Warning: Israel pe reser syez lor Gaza, akseler anserkleman, zet ankor plis bom lor sivil
26.04.2025
Sertin intelektyel vremem les zot kuyone par propagann Zionis. Ek zot stipidite ena konsekans danzere. Zot sipoze konn sa pli byen.
Israel pe la, aster-lamem, azir kumadir li ena enn “lafnet oportinite” inn uver e li kapav atak Liran, ris larme US dan enn gran lager. Bi Israel, dan sa dezord ek kaos ki pe arive la se pu “konplet so zenosid” kont Lepep Palestinn, pandan ki dimunn anzeneral, nu orifye par “lager” kont Liran. Propagandis Israelyin ek Amerikin apel li, dan zot langaz degutan, “fini travay la”. Anfet, “travay la”, pu kontinye servi zot langaz, finn kumanse an verite otur 1947. “Travay la” se zenosid.
Wi, Leta Israel ena lintansyon, zot lider finn dir li an piblik, pu pus tu Palestinyin, kumans avek seki dan Gaza, andeor Palestinn pu tultan, ubyin tuy zot. E aster, zot truve, li moman la. Hezbollah, zot argimante, inn afebli. Servis Sekre USA, CIA, finn planifye e met an pratik zot “Loperasyon Timber Sycamore” avek sikse. Ranvers rezim Siryen Assad ki, sa kantite represif li ti ete, ti sutenir Palestinn, e ranplas li avek zot alye, enn band pro-Israelyin azan Al Qaeda. Dan Liban, USA ek Lafrans finn inpoz enn nuvo Guvernman, avek lintansyon pu afebli Hezbollah. Aster, zot kwar, li moman pu enn aksyon final dan zenosid.
Israel so alye prinsipal, Prezidan Trump, limem, finn truv bon “sigzere” ki dimunn dan Gaza bizin deplas zot pu fer lespas pu enn proze reel-estayt, pye-dan-lo, ki Lamerik pu proprieter. Aksyon bizar, usi, finn ede pu uver enn lafnet oportinite ki Leta Israel bizin.
Palestinyin, byensir, pa finn zis leve ale. Olye sa, Gazawi finn fer pelrinaz ziska zot lakaz kinn detrir, par dizenn milye, kan sese-lefe Zanvye premye fwa ti kumanse. Anfet, Leta Israel finn gard zot an detansyon, detut fason. Nu tu kone ki Leta Israel pe infliz enn leta-syez vyolan, stil Medieval lor Palestinyin dan Gaza. Ni manze, ni dilo, ni kuran, parey kuma ansyin Minis Defans Yoav Gallant finn menase zis apre latak 7 Oktob lor Larme Militer Israelyin anserkle Gaza. Antan ki nuvo minis defans Israel Katz finn repete, par dir “Okenn led Imaniter pa pu rant Gaza”. Letan finn vini aster, Guvernman Israelyin panse, pu fors Palestinyin andeor Gaza net, pu afam ek asfiksye zot, anmemtan ki exterminn zot.
Alor, Israel finn deside pu, e pe al delavan pu, fors Palestinyin andeor Gaza par lasas zot depli-an-pli dan limit enn deplizanpli tipti Kan Konsantrasyon, anmemtan asasinn zot e fer landrwa la vinn invivab. Kan Konsantrasyon la ti apel “Kan Konsantrasyon” parski larme ki “konsantre” fami dan lespas deplizanpli tipti, avek bi pu deplas zot ek/ou exekit zot. Sa enn vye metod kolonyal exterminasyon.
Israel pu al delavan avek so zenosid, kuma nu pe truve divan nu lizye, malgre tu seki sa kapav kute anterm kriote, ilegalite, imoralite, barbari, obsenite ek vyolans san limit. Sel fason zot kapav fer sa se par sey fer lemond antye truve ki zenosid li zis “enn lager”. Nu bizin par kik espes sorselri pa truv seki zot pe fer kuma “zenosid”.
Me, Lemond antye, eksepte lider Loksidan ki pli ale pe izole, truv zenosid kuma zenosid. Israel pe akrose zis parksi lider Loksidan ek zot propagandis medya ki kurbe kapav ankor pretann ki “zenosid” li pa enn “zenosid” me enn sinp “lager”.
Aster zot panse ki, si ena enn veritab lager vyolan kont Liran, sa pu donn enn sok telman orib ek telman danzere pu furni enn “vwal desepsyon” ase epe pu trik lider Loksidan ek zot medya esklav mem ki seki zot pe truve kuma “solisyon final”. Enn term Nazi, ki servi apre mo transport, travay forse ek kan konsantrasyon, pu sinifye exterminasyon iltim. Sa, Israelyin panse pu deturn latansyon lemond ase lontan pu Israel “fini travay la” pu debaras lepep Palestinyin enn sel ku, dan enn fason ou enn lot. Zot espere ki okenn guvernman Oksidantal ek medya Oksidantal pa pu admet ena enn zenosid ou raport lorla. Olye sa, zot tu pu konsantre, zis lor enn vre kaos Israelyin, ou latak Israelo-Amerikin lor Liran. Sa latak la pu provok enn lager vremem danzere ki kapav exploz pa zis Mwayin Oryan s.a.d Lwes Lazi, me lemond antye.
Anfet, “lemond antye”, apart lider Oksidantal ek zot medya maryonet, kapav deza truve ki seki Israel ek so alye pe fer, li zenosid. ICJ, pli ot lakur Nasyon Zini, dir ki li enn zenosid “plozib”. ICC finn purswiv lider Israelyin lor sarz krim deger ek krim kont limanite. Lasanble Zeneral Nasyon Zini finn fer lapel Israel pu aret so bonbardman ek so syez. ICJ finn truv Israel kupab “lokipasyon” ilegal lor Palestinn, ek dimann Israel pu retir li, pu pey domaz e pu permet retur refizye. Rezon pu lekel port-parol lansanb pei Loksidan pretann pa truv plis ki enn “lager” – nu fer referans isi a parti politik ek lider Eropeyin ek Amerikin, laplipar patron liniversite ek zot akademik meynnstrim, tu lorgann medyatik meynnstrim –pankor konpran. Li paret kumadir, dan meyer ka, enn foli ou, dan ka pli pir, enn orer total.
Sertin intelektyel Morisyin, prinsipalman dan Lapres, ki pretann pa pe truv Israel pe komet zenosid kont Palestinyin, truv sa pa plis kuma “enn lager” ant “Israel ek Hamas”. Ena enn rezon adisyonel konpare avek zot omolog Oksidantal, enn rezon pli sinp : zot zis swiv zot ‘omolog Oksidantal’ dan sa pozisyon extrem nye seki pa kapav nye. MBC ek Radio Plus, pu nom zis de ek laplipar lagazet, resit mekanikman mansonz medya Oksidantal. Zot inyor pozisyon ofisyel Guvernman Moris, pu zot kapav swiv medya meynnstrim dan Lafrans, US ek UK. Me, kuma dan tu ansyin koloni, zis enn minorite repet mekanikman sa lopinyon la. E zot fer li dan enn fason prinsipalman anonim.
Anfet, nu bizin rann omaz a tu poet ek ekrivin Morisyin ki finn pran pozisyon kont zenosid, e finn denons li an piblik. Nu rann omaz artis ek mizisyin ki finn dibut pu form parti dimunn ki finn opoz zenosid. Nu rann omaz sa ti-ponye zurnalis kuraze, inklir Sedley Assone, Patrick Michel, Husna Ramjanally, ek Jean Claude Antoine, ki finn pran pozisyon. Nu rann omaz lider politik dan Moris, ki finn dan bann lane pase pran pozisyon, dan zot parti, lel fam, ou antan ki lider, kont zenosid Israel. Zot pozisyon kapav tro timid, anfet zot timid mem, me omwin zot inn pran pozisyon.
Me tu sa bann intelektyel dan Loksidan , kuma eski zot pa truv zenosid lor zot lekran divan zot prop lizye? Ubyin eski zot zis pretann zot pa truve? Ubyin eski zot panse tusala enn zwe? E kifer zot apel sa enn lager, kan anfet li pa enn lager.
Detut fason, “intelektyel” ou non, zot pe azir dan enn fason ase inyoran, ou avek prezize, ase pu tom dan propagann Israelyin ek Zionis. Sa, an retur, vedir, “intelektyel” ou non, zot pe azir vremen kuma inbesil. E stipidite kapav danzere.
Sa sanblan ki seki pe arive, anfet, zenosid li zis enn lager kuma lezot lager, avek tu so konsekans “malere” ek “trazik”, se pilye prinsipal Zionis Israelyin ek Amerikano-Eropeyin.
Enn mansonz sa.
Sa propagann. Nu bizin opoz sa mansonz la ek so propagann.
Fason fer sa, se pu expoz li, pu seki li ete. Mansonz. “Hasbara” [ zefor diplomatik piblik Israel ki viz pu infliyans lopinyon internasyonal e promuvwar enn zimaz pozitiv Israel, espesyalman kuma enn repons a kritik kont li] ou propagann al kumsa: seki pe (sipozeman) pase se Israel so “lager kont Hamas”. Li obligatwar pu truv li kumsa. Si ou apel zenosid - “zenosid”, ou ena menas kit pinisyon sosyal. Seki anfet pe arive seki Leta Israel ek so “met-esklav” Oksidantal pe amenn enn kanpayn pu eliminn lepep Palestinyin konpletman, e kree enn “Pli gran Israel, enn Leta Zwif depi Larivyer ziska Lamer”, par met deor Palestinyin, sinon asasinn zot ek, si pa asasine, expilse zot depi zot later. Parfwa “Pli Gran Israel” ankor pli gran, akapar bann parti dan Liban, Lasiri, Lirak, Liran, Zordani ek Lezip! Se seki zot deklare “Israel” ete, seki Bondiye inn done.
Alor, se rezon pu lakel Israel pe lager: pu eliminn tu Palestinyin ki bar larut enn “Leta Zwif”, enn Leta ki pe elarzi so frontyer.
E lot kote, ena rezistans kont opresyon. Dimunn ki oprime, Palestinyin, zotmem pe organiz rezistans. Palestinyin pe reziste par kontinye res dan Palestinn pu plis ki 75 banane malgre ki finn lasas zot dan fason vyolan. Zot inn reziste par zwenn parti politik ek lorganizasyon volonter, ek zot reziste par vinn zurnalis-sitwayin, depi ki Israel finn anpes prezans zurnalis internasyonal dan Gaza. Zot finn usi form grup larme rezistans kuma, avan, Fatah ek zordi inklir Hamas, Fron Popiler pu Liberasyon Palestinn (PFLP), Fron Demokratik pu Liberasyon Palestinn (DFLP), Jihad Islamik, Parti Pep Palestinyin (PPP), Fron Popiler Lalit Palestinyin – Komandman Zeneral (PFLP-GC), Linyon Demokratik Palestinyin (FIDA), Fron Liberasyon Palestinn, Fron Liberasyon Arab, Fron Palestinyin Arab ek Lafors Loraz. Byin rar nu tann seki rezistans anrealite ete lor medya meynnstrim Oksidantal.
Sepandan, rezistans kont zenosid existe. E li ena drwa existe. Li ena drwa reziste par lalit arme. Kifer? Parski zot later, kuma finn deside aster par ICJ lane dernye, militerman okipe par lafors lokipasyon Israelyin.
Bi Israel se pu debaras Pep Palestinyin depi tu teritwar Palestinn, e pu ki Leta Zwif Israel inpoz so puvwar lor teritwar la net ki sipoze, dan rezolisyon 1948 Nasyon Zini, pu divize an de Leta, ek pu plis ki sa, usi. Pu fer sa Leta Israelyin. pe komet zenosid. Li kler ki samem pe arive.
Pa enn lager sa. Parey kuma zame li ti “enn lager” par Leta Alman kont Zwif dan Lerop. Lerla sa ti enn zenosid ki ti arive. Seki Leta Israel pe fer zordi, li zenosid.
Dimunn ki apel sa zenosid la, enn “lager” olye seki li ete, zenosid, konplis zenosid.
Ki kantite for Propagann Oksidantal ete
Propagann Israelyin ek Zyonis sitan for ki mem seki kont zenosid kapav, e parfwa, vremem zot tom su lanpriz propagann la. Mem Moris, kan sak parti politik kont zenosid, individi ki aktivis dan politik, ki vremem kont zenosid e ki’nn vinn dan manifestasyon dan Porlwi, zot leker ladan, sarye pankart ki dir zenosid enn “lager”.
Li inportan konpran vre lefe sa slogan la. Tu sa santenn lepasan dan Porlwi ki’nn truv manifestasyon, zot inn arete lor zot semin pu lir bann slogan ki lor pankart. Zot pans lor sa bann slogan la. Zot mem ki sipoze lir slogan, pa zis lider dan USA ek Israel atraver zot lanbasad ek bann kolaborater. Par mil dimunn inn get video manifestasyon par laswit lor WhatsApp, YouTube ek Facebook, bannla inn met video lor poz pu lir slogan. Dimunn ziz manifestasyon la par slogan ki ti lor pankart, prepare an avans, lor lekel dimunn ki’nn sarye li la inn reflesi avan ekrir li. E dimunn kikfwa kapav adopte slogan ki enn lot inn desid pu montre lor so pankart dan enn lamars dan sant Porlwi. Ala kifer nu, dan LALIT, nu dimann ki pran kont linportans slogan avek enn mesaz politik kler. Seki nu dir ena konsekans. Suvan bann mo ena puvwar zener aksyon. Zot napa zis parol ‘dan ler’.
Ala enn lexanp
Kan enn manb, par-la-swit, ki li dimann enn misye kan li pe travers semin dan Quatre-Bornes ki ti ena lor sa pankart ki li ti pe sarye zur manifestasyon la, li dir zame li’nn sarye pankart li. Klerman, li kone ki li pa kapav defann ; nu dir sa parski nu tu inn truv li sarye sa pankart la. Li ek enn lot bug inn sarye pankart ki fer konfizyon ant ki ete enn zenosid ek enn lager. Li dir pa li ki’nn reflesi lor ki pu met lor pankart, ni li ki’nn penn pankart la. Ti « bann-la » ki’nn fer sa. Donk, alerman ena dimunn ki vremem kont zenosid – kuma sa misye la –ki’nn prepar sa pankart la e lezot, tuzur kuma limem ek so kamarad, ki’nn sarye li san ki zot kone ki ti lor pankart la uswa ki slogan la vremem dir uswa ki lerla inn bliye ki zot inn sarye dan zot lamin. Mazine ki manifestasyon inn organize e piblik ti invite lor baz enn deklarasyon komin byin long, byin koeran, avek bann mo ki’nn reflesi byin avan ekrir. Plis ki 20 lorganizasyon finn fer lapel pu lamars e so platform inn pibliye partu-partu avan lamars. Lerla ki fer lamars Porlwi le 4 Avril. Ofet, dimunn ti kapav reflesi par duzenn, kikfwa par santenn slogan ki ti pu tom anba tem zeneral platform. Anfet ti ena 2 tem ki konekte ansam : Ferm baz Diego Garcia e Stop Zenosid kont Palestinyin.
Me sitan propagann Zionis omniprezan ki ena aktivis vinn manifestasyon kont zenosid e lor zot pankart inn ekrir « Trump, f... ur War » (abrevyason « f… » nu ki’nn fer li, abrevyasyon “ur” dan plas “your” sort depi orizinal). Nu dakor avek sipozisyon dan slogan ki dir ki USA usi, e pa zis Israel, responsab zenosid. Selman, bliye ki fode pa servi move langaz ki kapav pus dimunn depi koz Palestinyin dan lespas piblik e bliye si slogan la limem fer sans, konteni slogan la, si nu sipoze ki lor size lamars la, pe anfet dir ki Trump pe fer enn « lager”. Vi ki lamars ti kont zenosid Israel lor Palestinyin, avek konplisite Lamerik, nu pe sipoze ki pe koz zenosid. Lamars pa ti lor, pu enn koze, Likrenn kot US direkteman inplike dan enn « lager ». Trump nek pe swiv semin Biden inn pran, donk li pa zis “Trump’s War” (Lager Trump), ni li zis Trump so zenosid. Pwin prinsipal se : Eski slogan la pe koz zenosid ? Si se-le-ka, seki’nn sarye sa pankart la pe montre ki zot viktim propagann Israelyin ek Zyonis. Anplis, seki slogan la vedir se pa ditu seki militan ki’nn sarye panse li vedir : « F… your …. (pe-inport) » vedir « Nu byin kare ar… ». Nu panse ki sa 2 bug ki’nn vinn manifestasyon la zot pran kont zenosid ki pe ariv lepep Palestinn. Zot pa ditu kare ar okenn lager Trump ou zenosid ki zot kapav pe koze. Sinon, zot pa ti pu dan lamars. Zot ti ava res lakaz.
Difisil pu mazine dan latet.
Pwisans lafors propagann
Seki inportan se ki li byin intrigan ki dimunn ki mem ki vremem zot kont zenosid, zot kanmem tom dan pyez propagann ki bann lafors pro-Israel mete, setadir apel seki Israel pe fer enn « lager ». Israel ek Lamerik, osi byin ki medya Oksidantal, fer byin byin atansyon nek koz, alemem, “lager”, uswa “lager kont Hamas » uswa enn « lager kont teroris ». Me zot ena tor. Pa lager sa. Pa lager DI-TU ! Enn lot zafer sa. Li enn zenosid kont lepep Palestinn.
Enn lager, se enn konfli ant 2 larme, dabitid a zarm egal kuma sipa avyon-de-ger pu bonbard sib militer, sipa lantrepo zarm. Ubyin li vedir tenk pe tir lor tenk, uswa solda ki pe tir kont lezot solda. Dan lager, ena batay. Enn lager li pa enn leta-de-syez medyeval kont bann fami, kuma Israel, avek sipor Trump, pe fer Palestinyin sibir dan Gaza zordi, pe fer fami mor-de-fin. Ferm enn fami dan kan konsantrasyon, apre lerla bonbard zot ninport kotsa zot kapav kasyet dan sa kan konsantrasyon la, pa apel lager sa. Anserkle ek pus dimunn depi enn landrwa al enn lot landrwa, kuma seki Trump pe siporte, avan masakre zot detut-fason, sa osi pa li sa. Tuy sivil ar explozif ki’nn large depi lwin lao dan lesyel, kuma zis dimunn kapon fer, zet bom lor tibaba ankor dan lebra zot mama, par milye zot tuye, leres res antere anba debri ziska nepli kapav respire, ek kan anmemtan, Israel anpes masinn katapilar rant dan Gaza pu tir zot, sa usi pa li sa. Lager pa vedir eliminn lopital par destriksyon tutafe intansyonel. Lager, pa vedir viz travayer lopital par milye. Par milye ! Li pa eradikasyon zurnalis, enn par enn, pu kasyet laverite ouswa kuver seki ou finn perpetre nonpli. Tuy bann mesaze par santenn. Lager li pa destriksyon databeys servis sivil, kontra later, mize ek lezot form memwar dimunn. Kan Larme Israel atak Palestinyin, pa enn lager sa. Enn asasina lor gran lesel sa. Apel sa zenosid.
An tuleka, ki li Trump, ki li Biden avan li, tulede inn sutenir zenosid lor nom 2 pli gran parti politik dan Lamerik – avek larzan kontribyab Amerikin, zarm ek linformasyon asire par Lamerik, e usi baking zeo-politik dan lespas kuma Lasanble Zeneral ek Konsey Sekirite Nasyon Zini e usi Lakur Kriminel Internasyonal. Dan Lamerik, nek semenn pase, inn ena bann manifestasyon imans. Me okenn lagazet meynnstrim pa finn kuver. Dan Kaliforni, lapolis inn aret 12 dimunn ki ti pe fizikman blok bom ki pe al Israel lor Baz Air Force Travis. Tule 12 inn large byin vit pu ki zistwar la pa fane. Al google li, ou pu truv enn rapor dan enn ti lagazet lokal dan Bay Area. Enn bann rezon kifer dan Lamerik, dimunn ena lopinyon defavorab ar Israel (53% kumansman sa mwa la) ek kifer mwins ki enn-tyer ena konfyans dan Netanyahu, Premye Minis Israelyin, li akoz nivo manifestasyon, lor kanpis liniversite dan lavil ek lor sayt travay. Ala kifer nu dir ki bann « lider oksidantal » ek zot “medya” pantin pe vinn bann sel dimunn ki kwar dan mansonz Israel.
Eski dimunn inportan kuma akademisyin, laplipar zurnalis, laplipar intelektyel Loksidan pa kone, pa truve, diferans ant lager enn kote ek masak sivil lot kote ? Sa se diferans ant lager ek zenosid. Mazorite dimunn dan USA pe kumans truv laverite malgre elit so kover-ep.
Bann mo ena zot linportans. Zot ena enn sinifikasyon. Dir zenosid enn « lager » se enn fason pu kasyet laverite. Li fer ditor.
E kan Israel pus Lamerik ziska bonbard Liran, sa nuvo lager la pu servi pu deturn nu latansyon depi zenosid.
Dan LALIT, nu propoz lekter nu lartik, seki anvi kapav reziste propagann Oksidantal, al lor YouTube, ou ninport ki lezot rezo sosyal e al ekut, pu enn koze, Norman Finkelstein so expoze li’nn fek fer lor The Chris Hedges Report, kinn eplord semenn pase, li apel « Empitying Gaza » - Devid Gaza – e Ilan Pappé so kozri piblik avek Aaron Bastani tut-o-lon wikenn ki apel « How Israel became a fascist state » - Kimanyer Israel inn vinn enn leta fasis. Tulede koz lor manyer truv enn zenosid pu seki Ii ete, setadir enn zenosid e lor kuraz apel enn zenosid « zenosid ». Pa dir li lager. Napa enn lager ki nu pe truve la. Li napa kont enn lager ki nu’nn fer lamars isi. Donk, nu dir tu dimunn ki « angaze », evit tom dan pyez lingwistik seki pe fer zenosid. Nu demann tu dimunn dir, dan slogan, seki zot ule dir e dir li enn fason kotsa dimunn dan piblik santi u pe respe zot e servi mo e fer demann ki dimunn ordiner pu kapav siporte si zot dakor. « Ferm Baz Diego ! » uswa « Stop Zenosid ! » par exanp. Ninport ladan kapav exprime dan long-long tez, ubyin u kapav met zot dan bann ti slogan byin presi ki nu pe dir. Sinifikasyon la kler. Demann la presi. Pena pu kurbe divan propagann Israelyin uswa Amerikin. Moman nu pe viv tro inportan pu ki nu fer erer, pu ki nu badine ubyin pu ki nu « pa pran kont » bann zafer usi inportan kuma enn zenosid.
Ler inn arive pu ki nu pran enn pozisyon ferm. Nu apel tu lorganizasyon e tu intelektyel ek akademik pu truv enn fason, individyel uswa kolektif, pu pran enn stenn piblik kont zenosid ki leta Israel pe fer kont lepep Palestinn avek baking USA ek Lerop an zeneral. Dimunn bizin ena kuraz apel enn zenosid « zenosid ». Nu bizin met presyon lot nu guvernman pu izol Izrael, zwenn Lafrik Disid dan so ka ICJ kot Israel pu zenosid, kominik gaydlaynn pu enn boykot total Israel, kup tu lyin diplomatik ar Israel e dimann enn anbargo zarm Nasyon Zini lor Israel e dimann Lasanble Zeneral Nasyon Zini pu lev leta-de-syez, inpoz enn sese-le-fe ki inklir enn zonn interdiksyon vol aeryin ki peyi ena larme ofer pu met anplas, lor Palestinn net. Lerla, tu muvman rezistans Palestinyin, ansam – kuma zot ti fini kumans fer dan miting Beijing Ziyet lane pase – negosye kuma al de lavan dan enn fason ki asire ki aret deplasman, aret vyolans kolonyal, e pu ki truv enn fason Palestinyin lib ek ki tu refizye kapav returne.
Bizin aret zenosid. Nu bizin anpes lezot lager pli divan par Izrael ek USA kont ankor peyi dan Mwayin Oryan. Ase ar lager ilegal ek imoral. Sityasyon la kritik. Li moman pli pir ki nu tu dimunn ki viv lor later zordi pe traverse.
LALIT
Tradiksyon CC, GH ek kudme AA.
[Edite le 26 Avril: Referans a pozisyon tro timid bann lider konsern sirtu lider politik dan Moris, pa lezot lider ki apresye pu zot pozisyon byin for kont Zenosid]
