma “Missie Mousstass”, ubyin Bruneau Laurette ek Ashok Subron so “desann dan lari, “BLD”, ek “BZTD”. Li pa zis bet. Li danzere. E, dayer, get kot li finn amenn nu zordi? Nu ena enn nuvo Guvernman ki finn aplik program swivan ki pa ti dan so manifes elektoral: li finn aboli pansyon vyeyes iniversel pu tu dimunn ant 60 ek 65 an; li finn vann lalit kont Israel par retir “oral submissions” dan ka ICJ kont Israel akoz li pe afam Palestinyin; li finn vann Diego Garcia pu 100 banane an-esanz pu “blood money”. Ala kot Missie Moustass finn amenn nu.
Dan buku pei kot “reysi” zis BLD, zot al fini pli pir ankor ki nu dan Moris. Zot al fini anba enn reyn militer diktater net. Nu finn truv sa arive dan Lezip. Klas travayer Lezip pli oprime asterla anba Al-Sisi ki zot ti ete su diktater Mubarak avan.
Alor, ki LALIT pe dir? Nu pe dir anplis desann dan lari, fode anmemtan, depi asterla-mem, prepar enn lorganizasyon politik sipa enn parti politik, swa plizir parti politik, pu pran ladireksyon sa muvman lamas dimunn la, lor baz enn program kler, rezone, e konsyan.
Sanzman li bon, me selman si li anfet sanzman pu lemeyer.
Sanzman pu gayn seki pli pir, li napa bon.
Sanzman ki fer Repiblik Moris vinn enn esklav lanpir UK-USA-Israel an plin so lagoni, li pa bon ditu. Li danzere.
Konklizyon
Nu espere sa lartik la kumans reponn kestyon nu lekter.
Me, sakenn dant nu, nu bizin reflesi. Gard kalm, e res vizilan.
Mazinn enn ku ki politisyin u kone ki finn deza gayn “vizit” pu al Lamerik. Gard li antet kan li koze. Kuggan Parapen, nu kone finn fer enn tel vizit. Asterla li Jinyor Minis.
Mazinn byin ki reporter u kone ki finn gayn “vizit” pu al Lamerik? Ena enn ki finn mem aterir dan travay kuma enn advayser andan dan lanbasad USA, kuma Iqbal Khan, aka Ahmed Khan.
Ena dimunn avek lyin ar zurnal L’Express ki finn gayn finansman depi Lamerik so National Endowment for Democracy, kuma Roukaya Kasenally. Ena zurnalist L’Express ki finn mem “benefisye” vizit pu al Israel. Nu konn trwa reporter L’Express, Marie Annick Savripenne, Anju Ramgulam asterla MBC, ek Aline Groeme Harmon ki finn ekrir lartik konplezan net. Parmi finn gayn biye peye par Israeli Defense Force, fer pli onte ankor, kan li ti pe deza perpetre enn zenosid.
Not
(1) Anpasan, kote stil literer, sa fraz “instabilite konstan”, li apel enn “oximoronn”, setadir enn zafer ki 2 zafer lekontrer anmemtan.
(2)Ladan nu finn get kimanyer enn laspe Konstitisyon Moris provok sa instabilite initil la. Konstitisyon anmemtan donn Premye Minis buku puvwar e pa donn okenn puvwar so adzwin kan li azir kuma Premye Minis par interim. E si Premye Minis sed kit puvwar kan li absan ubyin malad, li fer li an-sekre. Nu finn osi get lefet ki enn lalyans politik li mwin stab ki enn parti politik, kan li opuvwar. E nu finn termine ar enn ti-but lor rol UK-USA dan sa instabilite konstan la.
(3) Ti ena enn seri TV apel “Yes, Minister!” e so sekel “Yes, Prime Minister!” ki montre sa pli byin ki enn analiz. Kapav rod li lor YouTube.
(4) Amerikin dan sa kalite konplo la finn bliye zot prop “rezim” dan USA ki pli bizin sanze!
(5) Si tap “victoria nuland telephone conversation” dan google ubyin youtube, u gayn enn lanrezistreman kot sa fam ki efektivman enn espyon Amerikin la pe tripot sa ku-deta la avek Anbasader USA dan Kiev. Zot diskite ki politisyin tro fasis bizin res dan lonb, ki politisyin ki zot pu fer vinn Prezidan apre ku-deta ki zot pe planifye. Li inkrwayab. E sa ti tutswit vinn lor YouTube, alepok. Sirman Larisi ti intersepte li, pibliye li. Normalman, kan servis sekre truve ki so konplo fini expoze, li oblize kennsel li. Me, zot pa ti ule, ubyin pa ti kapav kennsel li. Ku-deta finn al delavan. De semenn plitar, USA ena inpinite, tusala, kisannla bizin res dan lonb, kisannla bizin vinn Prezidan, met an-aksyon. Li vinn vre. E se sa, ki amenn nu direk, ver lager proxi kont Larisi ki kumanse 2022.
