Apel a Navin Ramgoolam antan ki Premye Minis e antan ki dokter, pu azir pu azut dan presyon Internasyonal pu kondann Barbari Israel kont lepep Palestine

29.07.2025

Nu pe pibliye versyon an Kreol let ki nu finn adrese a Premye Minis

Hon. Navin Ramgoolam,

Premye Minis,

Registry Level 6, West Wing, 

New Government Centre, 

Port Louis.

23-Ziyet-2025

Ser Premye Minis,

Ou finn gayn antrennman antan ki enn dokter diplome ek forme, alor, kan ou get sivil, kan ou get zanfan dan Palestinn, ki pe bonbarde dan zot lakaz depi avyon ek dronn Israelyin anler, bonbarde par tenk Israelyin dan landrwa kot zot viv, ek depi solda snayper Israelyin pe tir lor zot, ou kone ki savedir anterm sufrans. Ou kone ki savedir ekzerse kuma dokter dan enn sa lopital ki pe bonbarde par expre. Asterla, kan Israel pe inpoz lafaminn lor zanfan, seki blese, dimunn ki pena lakaz ek gran dimunn, osi byin ki tu lezot sivil – intansyonelman, planifye an-avans ek anonse an-avans depi lafaminn Oktob 2023- ou, antan ki enn dokter forme ou kone ofon u-mem ki sa lafaminn-a-mor vedir.

Ou, Dokter Ramgoolam, ou osi enn avoka forme, alor, kan ou lir fraz “Konvansyon lor Prevansyon … Zenosid”, ou kone ki personn lor later pa bizin atann, mem legalman, pu ziz deside si term “zenosid” li apropriye. Me olye sa, sak Leta ena enn obligasyon ziridik pu nom li kuma li ete ek lerla sa permet respekte Trete lor so “prevansyon”. Ou pa enn dimunn ki pa informe lor size “prevansyon” zenosid.

Ou, Dokter Ramgoolam, ou finn etidye London School of Economics ek aster lamem ou Minis Finans, alor, kan ou gete kisannla pe furni Israel armaman, bom ek tenk, avyon ek dronn, seki swadizan apel “intelizans”. Ou kone tusala kut larzan e li inplik furniser, e ou kone ki laplipar seplay sorti depi USA ek peyi Eropein. Antan ki enn ekonomist, ou finn sirman bizin lir Rapor ki fek sorti par Raporter Spesyal Francesca Albanese dan Nasyon Zini “Depi Lekonomi Lokipasyon ziska Lekonomi Zenosid” ki expoz profi ki pe fer lor masak zanfan Gaza.

Ou, Dokter Ramgoolam ou pa zis dan sa bann pozisyon privilezye pu gayn akse a sa kalite konpreansyon, me ou aster lamem Premye Minis Moris. Ou kapav ede pu aret tortir ek masak lepep Palestinn.

Ou kapav aster lamem konvok enn Renyon Kabine irzan, e pran 2 desizyon:

Premye, pu azut Repiblik Moris lor lalis peyi ki sutenir Sid Afrik dan ka divan ICJ kont zenosid ki Israel pe komet; sa pu ed repar retre sokan ou Guvernman depi “sumisyon oral” divan lezot ka dan ICJ kont Israel ki anpes Nasyon Zini ek lezot distribye manze ek seplay dan Gaza. Ansyin Guvernman, dan so faver, finn avoy enn lekip exper ziridik pu prezant sumisyon oral dan ka ICJ ki finn fini deklare ki lokipasyon Israel dan Palestinn ilegal, pu dimann so lafin, pu drwa retur, ek pu reparasyon.

Dezyem, pu etablir enn lalis aksyon imedya ou pu pran pu izol Leta Israel. Sa bizin inklir sispansyon imedya tu lyin diplomatik avek Israel ek inpoz sanksyon ekonomik total ek lezot sanksyon lor Israel. Bizin boykot konpayni miltinasyonal ki pe fer profi depi krim ki pe komet kont lepep Palestinn. Bizin met restriksyon lor viza pu exklir tu Israelyin ki dan kit fason inplike dan servis militer. Ou bizin apel sispansyon imedya Leta Israel depi Nasyon Zini. E, ou bizin osi sispann lakor avek UK lor Sagos, inklir Diego Garcia, akoz risk ki USA kapav antrenn nu peyi dan zenosid, par servi nu later pu infliz zenosid lor Palestinyin, an partikilye dan Gaza.

Ou bizin azir pu ki masak Palestinyin, inklir afam zanfan ziska lamor, pa lor ou lame, ek nonpli lor pu nu.

Sinserman,

Rajni Lallah ek Alain Ah Vee,

Pu LALIT.

Tradiksyon CC ar kudme AA