Selman enn Program Koeran anfaver Klas Travayer ki pu Amenn Laviktwar
02.10.2025
Buku dimunn Moris pe aplodi lamas dimunn Nepal ek lamas dimunn Madagascar pu lefet ki zot pe desann dan lari. E zot finn reysi fer Guvernman demisyone dan sak sa 2 pei la. Dan Lalit, nu osi nu aplodi sa kapasite ki lamas dimunn ena pu azir. Me selman, “desann dan lari”, par fer sa tusel, san enn program an-komin lor ki kalite sosyete nu pe rode, li pa ditu enn stratezi. Li plito enn defulman. Li plito furni enn garanti ki swa tu res parey apre aksyon la, swa li kapav anpire – e byin suvan sa finn anfet arive, sirtu kan ena tandans fasizant pe monte.
Kan “desann dan lari” pu tir enn Guvernman san enn program kler ki dimunn pare pu defann an-personn, li kapav mem anplis tu so lezot problem, donn kart-blans pei inperyalist, kuma UK-USA, pu profit enn tel expresyon lakoler-san-refleksyon pu fer tu re-vinn kuma avan, ubyin pli pir. Anfet kan “desann dan lari” san enn platform komin, so fonksyon obzektiv se pu asire ki pena veritab sanzman sosyete. Li vinn kuma enn dife dan kann. Li fer gro gro laflam, lerla li teyn. E li kit lanvironnman mwin propis pu lavenir! Alor, inperyalis kuma UK-USA konn sa, e servi sa kalite “desann dan lari” kuma enn valv dan enn kastrol presyon, ubyin pu met zot “zom”. Ankuraz tu dimunn desann dan lari, deful zot, return travay trankil, get zot lekran trankil.
Fode ena enn prosesis organizasyon lor baz enn program politik ki pe finyole kolektivman amizir azir.
Me, anu get protestasyon dan Nepal.
Par exanp, dan Nepal ti ena enn Guvernman opuvwar, enn parti kominis ki ti koronpi net. Li enn pei kot ena telman lamizer ek somaz agrandisan ki otan travayer Nepale vinn travay isi Moris ki, kuma nu tu kone, pa exakteman enn paradi pu travayer! Tusala pu dir, bizin sanzman-mem laba. Li irzan-mem. Me, sanzman avek ki kalite organizasyon kolektif? Enn sanzman avek ki kalite program pu apre ki Guvernman finn ale? Tultan ena posibilite “pli pir” ki avan la.
Repiblik Moris, kuma nu finn diskite dan Kongre LALIT, li ena so linportans pu UK ek USA akoz zot finn plank zot baz militer lor nu pei, lor Diego Garcia. Sa, zot lintere pu ena enn instabilite insanse an-permanans isi – purvi sulevman popiler napa baze lor enn prosesis organize kote politik! UK-USA zot bi se pu anpes atak kont sistem kapitalist. Zot bi se pu anpes priz puvwar enn Guvernman veritableman sosyalist ubyin kominist, dan sans li dan tradisyon “kominn de Paris 1871”.
Nepal, antan ki pei, ena so linportans pu inperyalist li osi. Diferan depi pu Moris, me kle pu UK-USA. Nepal enn pei ki kwinse zeografikman, san akse lor okenn lamer, ant 2 pei zean: Lind ek Lasinn. E li tus Lasinn, anparti atraver distrik Lasinn apel Tibet ki, li osi, USA finn tultan ena lintere destabilize*.
UK-USA viz “sanzman rezim” partu kot ena enn Guvernman ki pa obeir zot sifizaman avegleman. Dan ka Nepal, manyer ki sa frontyer la finn desine par kolon Britanik, li ti bizar, e li res bizar. Enn militer, enn Britanik nome Sir Henry McMahon, antan ki Sekreter Kolonyal ansarz koloni Lind, ti kareman asize desinn frontyer ant Lind ek Lasinn an 1914. Alor, Britanik ki responsab sa problem frontyer la. Zame Lasinn pa ti tom dakor. Kan Lind gayn so Lindepandans dan tu sa sufrans “partisyon pei”, Guvernman Nehru pa ti ena klervwayans zeopolitik sifizan pu re-negosye frontyer ar Lasinn, ki ti pu tutafe posib. Alor, Nepal res enn pwin feb ki konploter patante kolonyal UK-USA servi ziska zordi. Rapel zot demars konzwin, UK ek USA, sete pu gard seki USA apel zot “full spectrum dominance”, setadir zot ezemoni, zot kontrol total lor totalite lemond – ki nu pe truve o-kler zordi, ansam ar Israel, kan zot pare pu defann Israel zenosider a nerport ki pri.
Fast-forward ziska zordi dan Nepal. Guvernman Nepal ti pe travay depi plis ki 7 banane ar Guvernman Lasinn pu negosye ansam dan kad proze imans kote infrastriktir mondyal pu komers, apel “Belt and Road Initiative” Lasinn. An Kreol, nu kapav apel sa linisyativ Lasinn so “Demars Kurwa ek Larut”. Li inklir enn 150 pei dan lemond! Li inplik, ant-ot, enn lyin teres ant Lasinn, kote Les, ek Lerop, kote Lwes. Li konsern lyin kote gran-gran sime, furnitir elektrisite, partaz dilo, rezo innternet, e lyin simerel – avek bi pu permet komers pezib. Kan li fer sa, sa osi inplik enn zoli koneksyon ant Lasinn avek 2 lezot gran pei, an-okirans Liran ek Larisi. Lamerik, ki obsede ar kree lennmi, inn dir so pli gran lennmi fitir li Lasinn. E kuma nu kone, Liran ek Larisi, sa-mem so 2 gran lennmi aktyel. Lamerik ek Israel fek bonbard Liran. Lamerik ek Angle pe lager ar Larisi, atraver zot proxi, Likrenn – lefet li enn lager proxi finn vinn kler kan ena Some Trump-Putin. Alor, tusala pu dir ki Lamerik ek Angle ena lintere azut karbiran kan zenn dan Nepal fer enn seri manifestasyon kont Guvernman san lorganizasyon sifizan pu ki sanzman politik reyel posib. Kuma li ti deza fer dan Pakistann pu mem zar rezon** e dan Lasiri osi.***
Zordi dan Nepal, apre ki, ariv Zanvye 2023, Lamerik ti’nn reysi deza met enn lipye laba, li pare pu alimant enn manifestasyon ki pena enn program kler apar met Guvernman deor. Leta Zini ti’nn deza inpoz enn imans “donasyon” pu sey anpes ubyin deray ubyin deranz abutisman 7 banane negosyasyon ant Lasinn ek Nepal. Lamas dimunn dan Nepal ti anfet fer enn sulevman pandan sipa 7 an, pu anpes zot Guvernman aksepte sa donasyon Amerikin la. Zot ti truv li larzan sal. Par exanp, Reuters 21 Fevriye 2022 dir guvernman Nepal ti bizin avoy gaz lakrimozenn lor manifestasyon, ki depi 5 an avan sa finn persiste kont Guvernman laba akoz li pe rod pran “lamone sal” ar USA. Enn lazans 100% guvernmantal Amerikin apel Millennium Challenge Corporation (MCC) depi 2017 ti pe sey fer sa don Amerikin la. Ti pu servi pu finansman pu 300 kilomet transmisyon elektrik ek sime, pu sey bar proze Lasinn “Belt and Road Initiative”.
Kot lalimyer ruz inn kumans klinyote pu nu dan LALIT, se ariv Zanvye 2023, USA panike ki linfliyans Lasinn pe agrandi dan Nepal, li avoy enn emiser laba. Li apel Victoria Nuland. Clinton avoy li vizit Nepal pu dres papye laba. Li-mem ki ti organiz ku-deta pu tir Prezidan eli dan Likrenn an 2014. Ki sa madam ete, li? Li enn gran neo-konservater dextrem drwat, ki reprezant sa nuvo fason ki Lamerik fer ku-deta apre ki repitasyon CIA ti fini telman gate ki ti nepli kapav kontiyn servi asasinasyon par CIA. Leta Zini finn kumans servi plito enn zafer apel National Endowment for Democracy (NED), ki met dibut par 2 gran parti politik laba, pu kontrol diferan pei partu atraver seki zot apel “colour revolutions”, ki ule dir furni manifestasyon ki epwiz enn guvernman anplas telman, ki li tonbe, e zot kontrol sa nuvo Guvernman ki zot fini prepare. NED li sirtu anti-kominist, anti-sosyalist. Mme Nuland reprezant lel dir adrwat sa metod fer ku-deta. Nepli bizin fye lor CIA al asasinn dimunn kot lepep vot enn guvernman sosyalist. Lamerik zis donn kas e organiz vizit Lamerik pu ONG, zurnalist dan lapres, reprezantan patrona, kad parti politik ek mem sindika, lerla Leta Zini kan donn kudme tu dimunn “desann dan lari”, fer zot res anplas laba, destabiliz tu, met dife dan enn-de batiman, met presyon lor Guvernman ziska ki li demisyone. E kumsa, zot organiz ku deta e sanzman rezim, san fye lor “fer vilin” kuma CIA ti pe fer.
Alor, finalman Guvernman Nepal aksepte sa kado anpwazone USA valer $500 milyon, ki lepep ti pe anpes zot Guvernman aksepte. Sa ti an Fevriye 2022.
Me, ariv Desam 2024, Nepal ek Lasinn al delavan, siyn zot Trete “Belt and Road” apre 7 an negosyasyon.
Enn mwa plitar, 20 Zanvye, Prezidan Trump sispann peyman tu AID Amerikin, inklir sa larzan MCC la, pu 90 zur. Alor, larzan la kumans sek apartir de-trwa mwa ki deza dan kolimater.
.Sityasyon pu lamas dimunn dan Nepal natirelman kontiyne anpire, kuma partu, e zenn fer enn sulevman – sirtu kont Nepo-kids, ek Nepo-babies – zot ekivalan, “piti Sithanen”, “piti Komiser Dip”, “piti Jagai”, etc. E, Lamerik li, li ena lintere pu sey sanz rezim Nepal. Li finn reysi fer li. Manifestasyon – akoz li pena program ni lorganizasyon – finn al fini dan kikenn al met dife dan batiman Parlman, batiman ki sinboliz demokrasi ki deza ena. E Lamerik reysi met opuvwar enn Ziz kuma Premye Minis! Zis Lamerik kapav inpoz enn tel zafer!
E dan Madagaskar, ki nu truve. Nu pa bizin dir, li enn pei ki form parti dan demars Lasinn “Belt and Road”. Alor, Lamerik ena lintere destabiliz so Guvernman osi. Li atann kan zenn fer sulevman, li alimant li. Guvernman demisyone.
E, Moris, akoz zot baz UK-USA lor Diego, zot ena lintere ankuraz sulevman pu “BLD” an-seri, turn-an-ron an-seri, dan enn fason osi bizar ki fer enn lepep net swiv enn Bruneau Laurette antrene par Special Services Israel, e plitar swiv enn Misie Moustass anonim. E asterla, kan ena nuvo Guvernman eli, mem 60-0, Leta Zini pu truv tutafe normal ki li pu ankuraz protestasyon – protestasyon sirtu ki baze lor lalyans nerport e program nerport – kont sa nuvo Guvernman la.
Kumsa, UK-USA fer so “divide and rule” kolonyal kontinye. Li baze lor enn kanpayn orkestre depi 50 an parla kont form organizasyon ki “politik” – e anfaver form organizasyon NGO finanse depi deor, e form organizasyon flas kuma “sosyete sivil” ubyin “tu sitwayin ansam inklir patrona” ubyin “sitwayin kont non-sitwayin”.
Sa li enn trwazyem lartik baze lor enn eleman dan papye LC pu Kongre LALIT le 28 Ziyet, avek kontribisyon ki manb ti azute pandan Kongre.
* Tibet li enn provins Lasinn ki USA depi lane 1950 finn servi pu destabiliz Lasinn. Program Amerikin ti rule pandan 20 an par so lazans sekre CIA, e ti kut $17 milyon (valer aktyel). Bi formel program CIA an-ekri ti pu fer “political action, propaganda, paramilitary and intelligence operations” ki ti viz “to keep the political concept of an autonomous Tibet alive within Tibet and among several foreign nations.” Departman Defans Leta Zini ti inplike ladan, osi byin ki Departman Defans. Sa destabilizasyon la finn diminye apre ki Nixon ti retablir lyin ar Lasinn an 1972.
E sa destabilizasyon pe re-pran tudernyeman dan enn lot form.
** Avan sa, kan Imran Khan ti Premye Minis Pakistan, li ti pe negosye pu Pakistan dan kad “Belt and Road Initiative”. Natirelman USA inn master-maynd enn sanzman rezim laba.
*** Dapre enn plan alonterm CIA apel “Operation Timber Sycamore” pu zet rezim Bashar al Assad, enn rezim represif-mem, rezim finn ranplase par enn rezim su enn ex-Al Qaeda ki, ziska ler, travay ansam ar Leta Zini ek Israel. Nu gete kimanyer nuvo Guvernman ki UK-USA finn met dibut su Ahmed al-Sharaa azir dan lavenir.
