Sindikalis Senior Nursing Staff: "Ners lemond antye bizin leve, mobilize"
02.09.2025
LALIT finn fer enn rankont avek Rashid Goolamally, Prezidan Senior and Other Nursing Staff Association pu konn so pozisyon lor zenosid Israel kont popilasyon dan Gaza, Palestinn e lor atak nuvo Guvernman lor drwa iniversel pu pansyon 60 an.
Kestyon: Antan ki infermye e usi dirizan sindikal, kan u get bonbardman sivil dan zot lakaz dan landrwa kot zot viv, depi avyon ek dronn Israelyin, e depi solda snayper Israelyin pe tir lor zot, u kone ki savedir anterm sufrans, u kone ki savedir exerse kuma enn ners dan sa lopital ki pe bonbarde par expre. Ki u panse lor sa sityasyon la?
RG: Mwa mo lopinyon kuma enn ners, mo panse ki zenosid ek destriksyon Israel kont lepep Palestinn, kan pe eklat enn lopital, enn lopital ki donn tretman, geri dimunn e sweyn dimunn, si laba-mem, mo kapav dir, dernye resurs enn lepep, e si laba mem pe gayn bom, pe bonbarde, se enn katastrof extraordiner ki zame vi.
Mo ena linpresyon ki militer Israelyin – mo pe refer a solda la, a komandan – zot pa pe rekil divan nanye, e li paret kler e net ki, pu dir ki sa konstitye enn zenosid. Kapav dir li plis ki enn zenosid, li kumadir pe exterminn tu Palestinyin, fer zot disparet net.
Dezyem seki, fas ek enn sityasyon san presedan, mo panse ki pa kapav ki nu ners, tu ners antye lemond, pa kapav res insansib. Nu travay se sweyn dimunn, e asterla dan Palestinn pena mem mwayin pu sweyn blese laba, pa pe gayn medikaman, deza pa pe gayn manze.
Mo panse ki res trankil li pa enn opsyon la, silans li pa enn opsyon, mo panse ners bizin leve antye lemond, bizin pa zis koz-koze, mo panse ki bizin leve, bizin mobilize, e fer seki dan puvwar enn ners, infermye pu fer.
Kestyon: Asterla kan Israel pe inpoz lafaminn lor zanfan, lor seki blese, dimunn ki pena lakaz ek gran dimunn, osi byin ki tu lezot sivil, e pe fer li intansyonelman, planifye an avans e anonse an avans, u, antan ki ners, sindikalis u kone ofon u mem ki sa lafaminn amor la vedir. Tu saki pe arive kut larzan e inplik furniser, e u kone usi ki laplipar seplay sorti depi USA ek pei Europein, ki u pu azute lor la?
RG: USA ek pei Lerop se pei ki swadizan otman sivilize, e ki swadizan ena bann bel, bel valer, kuma zot dir “liberte”, “demokrasi”, “lazistis”. Me, mwa mo panse se enn fasad, e deryer sa bann valer la, zot pare wadire pu fer tu krim posib pu sov zot lintere.
Pu mwa se enn stratezi, zot inn met enn stratezi dibut, pu wadire kapav akapar tu dibyin dimunn ki truv dan sa rezyon la. Li kler e net ki laba, dan Mwayen Oryan, ena buku resurs. Pu mwa mo truve ki li enn lager de resurs sa. Ameriken, Eropein, zot pa pu rekil divan nanye pu ariv zot obzektif. Dayer Lamerik se enn lanpir, Lerop se enn lot lanpir, e lanpir tultan pe fer lager, pe tuye, pe derasinn popilasyon. Byin malere, me nu pa kapav nu, dimunn nu res trankil, bizin leve.
Kan u pe swiv, u pu truve ki lanpir pe grene. Ena bann siyn, e dayer saki zot pe fer, sa exterminasyon, sa atrosite zot pe komet la, samem se premye siyn ki lanpir la pe al an deklin parski zot dispoze tuye, kraze, fini tu lepep pu kapav sov zot lintere. Si lanpir la ti for, lanpir la ti pe prospere, mo pa krwar zot ti pu rant dan sa sime la. Se enn siyn byin mazer ki lanpir Amerikin li an deklin. Mo kapav dir enn deklin rapid parski, mo ti pu sit enn Angle, Arnold Toynbee, enn gran istoryin Britanik, li ti dir ki lemond finn prodir 11-13 sivilizasyon, e tu sivilizasyon inn disparet lakoz enn sel fakter inportan, se limoralite. Se sa, ki Amerikin ek Eropein fer, se imoralite. Zot pe tuy dimunn inosan, zot pe kokin later dimunn. Nu dakor ki lanpir pe pran enn kurb desandan, me dimunn ki reflesi. Nu, nu pu bizin presipit sa deklin la, pu kapav ena lape.
Mwa mo pe panse, ki nu, nu tu bann pei Non-Alinye nu, la li pa enn kestyon mem nitralite la. La, parski ena krim, ena deplasman enn popilasyon anviron 2,000,000 dimunn dan Gaza. Anplis la, Premye Minis ti bizin azir kuma enn Leta, e ti bizin fer lavwa Moris tande. Enn Premye Minis ti bizin pran enn stenn, dan bi pu dir Amerikin aret backing zenosid Israelyin. Premye Minis ti bizin omwin devlop enn anpati, e sirtu li enn medsin, li ti bizin kone ki apel sufrans enn lepep, li ti bizin pran pozisyon ferm kategorik an faver sa bann dimunn la. Li kler e net sa. Li pena pu per. Kifer bizin per Amerikin, Eropein? Enn Premye Minis bizin dibut pu lazistis, lazistis lokal ek internasyonal.
Mo etone ki Premye Minis pankor pran enn bon stand kan ena sa zenosid la. Si tu dimunn pu res dan silans, pu kontinye ena bann problem.
Kestyon: Ki u panse lor atak ki nuvo Guvernman pe fer lor drwa pansyon vyeyes iniversel laz 60 pu fer li vinn 65 an?
RG: Mwa personelman, mo panse kuma enn sindikalis, mo panse li enn prinsip sakre, wadire kan enn lepep inn gayn enn drwa aki, abitye gayn tel larzan, tel pansyon, tel alawens, ki teknikman pa gayn drwa kupe. Kifer bizin kup sa? Sa ti reprezant welfer dimunn. Tu dimunn dan Moris ti atann ki, kan li gayn 60 an, li gayn so pansyon iniversel. Mo pe panse, pa ti bizin kup sa parski kan pe kup sa, u pe kup bann zafer grave dan leker dimunn ek dan lespri dimunn.
Sa li kree enn fristrasyon, enn mekontantman e mo panse personelman ena enn pri a peye sa.
Ena dimunn dir, “Nu pa pe get popilarite nu. Nu pa pe koz “popilarite” la. Nu pe koz byinet la popilasyon. Kuma u dir u enn “caring government”, u ena bann servo, ena bann teknisyin dan sa guvernman la, u ena 4 partner dan Lalyans la. Zot ti bizin travay zot lespri, fer lapel a tu exper ki ena, mem andeor Moris, pu gete kuma pu rezud sa problem 60-65 an la. Saki zot ti bizin fer, ki pa tro difisil sa, e enn Ramgoolam, ek enn Berenger, zot ti bizin rod ayer sa 2-3 milyar ki bizin la. Mo pa dakor ki pena kas dan Moris, mwa. Ena kas dan Moris. Guvernman ti kapav pey pansyon 60 an.
Mo dir enn Guvernman ki finn eli lor enn baz ki li pu met enn lord, li pu amenn lazistis sosyal, mo panse ki li pa ti bizin fer enn zafer ki kree mekontantman. Enn Premye Minis li kuma enn papa pu enn pei, li ti bizin amenn lazistis. Kuma amenn lazistis? Ti bizin fer bann gran palto peye. Se gras-a nu koperasyon, lepep 1.2 milyon, se sa ki pe permet zot wadire mont lao an fles e prospere. Mo pe pans par exanp MCB, sa kantite milyar ki li tape la. E ena gran aglomerasyon kuma Noel, Rogers ki ti kapav kontribiye inpe plis. Guvernman bizin taxe zot, deza zot gayn buku fasilite depi guvernman. Bizin pran enn tipe ar zot. Pa kup pansyon vyeyes 60 pu al 65 an la.
Mo panse Premye Minis ek so lekip, zot finn al komet enn fopa, malerezman. Fot la inn fini komet. Zot ti kapav repanse. Pena perdi pwin ladan. Lepep inn proteste, lepep inn leve, lepep inn montre so santiman, abe la si u enn Guvernman “caring”, u bizin kontan, u pa bizin fer sondaz nanye, u pe truv sondaz la “live and direct”. Reyni u kabine, dir kuma nu kapav rezud sa problem la. E ena solisyon.
Mo panse guvernman pa ti bizin met li a-do avek la popilasyon.
(Intervyu fer par A.J, pu LALIT)
[Finn ena enn reket pu sanz tit, e redaksyon dakor.(3.09.25]
