Lalit Anti-inperyalis Zordi – dan kad enn Zenosid par Israel
02.10.2025
Lalit anti inperyalis finn gayn enn nuvo dinamik. Zordi zenn ek klas travayer diferan pei lemond finn inifye dan lalit kont zenosid Israel-USA pe perpetre dan Palestinn. Zot finn desann lor lari pu dir Free Palestine, Liber Palestinn! Zot finn mobilize deryer enn program ki finn pran form. Dan Moris, tu sindika e buku lorganizasyon finn konstaman proteste ansam ar LALIT kont zenosid, azir lor baz enn seri deklarasyon komin. Li posibleman enn re-nuvo internasyonal.
Partu dan lemond, lalit kont inperyalis ki ti byin bese, finn re-leve. Enn program finn pran nesans: anti-inperyalis finn klarifye pu enn nuvo zenerasyon. Li inklir lalit kont lokipasyon, lalit kont militarism ek kont lager, lalit kont aparteid ek dominasyon kolonyal, lalit pur dekolonizasyon e pur laliberte. Tusala finn inifye otur lalit anfaver liberasyon Palestinn depi zug kolonyal.
Dernye 2-an nu finn truv enn mobilizasyon internasyonal san relas. Pa finn truv sa depi lontan.
Finn ena imans manifestasyon ek lezot aksyon, inklir lagrev travayer, aksyon direk kont lizinn zarm e kont bato ki sarye armaman ver Israel. Manifestasyon ek lezot aksyon finn baze lor platform kler: aret zenosid e aret lafaminn delibere dan Gaza, pu aret masak, atrosite e destriksyon Israel pe perpetre an-direk divan medya, avek ful baking Lamerik e konplisite UK, Lalmayn, Lafrans e lezot pei Lerop, e fini avek lokipasyon Israel enn fwa. Dimunn finn swiv rezistans dan Gaza, aksyon par enn parti politik dan Liban apel Hezbollah, aksyon par Yemen – kont larme imans Israel ansam ar so baking Leta Zini e Gran Bretayn.
Seki pe rasanble tusa miltip lorganizasyon ek aktivis dan lemond se pu aret zenosid, aret lokipasyon e aret kolonizasyon dan Palestinn ki pe dire plizir deseni. Aksyon partu dan lemond li otur enn program.
Asterla-mem lemond pe kapav swiv an-direk aksyon kolektiv Gaza Sumud Flotila, enn flotila enn 50 bato ki pe diriz ver Gaza pu kas blokis Israel. Sa flotila la, li reprezant kilminasyon aksyon 4 muvman, inklir enn dan lekel trwa militan LALIT ti inplike, Global March to Gaza. E zordi nu pe swiv an-direk kuma Israel servi represyon kont tu aksyon solidarite ar Palestinyin.
Blokis Gaza li pa nuvo.
Anfet depi 1991 pandan Premye Intifada, gran sulevman pasifik lepep Palestinyin, Israel ti kumans restrenn liberte muvman Palestinyin ant Israel e teritwar okipe e alinteryer teritwar okipe. Lotorite militer Israel ti inpoz enn sistem permi pu tu Palestinyin pu zot sirkile. An 2006 apre viktwar Hamas dan eleksyon zeneral dan Palestinn, Israel finn inpoz enn blokis zeneral. Li finn intansifye leta-syez, par re-ser tu pasaz par later, dan lezer e lor lamer Gaza, pu anpes o-maximem, rantre lib marsandiz e dimunn.
Gaza ti vinn kuma enn prizon lesyel-uver. Gaza ti vinn kuma enn kan konsantrasyon.
Sa pa finn anpes rezistans kont kolonizasyon ni aksyon pu kas blokis kontinye.
An 2008 ena 2 bato Free Gaza Movement ti reysi rant Gaza. Ant 2008-2016, ena 31 bato finn anbark lor vwayaz ver Gaza, 5 finn reysi travers blokis. Me, depi 2010 Israel finn sistematikman intersepte tu bato – enn aksyon ilegal – dan dilo internasyonal. An 2010 enn komando larme Israelyin ti atak bato Mavi Marvara (ki ti form parti enn flotila 6 bato e ki apartenir enn NGO Tirk). Komando Israelyin finn tuy dis manb lekipaz dan sa latak la.
An 2018-19, dan Gaza ti ena protestasyon “Gran Lamars Retur”, enn aksyon pasifik. Larme Israel inn asasinn par santenn Palestinyin.
LALIT, depi so nesans, finn sutenir lalit Palestinyin. Nu finn azir pu gard lor azanda lalit kont lokipasyon e kont kolonizasyon Palestinn. Nu finn persiste pran pozisyon, organiz veye e manifestasyon anfaver lalit Palestinyin. E nu manb finn al Palestinn pu partisip dan lamars internasyonal kont Miray Aparteid Israel finn konstrir otur Wes Benk, dan kanpayn sutyin Palestinyin kont vyolans lokipasyon, pu donn kudme hands-on kan Palestinyin sey rekolte zoliv kan setler ek larme Israel atak zot, e sa lane la 3 manb LALIT ti al dan lamars global ver Gaza, ki finn kilminn dan flotila aktyel. Nu finn met presyon, ansam ar 20 lezot lorganizasyon, pu Ramgoolam al Lasanble Zeneral UN, sutenir enn lafors militer pu kal Israel, propoze par Prezidan Kolonbi. Li pa finn ale, e so Minis Finans ti pran laliyn Oksidantalo-Arab pu rekonet Palestinn, me pa fini ar lokipasyon Israel.
Zordi politik kolonyalis, opresyon e expansyonis Israel pe expoze andirek divan lizye lemond.
Seki pe pase vinn donn rezon LALIT so kanpayn konstan anfaver sanksyon e boykot kont Israel.
Depi so nesans an 1948, politik Leta Israel finn viz pu akapar later Palestinn, expilse ubyin laminn so popilasyon ubyin mem exterminn zot. E Israel finn tultan azir kuma gardyin lintere inperyalis Amerikin dan Mwayin Oryan. Israel, USA ek UK ena enn joynt-venncher kont lepep Palestinyin.
Samem ki zordi Israel ek so alye pe kontiyn fer dan Gaza, dan Wes Benk.
Samem Israel pe fer depi plis ki 75 an avek enn tel inpinite o-kler, presizeman parski USA ek pei Lerop dan NATO, finn donn dirizan Israel kart blans pu azir, finn donn zarm ek inntelijenns.
Anmemtan dirizan Syonist Israel finn tultan ena zot prop proze expansyonist, pu kree enn “Gran Israel”, pu etann kontrol dan larezyon apar invazyon e anexasyon. Zot deza okip enn parti Liban ek Larsiri. Zordi, tulezur zot Liban, Lasiri, Yemen, e zot finn mem fer atak militer dan Liran, Zordani, Lezip, Tinizi, e tu-dernyeman dan pei zot mam-kole Katar. Israel osi servi Palestinyin kuma laboratwar pu teste so armaman e sistem kontrol popilasyon. E li vant li-mem dan so reklam zarm dan lafwar zarm. Limem li enn gran marsan zarm ek sistem sirveyans. Moris deza finn aste teknolozi sirveyans Israelyin pu prizon Bo Basin. Sa bizin arete!
Represyon kont manifestan pro-Palestinn
Guvernman pei Lerop finn aplati zot divan USA. Li inkrwayab me vre. Zot finn vinn sibaltern divan Leta Zini.
Si zordi dirizan UK, Lafrans, Lalmayn e lezot pe met lake pu rekonet enn Leta Palestinn, li par enn melanz ant pir ipokrizi ek lafreyer ki zot lepep devir zot si zot pa fer kiksoz kont Israel.
Anfet zot muv pe plito devye latansyon depi zenosid ki Israel pe kontiyne perpetre, anmemtan ki li enn tantativ dezespere pu sap enn Leta Israel ki an-kriz net. Israel enn sistem opresyon ki an-deklin. Li enn or-lalwa. Li finn perdi tu lezitimite. Li deplizanpli izole. Li pe al bankrut. Li mank solda. Li mank minisyon. E anfet sa bann mem pei la pe kontiyn arm e protez enn Israel ki pe azir pu ki na pena enn leta Palestinn! Zot ridikiliz zot-mem.
Kifer zot refiz boykot Israel, aplik sanksyon e met anbargo zarm kont Israel? Si vremem zot interese ar lavenir Palestinn, zot ti bizin zot-mem avoy navir pu protez Sumud Flotila ki pe azir pu aret Israel aneantir lepep Palestinyin e detrir so later. Zot ti zot-mem bizin avoy bato deger ek avyon deger kont Israel, pu fors led imaniter rantre, e pu fini ar sa lokipasyon ki konpletman ilegal, e dekrete ilegal, depi 18 Septam 2025.
Nu finn truve ziska ki pwin pei Lerop kurbe divan inperyalis USA, ki li lor sutyin pu zot proxi Ikrenn, ubyin pu zot proxi dan Mwayin Oryan, Israel.
Pei Lerop finn servi vyolans kuma zame avan kont manifestan pro-Palestinn. Dan Lalmayn larme finn reprim e aret manifestan pro-Palestinyin britalman. Dan UK lapolis finn aret par santenn manifestan zis akoz zot ena enn sinp pankart ki dir zot sutenir grup “Palestine Action”. Lor zot pankart zot dir, “I oppose genocide. I support Palestine Action”. Lerla polisye bizin rann zot lekor kuyon, aret zot?
Dan Leta Zini, lapolis laba finn azir ar mem vyolans kont etidyan liniversite. Finn ena arestasyon, purswit, e deportasyon. Tusa sa bann rezim kapitalis alafin pe protez Israel, akoz Israel azir kuma zot prop “lapolis” ek “larme” pu defann lintere zot burzwazi dan lasurs buku petrol dan Mwayin Oryan. Li parey pu tu sa rezim Arab diktater ki pa finn azir pu anpes Israel kontiyne so kolonizasyon e mem so zenosid dan Palestinn.
Liberasyon resan Georges Abdallah, militan lalit pu liberasyon Palestinn, apre 41 an prizon dan Lafrans, fer nu rapel kuma Lafrans finn tultan swiv lord inperyalis USA.
Leta Franse finn mintenir Abdallah dan prizon mem kan so prop Lakur ti dir bizin larg li! Kifer li fer enn insanite parey? Parski dirizan Lamerik ti exiz sa.
Nu finn osi temwin limit institisyon UN pu aret zenosid. UN selman osi for ki pei ki manb. E tu sa pei Oksidantal la, zot alye Israel o-fon. Alor, nu salye kuraz sertin pei kuma Sid Afrik ki finn met ka kont Israel divan ICJ e lezot pei dan Grup Lahay ki pe itiliz tu mekanism Lasanble UN kuma rezolisyon Uniting for Peace pu ki ena enn lafors arme internasyonal su UN pu protez lepep Palestinyin kont zenosid e barbari Israel. Me, dan sak pei, kuma nu dan LALIT fer isi, nu bizin fors nu prop pei pu azir irzan.
USA, sant kapitalism mondyal, li an-deklin vyolan
Nu pe viv dan enn lemond pli instab, pli danzere e pli inprevizib.
Kan lanpir USA, sant kapitalist global, rant an-deklin, kan li pe literalman grene divan nu lizye, li vinn plis vyolan, plis militarize e antrenn lemond ver lager e destriksyon.
Anfet kapitalism inkapab prodir enn plan dan lintere kolektif limanite. Li enn sistem kontrole par enn poyne gro konpayni miltinasyonal ki pu fer tu zis pu kapav maximiz zot profi, ogmant zot kapital, san get so konsekans pu imin e lanatir.
Zordi avek Trump opuvwar, USA pe vinn enn plas plis kriyel pu viv. E leres lemond antye riske vinn parey dan prosin 4 an, si nu pa organiz nu politikman pu bare.
Nu pe deza truve kuma Lamerik pe kareman vinn plis fasizant. Mezir Trump finn pran montre sa deriv danzere la. Trump avoy so larme, so zom militer pu azir kont imigran, e kont “lavil” ki li krwar bizin invayir. Li dir “gran lavil Lamerik bizin vinn plas kot larme Amerikin fer so lantrennman pu konba”. Trump finn kareman kup finansman liniversite ki pronn boykot Israel, finn met presyon pu liniversite sispann e expilse zelev ek staf ki anfaver Palestinn.
Angro, Trump finn organize pu reprim e aret opozan pro-Palestinn dan so prop pei, e finn zet bom lor Yemen ek Liran akoz zot sutenir Palestinn.
Pli resan, li finn avoy bom kont ti-bato Venezwela akoz li dir ti ena ladrog abor. Kumsa li finn tuy plizir dimunn abor. Li klerman enn ak ilegal, seki Trump finn fer. Ena enn prosedir. Kan supsonn bato pe sarye ladrog, gard-kot arezonn bato la, fer lafuy, e si truv ladrog, pran li kuma exibit e fer aret lekipaz, purswiv zot Lakur. Anfet Trump pe fer tusa pu akil e destabiliz rezim Venezwela kot ena enn Parti Sosyalis opuvwar, e kot ena petrol an imans kantite anba later.
Aster li pe zet blam lor “lagos” pu asasina Charlie Kirk, enn aktivis pro-Trump, lextrem drwat. Aktivis la ti, anfet, klerman pe vir kont Israel akoz so zenosid, alor ena lezot plas kot ena enn motivasyon pu asasinn li. Sa zafer zet blam lor “lagos”, fer nu rapel nesans Parti Fasis dan Litali an 1921 ki ti atak lorganizasyon travayer, peizan, kominis ek lapres. Parey dan Lalmayn an 1919 fasis ti atak bann kominis ek sosyalis, e an 1933, Nazi met dife dan Parlman lerla blam “kominis”, e kumsa ena enn eleman kle ki permet Nazi pran puvwar. Pu return ar Leta Zini, Parti Demokrat, prinsipal parti lopozisyon dan Lamerik, pena okenn stratezi pu konbat Trump apar fye lor linstitisyon zidisyer (kontrole, dayer, par nomini pro-Trump) e par eleksyon. Avek enn Trump opuvwar, nu pa asire pu ena enn lot eleksyon prezidansyel ni asire dan ki kondisyon fer li. Sel fason konbat fasism li mobilizasyon lamas dimunn otur enn parti politik ki avans azanda pro-klas-travayer. Sa, li marse.
Politik Trump onivo internasyonal se pu prepare pu lager, e pu inpoz lape par lafors militer, e osi par lager komersyal atraver inpoz tarif partu kote, e fer dirizan lezot pei met lake divan li pu negosye dan lintere burzwazi zot prop pei. Ramgoolam ti anonse ki li ti pe met lake pu al Leta Zini pu re-negosye tarif, lerla Trump finn dir o-kler “Dirizan lemond pe met lake pu kiss my ass,” e kartunis inn kumans fer desin. Lerla Ramgoolam ti prefer ekrir enn let
Inperyalis Franse, li osi an-deklin. Mali, Burkina Faso, Nizer, Chad, Repiblik Sant Afrik, Kot Divwar, Senegal finn met larme Franse deor net depi zot teritwar. Zordi Lafrans ena enn prezans zis dan Dibuti ek Gabon, si pa kont so 2 koloni Losean Indyin, Lareynion ek Mayot, ki li finn kokin depi Repiblik Komor.
Lager li enn rezilta expansyonism inneran dan kapitalism
Kapitalis dan diferan pei tultan an-konpetisyon pu konkerir pli gro par marse, pu kontrol resurs matyer brit pli inportan, pu gard kontrol lor rezo sirkilasyon marsandiz ek linformasyon. Sistem kapitalist li rapas. Li gurma. Li oblize fer profi tultan pu ogmant so stok kapital. Li bizin tultan rod nuvo teritwar pu kontrole. Me, bul later pa infini. E, ena enn sel bul later. Ena osi limit lanatir. Li pa inepwizab. Alor, kan kapitalis li bloke, ubyin kan pei inperyalist rant dan spiral landetman, zot panike: swa zot organiz enn ku deta, swa zot bankrut lezot pei la, swa zot sezi dibyin lezot pei (Liran, Larisi, Venezuela, Kiba), swa zot kareman bonbard lezot pei. So expansyon depann buku lor vyolans, lor lafors militer, lor kontra armaman e lor kontra ek tennder pu rekonstriksyon apre lager.
Kan nu get seki pe pase dan Gaza li parey, ena zenosid, destriksyon tu lozman ek infrastriktir piblik, pu expilse Palestinyin e akapar later. Aster zot pe zet baz pu Trump so proze Riviera ki an-kolaborasyon ar kriminel deger Tony Blair, ex-Premye Minis UK ki ansam ar USA ti invayir e detrir Lirak an 2003. Dapre sa proze la, ki ti expoze an-detay dan Washington Post, Tony Blair pu vinn Guverner sipa Visrwa Gaza. Proze la inplik enn konsortyom USA ar enn kapital 100 milyar $US, e ki viz pu deport pre 2 milyon abitan Gaza ver Lalibi, Letiopi, Sudan e konverti Gaza an vila delix, morl ek terin golf pu milyarder! Se sa plan ki Guvernman Moris riske swiv, si nu pa anpes li.
Zordi inperyalis USA pe antrenn buku rezyon lemond ver lager. Mem ena menas lager nikleer. Par exanp, kot ena fwaye konfli, laba ki ena prezans pei ki ena zarm nikleer: Israel ek USA dan Mwayin Oryan ena zarm nikleer; Larisi ek USA dan lager NATO v. Larisi dan Likrenn; Pakistan ek Lind dan Kashmir e otur frontyer; Lasinn ek USA dan Losean Pasifik. Nu pe truv pei Lerop, enn apre lot, ogmant zot bidze militer su presyon USA, ki finn antrenn zot dan lager proxi dan Likrenn e ki pe dire depi 3an deza. Gran Bretayn ek Lafrans ena zarm nikleer, e zot pe rode-mem anpir lager kont Larisi. Zot ogmant bidze militer, kan zot lepep pena reveni ase pu protez zot kont freser dan liver, e nepli ena enn bon sistem lasante.
Zame nu pa finn temwayn bidze militer pei vinn osi elve ki sa, depi lafin Lager Frwad. An 2024 plis ki 100 pei finn ogmant zot bidze militer. Bidze militer dan lemond finn ogmante par 9.4% an 2024. Pu Lerop (inklir Larisi) li finn ogmante par 17%. Pu Israel par 65%, enn ogmantasyon pli elve depi lager 6-zur an 1967.
Guvernman dan buku pei pe fer propagann pu prepare, e kumans abitye zot lepep, pu al ver lager. Dan USA Trump finn mem sanz nom so Minister Ladefans fer li vinn “Minister Lager” – mem pa li ki ena drwa determinn so nom, Kongre ena.
Dan Lafrans guvernman pe prepar so lepep pu abitye ar lager. Enn lartik Canard Enchainé (26 Ut 2025) revel konteni enn let Minister Lasante adrese ar Lazans Rezyonal Lasante dan Lafrans, pu prepar enn gran plan tretman fitir blese lager an-mas dan teritwar Lafrans antye. Ena ziska Mars 2026 pu zot fini planifye kuma etablir ase sant medikal ki pu kapav pran ansarz ziska 500,000 blese lager! Apre sa revelasyon la, Minis Lasante finn sey rasir piblik, dir ki sa enn demars normal pu antisip kriz e konsekans kriz. Enn mansonz. Anfet depi inpe lane ena plan similer dan diferan sfer leta Franse. Enn-de-zan desela ti ena enn konvansyon ant larme ek Minister Transpor pu prepar kuma avoy pli rapid posib solda anmas ziska frontyer, avoy pli vit posib trin minisyon ek tenk lor frontyer e pli lwin.
Tusa ogmantasyon dan bidze militer pe akseler ekrulman demorasi intern pei kuma Lalmayn, Lafrans, UK – ki deza finn truv ekrulman zot lekonomi akoz zot nepli gayn mem kantite gaz natirel ek karbiran depi Larisi.
Vizit resan Trump dan Langleter finn montre kuma Lamerik pe bizin ponp lamone dan lekonomi UK pu li pa ekrule net. Laba Trump finn anons investisman masif plizir milyar dolar depi gro konpayni USA dan lekonomi UK. Parmi ena Blackstone ki pu investi 1,200 milyar dolar US lor 10 an, Microsoft pu inzekte 30 milyar dolar e ena osi Google, Citigroup. Anplis finn ena koze enn proze nikleer konzwin USA-UK.
Tusa pe fer o-dretriman depans dan lasante e lezot servis sosyal. Seki pe antrenn plis inegalite ek lamizer e sa, asontur pe kree kondisyon pu lalit deklas akselere, ki pe provok plis represyon. Li enn moman kot mobilizasyon esansyel, me mobilizasyon lor baz enn program. Protestasyon demas muvman sindikal kont politik losterite dan Lafrans finn mem zet guvernman Bayrou. Me, mobilizasyon bizin kontiyne pu kree enn alternativ politik.
Mobilizasyon internasyonal
Gaza finn vinn santral dan lalit kont inperyalis, setadir sistem kapitalist internasyonal. Zordi Gaza kuma enn busol pu nu dan lalit internasyonalist. Anfet Gaza finn depi kreasyon leta Israel an 1948, tultan enn fwaye lalit dekolonizasyon, liberasyon depi opresyon e lalit internasyonalist. Lider muvman liberasyon kuma Che Guevara an 1959 ek Malcolm X an 1964 ti vizit Gaza.
Finn ena imans mobilizasyon partu dan lemond an solidarite ar lalit lepep Palestinyin. Zenn, aktivis ar lexperyans ek travayer, tu ansam, finn desann lor sime. Dan UK plis ki 5 milyon manifestan finn desann lor lari dan plizir rezyon anmemtan. Finn ena manifestasyon ek aksyon solidarite ar Palestinn lor tu kontinan.
Mobilizasyon anfaver liber Palestinn, e pu aret zenosid dan Gaza, finn pran tu kalite form. Finn ena aksyon deklas, pu blok lekonomi kapitalis. Kuma manifestasyon kot finn paraliz Wall Street, leker sant finansye global dan New York. Finn ena lagrev e aksyon travayer lepor dan Marsey, Barselonn, Genoa, Ostrali, Lamerik, pu refiz anbark-debark materyel militer pu Israel.
Finn ena muvman ennkempmennt dan USA, UK, Kanada, Lostrali, Lalmayn, Laoland.
Etidyan liniversite finn okip zot kempes, instal latant reste e organiz deba, aktivite an solidarite ar lalit dan Palestinn, e lalit dan lemond kont Israel. Ena finn apel li inntifada (sulevman) etidyan.
An 2024 finn ena plis ki 120 protestasyon ennkempment dan liniversite zis dan Leta Zini. Zis dan liniversite Columbia ti ena 50 latant etidyan instale pandan plizir semenn.
Finn ena manif etidyan dan 45 lor 50 leta dan USA. Zot demand ti santre otur aret investi dan konpayni armaman Israel; otur aret zenosid; otur dekolonizasyon e liberte dexpresyon. Zot finn osi konekte ar akademik ek istoryin Israelyin pro-Palestinyin kuma Norman Finkelstein ek Ilyan Pappe, pu invit zot vinn koze lor kempes. Sa muvman etidyan la finn amenn enn politizasyon e radikalizasyon parmi zenn.
Anfet enn parti etidyan depi muvman Ennkempmennt finn kumans zwenn dan rasanbleman politik. Par exanp, dan People’s Conference for Palestinn,(PCP). Dan dezyem konferans PCP an Ut dan Detroit (USA) pre 4,500 partisipan ti reyni, e parmi buku zenn. Li ti enn rasanbleman politik e laba buku militan radikal ti pran laparol anpersonn ubyin par video. Parmi ki ti pran laparol ena Eduardo Martine (manb parti Democratic Socialists of America e lemer Richmond), Arab Barghouti (garson Marwan Barghouti, lider anprizone par Israel) lider Tanzim (grup milis Fatah), Omar Assaf (ko-fondater Fron Demokratik Liberasyon Palestinn - DFLP), Huwaida Arraf (manb ISM ek Free Gaza Movement) ki ti partisip dan Flotila ver Gaza, enn manb Al Aqsa Brigade (ki fek fer 20 an prizon dan Israel e finn libere sa lane la). Manb Progressive International ti osi prezan. Tutlong konferans diferan orater finn fer eloz dirizan ki finn partisip dan lalit arme pu liber Palestinn kuma Leila Khaled (PFLP), George Habbash (PFLP) ek manb fondater Hamas. Sa konferans la ti organize par Palestinian Youth Movement, US Palestinians Community Network e finn enndors par 12 lorganizasyon, inkli CODEPINK, Jewish Voice for Peace. Sa kalite politizasyon la ki pu amenn progre e non pa NGO, ni raliman sosyete sivil sipaki.
Finn ena lamars ver Gaza kordine par Codepink ansam ar grup Global March to Gaza, konvwa kamyon Sumud e bato Madleen. Apre ki larme Lezip finn blok partisipan sa aksyon pu kas blokis Gaza la, sa finn amenn inifikasyon plizir grup ki finn debus lor sa muvman Sumud Flotila ver Gaza ek kanpayn Freedom Flotilla Coalition (FFC) ek Mil Madleen ver Gaza (TMTG).
Aster-mem ena enn flotila 50 bato ki pe diriz ver Gaza. Sa flotila la form parti dan enn regrupman 4 muvman: FFC (ki inklir manb lekipaz Madleen (Greta Thunberg, Rima Hassan depite Lerop), Global Movement to Gaza (ex Global March to Gaza), Maghreb Sumud Flotila ek Sumud Nusantra.
Sannfwala zot buku plis ekipe ar 100 partisipan. Parmi ena zurnalis, lekip legal dan enn bato apel “Shireen Abu Akleh”, activist lanvironnman Greta Thunberg, ex-Lemer Barselonn Ada Colau, akter Irlande Liam Cunningham, Nkosi Zwelivelile Mandela (ti zanfan Nelson Mandela antrot).
Anplis zot ena kuma enn bukliye proteksyon. Ena 16 pei ki finn fer enn deklarasyon komin pu warn Israel ki li pu pey konsekans si li atak bann bato. Ena sirtu plizir sindika travayer lepor kuma dan Genoa ek Barselonn ki finn anonse ki si zot perdi kominikasyon ar flotila plis ki 20 minit, zot pu blok lepor dan Lerop e anpes tu anbarkman ver Israel. Dan lepor Ravenna, Litali, sindika lepor finn reysi fer lemer azir pu blok lavant zarm ver Israel. Protestasyon sindika travayer lepor finn fors lotorite aret 2 kamyon explozif ver Israel.
Dan Laswed, Lafrans, Lagres finn ena mem kalite aksyon travayer lepor. Dan Litali General Confederation of Labour (CGIL) finn apel lagrev demi-zurne dan tu sekter exepte servis esansyel pu fors guvernman sispann tu komers ek lakor korperasyon militer ar Israel ziska aret zenosid ek lokipasyon dan Gaza ek lezot teritwar Palestinyin.
Dan enn Seminar sindika All African Middle East Trade unions, ki regrup sindika Lafrik, ki ti ena 5 Septam dan Kenya, partisipan finn vot enn rezolisyon byin ferm kont zenosid Israel pe perpetre Gaza. Reeaz Chuttoo, reprezantan CTSPP ti prezid Komite redaksyon sa rezolisyon la.
E, kan nu pe ekrir sa lartik la, larme Israel pe arezonn bato dan flotila, enn par enn, pu ki li kontiyn afam lepep Gaza amor.
Me, antretan, flotila finn fini fer so veritab travay: met presyon lor guvernman partu pu azir, e lor lepep partu pu asire ki zot guvernman azir pu STOP Israel-USA dan zot foli kolonyal kriminel.
Moris
Dan Moris finn ena aksyon konstan anfaver lalit Palestinyin. Finn ena aksyon konstan pu aret zenosid.
Finn ena kanpayn lafis, Forum, sesyon Teach-In, rankont Poem pu Palestinn, Mizisyin-Artis pu Palestinn, veye, manifestasyon organize par SOMALP, LALIT, MLF, CTSPP, Olive Resistance, Student for Palestine ek lezot nuvo regrupman.
Me seki pli krisyal, se finn osi reysi inifye 21 lorganizasyon lor enn platform komin pu aret zenosid Palestinyin e anmemtan ferm baz militer USA lor Diego.
Seki pe pase dan Palestinn zordi finn expoz lyin ant baz Diego ek lalit pu liber Palestinn.
Nu finn truve kuma USA finn regrup so avyon bonbardye B-2 pu menas atak Liran ek Yemen, 2 pei ki sutenir Palestinn. Alor nu ena pu ogmant presyon lor guvernman Moris pu retir li depi Trete li finn siyne ar UK kot finn vann suverennte Moris lor Diego Garcia, e kan byin lir trete la, lor totalite Chagos.
Samem travay platform komin 21 lorganizasyon pe fer.
Seki arive dan Palestinn pu determine ki pu arive pli divan.
Internasyonalism Revolisyoner
Sa mobilizasyon internasyonal la anfaver Palestinn montre potansyel pu lalit anti- inperyalist, e pu internasyonalism, pli divan.
Zordi buku lorganizasyon internasyonal revolisyoner pe kumans expann e rekrit nuvo manb.
Enn regrupman internasyonalist Revolutionary Communist International ti fer so Premye Kongre dan Litali sa lane la kot 350 dirizan ti prezan e 2,500 manb ti zwenn onnlaynn. Laba zot finn koz buku lor nesesite plis kordinasyon ant lorganizasyon revolisyoner dan lemond.
Internasyonal Parti Communiste des Ouvriers de France (PCOF) ti fer so 29yem Seminer Internasyonal an Ut dan Ekwador. Alafin zot finn tir enn Deklarasyon kont inperyalism, kont lager, pu drwa lindepandans ek oto-determinasyon pei kolonize. Parti revolisyoner ek lorganizasyon peizan, zenn ek fam depi 8 pei rezyon Lamerik Disid finn siyne.
Katriyem Internasyonal (koni kuma La 4) finn fer zot 18yem Kongre Internasyonal an Fevriye sa lane la dan Belzik. Ti ena 150 partisipan depi 60 lorganizasyon depi 42 pei prezan. Li interesan note ki dan zot text lor sityasyon internasyonal adopte dan sa kongre, li fer mansyon Diego Garcia ek Trete Pelindaba. Ladan zot dir zot anfaver ki International Atomic Energy Association (IAEA) bizin ena sirveyans lor Diego Garcia, kuma LALIT pe revandike depi lontan, pu asire pena zarm nikleer dan avyon, lantrepo ubyin dan navir USA ki tranzit laba.
Zordi lemond plis militarize. Militarism li linstriman dominasyon deklas burzwazi dan sak pei. Samem lafors militer Leta li servi pu reprim mobilizasyon klas travayer.
Lager byin rar li dan lintere travayer. Dan lager inperyalis se travayer ki tuy travayer, pa pu lapatri kuma zot propagann fer kwar me pu lintere burzwazi sak pei inperyalist.
E zordi nu pe travers enn lepok danzere kot si nu pa fini ar lager, lager ki pu fini nu tu.
Lager pu fini konpletman selman kan sistem ekonomik kapitalist baze lor gurmandiz ek piyaz, li-mem, li finn aboli
Dan LALIT nu pe tultan konfront politik klas posedan dan Moris, e nu pe konfront so Leta, enn leta burzwa. Nu pe tultan lye lalit deklas ar lalit anti inperyalis e artikil lalit deklas ar dekolonizasyon. Zordi nu finn met Chagos osant lalit pu liber Palestinn depi politik kolonyal Syonist Israel ek inperyalist USA.
Lalit pu ranvers kapitalism zordi li nepli enn opsyon politik me enn nesesite akoz li reprezant enn menas pu lexistans sosyete imin, li deregle klima, e li enn ris konstan provok lager nikleer ki kapav aneantir sosyete imin.
Nu ena pu prepare pu enn lepok kot ena plis vyolans depi inperyalis e diferan leta kapitalis. Nu bizin prepar nu pu lamonte lextrem drwat e mem fasis. Nu ena pu konsolid nu lyin, e kree nuvo kontak rezyonal ek internasyonal, e sirtu angaz nu lor baz enn Program ki viz lafin inperyalism, abolisyon puvwar burzwazi, isi kuma partu dan lemond, e ki viz kree enn sosyete vremem demokratik, egal ek lib, sel garanti pu byinet imin e lape dirab.
(Baze lor papye AA ek deba apre, dan Kongre LALIT 28 Septam 2025)
