Blog Zenosid No.66 -Zenosid akselere par Israel avek Baking Trump
25.03.2025
[Versyon an Angle poste le 21 Mars]
Tu imin ki ena kit santiman dan zot leker bulverse akoz Israel inn rekumans bombard e fer pilonaz artilri lor dimunn Palestinn ki viv dan Gaza. Ki ena kit santiman dan zot leker. Sa arive mem si pe ena anmemtan expilsyon akselere fami Palestinyin depi Wes Benk ek Zerizalem, sa pruv lintansyon Leta Israel komet zenosid. Pa fasil pu kontinye avek nu rutinn tulezur kan ena sa nivo intansyonel pu infliz tortir lor enn lepep antye, anserkle, pe lasas zot, pe pilone depi lesyel ek later. Mem manb Guvernman Moris ena ase santiman dan zot leker pu vinn an piblik ek pran pozisyon, “Moris kondann avek fermte lansman latak masif aeryin par Israel …, deplor re-kumansman ostilite ki pe koz vyolans persistan ek atros dan Gaza. Moris re-iter so lapel pu enn sese-lefe imedya ek permanan, e pu repran oplivit negosyasyon pu enn rezolisyon pu lape ek lor lon-term dan konfli Israelo-Palestinyin san okenn pre-kondisyon”. Malgre sa, Guvernman ankor tuzur pa pe respekte so langazman minimal dapre Konvansyon Prevansyon ek Pinisyon Krim Zenosid, e pankor ziska ler, omwin, zwenn ka ki Sid Afrik inn mete dan ICJ kont Israel pu zenosid. Moris ena devwar anpes zenosid. Savedir li ena enn devwar pu nom seki Israel pe fer kuma “zenosid”, ek anpes ki sa kontinye. Seki nu bizin aster, anmemtan ki santiman dan nu leker ek mem parol pu dir, seki Guvernman bizin azir. Partu dan lemond ena dimunn, ek guvernman, usi, ki pe truv mwayin pu azir.
Me, antretan, dan lemond ena sertin et-imin dan Israel, ek lezot plas, ki paret pena “santiman dan zot leker” kuma normalman ena. E sa usi, bizin rekonet. Sa se “eschatolozikal” – enn gran mo ki nu ti devet osi konpran, parski, otan ansyin ki li ete, li finn vinn pertinan pu realite zordi, ubyin “apokaliptikal” ubyin “lafin lemond”, lider ki zordi opuvwar dan Israel. Zot inklir de Minis Smotrich ek Ben Gvir. Pli ot lider sa bann eschatolozist se Bibi Netanyahu, limem. Detut fason, sa se “vre kwrayan” pli pir espes. Zot travay konsyaman ver dezord total kuma zot politik-krwayans relizye irasyonel. Avek destriksyon Moske Al Aqsa dan Zerizalem, zot kwar Trwazyem Tanp pu pran nesans, ek sa pu lanons kumansman enn nuvo lord mondyal dan Zidaism. Pu ariv sa, zot bi politik se pu amenn enn “gran lager”. Enn lager ase gran pu kree telman dezord, andan li, ki se kumsa ki pu bann roder-apokalips pu lerla kapav debaras totalite “Pep Arab” andan seki zot apel “Gran Israel” ek pran kontrol permanan sa teritwar la an-antye. So frontyer aktyel byin diferan dan lespri diferan eschatolozist. Netanyahu, kuma mo’nn dir, finn kumans reprezant totalite sa kuran parmi Zionist. E zot – “eschatolozist Zwif” – zwenn par milyon dimunn dan baz Trump ki manb eschatolozist Kretyin, Kretyin Zionist ki ena enn krwayans “lafin dimond” ki konverze avek zot omlog Zwif. Sa lezot “vre kwayan” la atann inpasyaman ziska kan Kretyin -vivan ek mor – pu fizikman, ansam, al ansam dan nyaz, pu zwenn Bondye lao parla dan lesyel. E sa pu arive kan, dapre krwayans bann fanatik Zwif finn pran kontrol “Israel”. Alor, zot, usi, insit latak vyolan kont Palestinyin. Alor, zot, usi, blok santiman dan zot leker. Dan Moris, ena sertin Evanzelik Kretyin, ki tann sa kalite lapres dan zot legliz mem zordi. Wi, nu pe viv dan Lepok Som. Lepok Som avek enn telefonn portab azute ar ek sertin medya.
Kan mo pe ekrir sa blog la, sosyete Israelyen pe kas an de but lor sa pwin la. Ek so Leta, usi. Sa divizyon la finn kumans inpe lane avan 7 Oktob Hamas atak lafors lokipasyon Israelyen. Aster, sa divizyon la pe vinn pli grav. Ena menas lager sivil.
Alor, pu sit ansyen Anbasader Britanik, Alistair Crooke dan enn lartik resan avek tit, “enn lektir zeo-politik lager sivil nesant Israel”, kan Prezidan Trump menas ki, “tu lanfer pu desene”, savedir ki vre krwayan eschatolozikal rezwir. Eski Trump kone kuma bann maniak apokaliptikal Israelyin interpret so parol? E azir lor so parol? Ubyin eski li dir so parol dan kontex sertin lezot kalite lozik? Ubyin san okenn lozik? Li pa kler. E manipilasyon Trump li tel ki suvan ena enn melanz dan so koze lor seki li “kone” ek “pa kone” e, detutfason, pa caring.
Antuka, byin vit depi ki Trump finn menas enn dezyem fwa ki “tu lanfer pu desene”, Israel Netanyahu sinpleman eklat sese-lefe ki Trump, limem, finn orkestre e inpoze lor li. Kumadir permisyon finn done. Anfet permisyon finn done pu Israel depi Trump. Alor, Israel kontinye, ankor enn fwa, azir avek inpinite inakseptab. Israel finn sinpleman rekumans travay pu tir tu Palestinyin andeor zot later Palestinyin byin-eme par zenosid, kuma tu dimunn pe truve. E Trump, sa mem zom ki finn orkestre ek inpoz sese-lefe, finn kurbe kuma enn vale ki sumet divan volonte lobi Netanyahu dan USA, e finn donn Israel “lese-pase”. Alor, plis ki 400 dimunn dan fami Gazui finn masakre Mardi gramatin boner, kan zot ti pe pran enn repa avan soley leve ek karem kumanse. Wi, latak la dan Ramadan. Alor, kan ariv Merkredi, patern orib Israel lor expilsyon forse, lasas fami kuma trupo zanimo depi enn but a enn lot, bonbard zanfan usi pilonn dimunn aze-pansyoner depi zot tenk, ek fizye travayer led-imaniter depi fizi sniper tu kontinye enn ritm suteni. Lafors larme Israelyin zom ek fam azir kumadir zot pena santiman dan zot leker.
Alor, Israel pu kontinye perdi lager kont Hamas, kontinye perdi kredibilite li ti kapav ena a enn sertin moman dan lizye sertin, e kontinye perdi so lespwar fitir pu existe kuma enn Leta. Alor, sel ospyon pu Israel se pu kontinye ris USA ver enn lot lager lor nom Israel. Kifer “enn lot”? Gran lager pu vini apre premye sis lager, ki nu ti denonse dan nu blog 59 an Desam, ar mo swivan: “An 2007, ansyin Zeneral US Wesley Clark, ti explik kitsoz inportan. Linn revinn dan nuvel ankor. Ala kifer. Li ti dir lor program Amy Goodman an 2007 ki, apepre dis zur apre latak 9/11 lor Tur Zimel, otur 20 Septam 2001, ki enn top Zeneral US finn inform li “nu pe al lager kont Lirak’. Inpe semenn apre, li ti azute, kan nu pe deza bombard Afganistan, mem Zeneral finn dir li, li finn gayn enn lot Memo depi Sekreter Defans ki ‘dekrir kuma nu pe al pran kontrol set peyi dan sink an, kumans par Lirak, Liban, Lalibi, Somali, Sudan e pu fini ar Liran’. An realite letan ki ti prevwar finn pran preske 20 banane pli long ki dan Memo, ek lord la pa exak, me aster, an Desam 2024, sel peyi reste lor lalis, apre ki USA “pran kontrol” Lasiri, li Liran. Tu inn rest dan diferan degre larwinn apre ki finn ‘sanz rezim” inpoze lor zot par lanpir US, lor enn lalis ki kapav finn met dibut par Israel, ki kone.”
Sa fwa la pu pran kontrol Liran li pa pu zis dernye lor lalis Zionis finn tire an 2001, me li pu “ gran lamem”. Wi, enn lager kont Liran, si li arive, pu enn gran lager. E se samem ki “eschatolozist” ule. Alor, lemond baskile ver teritwar irasyonel krwayans dan provokasyon Armageddon.
Sa form parti enn vi dansanb, enn zimaz terifyan, par limem: Lanpir Amerikin, aster pe degringole sak zur, vyolans dan so agoni pe ogmante e kontinye. Trump pe seye dezespereman pu ranvers kolaps lekonomi US. Li inpoz tax lor inportasyon, e sa agrav sityatyon ekonomik Lamerik. Trump, akiz Demokrat pe atak liberte dexpresyon, atak li, limem, avek pir mesanste. Li finn expilse proprieter Kart Ver, Mahmoud Khalil, ki ti proteste pasifikman dan Liniversite Kolonbi, e avek ki Lotorite Liniversite finn prezant exkiz an Me lane dernye apre so sispansyon-enn zur parski li ti partisip dan protestasyon etidyan an solidarite avek Palestinn. Lord expilsyon pe chalennj dan Lakur ek dan manifestasyon lor sime. Trump aster pe servi Lalwa Alien Enemies Act 1798 (sic), pu li kapav met deor dimunn ki li ule met deor. Alor nu finn return sa kalite lepok la.
Trump atak Leta US antye, aster pe ferm Departman Federal Ledikasyon antye. Li pe renye par dekre. Enn patern ki finn fini agrave pandan reyn Biden. E aster li pe avanse ful vites. Trump ule vinn lerwa.
Korporasyon Prive pu renye san preske okenn proteksyon par lalwa u par Leta.
Viktwar Revolisyon Ris 1917 ki finn fors Leta burzwa partu dan Lemond pu reprim vyolans kapitalism, finn finalman tro ize pu reziste. Vyolans Leta pu vinn fu avek lakoler atraver Loksidan. Trump inyor Lord Lakur. Li met deor fonksyoner san okenn prosedir legal. So lintansyon se pu anekse so prop alye NATO, Kanada direkteman, ek Dennmark par pran kontrol Grinnlenn. Trump kapav rod lape ar Larisi – e dan mem prosesis larg so alye Eropeyin dan gran problem – me fe la seki, dan ninport ki ka, Larisi finn ganye kont Likrenn. E aster sa finn expoze net. Likrenn ti nek enn Proxi pu USA ek so alye Eropein ek NATO, finn tuy dimunn, sirtu Ikrenyin, zis pu “afebli Larisi”.
Kan lekonomi US pe efondre, Trump seye, usi, pu konsolid so prop versyon “Loksidan”: Li ena lintansyon anekse Kanada, dan so lenor, ek Grinnlenn, dan lenor Kanada, usi. Sa fason la, so kolateral, an term matyer premyer anba later kapav duble, usi, kumsa evit fayit posib ubyin efondreman ekonomik. Li pa ule Mexikin, alor li pe plito atak Mexik, e pe anfons zot ankor plis dan lame gang kriminel. Li pe reser kontrol US lor kanal Panama pli lwin dan so Sid, e menas pu anekse li. Li ule omwin ki Doktrinn Monroe mintenir: pu ki USA ena enn isfer linfliyans, enn monopol, lor Lamerik antye, kumans avek lamwatye Lemisfer Nor. E li pe viz pu retir tu so latrup depi Lerop – alor lape avek Larisi – ek depi Mwayin Oryan, usi, me laba li tap ar enn problem: Lobi Zionis dan USA tro for e pa pu les li retir li depi so rol bak Israel.
Alor, blesir uver enn Israel aswafe-disan pe agrave. So lel-drwat fanatik relizye pli irasyonel pran kontrol Leta, viz enn reyn par brans Lexekitif tusel. Sa arive an-paralel avek Lord Exekitif Trump ki met o-defi balans puvwar tradisyonel dan USA.
USA inkapab pu azir dan enn fason indepandan depi so prop “lake”, Israel.
Nu sit ankor enn fwa depi Blog 35 pli avan, “An verite, Netanyahu li lake dyab ki asterla pe komann lisyin zenosider, Biden.” Zis ranplas mo Biden avek mo Trump.
Trump reprezant enn seksyon burzwazi ki opoz globalizasyon burzwazi. So pli pros alye zot (get nu lartik 4 Fevriye, “Kan enn Lanpir grene”) depi sekter “data” ek “kominikasyon”: Elon Musk (Tesla ek X), Mark Zuckerberg (Facebook), Tim Cook (Apple), Sundar Pichai (Google) ek Jeff Bezos (Amazon). Li ule return lizinn dan USA – espesyalman depi Lazi, an partikilye depi Lasinn.
Anfet, li prepar pu konfront Lasinn, pu “kontenir” Lasinn. Ladan, kuma buku lezot zafer, li ena mem stratezi ki Demokrat ki finn fini kumans pu met li anplas. Tuzur lor laliyn “Bann ki bon” (nu dan US) ek “bann ki move” (lor lekel nu kapav kont lor CNN, Fox News, BBC, ek tu bataklan stasyon Televizyon Franse pu ede pu kree seki move), lager apre lager. Prosin “move” – pu ranplas Putin ek azut Hamas- zot dan “Lasinn”.
Me, pu lemoman, tu dan enn leta “bat fol”.
Tulede Trump ek Netanyahu, konzwitman ek individyelman, ena lintansyon “kree enn nuvo realite lor terin”, donn zot mem buku buku puvwar pu zot mem e pu zot tusel. Li extreman danzere. E, lor la, sa pe arive dan enn laz nikleer. Tulede USA ek Israel ena fize nikleer, alor enn lager li vrememe inpansab.
Rasyonalite finn voltize par lider tulede lanpir USA, kan li pe grene, ek usi par lider alye Eropeyin USA ek alye/ antagonis NATO (Grand Bretayn, Lalmayn, Lafrans, Kanada, etc). E kan lanpir US pe trene par enn kapitenn fu, Israel, alor lider Eropeyin prepare pu kontinye lager, osi byin ki zot kapav, kont Larisi deryer enn lot kapitenn fu, Zelensky – si ansyin zwer piano, ki zwe avek so parti prive, res tuzur opuvwar pu ankor lontan, kan USA fini abandonn li.
Armagedon pre. Eschatolozist pe met anplas enn profesi ki pu realize lor zot mem.
Si nu pa anpes li vinn vre, li pu arive.
Alor, nu bizin met presyon lor nu Guvernman pu zwenn ka Sid Afrik. E nu bizin fer ferm baz Diego Garcia. Nu finn batir enn koalisyon larz pu organiz enn manifestasyon lari lor size tulede: Baz Militer- NON, ek Zenosid Non. Dat lamars pu anonse byinto. Prepar ou pu dimann enn zur ‘off’ dan travay! Kumans invit dimunn, e dimann zot fer li enn priorite, e fer aranzman pu liber zot sa zur la.
Lindsey Collen, pu LALIT.
Tradiksyon: CC ek kudme AA.
