Trump so Plan 20-Pwin v/s Plan kuma ti kapav ete ubyin ti bizin ete – Zenosid Blog 77
08.10.2025
Trump ek Netanyahu ti pibliye enn Plan 20-pwin pu Lape. Pa Nasyon Zini, non. Pa Lepep Palestinyin ki pe lite pu zot lindepandans depi reyn kolonyal, non. Anfet, lorganizasyon Palestinyin pa ti mem kone ki ti dan Plan la ziska li pibliye. Li enn draf Trump-Netanyahu finn konkokte pu permet Israel kontinye so lokipasyon Palestinn. Li enn Plan ki anfet mem permet Israel kontinye zenosid. Li enn fars kriminel. Guvernman Morisyen ek lezot Leta bizin pans de fwa avan sutenir sa. Si Guvernman Morisyen siyn sa, savedir kolaborasyon dan zenosid. Nu pa dakor konplis zenosid.
Li etranz, ki sa de perpetrater zenosid ki finn manigans sa Plan la. Lerla, ansam, zot prezant li. E li swiv enn manev presedan dan UN, ki finn usi konseptyalize an vyolasyon lalwa internasyonal. Li ti enn lide konkokte par ti-Napoleon Lafrans, Emmanuel Macron, ek diktater Larabi Saodit Prins Eritye Mohamed bin Salman, koni pu so rol dan dekup an but but lekor zurnalis kuraze Jamal Khashoggi an 2018. Muv presedan dan UN ti perfid, li ti pretann “rekonesans Leta Palestinn” anmemtan ki permet Leta Manb pu kontinye vit-vit zenosid kont Palestinyin, avek Leta u san Leta.
Nu pu kopye “Plan 20 Pwin”, pwin par pwin, ek lerla apre sak pwin, drafte seki enn plan 20-pwin “normal”, setadir seki enn plan non-zenosider, ti kapav dir, pwin par pwin usi, si nu ti kontant nu zis respekte lalwa internasyonal, pa plis pa mwins. Sepandan, li pa nu devwar pu drafte sa. Nu pe fer sa pu met lanfaz lor enormite trikmandaz Trump-Netanyahu. Pu sinplisite, nu finn swiv striktir plan Trump-Netanyahu.
Sa kalite lexersis- kan nu pe ekrir li e kan u pe lir li – li probableman sa kalite aksyon ki neseser pu mintenir nu lasante mantal normal dan sa lepok kot ena sa kalite zenosid atrosman amer ek kriyel.
1e pwin dan Plan Trump dir:
“1. Gaza pu deradikalize pu vinn enn zonn lib depi terer ki napa reprezant enn menas pu so vwazin.”
Enn plan rezonab ti kapav dir:
1.Israel pu, dapre lalwa internasyonal, aret so lokipasyon Palestinn. Sa lokipasyon la finn dekrete ilegal par ICJ an 2024. Aster, apre enn-an dele ki Lasanble Zeneral Nasyon Zini finn akord Israel pu inplemant retre konplet so larme pu tultan depi Gaza, Wes Benk ek Zerizalem Es, apartir 18 Septam 2025. Sa lokipasyon la, li pa zis ilegal, me finn ziz li ilegal, ek aster li enn vyolasyon flagran. Israel bizin retir li e kumans pey reparasyon ki li dwa dapre ICJ. Tu radikalizasyon Israelyin e terer pu arete deswit, pu ki Israel nepli enn menas pu tu so vwazin, setadir dan Palestinn antye osi byen ki dan Liban, Yemen, Liran, Lasiri, Lirak ek Tinizi.
Lorganizasyon rezistans Palestinyin inklir zot konbatan pu konsidere kuma konbatan laliberte lezitim, e parey kuma tu lezot inklir Israel pu bizin responsab divan lalwa internasyonal. Etiket “teroris” pu apartir aster transfere depi konbatan laliberte a Leta teroris ki pe komet zenosid ek asasina sivil dan peyi vwazin ek partu dan lemond.
Dan lalwa internasyonal, apartir asterla, kan nu lir mo “tu leta” dan tu kontex, mo “tu” pu inklir Israel, USA, ek so aliye Oksidantal, kuma UK, Lafrans ek Lalmayn.
Eksepsyonalism inn fini.
* * *
2em pwin dan Plan Trump dir:
"2. Gaza pu redevlope dan lintere lepep Gaza, ki finn sufer plis ki bizin. "
Enn plan rezonab ti bizin dir plito:
2. Palestinyin –ki pe viv dan Gaza, ubyin dan Wes Benk u Zerizalem Es, ubyin dan Israel zordi, dan lezot peyi kuma refizye, uswa libere depi prizon Israelyin –pu byin vit swazir zot reprezantan e deside, zotmem, an akor avek lalwa oto-determinasyon enn teritwar kolonyal, lor fason pu redevlop Palestinn antye. Israel finn koloniz Palestinn depi byin tro lontan.
* * *
3em Plan Trump dir:
"3. Si tulede kote tom dakor ar sa propozisyon la, imedyatman lager pu arete. Lafors larme Israelyin pu retir zot dapre laliyn teritoryal kinn tom dakor pu prepar liberasyon otaz. Pandan sa letan la, tu loperasyon militer, inklir bonbardman aeryen ek artilri, pu sispann, ek laliyn konba pu zele ziska tu kondisyon reini pu enn retre konplet par letap.”
Enn plan rezonab ti bizin dir:
3. Israel bizin retir tu so larme partu dan Palestinn, inklir Gaza, Wes Benk ek Zerizalem Es, e aret so zenosid. Israel pu aret so bonbardman e bonbardman artilri ek tir snayper, so syez, so aparteid, so lokipasyon ilegal ek tu so bann chekpoynt ek so polisi lafaminn. Israel bizin obeir lalwa internasyonal. Tu setler bizin retir zot depi Teritwar Okipe pu tuzur. Israel pu lerla pey reparasyon pu tu destriksyon li finn komet.
* * *
4em Plan Trump dir:
"4. Dan 72er ki Israel pu piblikman aksepte sa lakor la, tu otaz, vivan ek mor, pu returne,”
Enn plan rezonab ti bizin plito dir:
4. Israel pu, dan 72er, liber tu Palestinyin ki li pe gard an otaz san okenn sarz, e liber tu dimunn ki par lafors finn prezant ilegalman divan lakur lokipasyon Israelyin, setadir tu sa 10,000 Palestinyin dan prizon Israelyin, inklir fam ek zanfan. Lerla konbatan laliberte pu remet zot 20 prizonye deger Israelyin, se tu prizonye ki reste ete: Prizonye deger. Tusala, dapre lalwa internasyonal.
* * *
5em pwin Plan Trump dir:
"5. Enn fwa ki tu otaz libere, Israel pu larg 250 prizonye kinn gayn santans prizon-avi, plis 1,700 Gazawi ki ti anprizone apre 7 Oktob 2023, inklir tu fam ek zanfan kinn anprizone dan sa kontex la. Pu sak lekor ki reste otaz Israelyin ki pe livre, Israel pu return lekor 15 Gazawi kinn desede".
Enn plan rezonab ti bizin plito dir:
5. Israel, kan li larg tu prizonye Palestinyin vivan, pu lerla return zot fami lekor ki reste tu sa 676 Palestinyin ki dimunn kone, okipan Israelyin finn konfiske zot lekor. Lerla konbatan Rezistans pu return 28 lekor Israelyin kinn mor ki ti su zot kestodi.
* * *
6em pwin Plan Trump dir :
"6. Enn fwa ki tu otaz large, manb Hamas ki finn angaz zot dan enn ko-existans pasifik e pu demantel zot zarm pu gayn amnesti. Manb Hamas ki swete kit Gaza pu gayn enn pasaz an sekirite dan peyi ki pe akeyir zot."
Enn plan rezonab ki bizin plito dir :
6. Enn fwa ki tu Palestinyin dan prizon Israelyin libere e tu lekor Palestinyin ki larme Israelyin finn konfiske, returne ar zot fami, Israel pu respekte Manda Dare e remet Benjamin Netanyahu ar Lakur Internasyonal Lazistis pu zizman pu krim kont limanite, dapre lalwa imaniter internasyonal. Li pu gayn enn pasaz sekirize ziska Lahe kot li pu anprizone ziska so prose derule. Lezot perpetrater Israelyin pu pas divan Lakur dapre prinsip kinn etabli dan prose Nuremburg.
* * *
7em pwin Plan Trump dir:
"7. Kan gayn lakorite pu sa lakor la, tutswit ful led pu avoy dan band Gaza. O-minimem, kantite led pu konsistan avek seki ti inklir dan lakor 19 Zanvye, 2025, ki konsern led imaniter, inklir reabilitasyon infrastriktir (dilo, elektrisite, sewage), reabilitasyon lopital ek bulanzri, e lantre neseser lekipman pu retir tu graba ek uver simin.”
Enn plan rezonab ti bizin plito dir:
7. Kan sa pak internasyonal vinn anviger e Israel kumans pey reparasyon pu domaz ki zot inn fer, ful led internasyonal pu distribye, inklir reabilitasyon infrastriktir (dilo, elektrisite, sewage), reabilitasyon lopital ek bulanzri, e lantre neseser lekipman pu tir tu graba e uver simin, kan nuvo Guvernman Lindepandans Palestinyin pu deside.
* * *
8em pwin Plan Trump dir:
"8. Lantre distribisyon ek led dan band Gaza pu fer san interferans depi tulede parti atraver Nasyon Zini ek so lazans, ek Krwasan Ruz, anplis ki lezot institisyon internasyonal ki pa asosye dan okenn fason avek enn sa parti la. Uver Krosing Rafah dan tulede direksyon pu swiv mem mekanism kinn inplemante dan lakor 19 Zanvye 2025.
Enn plan rezonab ti bizin dir:
8. Led pu rant dan Gaza san interferans depi Israel, ki pu finn retir so lafors larme, e livrezon led imaniter pu fer par UNRWA atraver so 400 sayt led livrezon, lezot institisyon UN, ek Krwasan Ruz, anplis ki lezot institisyon internasyonal ki pa asosye dan kit fason avek Israel, ansyin lafors lokipasyon kolonyal. Tu pwin pasaz inklir Rafah pu uver, osi byen ki nuvo lepor ki ena akse lor Mediterane, ek enn laeropor pu ranze imedyatman, ar larzan reparasyon ki peye par Israel.
* * *
9em pwin Plan Trump dir:
"9. Gaza pu guverne par enn guvernman Palestinyin tanporer tranzisyonel konpoze avek enn komite teknokratik, apolitik, responsab pu zesyon kotidyin servis piblik ek minisipalite pu dimunn Gaza. Dans sa komite la pu ena Palestinyin kalifye ek exper internasyonal, su kontrol ek sipervizyon enn institisyon tranzisyonel internasyonal, “Bord Lape”, ki pu dirize ek prezide par Prezidan Donald J Trump, avek lezot manb ek sef deta ki pu anonse, inklir ansyin Premye Minis Tony Blair. Sa antite la pu met dibut lankadreman e zer fon pu redevlopman Gaza ziska ki Lotorite Palestinyin konplet so program reform, kuma ena dan plizir propozisyon, inklir Prezidan Trump so plan Lape an 2020 ek propozisyon Franko-Saudyin, e ki kapav repran kontrol sekirize ek efektif Gaza. Sa antite la pu met anpratik meyer prinsip internasyonal pu instor enn guvernans modern ek efikas ki pu oservis dimunn dan Gaza e pu propis pu atir investisman. “
Enn plan rezonab ti bizin plito dir:
9. Gaza pu guverne par 14 lorganizasyon Palestinyin ki ti zwenn dan Beijing lane dernye, ziska ler vini pu kapav organiz eleksyon lor totalite Palestinn, setadir ki lorganizasyon swivan, san okenn interferans depi ex-larme lokipasyon, Israel, ubyin so alye, USA, Lerop ek diktatir Arab, me avek reparasyon par tu seki finn komet zenosid u finn konplis ladan, dapre lalwa internasyonal.
Muvman Liberayson Nasyonal Palestinyin (Fatah)
Muvman Rezistans Islamik (Hamas)
Fron Popiler pu Liberasyon Palestinn (PFLP)
Fron Demokratik pu Liberasyon Palestinn (DFLP)
Muvman Palestinyin Jihad Islamik
Parti Lepep Palestinyin
Fron Lalit Popiler Palestinyin
Muvman Linisyativ Nasyonal Palestinyin
Fron Popiler pu Liberasyon Palestinn (Komandman Zeneral)
Linyon Palestinyin Demokratik (FIDA)
Fron Liberasyon Palestinyin
Fron Liberasyon Arab
Fron Palestinyin Arab
Lavangard Lager Liberasyon Popiler (As-Sa’iqa Forces)
* * *
10em pwin Plan Trump dir:
"10. Enn plan devlopman ekonomik Trump pu rekonstrir ek dinamiz Gaza pu kree par ek elabor enn panel exper ki finn ede met dibut sertin lavil modern mirak prosper dan Mwayin Oryan. Plizir propozisyon reflesi investisman ek lide devlopman pasyonan ki finn elabore par grup internasyonal byen intansyone, e pu konsidere pu sintetiz sekirite ek lankandreman guvernans pu atir e fasilit sa investisman ki pu kree lanplwa, oportinite, ek lespwar pu fitir Gaza".
Enn plan rezonab ti bizin dir:
10. Nuvo Guvernman Palestinyin sa 14 lorganizasyon la pu deside lor so prop plan devlopman.
* * *
11em pwin Plan Trump dir:
"11. Pu etablir enn zonn ekonomik spesyal, avek tarif preferansyel ek tarif akse ki pu negosye ar peyi partisipan."
Enn plan rezonab ti plito bizin dir:
11. Nuvo Guvernman Palestinyin avek 14 lorganizasyon pu desid lor so plan devlopman.
* * *
12em pwin Plan Trump dir:
"12. Pa pu fors personn kit Gaza, e seki ule kite pu lib pu fer li ek lib pu returne. Nu pu ankuraz dimunn pu reste e ofer zot enn lokazyon pu konstrir enn meyer Gaza."
Enn plan rezonab ti bizin plito dir:
12. Tu dimunn Palestinn pu ena drwa liberte muvman, kuma tu leres dimunn dan lemond, servi zot paspor Palestinyin ki pu livre par nuvo Leta Palestinn. Pa pu fors Israelyin pu kit Israel, e seki swete pu kite pu lib pu fer li e lib pu returne. Tu kolon pu imedyatman evakye later ki zot finn kokin.
* ** *
13em pwin plan Trump dir:
"13. Hamas e lezot faksyon dakor pu pena okenn rol dan guvernans Gaza, direkteman, indirekteman, ubyen dan lezot form. Tu terer militer, e infrastriktir ofansiv, inklir tinel, ek fasilite prodiksyon zarm, pu detrir e pa reprodwir. Pu ena enn prosesis demilitarizasyon Gaza su sipervizyon moniter indepandan, ki pu inklir fer zarm dan enn fason permanan inserviab atraver enn prosesis dezaktive kinn tom dakor, e ki ena sutyen enn program lavant ek re-integrasyon finanse onivo internasyonal. Nuvo Gaza pu konpletman angaze pu konstrir enn lekonomi prosper e pu koexiste anpe ar zot vwazin."
Enn plan rezonab ti kapav plito dir:
13. Israel e Lotorite Palestinyin tom dakor pu pena okenn rol dan guvernans Gaza, direkteman, indirekteman, ou dan lezot form. Tu infrastriktir Israelyin militer, terer ek ofansiv, inklir dronn e fasilite prodiksyon zarm, pu detrir e pa reprodwir. Pu ena enn prosesis demilitarizasyon Israel su sipervizyon observater indepandan ki pu inklir fer zarm dan enn fason permanan vinn non-itilizab atraver enn lakor pu enn prosesis dezaktive e sutenir par Nasyon Zini. Tu pu verifye par observater Nasyon Zini. Israel pu konpletman angaze pu batir enn lekonomi prosper, pasifik ek koexistans pasifik avek zot vwazin.
* * *
14em pwin Plan Trump dir:
"14. Partner rezyonal pu donn garanti pu asire ki Hamas, ek bann faksyon, konform zot avek zot obligasyon ek ki Nuvo Gaza pa poz okenn menas pu so vwazin ubyin so pep."
Enn plan rezonab ti bizin plito dir:
14. Nasyon Zini pu donn enn garanti pu asire ki Leta Israelyin an konformite avek so obligasyon dapre lalwa dekolonizasyon ek ki Nuvo Israel pa enn menas pu so vwazin ni so pep.
* * *
15em pwin Plan Trump dir:
"15. Leta Zini pu travay avek partner Arab e internasyonal pu devlop enn Lafors Stabilizasyon Tanporer (ISF) ki pu imedyatman deplwaye dan Gaza. ISF pu antrenn e furni sutyin pu siport lafors polisyer Palestinyin apruve dan Gaza, an konsiltasyon avek Zordani ek Lezip ki ena gran lexperyans dan sa domenn la. Sa lafors la pu solisyon sekirite intern alonterm. ISF pu travay avek Israel ek Lezip pu ede pu sekiriz zonn lor frontyer, ansam avek lapolis kinn gayn nuvo formasyon. Li krisyal pu anpes minisyon rant dan Gaza e pu fasilit flo rapid e sekirize marsandiz pu rebatir e revitaliz Gaza. Bann parti pu tom dakor lor enn mekanism de-eskalad."
Enn plan rezonab ti bizin plito dir:
15. Pu ki Lasanble Zeneral Nasyon Zini konturn abi drwa veto USA, de-tyer mazorite pu pas enn Rezolisyon Spesyal pu met dibut enn Lafors Internasyonal Proteksyon pu asire, par mwayin militer par Leta manb UN, ki Israel respekte so obligasyon pu retir so lafors lokipasyon ilegal, aret leta desyez Gaza, e respekte (nu) plan 20-pwin ki respekte lalwa internasyonal dekolonizasyon.
* * *
16 pwin Plan Trump dir:
"16. Israel pa pu okip u anekse Gaza. Kan ISF etablir kontrol e stabilite, Lafors Defans Israel (IDF) pu retir li baze lor prinsip, letap e eseans ki liye avek demilitarizasyon ki pu tom dakor ant IDF, ISF, garan, ek Leta Zini, avek obzektif pu sekiriz Gaza ki pu nepli enn menas pu Israel, Lezip, u so sitwayin. Dan lapratik, IDF pu progresivman remet teritwar Gaza ki li okipe avek ISF, dapre enn lakor ki zot pu fer avek lotorite tranzisyon, ziska ki zot retir zot konpletman depi Gaza, exepte enn prezans sekirite ki pu reste ziska ki Gaza sekirize kuma bizin kont menas terer ki kapav relev latet."
Enn plan rezonab ti kapav plito dir:
16. Israel pu respekte lalwa internasyonal kan li pe aret so lokipasyon Palestinn. Sa pu kontrole par Lafors Proteksyon Internasyonal UN. Israel pu forse pu kree lor so teritwar enn zonn sekirite ki pu res enn zonn tanpon pu protez tu rezyon Palestinn.
* * *
17 pwin Plan Trump dir:
"17. Dan ka ki Hamas retard ou rezet propozisyon kinn mansyone lao, inklir sa gran plan loperasyon led, sa pu aplike dan rezyon libere depi terer ki IDF finn remet ISF."
Enn plan rezonab ti bizin plito dir:
17. Dan ka ki Larme Lokipasyon Israelyin (IDF) retard inplemantasyon so retre depi Gaza ek settlement, ek depi Zerizalem Les, Lafors Proteksyon Internasyonal pu intervenir.
* * *
18em pwin Plan Trump dir:
"18. Pu etablir enn prosesis dialog inter-relizye baze lor valer tolerans ek ko-ekzistans pasifik pu sey sanz mantalite ek narativ Palestinyin ek Israelyin par met lanfaz lor benefis ki kapav gayne depi lape."
Enn plan rezonab ti bizin plito dir:
18. Lalwa internasyonal pu respekte, liberte konsyans institye preferableman otur institisyon sekilye, e, apartir asterla, pu atann depi Leta Israelyin, tu lorganizasyon Israelyin ek individi, desans imin elemanter.
* * *
19em pwin Plan Trump dir:
"19. Amezir ki redevlopman Gaza avanse e kan program reform PA pu met anpratik fidelman, lerla kondisyon kapav pu finalman anplas pu uver simin kredib pu oto-determinasyon e kreasyon Leta Palestinyin, seki nu rekonet kuma aspirasyon Lepep Palestinyin."
Enn plan rezonab ti bizin dir:
19. Amezir ki Palestinn etablir so prop demokrasi ek lankadreman pu rekonstriksyon so lekonomi ek sosyete, espesyalman dan Gaza, e avek eliminasyon progresiv seki apel “Lotorite Palestinyin”, instriman Israelyin, ki pu dezintegre, kondisyon pu finalman anplas pu enn simin kredib pu Leta Israelyin kumans azir kuma enn Leta normal, avek frontyer defini ek sitwayin, kuma tu Leta san kriminel, ni eksepsyonalism kolonyal ki perpetye limem.
* * *
20em pwin Plan Trump dir:
"20. Leta Zini pu etablir enn dyalog ant Israel ek Palestinyin pu tom dakor lor enn lorizon politik pu koexistans pasifik ek prosper."
Enn plan rezonab ti bizin plito dir:
20. Si Palestinn dispoze, li pu deside, atraver so nuvo Guvernman indepandan kinn forme par 14 lorganizasyon politik rezistans, swa pu apros Israel pu diskisyon lor fitir lorizon politik pu koexistans pasifik ek prosper, swa dan enn ubyin de Leta. Li kapav atann ziska apre so premye eleksyon pos-lindepandans. Dan ninport kadfigir, ubyin mem san sa kalite diskisyon la, Israel,dan enn fason u enn lot, kapav lerla aspir pu pran enn sime ver fini ar so stati kuma enn antite paria, bandi, ilegal, profondeman kolonyal.
