“Nu partisipasyon dan Lamars Global ver Gaza” – Invitasyon pu Riport-Bak
06.07.2025
Pu ena enn Riport-Bak depi trwa Morisyen ki finn partisip dan muvman internasyonal pu “Anu al Gaza” pu kas syez Izrael kont Palestinyin. Pa manke!
Riport-Bak pe organize par 20 lorganizasyon* dan enn fron komin “Kont Zenosid ek pu Fermtir Baz UK-US lor Diego Garcia”. Li pu ena lye dan Konsey Minisipal dan Por Lwi. Vandredi 11 Ziyet, 4er tanto. Li enn evennman inportan. Piblik kordyalman invite.
Alain Ah Vee, Ally Hosenbokus, ek Ragini Kistnasamy manb LALIT, ki usi manb fron komin, finn partisip dan “Lamars Global ver Gaza” dan Lezip mwa dernye pu rakont nu lor zot aksyon.
“Al Gaza an personn” li ti enn aksyon konbine par trwa diferan muvman ki ti pe konverze preske anmemtan dan direksyon Gaza: Lamars Global, limem, ansam avek konvwa bis apel Sumud ou “Temerer” ki rasanble par santenn dimunn depi tu peyi ki bord Maghreb, ek bato Madleen depi Flotila Laliberte. Abor Madleen ti ena enn duzenn dimunn inklir aktivis byin koni Greta Thunberg ek Manb Parlman Linyon Eropein Rima Hassan. Bi konverzans a trwa nivo lor Gaza ti viz pu montre lemond kuma Izrael pe inpoz so syez. Li enn syez telman kriyel ki dimunn pa mem kapav koste avek frontyer Gaza. Alor, tule trwa parti sa muvman konbine ver Gaza ti viz pu montre sa. Partisipan pa finn kapav ariv Gaza, pa mem ariv lor frontyer ni rivaz. Zot finn kapav ariv zis pre avek Gaza.
Ek se seki zot finn fer!
Izrael finn aret totalite lekipaz Madleen dan dilo internasyonal andeor Gaza, ek lotorite Ezipsyin, apre menas depi Izrael, finn anpes fizikman Konvwa Sumud ek Lamars Global ver Gaza ariv pli pre avek Gaza ki Ismalia. Leta Ezipsyen enn diktatir militer ki finn met opuvwar par ku-deta kinn orkestre par Lamerik. Li finn aret konvwa ek Lamars avek represyon dir e sovaz ek avek konplisite ki telman karakteriz diferan Guvernman dan lemond aktyel. Riport-bak pu donn detay lor seki nu trwa kamarad finn bizin traverse dan Lamars Global.
Tulede trwa evennman solidarite finn aziste anterm letan. Dimunn ordiner depi plis ki 80 peyi finn pran par dan sa trwa evennman internasyonal ki tule trwa finn koste osi pre ki posibleman realizab avek Lepep Gaza – par lamer, par bis, ek par lamars. Lepep Gaza ek Palestinn antye inn kone ki kantite pre sa milye dimunn ordiner finn anfet ariv ziska zot. Ek pu vinn depi plis ki 80 peyi, ti enn explwa kordinasyon inkrwayab.
Aktyelman, partu dan lemond ena “riport bak” parey kuma nu pu fer sa Vandredi la.
Dimunn dan Gaza kone depi sa trwa aksyon kolektif la, ki, laba andeor syez ki zot pe sibir depi 18an, ki ena dimunn ki dibut avek zot an solidarite. Ena dimunn kinn pran risk pu defye syez la. Ena dimunn ki finn sey ariv ziska zot fizikman. Ek par aksyon ki zot finn pran, zot finn kapav montre kuma sakenn nu Guvernman dan lemond antye, swa, pli pir kuma USA pe aster lamem fer par “komandit”, arm, finans ek konsey Izrael ubyin pe konplot dan enn stil kaponnri avek Izrael ek USA, dan enn fason ou enn lot. Nuvo Guvernman Morisyen, par egzanp, dan enn moman kle lafin lane dernye, finn retir depozisyon oral ki Moris ti bizin prezante dan ICJ dan sa ka ki presizeman kont Izrael parski li pe blok manze ek seplay ki Nasyon Zini ek lezot dimunn pe sey fer rant dan Gaza. Guvernman Moris finn retir li depi taymtebul ki ti deza pibliye par ICJ ek sistem Nasyon Zini an-antye. Mem si finn chalennj li, piblikman pu vinn explike kifer li finn azir kuma kapon, Guvernman pa finn donn okenn explikasyon satisfezan ziska ler. Anfet, li pa finn mem avoy sumisyon ekri dan ICJ. Diktatir militer Ezipsyin, dezyem pli gro benefisyer “led” armaman depi US apre Izrael finn konplote par servi represyon kont enn lamars pasifik dan Lezip ver frontyer Gaza.
Alor, trwa Morisyen finn al ver Gaza, an personn.
Zot finn servi kas ki zot finn ramase par zot mem. Zot finn aste zot prop tiket. Zot finn fer buking zot ti lotel. Ek zot finn ale. LALIT ansam ar 20 lorganizasyon ki pe organiz Riport-Bak ti anons zot partisipasyon dan enn Konferans de Pres dan Kafe Vye Konsey mem zur e mem ler ki Lamars Global ti planifye pu kit Cairo.
Nu trwa kamarad Morisyen ti parmi plis ki 4,000 internasyonal dan sa trwa aksyon la. Zot ti laba. Ek zot pu temwayne dan sa Riport-Bak la.
Moman dan Listwar kan sa trwa muvman solidarite finn deside pu konbine pu al Gaza ti apropriye, dan lesans ki li moman marenwar dan sufrans Palestinyin. Moman pli amer zenosid ki Izrael pe komet – Leta Izrael pe infliz lafaminn, pe met pyez-manze ki sniper pe veye dan kasyet pu tir kut bal lor dimunn san pitye. Anplis masak ki Izrael pe komet tulezur pu plis ki 20 mwa aster-la, ena bonbardman aeryen, destriksyon batiman antye ek tir par obi ek bonbardman par dronn. Dan moman kan Lemond ti pe bizin aprann sa enorm konverzans internasyonal ki pe al Gaza, Izrael sa mem zur ki Lamars Global ti bizin kit Cairo, pu premye fwa finn bonbard Tehran. Leta Izrael inn kumans asasinn lider militer ek syantis ansam avek zot fami dan enn lager ilegal ki enn akt teroris par enn Leta. Lager la par expre viz pu “kasyet” sa moman pli kriyel zenosid dan Gaza.
Sa Riport-Bak la, alor form parti sa prosesis kot dimunn partu dan lemond pe organize dan lasosyasyon ek sindika dan lekel zot manb pu demaske zenosid pu nu truve, pu ki nu, dimunn ki viv dan sa lemond la kapav aret sa,
Guvernman pa finn lev enn ledwa pu kas syez par aksyon konzwin. Zot pa finn azir pu fors uvertir frontyer ek asire ki sa milye kamyon led imaniter rant dan Gaza. Zot pa finn mem met anplas enn “no-fly zone” pu aret masak Palestinyin par Izrael. Okontrer Guvernman dan lemond antye finn sponsor ansam zenosid, ubyin fer sanblan zot pe opoz li.
Me malgre sa, par milye dimunn partu dan lemond dan lamars Global pu al Gaza, enn duzenn individi lor bato Madleen, ek enn lot milye dimunn depi Lenor Lafrik dan konvwa Sumud finn azir.
Trwa ant zot Morisyen. Li ti lexperyans enn lavi antye. Zot pu rakont nu, ek explik nu kontex. Dan sa fason la nu pu kapav konpran pli byin zenosid e usi agresyon lor Liran, ek dan sa fason la donn kudme pu aret tulede.
Dan sa fason la usi, nu kapav truve dan enn fason pli kler, fason ki baz militer UK-USA lor Diego Garcia form parti dan arsenal ki USA ek Izrael pe servi kont peyi dan Mwayin Oryan avek lekel Moris pa pe lager. Leta Zini finn servi Baz Diego Garcia pu ranforsi so bombardier B-52 ek B-2 pu atak peyi dan Mwayin-Oryan ki pe defann Palestinyin. Li probab ki mwa dernye, USA finn servi baz Diego Garcia dan so agresyon kont Liran so trwa sayt nikleer (Li pa enn sekre ki zot fonksyone pu itilizasyon pasifik ek ki zot kontrole par Trete Non-Proliferasyon). Ki savedir? Savedir ki Liran so ripost kont USA sa ler la, ti viz direkteman pli gro baz militer USA ki Qatar donn permisyon opere ek sa depi so teritwar. Sa fer nu truve dan enn fason kler ki baz militer USA Diego Garcia, lor nu later fer nu vinn sib direk retalyasyon dan agresyon zeopolitik ki rezim Trump deside pu lanse. Sa, anretur, expoz menas reel suvrennte Repiblik Moris ki baz US laba reprezante.
Ou prezans dan Riport-Bak enn fason pu nu, ansam, met presyon kolektivman lor Guvernman Morisyen pu izol ek dezarm Izrael pu aret zenosid ek anmemtan pu dimann ferm baz Diego Garcia pu anpes servi nu later, parmi lezot zafer, pu sutenir zenosid ki Izrael pe komet.
* Lalis Lorganizasyon ki pe organiz Riport Bak
Mauritius Labour Congress
Federation of Parastatal Bodies and Other unions
Conf. des Travailleurs des Secteurs Publique et Privé
National Trade union Confederation
Federation of Civil Service and Other unions
General Workers Federation
Federation des Travailleurs Unis
Government Teachers' union
Rodrigues Private Industries & Allied Workers union
Rodrigues Government Employees Association
Rodrigues Workers Federation
Nursing Association
union of Private Secondary Education Employees
Ledikasyon pu Travayer
Dr Idrice Goomany Treatment Centre
Leve Fam!
Muvman Liberasyon Fam
ABAIM
Never Again-Olive Resistance
Lalit
