Kifer Trump pa kapav fer Skandal Epstein disparet – Baz MAGA ena lintere de klas pu expoz li
31.07.2025
[Tradiksyon lartik versyon Angle ki ti pibliye le 19 Ziyet 2025]
Apre ki li finn promet pu pibliye fayl Jeffrey Epstein avek enn lalis dimunn infliyan ki supsone kupab agresyon sexyel, Prezidan Donald Trump ek so Atorne Jeneral finn lerla anonse ki sa kalite dokiman la pa existe, e ki donk nanyin pa pu pibliye. Baz pro-Trump “Refer Fer Lamerik Gran” (MAGA) ti telman ankoler, zot inn vinn isterik e finn denons Trump telman for, ki Trump finn bizin fer voltfas.
Yer 18 Ziyet, Trump finn fer lapel Departman Lazistis pu fer enn zafer rar par divilge prev sele depi Gran Ziri dan ka lakur kont Epstein. Yer Trump finn purswiv Zurnal Wall Street pu $10 milyar akoz Lagazet la lavey la finn dir ki Trump finn avoy enn kart indesan Epstein pu so laniverser inpe lane avan.
Ki linportans zistwar deryer sa bom politik explozif la?
Premyerman, li expoz kote som enn lanpir ki pe grene. Lanpir Amerikin li sibitman expoze kuma enn Leta ki pe puri, dan so sant.
Ena enn ta teori Konspirasyon. Inyor zot. Kestyon li, eski size la li inportan pu politik dan diferan fason osi byin ki li expoz puritir kosmar Amerikin? Si wi, dan ki fason?
Zistwar la konsern puvwar, zom byin ris ek dimunn dan politik dan enn rezo sosyal ki inplik kamaradri ek diyl komersyal, inklir lavant zarm, dan gran vila dan USA, Grand Bretayn ek lor Zil Virgin. Sepandan, evennman la inklir inplikasyon dan meyer sityasyon, eskapad ek konportman sexyel obsenn dan lekel zom pwisan inplike, zot mem zot onte e pe fer tu seki posib pu kasyet sa depi zot ser, mama, tifi ek zot fam, anplis ‘dimunn an zeneral’. Me, sa li zis seki nu pe truve lao-lao. Pu ki sa inn kapav arive, ena vyolans sexyel byin grav, agresyon sexyel, mem vyol lor fam dan klas travayer ki “aktris segonder”, u viktim sa kalite terin zwe inpitwayab. Finn antrenn par santenn fam ek duzenn tifi miner dan sa serk abi sexyel. Alor, rezo Epstein li inportan pu nu konpran kuma enn manifestasyon grav enn sistem patriarkal vyolan e zeneralize osi byin ki enn sistem patriarkal kot ena abi sistemik fam ek tifi.
An retur, sa kalite loperasyon ilegal explwatasyon sexyel inevitableman uver sime pu spekilasyon lezitim ki li enn kuvertir pu loperasyon santaz lor enn lesel indistriyel. Santaz li enn fason prinsipal ki koronp politisyin dan USA, e ki li opere kuma enn prolonzman koripsyon par lobi sistem kapitalis. Si brayb (finansman eleksyon ek lobi) li karot, lerla santaz li baton.
Alor, li enn size anti-patriarsi ek size santaz.
Anplis, li kapav enn size ki konsern servis sekre. Li kapav samem so lasurs.
Ena prev sirkonstansyel ki tusala kapav depi kumansman ena lyin ar servis sekre, inklir CIA, Mossad Israelyin ek MI6 Britanik. Pu pran enn lexanp, dapre rapor Zurnal World Street an 2023, zot inn gayn enn kalandriye ki montre, ek personn pann niye, ki Ehud Barak ansyin Premye Minis Israelyin (ant 1999 ziska 2001), ki ti usi vis Premye Minis (ant 2008 ziska 2009) e ankor pli inportan kan li ti Minis Defans (2007 ziska 2013), depi so propriete dan Florid ek New York inklir enn moman an 2014 kan li ti ansyin Premye Minis Israelyin, ti pran avyon avek Epstein dan so jet prive depi laplaz Palm Beach ziska Tampa. Apre sa Epstein finn al New York.” (sitasyon depi lagazet Times of Israel, 4-Me-2023). Li azute, “Dapre rapor, Barak finn usi zwenn avek Epstein tule mwa pandan preske enn-an, kumanse an Desam 2015.”
Antuka, ka Epstein pe refiz les Donald Trump Prezidan US trankil. Kifer? E ki ete sa ka la?
Dan muvman “Fer Lamerik Gran Ankor” ena prinsipalman klas travayer marzinalize ek klas tit-burzwazi irbin, dan landrwa kot ena fermtir masif lizinn ek dezespwar ki sa finn amene avek li. Sa baz sosyal la finn fidel anver Donald Trump ziska renye so prop “valer familyal” Protestan intoleran e aksepte enn prezidan vilger, enn sovaz patante, ki uvertman pena moral u imoral pu pas lalwa dan lekel zot kwar, kuma par exanp fer lavortman ek maryaz mem-sex ilegal, parmi lezot. Me Trump so kover-ep resan lor fayl Jeffrey Epstein pe fer enn pa tro lwin pu sa baz la.
Sa size la finn tus enn pwin sansib dan lalit deklas.
Li pa konsern zis transgresyon moral ek legal Trump ek so bann kamarad intim kuma Epstein ki pe dimann baz dimunn MAGA avale. Li pa zis aval kulev pu Donald Trump so frask lepase ek plizir so aksyon debos ki suvan devwale. Lanturaz Jeffrey Epstein konsern explwatasyon sistematik par santenn zenn fam ek tifi, zanfan ek ser, sa mem klas sosyal baz MAGA: seki mizer ek suvan zoli, zenn etidyan blan ki al dan lavil pu gayn enn kalifikasyon ek usi rod travay kuma mannkin, artis u aktris, pu kapav pey lwaye ki ser laba ki enn lapey server pa kuver.
Finn swiv zot, pyez e trik zot dan lakaz delix ki Epstein posede dan New York City, dan Palm Beach dan Florid, e finn abiz zot dan Lond ek lor enn lil ki li proprieter dan zil Virgin Karaib. Zot finn abize par zom pli ris ek pli pwisan dan lemond. Epstein finn deklare kupab par lakur an 2008, ek apre so lamor, so partner, enn fam apel Ghislaine Maxwell, ti kondane ek pe fer 20an prizon dan USA parski li finn donn kudme e azir kuma so konplis.
Skandal la finn fer buku tapaz parski Prins Andrew finn exklir depi Lakuronn par Fami Rwayal akoz linn partisip ladan. Lezot zom ki finn nome pu zot lyin avek Epstein, mem si zot pa finn inkrimine, inklir top politisyin kuma Prezidan US Bill Clinton ek Donald Trump, ki ti kamarad pros Epstein pandan 10-15an. Lezot dimunn byin koni kinn nome par lapres meynnstrim inklir Bill Gates, Michael Jackson, mazisyen David Copperfield, akter disgrasye Kevin Spacey, avoka Alan Dershowitz (dimunn pu rapel, ki Leta Israel finn swazir li kuma avoka dan ka Sid Afrik inn mete kont li dan ICJ pu zenosid kont Lepep Palestinn). Ena osi ansyin Guverner Leta Amerikin, Bill Richardson ek ansyin Vis Prezidan Al Gore. Me pena supson kriminel kont sa lalis dimunn la ziska ler. Rapel ki Epstein finn poz kuma enn benefisyer syans ek lar. E enn kalite problem ki suleve dan sa kalite rezo la se ki zot kapav invant rimer lor zom totalman inosan, baze lor lof finansman pu sertin resers ordiner u travay saritab. Enn ‘zonn donb’ prinsipal dan sa ka la, se pu kone kuma exakteman enn Epstein san enn-su finn kapav akimil enn tel larises e propriete prive. So rises inklir lefet ki li proprieter de zil dan Zil Virgin e seki konsidere pli gran lakaz dan Manhattan, azute avek sa enn ranch imans dan Nuvo Mexik, anplis li proprieter rezidans dan Lond ek Pari.
Pu donn lekter enn lide grander sa skandal la, mem si li ankor konsidere misterye, JPMorgan Chase & Co., pli gran labank dan USA, kuma enn Labank ki fasilit trafik sexyel par rezo Epstein. Sa li enorm.
An rezime, Epstein ti kondane an 2008, apre ki linn negosye so santans dapre lalwa Leta parski li finn solisit fam pu fer prostitisyon, inklir miner ek li finn pas 13 mwa dan prizon. Avoka US Alex Acosta, li ti negosye enn lakor lor so santans pu ki pena purswit federal sa lepok la. Plitar li finn demisyone depi so pos dan Kabine Trump an 2019 akoz sa ka la. Dapre Britannica onn-layn Alex Costa finn deklare ki li finn “toleran parski servis ranseynman finn dir li “res lwin” avek Epstein sa lepok la”. Malgre sa, Epstein finn akize lor sarz infraksyon federal grav plitar.
Kan li ti pe atann pu gayn kosyon an 2019, finn truv li mor dan so selil. Mem si linn mor, so lavi pase pankor mor.
Li finn sipozeman pandi dan so selil kan li ti pe atann enn desizyon pu fer aplikasyon konsernan so demand liberasyon su kosyon. Dan enn fason byin similer avek fason ki prizonye pandi par swisid dan selil Moris, sa li pa konvinkan. Kamera ki ti pe filme inn arete pu enn minit dan moman inportan, par kwinsidans. Dapre fami Epstein ek aparaman pa finn dimann prizonye dan selil akote pu donn deklarasyon lor seki zot inn tande e truve sa ler. Lasenn krim lamor pa ti izole. Patolozis byin koni, Dr. Michael Baden, ansyin sef ofisye medikal dan New York, ti dir ki ti ena trwa fraktir dan so lezo hyoid osi byin ki enn kasir dan kartilaz tiroid dan so liku, ki konsistan avek omisid, e pa avek swisid. Etc.
Pli resaman, zenn fam ki ti akiz Prins Andrew, Virginia Giuffre finn usi komet swisid dan Lostrali, enn lot swisid dan sirkonstans ki ase difisil pu kwar.
E byinsir, boper Epstein, setadir papa so partner Ghislaine Maxwell, Robert Maxwell, baron medya kinn perdi kredibilite piblik ek ansyin Manb Parlman Britanik, finn desede dan sirkonstans etranz an 1991 e finn dekuver so lekor pe flote dan lamer apre “ki li finn tonbe depi so bato”. Antan ki enn azan infiltre servis sekre Israelyin, li ti konsidere kuma enn “atu” Israelyin e paret li finn konn Epstein avan ki so tifi desede. Li finn gayn enn fineray Deta, Premye Minis Israelyin Yitzhak Shamir, Prezidan Chaim Herzog, sis u set aktyel e ansyin sef Servis Ranseynman Israelyin, osi byin ki lezot “notab” ek politisyin dan Guvernman ek parti lopozisyon ti osi prezan.
Alor, tu seki finn idantifye lao byin dramatik, ek politikman byin inportan – personn pa kone exakteman kuma, ubyin kifer. Ubyin nu pankor kone.
Surs konservater me fyab, Radyo Piblik Nasyonal (NPR) dan USA, 4-Zanvye 2024, finn rezim sertin evennman kumsa, exkize pu sertin repetisyon:
- 2019, Sekreter Departman Travay dan US, Alexander Acosta, ki ti nome par Trump, finn demisyone sibitman. Dapre Departman Lazistis, Acosta finn zwe enn rol “pivo” kan li ti pe travay kuma Atorne Jeneral pu US. Li ti negosye pu permet Epstein evit gayn sarz federal “trafik sexyel”. Acosta finn refize admet ki li finn fer seki pa bizin.
- Novam 2021, Jes Staley, sef labank Barclays baze dan UK, ti demisyone apre ki finn revele ki li finn mintenir lyin pros avek Epstein apre ki Epstein finn kondane pu krim sexyel an 2008. Dan enn rapor an Me 2023, ofisye Britanik finn konklir ki Staley finn azir dan enn fason “iresponsab ek avek enn mank integrite” kan li finn kuyonn lotorite lor so lamitye avek Epstein. Staley finn nye ki li finn komet kik deli.
*An Fevriye 2022, Prins Andrew finn tom enn lakor avek Virginia Giuffre. Li finn dir dan dokiman lakur ki li “regret so lyin avek Epstein” e aksepte pu fer enn “donasyon konsiderab” pu Lorganizasyon Saritab Madam Giuffre (kree an 2015) ki donn enn platform pu drwa viktim sirvivan trafik sexyel. Sa linformasyon la li sorti dan enn dokiman ki finn fayle par David Boies, avoka Giuffre. [ Giuffre finn komet swisid trwa mwa desela.]
* An Me 2023, Labank Deutsche finn dakor pu pey $75 milyon pu regle litiz avek viktim Epstein kan labank la ti ziridikman responsab pu lefet ki li finn “sutenir, fasilit e dan lezot fason ofer servis pli kritik pu lorganizasyon trafik sexyel Jeffrey Epstein”. Lakor la ti inklir rekonet ki Labank Deutsche pa finn fer naryin imoral.
- An Me 2023, avoka labank JPMorgan (ki ena enn rol santral dan finans mondyal) finn deklare dan dokiman ki finn sumet, ki ofisye Guvernman ti okuran ki Epstein ti pe viv dan enn lakaz lor Zil Virgin US, “ti kone e finn fasilit Epstein so bann krim”. Me, labank la plitar finn dakor pu pey $75 milyon pu Guvernman Zil Virgin pu regle lyin ki ti ena avek aktivite Epstein.
- *An Zin 2023, JPMorgan finn dakor pu pey otur $290 milyon dan enn lakor pu met enn fon pu viktim, apre ki pandan plis ki 15an li finn azir kuma labank ki Epstein inn privilezye. JPMorgan finn refiz aksepte zot finn fer seki pa bizin. “Nu tu konpran aster ki Epstein so konportman ti orib,” se seki ofisyel labank la inn dir dan enn deklarasyon lor NPR.
Konklizyon
Ena 4 laspe inportan pu retenir lor sa zistwar dulure la:
1. Li explik nu puritir oker klas milyarder Amerikin. Li inportan pu tu dimunn dan lemond parski li kapav afekte negativman desizyon ki pe diriz nu ver lager nikleer ek destriksyon limanite. Lor enn nivo nasyonal, li enn warning pu nuvo Guvernman Ramgoolam dan Moris, ki finn met lipye kot pa bizin kan li pe kontinye fasilit bayant later avek vila pu gran kapitalis-puri. Ankor enn fwa, Guvernman pe menas fer seki linn apel “grandfathering” atraver proze ki pe bes tax pu seki byin ris, ki pu mete dan Finance Bill 2025. Sa bann proze la pe rant kasyet-kasyet, parey kuma kan Guvernman finn diminye tax 20% ek 10% lor reveni seki pli ris, malgre ki finn fini vot bidze dan Parlman. Guvernman finn espere pu kasyet sa bann mezir la dan Finance Bill. Me lel-drwat Konservater dan UK finn anons for e kler dan Parlman UK Ramgoolam so plan ki viz pu bes tax lor reveni avan mem ki Ramgoolam fer li! U kapav bat sa! Ramgoolam finn zis fer enn referans enigmatik lor sa konsesyon la dan Kabine Minis Vandredi dernye. Eski Ramgoolam, avek tu so kabine Minis, pa finn fini vinn otaz dimunn ek konpayni ki pli ris depi peyi inperyalis? Parlmanter Konservater finn fer sa lanons la kuma enn latak kont dyl Chagos-ek-Diego, par dir ki Ramgoolam kapav servi “larzan-disan” Britanik, kuma nu apel li, pu bes tax lor reveni dan Moris. Dan LALIT, nu ti panse zot pe koz ninport, kuma zot fer dan zot kanpayn kan zot dir Moris anba linfliyans Lasinn (u Larisi) kuma enn pretex pu koz pro-lanpir. Me anfet zot ti pe fini anons davans mezir Ramgoolam pu bes tax. Nu pu truve byin vit, kan Finans Bill pu pibliye e prezante dan Lasanble Nasyonal.
2. Li explik abi lor gran lesel par zom-predater dan klas siper-ris ki otman organize ki fam dan klas travayer mizer pe sibir par zot vis imoralite sexyel.
3. Li explik fondasyon lor lekel, par filmaz ek lekut, finn ena ek ankor ena materyel pu imans plan santaz ki pu met dibut. Se fason ki servis sekre obliz politisyin kurbe, ek fason zot extrer buku buku som larzan depi seki plis ris pu zot aktivite dute.
4. Li explik fason dan lekel CIA Amerikin ek Mossad Israelyin ek MI6 u SIS kapav inter-konekte pu plan santaz baze lor abi sexyel dan nivo indistriyel ki fer kont fam ek zenn tifi klas travayer.
Li kote moralman pli degutan lanpir Amerikin so deklin. Nu pe viv dan moman danzere pu limanite.
Tradiksyon CC avek kudme AA.
