Global Sumud Flotila: 16 pei donn Israel warning
20.09.2025
Sa semenn la 16 pei finn donn Israel enn warning pu napa servi vyolans ubyin lezot mwayin ilegal kont Sumud Flotila ki pe diriz ver Gaza e pu respekte lalwa internasyonal ek lalwa imaniter internasyonal. Dan sa deklarasyon konzwin zot finn averti Israel kont tu latak kont bato sa flotila la e kont arestasyon ilegal partisipan sa aksyon imaniter la.
Minis Zafer Etranzer pei ki finn siyn sa deklarasyon komin ena Tirki, Katar, Bangladesh, Brezil, Kolonbi, Indonezi, Lairland, Libi, Malezi, Maldiv, Mexik, Pakistan, Oman, Sloveni, Sid Afrik ek Lespayn.
Global Sumud Flotila regrup plizir bato ki pe diriz ver lakot Gaza avek aktivis depi plis ki 44 pei. Zot pe chalennj blokis Israel lor Gaza e sey uver enn koridor imaniter. Sa flotila la li enn inifikasyon 3 linisyativ internasyonal resan anfaver Palestinyin: Lamars Global ver Gaza (kot 3 manb LALIT ti partisipe), Konvwa kamyon Sumud ek Grup bato Madleen ki zot tu ki pe sey kas blokis Israel lor Gaza.
Aksyon Sumud Flotila pe fer dan moman kot Palestinyin dan Gaza, Wes Benk, Zerizalem Est pe sibir agresyon militer e atrosite rezim syonist Israel ar ful baking USA ek konplisite Langleter, Lalmayn , Lafrans. Israel pe kontiyn so lafaminn delibere e zenosid dan Gaza. Zordi lepep dan lemond pe sutenir lepep Palestinn e plizir guvernman pe kumans abandonn Israel. Bizin tret Israel kuma enn leta bandi ek orlalwa merite.
Tutswit Lasanble Zeneral UN bizin pran mezir dirzans pu protez Palestinyin atraver rezolisyon ‘Uniting for Peace’. Moris bizin inisye ubyin sutenir sa linisyativ la (Get Lapel 21 lorganizasyon finn adres PM). Bizin sispann Israel depi UN. Bizin aksantye kanpayn boykot e sanksyon kont Israel e izol li politikman.
