LAKOR SIYNE ANT UK EK REPIBLIK MORIS LOR CHAGOS EK DIEGO –SO LINPORTANS EK SO DANZE
30.05.2025
[Extre trak LALIT Vandredi 30 Me 2025]
Lakor ki fek siyne ant Premye Minis Ramgoolam, avek akolad tu so Minis ek Depite, ek Sir Keir Starmer, li reprezant enn sertin progre, me li konport buku danze osi. Progre se BIOT, sa koloni Britanik forme an 1965, finn aboli. Tan mye!
LALIT ti ena rezon pu mintenir ki leta Moris ena suvrennte. Asterla UK ek USA fini siyne kumkwa sa li vre. E natirelman, nu selebre avek Chagosyin ki zot nepli totalman bani depi Chagos. Interdiksyon total finn leve. Me. Enn gran “me”. Sak devlopman lor Chagos, mem lor Peros ek Salomon, li pu tuzur bizin lotorizasyon Britanik, e anfind-kont Lamerik. Moris bizin fer enn analiz lor lefe “sekirite” pu baz Amerikin nerport ki sanzman, pa zis lor Diego, me lor tu lil, e fer sa traverse dan enn komite konzwin kot UK, e osi USA, syeze. Li enn prolongasyon okipasyon militer pu ankor 100 an. 100 banane! E li enn antrav ar Trete Nasyon Zini apel “Pelindaba” ki asire ki pena zarm nikleer dan Lafrik ditu. Sa Lakor ki Ramgoolam inn siyne re-met sa trete baynding la an-kestyon
