Komanter LALIT lor Bidze 2025-2026
05.06.2025
Bidze Premye Minis e Minis Finans Navin Ramgoolam li byin “minimalist” anterm sanzman ki li propoze, sirtu pu enn Guvernman “du Changement”.
E sirtu nu finn kontiyn tann mem kalite koze vag, san okenn presizyon, ni okenn plan konkre pu bidze devlopman, setadir sirtu kimanyer pu stimil prodiksyon, sirtu prodiksyon alimanter ek lenerzi. Par kont, kan Ramgoolam pe koz lor kann ek disik, li vini avek ogmantasyon presi komye pu gayne kuma rant garanti pu planter kann, e mem pu melas, etc. Kote “sekirite alimanter” ek lapes, li tuzur vag. E kuma tultan avan, Guvernman refiz koz lor kimanyer later tablisman bizin servi pu kontribiye dan prodiksyon alimanter. Li koz sirtu later ki deza pu Guvernman.
Nu akeyir byin ki tu scheme Smart City ek lezot scheme Property Development ki EDB ansarz monitor, pe arete net dan lavenir.
Kote Reveni ek Depans
Nu dan LALIT, deplor lefet ki pe anonse ki pu servi larzan depi “deal Chagos” pu konble tru ki Guvernman dir ki Guvernman Jugnauth finn kite.
Konsernan problem anterm defisit bidzeter, e mem defisit dan balans peyman, li ti pu pli onet si Minis Finans Ramgoolam ti o-mwin konsede ki ti ena Covid dan sa dernye 5 an la.
Kote Reveni, par kont LALIT truv li bon ki Guvernman pa pe ogmant TVA, me pe inpoz enn tax lor gran reveni, e lor gran konpayni.
Me, lefet ki laz pansyon iniversel pe monte ziska 65 an gradyelman dan prosenn 5 an, li lur pu klas travayer ek dimunn mizer, sirtu seki fer travay manyel.
Nu remarke ki reveni minimem pa pe ni ogmante, ni retire.
Lozman
Minis Finans Ramgoolam finn koz selman lozman dapre seki ansyin Guvernman finn planifye. Li pena okenn nuvo plan dan Bidze. Li pu fer ankor enn letid lor lozman. Nu osi remarke ki li pena okenn alokasyon pu ranplas lakaz lamyant, mem ki li enn lakaz danzere pu lasante abitan ki res ladan.
Ledikasyon
Ena enn lanons enn “nuvo kontra sosyal” lor ledikasyon. Nu pena ditu lide ki Guvernman pe mazine. Nu espere li pa sa sistem ki finn rwinn sistem ledikasyon dan Leta Zini, kot donn sakenn enn espes “bon” ki li servi pu ledikasyon prive.
Kote Special Needs, li tutafe an-ord ki pey taxi pu zanfan al lekol ki lwin kan li viv avek enn disabiliti.
Lasante
Kote lasante, li enn lanons inportan ki Guvernman pu pran 1,000 nuvo infermye ek ners, e lezot staf kote medikal osi. Sa enn sanzman.
LALIT, 5 Zin 2025.
