Aksyon Dimunn aster ki pu fer zot Guvernman Aret Zenosid- Blog No.70
13.06.2025
Nu finn met angard ki Leta Israelyin pu agrav sityasyon Palestinn, ek ankor plis pu Gaza. Ek USA pe kontinye persiste avek zarm ek veto, konplis avek seki pe komet sa masak-la. Lider gran peyi Eropein pe sey evit tit perpetrater zenosid, san ki zot aret zot partisipasyon.
Nu usi anmemtan truv ti bato avwal Madleen depi Koalisyon Flotila Laliberte konfront Lafors Lokipasyon Israelyin lor lamer. Lor bato ti ena nesesite debaz ki dimunn Gaza bizin: manze, medsinn, dile ti-baba. Dimunn ki abor, pa Guvernman: inklir aktivis kuma Greta Thunberg, Rima Hassan enn manb Parlman Eropeyin ek zurnalis Omar Faiad depi Al Jazeera. Zot finn arete par Leta Israelyin. Imazinn enn Leta ki aret zenn dimunn ki pe amenn manze ti-baba pu seki pe mor defin! Madleen finn montre Lemond ki Guvernman lor Later pe apruve par zot mank aksyon.
Ek dan mem letan, lor later, dimunn depi partu dan Lemond pe zwenn Cairo pu marse pu al Gaza. Lamars la pu kumans boner gramatin Vandredi 13 Zin, ek li pu kontinye pu 2 zur. Lerla zot pu proteste pasifikman dan Krosing Rafah pu dimann lafin syez ek lafin zenosid. Sak dimunn ek grup ki prezan pu fer apel a zot Guvernman pu azir kont lokipasyon Israelyin lor Palestinn, kont zenosid, kont expilsyon kontini ek kont sa kriote ki apel eknisite seki apel netwayaz. Kisannla kapav dibute gete, ki par expre pe fer ti baba mor de fin? Kisannla kapav dibut gete, kan par expre pe bonbard ti baba? Ansam avek adilt, dimunn aze, fam aze, seki malad ek seki deza finn anpit enn parti zot lekor, infirm, ek seki deza blese lor lili lopital? Ansam avek servis medikal ek zurnalis? Fakter ek menizye? Kominote peser ek poet? Kwafer ek bulanze? Travayer bord ek profeser lekol maternel? Ek dimunn dus dan Palestinn?
Pu tu sa rezon la, nu dibut ansam avek dimunn dan sa lamars la. Ek nu fer apel, kuma sa 21 lasosyasyon ki fek ekrir Minis Zafer Etranzer, Onorab Ritesh Ramful, pu ki Guvernman anons imedyatman ki li ena lintansyon izol Israel konpletman – onivo politik, ekonomik, kiltirel, dan spor – ziska Israel aret zenosid ek lokipasyon, ek ki Moris pu vinn enn parti, ansam avek Lafrik Di Sid, dan ka ICJ kont Israel pu zenosid.
Lindsey Collen
