Ki nu andeor Palestinn Bizin Fer Pandan Sese-lefe?
11.10.2025
Palestinyin pe sulaze pandan sese-lefe. Nu ar zot kan zot pe marse, marse, marse, par zot milye, dan lanbyans enn selebrasyon – mem nu kone, kan zot pe marse, zot vant vid, zot pe mazinn fami ki Israel finn tuye, e zot pe trakase ki lavenir pu amene asterla kan dronn ek bom finn fonn, e finn kit enn silanz.
Leres sa “Plan Lape” li pa tutafe enn plan. Alor, sa vedir asterla-mem, li moman kan nu, andeor Palestinn, ena enn devwar pu azir pu sanz balans-defors zeo-politik ase pu ki ansam nu reysi obliz Israel ek so alye, sumet divan exzizans lalwa internasyonal. Pu nu reysi, nu, partu dan lemond, nu ena travay pu akonpli. Asterlamem, pandan sa sese-lefe la, nu bizin rod manyer pu fors nu Guvernman izol Israel. Nu bizin travay asterla pu fini Israel so lokipasyon later Palestinn. Pu aret so leta-desyez. Pu fini ar chek-poynt e demolisyon lakaz dimunn. Pu fini ar kolonizasyon pu debon. E pu aboli Israel so sistem aparteid. Se tusala ki ala-surs zenosid ki Israel pe perpetre. Alor so lokipasyon, so leta-desyez, so chek-poynt, so politik kraz lakaz dimunn, so kolonizasyon, so aparteid, bizin termine enn fwa purtu. Sinon, sa sese-lefe la pu res enn sinp poz dan zenosid la. Sak aksyon byin reflesi ki nu fer li kapav sanz balans-defors zeo-politik si li infliyans nu prop Guvernman, e lansanb sa kalite aksyon onivo lemond antye pu determinn sityasyon zeo-politik. Nu bizin prepare pu azir kuma klas travayer dan Litali finn kumans azir. Nu bizin rod fason pu nu Guvernman azir pu ki li izol sa Israel la totalman depi nu sosyete – kote politik, ekonomik, sosyete, tu. Par exanp, nu bizin anpes viziter depi Israel, omwin zot gayn enn viza apre ki zot finn prezant enn afidavit ki zot pena, ni pa finn deza ena, okenn lyin ar IDF ubyin okenn lot but dan militer Israel, pangar nu pe akeyir kriminel deger ki riske gayn sarz partisip dan zenosid, kan ena ka lakur kuma Nuremberg. Kumsa nu fer Israel va bizin rann kont pu tu so krim, aksepte responsabilite, e kumans azir dan fason ki permet lape dan “Mwayin Oryan” ubyin “Lwes Lazi”. E nu bizin kal leta Israel pu ki li aret rant dan later so vwazin. Tu dimunn ki viv dan Palestinn istorik, e tu refizye Palestinyin, bizin kapav viv dan lape, dan egalite, dan lazistis, sakenn so drwa de-vot egal – depi larivyer ziska lamer, ki li dan enn leta ubyin de. Israel bizin respekte zizman ICJ kont li pu so lokipasyon ilegal Gaza, Wes-Bennk ek Zerisalem-Les, parey kuma UK bizin respekte zizman ICJ kont li pu so lokipasyon enn but Repiblik Mauritius, setadir Arsipel Chagos, inklir Diego Garcia. Azisman kolonyal ki viz diviz “New Gaza” depi Palestinn, ubyin pu sey kree enn “New Chagos” separe depi Repiblik Moris, fini devwale dan ICJ pu seki zot ete: ansyin taktik sal, kolonyal apel “divide and rule”. Sa kalite azisman la ilegal, enn pwin se tu.
Tu vwazin otur Palestinn istorik, zot osi, ena drwa viv lib depi agresyon konstan enn Israel ki pe rod agrandi so teritwar ver so bi iltim ki li apel “Greater Israel”. Samem ziska ler, Israel zame pa finn definir so frontyer: li ena lanbisyon debaras dimunn dan Palestinn e otur Palestinn pu li kokin zot later. Sa-mem so bi. Zenosid, li so mwayin ariv sa bi la. Sa-mem nu bizin viz pu aret Israel so lokipasyon, leta-desyez, kolonizasyon ek aparteid, si nu ule ki li aret so zenosid.
