LALIT fer apel Ramgoolam pu ader imedyatman a Deklarasyon Bogota, 17-Ziyet-2025
27.07.2025
[Versyon an Angle pibliye le 17 Ziyet]
LALIT fer apel Premye Minis Navin Ramgoolam, lor nom lepep Moris, pu imedyatman sutenir piblikman Deklarasyon Bogota apel “Deklarasyon Konzwin lor Konklizyon Konferans Irzans lor Palestinn” ki finn inisye par Grup Lahe.
Ramgoolam bizin dakor, lor nom Repiblik Moris, lor pwin minimal swivan ki rezime dan Deklarasyon:
1. Pu anpes livrezon u transfer zarm ver Israel, ek pu anpes furni zuti ki permet Israel komet zenosid ubyin lezot krim deger.
2. Pu anpes navir tranzite, arime e fer mintenans dan ninport ki lepor nu Repiblik, [inklir Lepor Diego Garcia] ek pu respekte tu Konvansyon inklir UNCLOS, [ek Trete Pelindaba pu enn Lafrik Lib depi tu Zarm Nikleer].
3. Pu anpes transpor zarm, minisyon, karbiran militer, lekipman lye ar militer, ek item ena itilizasyon-dub ver Israel.
4. Pu kumans enn evalyasyon irzan tu kontra piblik pu kapav anpes linstitisyon e fon piblik sutenir Israel so lokipasyon ilegal Teritwar Palestinyin e pu asire ki nu sitwayin, konpayni u antite nasyonal anba nu zirisdiksyon pa azir dan enn fason ki kapav inplik rekonesans u donn led u lasistans dan mintenir sityasyon ki Israel so prezans ilegal finn kree dan Teritwar Palestinyin Okipe.
5. Respekte nu obligasyon pu asir akawnntabiliti pu krim pli grav dapre lalwa internasyonal atraver lanket e purswit ferm, inparsyal e indepandan lor nivo nasyonal ek internasyonal.
6. Sutenir manda zirisdiksyon iniversel pu asire ena lazistis pu tu viktim e anpes krim dan lefitir dan Teritwar Palestinyin Okipe.
Osi byin ki kloz, “Par rekonet vyolasyon Drwa Lasante, nu fer apel Konsey Ekonomik e Sosyal (ECOSOC) Nasyon Zini pu ordonn enn lanket imedya lor bezwin lasante e nitrisyonel popilasyon Gaza, pu met enn plan dibut pu donn zot, zot nesesite lor baz kontini ek suteni, e fer rapor lor sa size la avan 80em sesyon Lasanble Zeneral Nasyon Zini”.
LALIT usi fer apel pu Moris antan ki siynater zwenn dan ka Lafrik Disid kont Israel lor zenosid, e pu inisye enn muvman pu sispann Israel deswit depi Nasyon Zini. Lalit fer apel pu izol Israel konpletman – lor plan diplomatik, ekonomik, kiltirel, dan spor, ek dan tu lezot fason. LALIT usi sutenir lapel grup etidyan Students for Palestine, pu asire ki pa donn viza viziter Israelyin, an partikilye dimunn u lorganizasyon ki asosye dan kit fason avek larme Israelyin, u ki pe kas ninport lezot sanksyon neseser ki finn inpoze kont Israel. Sa bann krim la tro grav pu ferm lizye lor seki zot pe fer. Repitasyon Moris, par so inaksion, pu rwine terib. Li pa enn moman pu izol nu peyi par atas nu avek Leta kriminel, zenosider Israel ek so ponye finansye kriminel.
Ala enn kopi Dokiman Deklarasyon an-antye:
Deklarasyon Konzwin lor Konklizyon Konferans Irzans lor Palestinn Redize par Grup Lahe
Nu reprezantan Bolivi, Kiba, Kolonbi, Indonezi, Lirak, Lalibi, Malezi, Namibi, Nikaragwa, Omann, Sin Vinsan e Grenadinn, Sid Afrik ek tu lezot Leta ki apruv seki swiv, avan 20 Septam 2025,
Gide par obzektif ek prinsip ki proteze dan Sart Nasyon Zini ek lalwa internasyonal, inklir drwa inalyenab oto-determinasyon bann Pep ek prinsip akizisyon inakseptab teritwar par lafors;
Nu finn zwenn an irzans dan Bogota, Kolonbi 15 e 16 Ziyet 2025 avek bi pu ranforsi nu volonte kolektiv par kree enn lavwa inifye internasyonal e inplemant nu obligasyon internasyonal konsernan sityasyon dan Teritwar Okipe Palestinyin, inklir Zerizalem Les;
Nu plor sak lavi kinn disparet dan aksyon zenosider Israel dan Teritwar Palestinyin Okipe;
Nu deplor blokaz led Imaniter ek vyolans delibere, san distinksyon ek pinisyon kolektiv ki pe komet kont popilasyon afame Gaza;
Nu exprim nu duler akoz deplasman forse repete an mas popilasyon sivil Palestinyin ek blokaz pu zot retur;
Nu rekonet risk ki aksyon Israel reprezante pu anpes posibilite lape rezyonal ek sekirite osi byin ki integrite lalwa internasyonal an zeneral;
Nu refiz res obzervater pasif divan destriksyon masif dan Teritwar Palestinyin Okipe, ek divan refi rekonet drwa inalyenab oto-determinasyon lepep Palestinyin;
Nu reafirm Lopinyon Konsiltatif konsey Lakur Internasyonal Lazistis 19 Ziyet 2024 lor konsekans ki dekul depi polisi e pratik ilegal Israel, ki, dan zot natir mem, konsern tu Leta;
Nu rapel tu rezolisyon relevennt Nasyon Zini, inklir Rezolisyon Lasanble Zeneral Nasyon Zini A/RES/ES-10/24, ek obligasyon ki Leta Manb sipoze pran aksyon anliyn pu azir an konformite avek Lopinyon Konsiltatif Lakur Internasyonal Lazistis 19 Ziyet 2024, drwa imin internasyonal, ek lalwa imaniter;
Nu met lanfaz lor linportans linstitisyon kuma Lakur Internasyonal Lazistis ek Lakur Kriminel Lazistis pu ranpli so manda san laper ou faver ki esansyel pu prezerv Leta de drwa internasyonal;
Nu kondann latak e menas inilateral kont seki ena manda Nasyon Zini, osi byin ki kont linstitisyon vital dan arsitektir drwa imin ek lazistis internasyonal;
Nu batir lor leritaz muvman solidarite mondyal ki finn demantel aparteid ek lezot sistem opresyon, pu etablir enn model pu reaksyon ko-ordine dan lefitir kont vyolasyon lalwa internasyonal;
Nu rekonet konplemantarite Grup Lahe pu lezot linisyativ kuma Grup Madrid ki viz pu ranforsi inplemantasyon lalwa internasyonal;
Nu akeyir Konferans Ot-Nivo pu regleman Pasifik kestyon Palestinn ek Inplemantasyon solisyon De-Leta dan Lasanble Zeneral Nasyon Zini ki pu ena ant 28 Ziyet ziska 30 Ziyet 2025;
Nu met lanfaz lor lirzans pu tu Leta Manb respekte zot obligasyon pu azir an konformite avek Sart Nasyon Zini ek lalwa internasyonal;
Ini dan nu konviksyon ki aksyon kordine lor nivo nasyonal ek internasyonal li enn nesesite irzan pu protez Sart Nasyon Zini, pu fer respekte obligasyon dapre lalwa internasyonal, e pu promuvwar enn lape zist ek dirab partu dan lemond osi byin ki aret lokipasyon ilegal Palestinn e permet lepep Palestinyin exers zot drwa a oto-determinasyon;
Nu re-iter nu langazman pu inplemant mezir provizwar relevennt, zizman ek Lopinyon Konsiltatif Lakur Internasyonal Lazistis osi byin ki Rezolisyon Nasyon Zini inklir Rezolisyon Lasanble Nasyonal A/RES/ES-10/24;
Isi nu anons mezir swivan, ki nu pu adopte baze lor kad ziridik ek lezislatif nasyonal:
1. Anpes livrezon u transfer zarm, minisyon, karbiran militer, lekipman lye ar militer, ek item itilizasyon-dub ver Israel, kuma apropriye, pu asire ki nu lindistri pa kontribye dan zuti ki permet u fasilit zenosid, krim deger, krim kont limanite, ek lezot vyolasyon lalwa internasyonal.
2. Anpes tranzit, stokaz, ek servising bato dan tu lepor, si aplikab, dan teritwar su nu nu zirisdiksyon, anmemtan nu an konformite total ar lalwa internasyonal ki aplikab, inklir UNCLOS, dan tu ka kot ena risk kler ki bato pe servi pu sarye zarm, minisyon, karbiran militer, lekipman militer ki konekte, ek item itilizasyon-dub dan Israel, pu asire ki nu dilo teritoryal ek lepor pa servi kuma enn baz pu aktivite ki permet u fasilit zenosid, krim deger, krim kont limanite, ek lezot vyolasyon lalwa internasyonal.
3. Anpes transpor zarm, minisyon, karbiran militer, lekipman militer ki liye, ek item ena itilizasyon-dub ver Israel lor bato ki navige ar nu pavyon anler, kumsa nu an konformite total pu aplik lalwa internasyonal, inklir UNCLOS pu asir akawnntabiliti konplet, inklir retir nu pavyon kan ena vyolasyon sa interdiksyon la, pu nu anpes led u lasistans ki pe mintenir sityasyon kinn kree par prezans ilegal Israel dan Teritwar Palestinyin Okipe.
4. Nu pe kumans re- examinn irzan tu kontra piblik, pu kapav anpes linstitisyon piblik ek fon piblik, kot aplikab, pu napa sutenir lokipasyon ilegal Israel dan Teritwar Palestinyin pu pa ranforsi so prezans ilegal lor sa teritwar la, pu asire ki nu sitwayin, konpanyi ek antite anba nu zirisdiksyon, osi byin ki nu lotorite, pa azir dan kit fason ki pu inplik rekonesans ou furni led u lasistans pu mintenir sityasyon kinn kree par prezans ilegal Israel dan Teritwar Palestinyin Okipe.
5. Nu konform nu avek nu obligasyon pu asir akawnntabiliti pu krim ki pli grav dapre lalwa internasyonal atraver lanket e purswit ferm, inparsyal e indepandan lor nivo nasyonal u internasyonal, an konformite avek nu obligasyon pu garanti lazistis pu tu viktim ek anpes tu krim dan lefitir.
6. Nu sutenir manda zirisdiksyon iniversel, kan ek kot aplikab dan nu kad legal konstitisyonel ek zidisyer, pu asir lazistis pu tu viktim ek anpes krim fitir dan Teritwar Palestinn Okipe.
Nu presize ki sa bann mezir la konstitye enn langazman kolektiv pu defann prinsip fondasyon lalwa internasyonal;
Nu rekonet ki ena vyolasyon Drwa Lasante, nu fer apel Konsey Ekonomik ek Sosyal (ECOSOC) Nasyon Zini pu tutswit komandit enn lanket lor bezwin lasante e nitrisyonel popilasyon Gaza, met enn plan an mars pu satisfer sa bann bezwin la lor enn baz kontini ek suteni, ek fer rapor lor sa bann kestyon la divan 80em sesyon Lasanble Zeneral Nasyon Zini;
Nu fer apel a tu Leta Manb Nasyon Zini pu met anpratik nu obligasyon, anmemtan ki promuvwar mekanism koperasyon ant tu parti.
Adopte dan Bogota, Kolonbi, sa 16em zur mwa Ziyet, 2025.
Tradisyon CC avek kudme AA
