Kontras ant Lanpir Lerwa Ris ek Palestinyin Gaza afame – Blog No.69
17.05.2025
14-Me-2025
Kisannla ti pu panse ki apre 580 zur zenosid par Lanpir Amerikin dirize par Israel ki nu pu sibir spektak degutan Donald Trump, akonpayne ar so klik ferme elit bilyoner pe rant dan pale liksye prins eritye Salman dan Larabi Saodit, koni pu so rol dan asasinn ek kup an morso zurnalis byin emab Jamal Khashoggi. Enn lantre lor son-lamizik asurdisan lirik fondamantalis “Bondye beni USA”. E lor lot lamwatye lekran, realite Palestinyin Gaza pe konfine dan enn ankor pli tipti kan-konsantrasyon, bonbarde, pilone e afame intansyonelman ziska lamor, zanfan ki pe buskile ar bol vid pu enn buse manze, ek tu dimunn ki pe viv dan larwinn ki finn reste depi bom Amerikin, ki pe tuzur, akote, sufer zenosid par samem lanpir Amerikin e dirize par Israel? Bondye beni Lamerik?
Kisannla ti pu panse ki nuvo Guvernman dan Moris pu renons so langazman pu fer prezantasyon oral dan Lakur Internasyonal Lazistis dan Lahe, e ki li pa finn mem sumet kontribisyon an-ekri pli boner lor ka vital lor Israel ki pe blok Nasyon Zini ek lezot lorganizasyon pu alez lefe restriksyon syez Gaza. E sa, mem apre ki ICJ finn deklare ki lokipasyon Palestinn par Israel, inklir Gaza, li “ilegal”, ek ankor enn fwa, mem, apre so zizman ki li “plozib” ki Israel pe komet zenosid laba asterlamem?
Ler inn vini pu Leta Moris zwenn “ka prinsipal” Lafrik Disid dan ICJ ki akiz Israel zenosid. Anu tu met presyon lor nuvo Guvernman pu li dan bon kote listwar, e pa dan kan seki pe komet zenosid. Li partikilyerman inportan dan enn moman kan USA ek Grand Bretayn pe sey akapar Diego Garcia an esanz pu larzan disan. Leta Moris bizin pran enn pozisyon lor Prinsip. Anu fer parti politik dan Guvernman rapel, pu kumanse, ki lider parti Travayis, MMM ek Nuvo Demokrat zot tu finn siyn, antan ki mamb ansyin Lopozisyon Parlmanter, petisyon ki ti kordine par Muvman Liberasyon Fam. MLF ti fer apel pu ki Guvernman Pravind Jugnauth zwenn ka Sid Afrik dan ICJ. E nu asime ki Rezistans ek Alternativ, ki pa ti form parti dan Parlman sa moman la, zot usi ena mem pozisyon. Tule kat parti aster bizin azir lor zot prop konviksyon.
Lindsey Collen, pu LALIT
Tradiksyon CC avek kudme AA.
Referans depi nu websayt, lalitmauritius.org:
1. PTR, MMM, ND, Linion Moris, PMSD ek Lalit finn siyn Deklarasyon an Komin pu Moris sutenir ka Sid Afrik kont Israel (15.06.2024)
Ala enn kopi Deklarasyon an Komin Lalyans ek Parti Lopozisyon ki LALIT pe pibliye ankor enn fwa parski PMSD finn aster azut so nom dan Deklarasyon. Muvman Liberasyon Fam (MLF) inform nu ki PMSD ti anretar pu siyne akoz enn problem kominikasyon.
Deklarasyon An-Komin depi Parti Lopozisyon/ Lalyans
Etan done ki Leta Moris an 2019, ti siyn Konvansyon lor Prevansyon ek Pinisyon Krim Zenosid 1948, inn, kuma tu sinyater, deza dakor ki zenosid li “enn krim dapre lalwa internasyonal ki zot finn angaz zot pu anpese ek pu pini” (Lartik 1),
Nu kwar li inportan pu Leta Moris sutenir ka Repiblik Sid Afrik divan lakur pli ot Nasyon Zini, Lakur Internasyonal Lazistis, dan lekel Sid Afrik akiz Israel responsab vyolasyon Konvansyon, dan Palestinn an partikilye dan Gaza.
Adere par:
Parti Travayis, Navin Ramgoolam.
Mouvement Militant Mauricien, Paul Bérenger
Nouveaux Democrates, Richard Duval
Linion Moris, Rama Valayden.
Lalit, Rada Kistnasamy.
Parti Mauricien Social Democrate, Xavier Duval*
Kordine par Muvman Liberasyon Fam dan kumansman Zin, 2024.
* PMSD ti adere inpe plitar, 15 Zin, 2024 (anretar akoz problem kominikasyon).
2. Kestyon Parlmanter, Zin 2024 par aktyel Minis dan Guvernman Ramgoolam
Sa kestyon Parlmanter la, li enn swivi apre Deklarasyon an Komin.
Le 15 Zin, tu Parti Lopozisyon Parlmanter, setadir, Parti Travayis, MMM, Nouveaux Democrates, PMSD ek Linion Moris, ansam avek parti extra-Parlmanter LALIT, finn anonse dan enn “Deklarasyon-an-Komin” ki ti sirkile par Muvman Liberasyon Fam ki zot kwar li inportan pu Leta Moris sutenir Repiblik Sid Afrik. Deklarasyon an Komin ti lerla sumet anmin-prop biro Premye Minis par enn delegasyon manb MLF. Deklarasyon dir:
Etan done ki Leta Moris an 2019, kan ti siyn Konvansyon lor Prevansyon ek Pinisyon Krim Zenosid 1948, inn, kuma tu sinyater, deza dakor ki zenosid li “enn krim dapre lalwa internasyonal ki zot finn angaz zot pu anpese ek pu pini” (Lartik 1),
Nu kwar li inportan pu Leta Moris sutenir ka Repiblik Sid Afrik divan lakur pli ot Nasyon Zini, Lakur Internasyonal Lazistis, dan lekel Sid Afrik akiz Israel responsab vyolasyon Konvansyon, dan Palestinn an partikilye dan Gaza.
