Zenosid Blog 68 - Lafin Terib pe koste
07.05.2025
Tu pe indike ki nu pe koste ar faz-final efrwayab sa zenosid ki Israel pe perpetre kont Palestinyin.
Aster Israel pe fer dimunn Gaza mor-de-fin. Pa zis bonbard zot e zot sosyete antye an but-but.
Leta Zini enn parmi zis de peyi ki finn sutenir Israel dan ICJ sa semenn ki fek pase la, kot Israel akize anpes led imaniter rantre pu 2 milyon Palestinyin dan Gaza. 39 peyi* ek 4 lorganizasyon internasyonal finn fer prezantasyon oral kont Israel lor lefet li pe anpes led imaniter rant Gaza.
Israel finn bonbard enn bato lor so sime pu amenn manze dan Gaza. Israel ankor pe bonbard Berut ek Lesid Liban, pe defye tu lalwa ek moralite. Aster Israel pe bonbard Damas ek lezot parti Lasiri, sa usi, tulede enn diversyon e enn demonstrasyon lafors. Israel persiste dan provok lager ant USA ek Liran, ki pe azir kuma konplis atraver lobi Zionis Amerikin. Israel, limem, aster pe inploze preske dan lager sivil. Premye Minis Netanyahu finn met deor so sef Sekirite. Sitwayin pe sove. Lekonomi Israel anfayit. Repitasyon Israel li nil. Lavenir Israel kuma enn Leta inn fini, detrir par so prop aksyon demonyak kont enn lepep antye su lokipasyon.
Oto-destriksyon Israel pe ris USA dan spiral akselere enn lanpir ki pe kolaps..
Prezidan Trump finn akapar puvwar Kongre pu inpoz tax, e parey kuma Larenn dan Alice o-pei de-mervey, finn trafike ar tarif. Li deklar enn leta dirzans ilegal. Li defye Zidisyer, kan li deport dimunn ki li anvi dan ninport ki peyi li gayne pu pran zot. Li atak liberte dexpresyon ki sipozeman garanti dan Premye Amandman Konstitisyon US. Li atak liberte akademik, menas aret donn larzan liniversite ki pa les li deside ki pu ansenye, ek kisannla pu ansenye. Li finn lisansye ou met deor 260,000 fonksyoner, Reuters finn anonse yer. Li finn fer ferm diferan Minister an antye. Divan lemond antye, Trump pe prepare pu reyne kuma enn diktater, kuma enn tiran.
E Donald Trump, kan finalman, tu diktatir Arab ki abitye sumiz, finn interdi li servi baz militer USA lor zot later parski zot pa kapav riske ranverse par zot prop lepep si zot sutenir lalyans Israelo-Amerikin dan sa mem moman li pe komet zenosid kont Palestinyin, asterla li pe rasanble bonbardye B2 firtiv (ki pa detekte par radar) lor enn parti nu later, lor enn parti nu peyi, lor enn parti Repiblik Moris. Alor aster nu konplis perpetrater zenosid. Aster nu pe konpromet numem, politikman, militerman ek moralman.
Guvernman Moris bizin pran pozisyon ferm kont itilizasyon Diego Garcia pu bonbardye B-2 firtiv fer so agresyon. Sa agresyon militer intansyonel pu perpetre depi milye kilomet lwin depi teritwar USA. Lintansyon se komet agresyon kont Liran, u pu komet plis agresyon kont Yemen, u tulede.
Guvernman Ramgoolam bizin zwenn ka ki Sid Afrik inn mete kont Israel lor zenosid tutswit, e mobiiz tu peyi Afrikin pu fer parey. Ramgoolam bizin pran linisyativ dan lemond, vinn alatet kont zenosid.
E nu, dimunn, dan tu nu lorganizasyon, antan ki travayer, fam, mizisyin, sportif, zenn bizin travay lor solisyon pu ralye sipor mazorite dimunn dan Moris pu fini zenosid enn fwa ek pu fer ferm baz militer lor Diego Garcia. Sa pu ede pa zis pu sov dimunn Palestinn ki kuraze ek dus, me usi pu kontribiye pu fini ar tusa deseni dominasyon, expilsyon, lokipasyon ek Aparteid ki finn vinn ansam avek Israel so zenosid.
Tradiksyon CC avek kudme AA
* Antu 39 Leta ek kat lorganizasyon internasyonal, inklir Linyon Afrikin dan lekel Moris manb, finn fer prezantasyon oral pu denons blokis Israelyin lor Gaza. Ena Nasyon Zini; Palestinn; Lezip; Malezi; Sid Afrik; Alzeri; Larabi Saodit; Belzik; Kolombi; Bolivi; Brezil; Sili ; Lespayn; Federasyon Ris; Lafrans; Lindonezi; Latirki; Liran; Zordani; Kuwet; Luxanburg ; Maldiv; Mekzik; Namibi; Norvez; Pakistan; Panama; Poloyn; Katar; Grand Bretayn; Lasinn; Senegal; Sloveni; Sudan; Laswis; Komor; Tinizi; Vanuatu; Lalig Leta Arab; Lorganizasyon Koperasyon Islamik ; Linyon Afrikin .” Zis 2 peyi finn sutenir anbargo Israelyin lor manze ek medsinn ek lenerzi dan Gaza: USA ek Laongri. E Repiblik Moris absan lor lalis pei ki finn pran laparol, kuma enn nasyon kont zenosid.
