LIBER PALESTINN! STOP ISRAEL SO ZENOSID TUTSWIT!
30.05.2025
Zordi gramatin plizyer militan LALIT ti partaz trak lor 2 lagar Port-Louis, lagar Rose Hill, lagar Kirpip ek La Louise. Finn ena byin bon risponn. Partaz trak pe kontinye dan lezot rezyon.
Nu pe pibliye premye kote trak la ki dir STOP ISRAEL SO ZENOSID TUTSWIT.
Tulezur lor nu lekran nu truv larme Israel pe masakre Palestinyin dan Gaza – so zanfan, so gran dimunn, so mama-papa, so zenes, so dimunn infirm. Depi 18 mwa nu finn temwayn sa. Li enn zenosid. Larme Israel fors Pal¬estinyin dan Gaza ramas tu zot zefe dan motri, deplase ver enn lot landrwa, kot zot res swa anba latant swa dan lakaz deza kraze, lerla re-bombard zot depi avyon lao, detrwir zot plantasyon manze, zot bulanzri, zot lizinn, afam zot, blok tu manze, medikaman, fyuel, detrir zot lekol, lopital, sime, zot sistem CWA ek wes-water, zot sistem elektrisite, zot arsiv, zot leta sivil, zot liniversite, zot tu.
Rol USA
Tusala Israel fer avek benediksyon so alye, Leta Zini. Wi, USA furni so bom, so tenk, so fizi, so misil pu fer sa zenosid la. Tusala Israel kapav fer selman ar larzan e sutyin diplomatik depi Leta Zini. Israel asterla pe afam Palestinyin dan Gaza. Par expre. Tuzur avek sutyin USA, avek sutyin Lerop. Li selman asterla, apre 18 mwa zenosid, ki Lafrans, Gran Bretayn ek Kanada, pe kumans denons Israel pu atrosite li pe komet avek inpinite.
Asterla, Israel ek USA finn fek trafik enn espes antite militer degize kuma led imaniter, apel “Gaza Humanitarian Found¬ation”, ki proteze par enn band mersener Amerikin. Li pe itilize pu sey pyez Palestinyin afame, pu fors zot vinn dan Lesid Gaza pu gayn enn parsel manze, pu lerla, kan zot ariv laba, anpes zot return kot zot. Kan tu konsantre dan bann kan, Israel pu swa exterminn enn parti par kontinye avoy bom lor zot, swa devid zot tu depi Palestinn net. E zot apel sa “deplasman volonter”. E lerla Prezidan Trump pu kapav fer so proze “Mall” prive pye-dan-lo dan Gaza, vande pu enn profi, kuma li ti anonse.
Alor kisannla antor?
Premye: Leta Israel.
Egalman kupab: USA.
Zis deryer sa 2 pei la, ena preske tu pei “Loksidan”, akumanse par UK, Lalmayn, Lafrans, ki konplis dan mil fason kriminel.
Ekrulman Israel, e osi USA
Li vre ki Israel pe detrir li-mem kuma enn leta, anmemtan ki li pe aneantir Palestinn, Liban, e asterla Lasiri osi. E li ule ris Leta Zini ar li pu atak Liran. Tulezur, li mete-em chula. Li vre, osi, ki Leta Zini enn lanpir ki lor rebor falez so prop bankrut. Tulde fini ekrule net anterm kredibilite. Zot ostrasize dan lemond. Me, sa 2 ekrulman la, Israel ek Leta Zini, pa pe vinn ase vit pu sap Palestinyin, ni dan Gaza, ni dan West-Bank. Amwin, nu tu azir ....
Ki bizin fer? Ki nu kapav fer? Eski u pu donn kudme?
Fer nu Guvernman azir
- Ramgoolam bizin inskrir Leta Moris dan ka ICJ ki Sid Afrik inn loze kont Israel pu zenosid.
- Guvernman bizin kup tu lyin ar Israel – diplomatik, ekonomik, turistik, kiltirel, sportif, tu.
Deza Moris ti al depoze divan ICJ dan ka ki finn ranport laviktwar kont Israel pu so lokipasyon ilegal Palestinn. Me, fek-la nuvo Guvernman pa finn reponn prezan pu depoze divan ICJ kont Israel so “leta desyez” ki pe afam Gaza, fer li vinn enn ‘kan konsantrasyon” total. Purtan nom Moris ti figire lor azanda. Moris pa finn sumet argimantasyon ekrit, nonpli. Fode nu fors nu Guvernman azir. Nu pa’le disan Palestinyin inosan lor nu lame dan sa lalit dekoloniz¬asyon la.
Azir nu-mem
Ki nu pe fer, e pu fer, nu-mem dan LALIT ansam ar lezot lorganizasyson dan enn fron komin? Kontakte nu pu pran pozisyon, pu zwenn dan aksyon.
- Petisyon.
- Manifestasyon.
- Let uver.
- Al Palestinn an-personn. Ena enn linisyativ mondyal pu fer enn grup, marse, rant dan Gaza pu kas leta desyez ki Israel finn mete lor Gaza.
- Boykot tu prodwi e konpayni ki ena lyin ar Israel. Kumans par boykot sipermarse Carrefour, ki ena lyin for ar Israel dan moman zenosid la. Pa met lipye dan sa sipermarse la – ziska li kup so lyin. Al lor sayt muvman Palestinyin apel “Boycott, Disinvestment and Sanctions” pu detay.
Ki u kapav fer?
Kontakte nu pu rant zwenn dan SOMALP, Solidarite Morisyin ar Lepep Palestinn e pu zwenn nu Fron Komin ki pe anmemtan lite pu ferm baz Diego Garcia, ki pe servi par USA ek Israel pandan zenosid la.LALIT li manb dan enn Fron Komin kont zenosid e pu ferm baz Diego ar 20 lezot lorganizasyon: MLC, FPBOU, CTSPP, NTUC, FCSOU, GWF, FTU, RPIAWU, RGEA, RWF, Nurses’ union, Nursing Association, UPSEE, LPT, Idrice Goomany Centre, Leve Fam!, MLF, ABAIM, Never Again-Olive Resistance, GTU.
