Konpran deklin ek lagoni Israel-USA pu kapav aret zenosid aster lamem- Blog No 74

15.08.2025

[Versyon Angle pibliye 3.08.25] 

Tu sa 73 blog ki finn pibliye avan mark enn turnan dan zenosid Israel-USA ki pe vinn deplizanpli kriyel. Kan li pu ariv pli pir? Me paret pena limit dan sa pli pir la! Kuma eski sosyete Israelyin ek Amerikin kapav tolere ki zot solda ek zot zarm pe aneanti Palestinn net! Kuma eski nu dan Moris, nu kapav toler sa, san ki nu kup lyin diplomatik ar Israel? Kuma eski nu kapav aksepte enn baz militer UK-USA lor later Diego Garcia pu lekel nu demokratikman responsab? Kuma nu kapav les US buz enn sumarin nikleer ziska Diego resaman kuma finn rann piblik le Premye Ut*. Kuma eski nu kapav get USA ranz enn nuvo lanbasad kuma enn baz militer dan Moka, tandi ki US pe aktivman sutenir zenosid ki Israel pe komet?

Sak blog kinn ekrir avan, donn nu enn direksyon lor seki nu kapav fer numem, antan ki lasosyasyon u parti politik, e seki nu kapav fer pu bann parti politik dan Guvernman ki kontrol zafer etranzer ede pu aret zenosid. Nu, dimunn dan lemond antye, pe dusman dusman gayn terin kont lalyans Israel-US-UK. Me pa ase vit pu sov Lepep Palestinn depi sa destriksyon inimazinab ek intansyonel la. Alor, nu bizin met presyon pu sanz balans de fors kont sa lalyans la.

Blog zordi pu fuy dan natir deklin Leta Zwif Israelyin ek deklin lamor USA kuma ezemoni mondyal. Nu tu bizin, inklir ou ek mwa, konpran tulede sa fenomenn ki relye la, parski li kapav gid nu lor seki bizin fer pu aret zenosid ki Israel-US pe komet. Dan tu seki nu kapav fer-- ki nu bizin fer? Li usi inportan parski li PA moman pu Ramgoolam al atas nu ubyin nu peyi avek sa bann Leta bandi la—pa zis pu rezon zeopolitik ek moral, osi profon ek vital ki zot ete, ni pu konvenans ordiner, mo fami!

Guvernman Ramgoolam-Berenger-Subron-Duval paret determine pu antrenn nu peyi, pu rezon sipozeman “konvenans”, anpartikilye konvenans ekonomik. Savedir “lamone-disan” pu Diego ki ankor plis atas nu ar Lanpir Amerikin ki pe grene. Ramgoolam pe fer sa, mem kan Lanpir dirize par Trump pe debat ek tom anrwinn kuma ti ariv lepok Lanperer Romin Caligula 2000an desela. Kifer nu bizin tonbe ansam ar lanpir modern Caligula?

Nuvo Guvernman Morisyin pe mem refiz kontinye izol Israel, mem kan Leta Israelyin pe inploze su lidership Netanyahu, Ben G’vur ek Bezalel Smotrich, omwin kuma ansyin Guvernman Morisyin, anfet, ti fer, kan, par exanp, li ti fer sumisyon oral dan ka ICJ, ki lane dernye finn truv lokipasyon Palestinn par Leta Israel ilegal. Okontrer, Ramgoolam finn retir Moris depi lalis peyi ki ti angaze pu fer sumisyon oral dan ka resan divan ICJ kont Israel ki pe inpoz lafaminn lor Palestinyin par anpes led imaniter rantre. Kan nu get inpe lane pli avan, Ramgoolam limem an 2009, kan li ti opuvwar e ki ti ena enn lofansiv mertriye par Israel kont Palestinyin dan Gaza, li ti sispann tu relasyon diplomatik avek Israel, ek ti felisit li pu sa desizyon kuraze la. Kifer pa asterla, kan Israel pe komet aksyon milyon fwa pli pir? E avan sa, so papa, Sir Seewoosagur Ramgoolam, antan ki Premye Minis sa lepok la, ti kup lyin diplomatik avek Israel an 1976. Alor, kifer Ramgoolam pe vande kumsa? Li bizin explik nu sa sanzman dan so politik.

Alor, ala seki nu bizin fer: fors Ramgoolam izol Israel konpletman, e mintenir enn lindepandans otan ki posib depi USA ek so vale Eropein ek alye diktater Arab.

Letan pe sanze. Nu kone. Me, Ramgoolam pe montre enn linyorans total lor la. Li paret inkonsyan divan buku zafer depi sa lepizod li ti gravman malad ar Covid, ki ti menas so lavi. Malgre sa, nu bizin fer li retruv rezon. Li ek so Guvernman bizin truv rezon. Listwar pu ziz zot kuma konplis zenosid si zot pa pe azir kont Israel ek lalyans UK-USA. E anplis, Ramgoolam pu antrenn peyi dan larwinn ekonomik, si li kontinye atas Moris avek sa lanpir US ki pe grene. Lanpir ki pe kolaps zot danzere. Res lwin avek zot otan ki posib!

Premye Parti: Konpran danze Lanpir ki pe grene

Asterlamem Prezidan Franse Macron ek Prins Larabi Saodit Mohamed Bin Salman (MBS) finn lans enn propozisyon konzwin – enn kalite “Plan B” pu aret zenosid parski zot finn kumans truv-kler-kuma-lizur ki “Plan A” Israel-USA pe tom dan dilo. Anmemtan zot pe vinn konsyan ki tulede Leta Israelyin ek Lanpir USA pe kraze. Tu alye Israel ek USA, alye pros ek alye ki pa fyab, pe abandonn pozisyon Israel-USA. Eski li posib ki Ramgoolam pa pe truv sa? Zot pa pe fer sa kuma enn Prinsip, me zis pu sey fer enn tantativ tro tigit ek tro tar pu donn linpresyon zot pe fer kitsoz pu aret zenosid dan Gaza. Aster zot pe opoz lalyans Israel-USA piblikman pu premye fwa dan Listwar.

Wi, nu pe viv dan enn letan azite.

Alor, dan UN, dan prezans Sekreter Zeneral, nu truv Macron, ti-lanperer Napoleonik Lafrans pe ser lame MBS, prins eritye Rwayom Larabi Saodit. Dimunn konn li sirtu pu lefet ki li “finn dekup lekor zurnalis Jamal Khashoggi e li responsab pu disparisyon so lekor”. Sa de dirizan oto-proklame la finn pibliye enn “deklarasyon konzwin” bakle ki pe pretann zot pe koz lor nom tu sort lezot peyi. Sa de lanperer la finn deklare ki zot pe prezant zot Plan B “an asosyasyon avek prezidan zot grup travay”, ki zot finn liste apre sa deklarasyon la. Anfet lalis la pa lir kuma “grup travay”, me plito kuma enn rasanblaz tu kalite diferan obze**. Eski sa bann peyi “an asosyasyon” finn dakor avek propozisyon Bantustan Macron-MBS? Parey kuma rezim Aparteid finn sey tant fer kuma enn dernye manev avan so lagoni? Eski zot finn reflesi avek ki zot pe asosye zot? Ubyin eski sa bann peyi la telman dezespere pu pa rant dan Listwar antan ki konplis Israel dan zenosid li pe komet. Parski zot finn les zot antrene par asosye zot a kitsoz ki difisil pu kwar ki zot ti pu aksepte partisipe? Enn Bantustan pu Palestinyin dan enn Leta Israel arme avek nikleer ki pe kontrol zot?

Eski lezot peyi “asosye” dakor ki Lotorite Palestinn, sa ti-band vander dan lalit rezistans Palestinyin ki azir kuma su-tretan Israel, kapav pran kontrol zis kumsa? Eski Palestinn “bizin kontrole zis par Lotorite Palestinyin”, kuma dokiman la spesifye? Parey kuma “Lotorite” Kaiser Matanzima ti sipoze ete an 1976 dan Bantustan Transkei dan rezim Aparteid Sid Afrik kan John Vorster ti pe dirize? Eski tu sa peyi, ki sa de anperer pe pretann zot “an asosyasyon” avek zot finn rezet deklarasyon komin ki ti fer dan Beijing 23 Ziyet lane dernye. Enn deklarasyon ki ti ini tu 14 lorganizasyon rezistans Palestinyin kont kolonizasyon Israelyin, ek ki kolektivman kapav diriz enn guvernman tranzisyonel e organiz eleksyon? Kisannla Macron e MBS panse zot ete pu sibstitye zotmem pu totalite muvman rezistans Palestinyin? 

Israel ek USA finn rezet totalman sa Plan B la detut fason.

Nu ti kone Israel ek USA pu fer sa.

Alor, eski li ti, eski li, zis enn “Plan B fantom”, apre tu? Enn Plan B ki zame ti ena lot bi apart enn seri mo lor papye pu lider Eropein ek diktater Arab pu zot pa tom dan laont, zis pu kuyonn zot prop pep?

Sa linisyativ la li inportan, dan lesans ki li sinifye ki ti-Napoleon ek Prins eritye mertriye, malgre laparans zot puvwar, oblize zwe rol lera kan bato Israel-USA, Plan A, pe kule.

“Plan A” pu Israel ek USA, viz pu konzwintman bonbard, pu tir obi, asasinn dimunn par snayper, ek anmemtan, pu afam ziska lamor tu sivil Palestinyin. Pu detrir konpletman tu siyn sosyete imin, kiltir e alimantasyon, depi lagrikiltir ziska dimunn zot lakaz, depi lopital ziska sime, depi arsiv ziska restoran, depi lekol ziska mize, depi sistem drin ziska zoo Gaza, depi zardin zanfan ziska distribisyon dilo prop ek sistem stokaz. Tusala. Pu kapav expilse Palestinyin kinn sirviv. Preferableman dan dezer Sinai dan Lezip. Kumsa, ki Netanyahu gayn kontrol lor later, ek Trump gayn kontrol lor kontra pu imobilye pu ranz Rivera Gaza e vann li avek Oligark kuma defin Jeffrey Epstein so rezo trafik-sexyel.

Zot pretann ki samem later Gaza pu bliye seki li finn sibir. Kumadir kapav bliye. Kumadir later la pa pu vinn dan rev dimunn ki viv laba, pu zenerasyon ki pe vini e transform zot rev pu tuzur an enn kosmar osi orib ki sa lanfer vivan ki Israel pe inflize lor Palestinyin ki pe res laba zordi. Later res dan memwar kolektif imin. Par exanp, ou kapav remarke, ki ziska zordi dan Por Lwi, ena enn zardin piblik ki dimunn par instin ek inkonsyaman evite: ti ena exekisyon dimunn esklav an piblik laba pandan kolonizasyon Franse 200 banane desela. Kan ou pas laba, pa fer nanye mem li suvan, ou santi enn vid dan ou pwatrinn. Ou pa mem kone kifer. Later la fer ou leker rapel. Ou resanti enn fiyling dezolasyon, kan ou pe gete vit-vit, evit sertin simin avek enn long supir ki zenerasyon apre zenerasyon transmet. 

Pu Plan A al dan prosin letap, kan protestasyon indiyne popilasyon antye Mama bul later vinn inkontrolab, Israel-US les enn tigit led rantre. Asterlamem, dan faz zot foli satanik, zot fer zot swadizan Fondasyon Imaniter Gaza met enn kalite latrap avek manze ladan. E kan zenn zom mars par milye kilomet pu ariv laba dan lespwar gayn inpe manze pu zot fam, kan zot pe koste pu zwenn laful pu gayn enn kare minn ek lezot zafer, snayper Israel tuy zot. Par expre, sertin zur, zot viz latet sa bann zenn garson la. Lezot zur tir lor zot ches. Lezot zur zot tir lor zot testikil. Parfwa depi zot tenk zot tir lor zot. Parfwa zot larg bom lor zot. Tusala pe arive anmemtan ki zanfan skeletik pe tom malad ek pe mor akoz lafaminn. Alor anmemtan ki zanfan kinn pli afebli mor defin, zot fami bizin anter zot, zenn ki pe lite pu gard zot fami vivan.

Se sa kalite zimaz, ki nu truve lor nu lekran ek protestasyon depi lamas dimunn dan Lafrans ek Larabi finn fors Macron ek MBS prezant zot Plan B. Enn kalite komedi nwar, enn fim ki montre “bon lapolis, move lapolis”. Zot bi prinsipal li klerman pu dekilpabiliz zotmem. Enn travay inposib, sinpleman parski zot kupab. Zot partner dan zenosid ki Israel pe komet. Zame zot finn ferm zot lanbasad Israelyin, ni kup lyin komersyal, ni ofer enn sel avyon deger pu inpoz enn “no fly zone” lor Palestinn kont Israel. Zot bi segonder li enn plan repli, pu met dibut enn Bantustan, Plan B pu Bantustan. Enn lot plan ki kondane pu eswe.

Avek Plan A ek Plan B kinn kondane, Israel pe vinn enn Leta Esek. Zame li ti ena frontyer, ni enn definisyon kler so popilasyon. Alor dan sa fason la zame li ti enn Leta. Anfet tusa letan la, li ti enn “antite”. Enn antite kolonyal Loksidan. Pu kontrol larut “zot” petrol. E aster Netanyahu li andeor kontrol. Frankenstein ki Loksidan finn kree, aster enn mons. Israel kondane. Mons Israelyin fyer ki li finn servi desepsyon ek teroris pu komet asasina teroris kont Hezbollah kuma pinisyon akoz zot pe sutenir Lepep Palestinn. Israel fyer li finn met dibut enn Guvernman pro-Loksidan dan Liban, mem kan Israel pe kontinye okip ek bonbard Liban. Li fyer ki linn reysi fer USA lans so stratezi Pye Sykamor ki finalman finn amenn ranversman rezim Al-Assad, ek instal enn ansyin teroris ISIS kuma lider Lasiri, mem kan Israel pe kontinye bonbard Lasiri kan li ule e okip plis so later.

Me fyerte eksesif vinn avan defet.

E, solda Israelyin zot pa solda me “buse zanfan”. Dimunn parmi zot ki ena enn konsyans ridimanter devlop enn Dezord Stress Pos Tromatik¹. Lezot refiz return dan lafors rezerv militer kuma solda. Tro buku zenn zan pa kapav viv avek kilpabilite. Zot swiside. Sa larme la pa kapav amenn defet Hamas. Hamas pa mem ena enn sel avyon, pa mem enn tenk. Sa larme la pa kapav anpes Houthis dan Yemen bar bato ki pe al furni zarm pu Israel kontinye fer zenosid kont Gazawi. Sa larme la nepli kapav defann kont misil Iranyin. So instalasyon militer finn atake e sibir defet dan lager 12-zur, kan Israel ti atak Liran ek lerla finn sipliye USA pu aret lager la pu li. Sitwayin an gran nomb² pe kit Israel. So lekonomi an rwinn. Lepor apenn pe fonksyone. Rezo aprovizyonnman inn kupe. Me, seki pli fatal li enn lot zafer. Israel fini perdi so kredibilite. Li enn Leta Paria. Li finn azir dan enn fason ki finn detrir limem ek so lavenir.

Plan A ek Plan B finn kondane, sa usi reprezant deklin lant lanpir US ki aster pe intansifye, akselere. Pli gran lanpir ki lemond finn kone asterla an deklin rapid e inkontrolab:

-USA deza rwine.

-Dolar pe deza perdi so rol ilezitim, ki pe kasyet so rwinn anmemtan ki li pe agrave.

-USA finn rant dan enn extansyon militer ki depas so limit: li pa kapav lager kont Larisi u Liran u Lasinn e asire li pu gayne, ankor mwins si li ena pu lager kont tule trwa. 

-USA pe detrir tigit form demokrasi ki li ti ena. Aster la lobi kapitalis tu bor pe diriz li – gro data, gro farmasi, lobi armaman, lobi petrol, ek tusala pe orkestre par lobi pro-Israelyin, ki ena enn baz sosyal Zionis Kretyin, dan mem linye ki espes Joshua Ministri, ek enn pli tipti baz sosyal Zwif Zionis.

-USA pe detrir so prop servis sivil federal.

-USA pe vinn plis represif sak zur.

-Lidership USA pe vinn pli instab, pli fu sak moman.

-USA, kuma Israel, pe met limem dan enn kwin ki pu amenn zis oto-destriksyon- petet lemond antye, eski se so sel opsyon: enn olokos nikleer pe menas nu.

Ekse koripsyon moral

Limaz Lanpir Romin ki pe grene ki finn res sinbolik ziska zordi, se koripsyon moral ek inpinite Lanperer Caligula, mem si so reyn finn tini tini pu plizir syek avan ki sa Lanpir la finalman kolaps. Li kumadir USA pe viv dan enn sa kalite letan la zordi, me tu kitsoz pe akselere. Syek aster kuma mwa, ventenn lane vinn kuma zur, zur vinn kuma lertan, lertan vinn kuma minit ek mem minit vinn segonn.

Asterlamem, enn mega skandal zean menas lye ansam tu problem ant USA e Israel ek UK dan enn gro-tanpet dife: Jeffrey Epstein so rezo trafik sex, avek tu so ramifikasyon servis sekre e politik ki pe expoze, an partikilye dan baz sosyal Trump. Ki ti ete sa rezo trafik sex?

1. Li enn kabal oligark Amerikin siper ris, lider politik ek selebrite, ki ena an komin enn lavi sosyal debos. Kabal la, trafik par milye zenn fam, e pli inportan, par milye zenn tifi lekol, anba laz, sertin osi zenn ki 12an. Sa ti arive depi lane 2002 e inn kontinye pandan apepre 15an. Sa finn arive dan rezidans de lix Epstein dan New York City, dan zil Karaib ki li proprieter, dan so ranch dan Nuvo Mekzik, dan Lond ek dan Pari, ek dan avyon.

2. Parski rezo la inklir pratik ilegal ek pratik abominab – Epstein finn mem anprizone pu enn an ek so partner dan sa krim la e dan lavi, Ghislaine Maxwell finn anprizone pu 20an – paret ki sa rezo la finn servi kuma enn baz pu extorsyon ek santaz raket dan enn anpler enorm.

3. Ena usi lyin avek servis sekre, kuma Mosad servis sekre Israelyin, servis sekre Amerikin ek MI-6 Britanik.

4. Ena lyin avek bann prinsipal politisyin Amerikin, inklir Donald Trump. (Osi byin ki Bill Clinton ek lezot politisyin, selebrite, rwayote Britanik, kat Premye Minis Israelyin, ena ki finn vizit zil notwar Epstein plis ki 30 fwa.)

Lyin Trump

-Trump ek Epstein ti meyer kamarad pandan 10-15an. Alor, Prezidan US Trump konn buku. Li pa exprim okenn regre, ni okenn sinpati pu sa santenn zenn fam ki finn abize par so serk kamarad.

-Trump paret finn zwenn Melania, so fam, atraver Epstein. Par limem, sa pa vedir gran soz, me sa kapav truble Trump.

-Fam ek tifi ki Trump ti anplwaye dan so Spa Mar-o-lago finn fini par vinn anplwaye Epstein. Trump resaman inn dir, “Epstein finn kokin zot”, dan so langaz esklavazis. Sa lyin pa ti pu bon, pu dir mwins posib, si li ti sistematik.

-Trump ti promet so baz ki li pu rann piblik tu fayl e fim Epstein, me li finn sibitman refize fer li.

-Trump so baz sosyal Fer Lamerik Gran Ankor pe vir kont li lor sa size la. Tifi lekol ki finn viktim dan klas sosyal baz Trump, zot suvan tifi mizer, avek lapo ‘blan’ e dan klas travayer. Baz Trump blese ek amerde.

-Trump semenn dernye finn kumans prepar enn diyl avek trafikan sexyel Ghislaine Maxwell dan so selil prizon.

Sa kalite kriz politik riske fer enn dimunn osi instab ki Donald Trump desene dan enn fason ki pu plis akseler kolaps Lanpir Amerikin. Si servis sekre Israel inplike konpletman dan sa raket la, zot usi, pu akseler zot prop desennman destrikter. Ankor pli pir, enn parmi sa bann fu ki lider sa bann antite ki pe dezintegre la, kapav tuy nu tu dan enn Armagedon Nikleer.

Anze byin ot. Supson swisid frekan: Jeffrey Epstein limem finn mor dan sirkonstans inexplikab; finn truv lekor Robert Maxwell papa Ghislaine ki enn eminans griz Israelyin pe flote dan lamer pre avek so yach; Jean Luc Brunel, enn proxenet enn lazans mannkin an partnarya avek Epstein finn pandi dan prizon dan Lafrans; Konseye Bill Clinton Mark Middleton, ki finn fer Epstein vizit White House, finn pandi limem; Thomas Bowers, exekitif Labank Deutsche, finn pandi apre ki Labank finn bizin pey enn som enorm viktim Epstein. Pli boner sa lane la, nu finn aprann ki viktim kuraze Virginia Roberts Giuffre finn komet swisid dan Lostrali.

Sa kabal ki finn demantele kan li finn expoze an piblik, pe alimant oto-destriksyon Lanpir mondyal USA, ek kontrol Israelyin dan Mwayin Oryan.

2em Parti : Ki nu bizin fer? Ki nu bizin Fer Guvernman Fer?

Nu bizin konpran pu ki kan nu azir, nu azir avek sazes. Nu bizin azir, e pu azir pu fer Guvernman azir. Tu dimunn so aksyon konte. Sak peyi so aksyon konte.

Alor, seki nu bizin depi Guvernman Jugnauth aster:

-IZOL IZRAEL ASTER-LAMEM!

-Moris bizin zwenn dan ka ki Lafrik Disid inn mete kont Israel pu zenosid dan ICJ!

- Gard distans depi Lanpir US ki pe grene!

Se seki nu bizin fer.

Nu finn avoy enn let uver date 25 Ziyet pu Premye Minis Ramgoolam ki konsern seki li bizin fer. Repons ki finn gayne-- zet responsabilite lor Minis Zafer Etranzer. Pons Pilat finn lav so lame. LALIT pu kontinye rod repons Minister Zafer Etranzer.

Kuma nu kapav fer Premye Minis azir kuma li ti bizin?

Lindsey Collen

pu LALIT 

Tradiksyon Cc avek kudme AA

*Scott Ritter finn anons sa dan seri video “Judge Napolitano” lor You Tube kot Andrew Napolitano, ansyin ziz partaz so analiz ziridik e politik e kot li usi intervyu exper legal, ansyin ofisye Guvernman, analist militer, ansyin azan sekre ek ekonomist liberal.

** Tit la e premye paragraf dokiman ki ena 7 paz, depi tex konple sa swadizan “Deklarasyon New York” [kuma finn pibliye lor WAFA, Lazans Linformasyon Palestinn, lazans informasyon Lotorite Palestinyin ki kontrole par Leta ofisyel] “ Prezidans Konzwin Konferans la: Repiblik Lafrans ek Rwayom Larabi Saodit”, “An asosyasyon avek prezidan grup travay: Repiblik Federe Brezil, Kanada, Repiblik Arab Lezip, Repiblik Lindonezi, Lairland, Repiblik Litali, Zapon, Rwayom Hashemit Zordani, Leta Mekzik Ini, Rwayom Norvez, Leta Katar, Repiblik Senegal, Rwayom Lespayn, Repiblik Latirki, Rwayom Ini Grand Bretayn ek Irland Dinor, Linyon Eropein ek Lalig Leta Arab. …”

¹  PTSD (Dezord Stress Pos Tromatik) li enn leta sikolozik kot dimunn truble apre ki li finn viv e truv enn evennman tromatizan kuma enn zenosid, enn lager, explozyon bom nikleer, enn pandemi, enn lokdawn, enn agresyon, bagar rasyal, kalamite natirel, enn aksidan …

²  Dapre Biro Statistik Santral ki site dan www.haaretz.com apepre 60,000 sitwayin finn kit Israel lor enn popilasyon otur 10 milyon.