Warning Klas IV pu Guvernman Ramgoolam
08.09.2025
Israel-USA, kuma lizye siklonn, pe pas lor Palestinn. Li grav net. Bann la pe masakre lepep Gaza par expre. Zot pe depeple Gaza pu sezi li. Vis Premye Minis fini dir li “enn krim” sa.
Me, reaksyon Guvernman telman mol ki li konplis. Purtan Leta Moris latet-ot inn depoze dan Ka ICJ, Zizman ICJ vote par Lasanble Zeneral Nasyon Zini Septam 2024 ordonn Israel pu kit tu teritwar Palestinn dan 12 mwa. Deza sa vot la met responsabilite lor tu leta Nasyon Zini pu met Israel deor depi Palestinn antye, Gaza ek West Bank inklir Est-Zerizalem.
Alor, seki bizin la, la, la se Leta Moris zwenn linisyativ pu expilse Israel ek so larme depi totalite Palestinn. Lasanble Zeneral Nasyon Zini met dibut enn “lafors militer internasyonal” pu protez Palestinn. Kumsa kapav aret agresyon USA-Israel. Kumsa kapav aplik enn no-fly zone. Kumsa UNRWA kapav livre led dirzans partu dan Gaza.
Anplis, Lasanble Zeneral UN ena enn mekanism apel “Uniting For Peace” pu konturn veto USA pe abize dan Konsey Sekirite. Vot Lasanble Zeneral pu avoy enn Lafors Militer Proteksyon UN pu Palestinn antye pu ena enn pwa politik. Sa UN Protection Force konstitiye par Leta manb Nasyon Zini pu servi lafors militer pu aret agresyon la. Nasyon Zini inn deza servi sa mekanism la an 1956.
