LALIT denons Kominike Guvernman lor agresyon Izraelo-Amerikin kont Liran
25.06.2025
[Tradiksyon an Kreol lartik ki ti pibliye yer]
Kominike ki Premye Minis Navin Ramgoolam finn anonse dan Lasanble Nasyonal, avan
li dimann Minis Zafer Etranzer pibliye li, pretann ki ena enn similarite ant Israel ek USA, enn kote, ek Liran, lot kote. Dapre lalyans Guvernman, ena zis inpe “belizerans” vag ki pe opere dan paraz. An realite, ena enn agresyon flagran depi Israel ek USA. Dan so kominike Guvernman Moris pe kasyet sa. An realite latak par Israel, ek lerla par USA lor Liran zot ilegal. Latak la pena enn “casus belli” savedir rezon pu lager. Alor, Israel ek USA zot kupab krim ki depas tu krim deger, lager inzistifye. San mansyonn krim deger perfid ek provokasyon initil pu lager. Fode pa bliye usi ki Israel limem ena arsenal nikleer ilegal ki sekre. Tandi ki dapre Trete Non Proliferasyon, okontrer Liran ena “drwa inalyenab” pu anrisi iranyom, me anba grad fabrikasyon zarm militer avek iranyom .
Guvernman Ramgoolam finn tir enn kominike ki fer onte. Li enn sinnyal ki Moris pe sumet kuma “vale” Amerikin.
Li enn ipokrizi pu pretan ki Moris form parti enn “Lemond ki kontan Lape” kan li fek siyn lakor pu form parti dan masinn deger USA par lwe Diego Garcia pu buku zenerasyon an esanz pu lamone disan.
Seki agrav sityasyon ankor plis se nuvo Guvernman ziska ler pankor denons zenosid ki Israel pe inflize lor Palestinyin. Ankor pli pir, li sabot depozisyon oral ki Moris ti programe pu done dan Lakur Internasyonal Lazistis Nasyon Zini lor ka ki denons lefet ki Israel pe blok lantre manze ek medsinn dan Gaza.
Nu fer apel Guvernman Ramgoolam pu deswit pran pozisyon kont agresyon Israel dan Liran, kont agresyon USA dan Liran ek kont zenosid ki tulede Leta belizeran, anmemtan, pe inflize lor dimunn san defans dan Palestinn, ki zot finn kontinye kolonize. Pu vande divan zenosid, Guvernman Ramgoolam bizin ena plis ki laont. Li kaponnri kriyel ek inimin. Nu atann plis depi enn Guvernman. Me apart lefet zot finn vande lor kestyon pansyon, nu truv ankor plis trayizon olye ki zot pran pozisyon deprinsip.
Klas travayer dan peyi pu bizin dibute ek azir kont tulede, zenosid ek lager. Pu bizin dibute kont lokipasyon Sagos, ek defann aki sosyal ki klas travayer zenerasyon avan finn lite pu gayne kont kolonizasyon ek sistem kapitalis.
LALIT
24 Zin 2025
Tradiksyon CC
