Nu, 20 lorganizasyon ki ti siyn petisyon mwa dernye pu Ferm Baz Diego, asterla pe fer enn lapel pu enn lamars dan lavil kapital. Port Louis 4 Avril 11:00 a.m. lor sa tem la. Nu pe inklir dan nu platform demand Lamars Fam kont zenosid dan kad Zurne Internasyonal Fam lane dernye. 

VANDREDI 4 AVRIL 2025

Zwenn Zardin Lakonpayni 11:00 a.m.

PORT LOUIS

dan enn lamars pasifik, piblik dan plin sant Port Louis. 

Platform pu Lamars baze lor Petisyon mwa dernye (i)

Nu, reprezantan lorganizasyon ki siyne anba, ti fer enn lapel mwa dernye pu Premye Minis sezi lokazyon kot Repiblik Moris finn konfirm so suvrennte lor tu so teritwar:

* pu pran pozisyon pu ferm baz militer lor Diego Garcia

* pu amand Konstitisyon Moris pu aboli baz militer etranze depi nu pei

* anmemtan fer demand ki Britanik ki ansyin kolonizater ek Amerikin ki ena enn lokipasyon militer Diego pey aryeraz lokasyon depi dat Lindepandans an 1968 ziska dat ki zot ferm baz, ale, osi byin ki pey reparasyon ar Chagosyin pu ditor ki zot finn sibir kan ti deplas zot par lafors, e reparasyon a Leta Moris pu sa lokipasyon militer ilegal lor otan later ek lamer Repiblik Moris.

Asterla, nu fer apel pu enn manifestasyon lor baz sa mem platform la, etan done ki

- Li pu asir ki suvrennte Moris vinn efektif lor totalite Chagos.

- Li asir ki baz militer la nepli reprezant enn menas permanan lager, e ki lager ek zenosid zame ankor perpetre depi lor later pu ki nu responsab.

- Li asire ki later pu ki nu responsab zame re-servi pu anprizonnman ilegal ubyin tortir.

- Li asire ki Chagosyin ena drwa retur ver lil kot laplipar sorti, Diego Garcia, osi byin ki lezot lil Chagos, e tu Morisyin ena drwa lib sirkilasyon lor totalite teritwar nu pei. 

- Li asire ki Leta Moris pa vyol Trete Pelindaba pu enn Lafrik Lib depi Zarm Nikleer kot nu siynater.

- Li asire ki met fin “polisyon baz militer”– surs mazer degradasyon ler, later, lamer – e rann posib enn veritab Park Marin. 

- Li asire ki nu pei evit vinn sib atak par vanzans si avoy bom depi nu teritwar lor pei ar lekel nu pa anger.

- Sa pu permet nu, dimunn ki res dan pei, zwir nu “leta demokratik suvrin”, kuma dir dan Konstitisyon Moris Seksyon 1.

- Sa pu ede pu asir lape lor baz lazistis ek lalwa internasyonal. 

e nu lamars li osi baze lor platform Lamars Fam pu Lape (ii) lane dernye kordine par Muvman Liberasyon Fam:

1. Nu opoz zenosid ki leta Israel pe perpetre kont Palestinyin, 2. Nu denons USA ek lezot leta ki furni zarm, larzan ek kuvertir diplomatik pu Israel, 3. Nu sutenir ka ICJ ki Sid Afrik inn mete kont Israel pu zenosid, 4. Nu sutenir lepep Palestinn kont lokipasyon militer ek kolonizasyon zot finn sibir depi 1948, konfirme par zizman ICJ 2024.

Nu lamars li batir lor subasman sa 2 platform la. Nu pu swiv mem itinerer pu lamars ki ti swiv pu Women’s Peace March lane dernye. Nu pu zwenn dan Lari La Poudriere kot Zardin Konpayni, mont Larut Royal divan Lotel di Guvernman, vir a-drwat dan Sir William Newton, lerla re-vir a-drwat, desann Lari Desforges, lerla vir a-drwat dan Pope Hennessy, agos pu return Lari La Poudriere kot Zardin. 

Apel pu manifestasyon siyne par:

Mauritius Labour Congress, Haniff Peerun

Federation of Parastatal Bodies and Other unions, Deepak Benydin

Confederation des Travailleurs des Secteurs Publique et Privé, Reeaz Chuttoo

National Trade union Confederation, Narendranath Gopee

Federation of Civil Service and Other unions, Vinesh Sewsurn

General Workers Federation, Clency Bibi

Federation des Travailleurs Unis, Atma Shanto

Rodrigues Private Industries & Allied Workers union, Jocelin Louis

Rodrigues Government Employees Association, Julienne Meunier

Rodrigues Workers Federation, Marie Antoinette Casimir

Nurses’ union, Vidhata Jeewuth

Nursing Association, Ram Nowzadick

union of Private Secondary Education Employees, Dain Jahajeeah

Ledikasyon pu Travayer, Lindsey Collen

Dr. Idrice Goomany Treatment Centre, Norman Tambanivoul

Leve Fam! Danielle Turner

Muvman Liberasyon Fam, Rajni Lallah 

ABAIM, Marousia Bouvery, 

Never Again-Olive Resistance, Tania Haberland 

Lalit, Alain Ah Vee 

Alain Ah Vee, ki pe kordine pu Kolektif, c/o 1A La Croix Street, Forest Side. 

Not (i): Petisyon pu Ferm Baz, 23 Fev 2025 Zurne Global Aksyon Ferm Baz     Not (ii): 10 lorganizasyon fam ti adere a sa platform la, March 2024.