KOMANTER LALIT lor Bérenger so parol lor Zenosid
19.08.2025
Dan konferans depress le 12 Ut, zurnalist poz Paul Bérenger enn kestyon:
“Eski u kapav dir enn mo lor Gaza?
“Kuma u resanti u lor seki pe pase laba?
Paul Bérenger reponn:
“Ayo papa! U kone parfwa mo anvi kit Guvernman pu dir tu seki mo panse.
“Kit Guvernman, pa parski Guvernman dan tor, me nu enn ti pei frazil.
“Nu kone kisannla pe menase brit-brit.
“Mo manz ku, manz ku, manz….
Me, set-enn krim!
Li pa enn mo for. Li enn ‘krim’ seki Israel de Netanyahu pe fer dan Gaza dan Palestinn.
“Li enn krim.
“Orib.
“Zot pa ti pu kapav fer sa krim la san lapwi intel, intel.
“Mo aret la parski kot nu ete la, Nu ti pei Lil Moris.”
Parol Paul Bérenger dan so konferans depres 12 Ut merit buku komanter.
Ala enn-de Komanter LALIT, pu kumanse:
1. Lozik Bérenger li leswivan:
Akoz Repiblik Moris tro tipti, tro frazil, li, Bérenger, pena liberte dexpresyon. Li enn lider politik ki pena drwa uver so labus. Mem li anvi kit Guvernman pu li kapav koze, li evidan ki li pa pe fer li desito. Alor, li ule dir li enn dimunn ki kareman pena prinsip?
Enn lot enormite li pe konfese: Guvernman aktyel dan lekel li Vis Premye Minis, li pena drwa enn politik etranzer? Repiblik Moris fini aliyn li an-katimini ar Lamerik ek so UK? Ziska enn pwin kot Guvernman Moris refiz dirsi pozisyon Repiblik Moris anver Israel, mem kan Israel pe komet zenosid? Mem kan Israel ek USA pe orkestre enn faminn pu fors expilsyon tu Palestinyin, akumanse par Gaza, depi zot prop later?
Nepli ena politik etranzer?
2. Bérenger kone kisannla pe “menase brit-brit”. Abe nom so nom! Nom zot nom! Kifer res trankil. Dir nu! Lepep Moris adilt. Nu dan enn pei indepandan.
3. Bérenger dir ena “lapwi intel, intel” ki pe permet Israel fer tu so krim. Me, la osi, li pa nom zot nom. Dir nu!
Partu dan lemond tu pei pe andirsi zot stenn kont Israel. Tro lant. Tro tigit. Me, pe pran distans ar Israel. Preske tu pei, mem dan Lerop, pe kareman denons e kritik Israel.
Guvernman Ramgoolam-Bérenger-Subron-Duval, par kont, pe al dan lot direksyon, li.
Li finn anil, kareman anil, “oral submissions” divan ICJ, kot Repiblik Moris ti fini klase dan taymtebl dan enn ka ki konsern presizeman sa politik Israel pu orkestre pu afam lamas dimunn Palestinyin, pu ki zot fwir zot pei.
Li grav.
Answit, “Ministry” Zafer Etranzer finn tir enn Kominike le 13 Ut, enn Kominike pa zis fad, met aryer lor pozisyon Moris, me kareman vander anver Israel-USA.
