Zenosid Blog 65: Zenosid Israelyin a-de-vole ek nu de nivo Responsabilite
06.03.2025
[Versyon angle pibliye Mardi 04.03.25]
Aster li moman pu get Israel depre e pu nu prepar nu pu azir pu anpes prosin staz ankor plis vyolan zenosid ki Israel pe komet kont lepep Palestinyin an antye.
Israel finn perdi lager kont Hamas. Li pa finn akonplir nanyin apar masakre inosan. Etan done li finn sibir enn tel imilyasyon, Israel finn anonse ki aster li pu kup tu akse a manze, dilo, medsinn pu 2 milyon Palestinyin ki viv dan Gaza. Li ena lintansyon provok lafaminn pu fami laba ziska lamor.
Anmemtan Israel pe tir trwa milyon Palestinyin depi zot lakaz dan Wes Benk avek buldozer ek explozyon, kidnaping ek asasinasyon.
Israel ena lintansyon fer tusala divan nu lizye. Li pu fer sa si nu pa azir pu aret li.
Ladministrasyon Trump finn sa semenn la mem avoy 4 milyar dolar zarm dirzans pu Israel. Ladan ena bom 2,000 liv. Sa indike ki Trump pu sutenir zenosid, parey kuma Biden finn fer, si nu pa azir ansam pu aret li.
Antretan, lor enn lot fron ena devlopman. Lezip finn rasanble hardwer militer ek enn latrup 50,000 solda infantri lor so frontyer ant li ek Israel. Sef Ofisye Leta Mazor Israelyin finn exprim so linkyetid lor lafors larme Ezipsyin, ek repozisyonnman resan so trup ki Israel deklare kapav an vyolasyon Lakor Lape 1979 ant Lezip ek Israel. Alor, Lezip kapav pe prepar li pu lager, klerman anmemtan ki li pe kontre plan Israelo-Trump pu fer Palestinyin sove pu al dan dezer Sinai dan Lezip. Sa li plan orizinal Israel Oktob 2023.
Zordi Sef Deta pei Arab pe zwenn pu planifye enn aksyon komin lor Palestinn, inklir propozisyon lor kuma pu prosede ar rekonstriksyon Gaza, ek ofer enn lakaz tanporer pu Palestinyin dan Gaza. Inpe tro tigit ek inpe tro tar, me sepandan byin inportan. Tar zordi nu pu kone.
Me Israel pe donn indikasyon ki li pu anpir so zenosid. Eski li kapav pli pir ki li deza ete? Wi. E li dan enn moman kan medya dan lemond ek lizye lider inperyalis Loksidan kole lor kumansman kolaps Zelenksy, pyon Loksidan dan Likrenn. Sa kolaps la vedir ki itilizasyon Likrenn kuma “proxi” pu lager kont Larisi finn finalman provok enn riptir dan lalyans Oksidantal antye. Lalyans militer NATO antye lor rebor enn kolaps. Vizibleman ena enn kasir dan USA ant so Leta permanan ou “profon” ek ladministrasyon Trump. Lider Franse ek Britanik tuzur pe sutenir kolaps Zelensky, ek sa trwa la (Starmer, Macron ek Zelensky) panse zot kapav fer parey Trump dan sa moman la. Anzeneral lider Eropeyin pe galupe kuma pul san latet, afole dan direksyon konpletman diferan.
Alor, blog zordi li dan enn moman kan inperyalism Loksidan pe posibleman inploze. Lanpir US pe tranble, kuma nu finn explike plizir fwa lor nu websayt. Dan sa moman la, si pa dimunn, se Guvernman partu dan Lemond – inklir aster mem Eropein ek Amerikin – ki pe akey lafin posib lager USA kont Larisi, servi Zelensky so Likrenn kuma enn proxi Oksidantal. Vre natir lager la, vinn kler pu tu lepep ex-koloni –inklir partu dan Lazi, Lamerik Latinn ek Lafrik – finn aster expoze par Trump divan lepep Loksidan. Me, pa divan lepep Likrenn ki finn pey pri pli for, anterm kantite lavi kinn perdi ek lefet zot finn bizin sove depi zot peyi. Trump ek Putin pe rod enn Lakor Lape apropriye, tulede dir, pa enn sinp sese-lefe ki fize dan enn konfli glasyal. Macron, Starmer ek lerla Zelensky, an opozisyon, enn-par-enn finn al get Trump pu plede pu kontinye lager. Sa trwa la ule ki lager kontiyne – li pa kler ki fer exakteman. Zot ti, ek ankor, konplis pu sey fer Trump ofer enn sipor militer sekur pu lager kontinye si Lerop ek Likrenn kontinye perdi. Alor, li vre ki zeo-politik dan enn lakrwaze. Nu bizin konpran ki tusala pe arive ant USA, enn kote, ek UK-Lafrans-Likrenn, lot kote – ek zongle avek size kuma eski “London City” savedir gran labank biznes ek investiser sutenir Starmer? Eski Leta permanan USA( Pentagon, CIA, konplex-militaro-indistriyel) sutenir London City? Eski Lafrans esufle net ar so larme e ki pe gayn kutpye depi Burkina Faso, Chad, Mali, Kot Divwar ek Senegal, e pe rod enn lot plas kot pu poz zot bogi lor later? Eski Lerop kuma NATO pe riske efondre kan lezot lider Deta refiz swiv Starmer ek Macron dan zot lantrepriz agresiv dan Likrenn?
Me, kan pe sey konpran tusala, nu bizin usi res fokes lor zenosid. Nu bizin aret Israel. Li finn perdi divan Hamas, lerla bizin siyn enn lakor ki li pena lintansyon respekte. Hamas ule enn Lakor Lape apropriye, Israel dakor zis pu sese-lefe pu li kapav re-kumans so demolisyon ankor pli divan, mem kan li pe kontiyne fer mem zafer dan Wes Benk. Enn zafer ki Israel pu fer, mem kan li pe rod al pli lwin ki so kapasite, pa zis pu akapar Liban me usi Lasiri, se pu sey fors USA rant dan lager kont Liran.
E sa zis kan Lezip pe mobiliz so latrup lor so frontyer. Parey kuma Latirki ek Israel pe menas pu lager avek Lasiri. Tusa pe amenn nu ver enn pudriyer.
E lasufrans lepep Palestinyin pe kontinye mem. Depas nu panse ek kapasite nu leker konpran. Nu finn truv long latab pu Iftar dan Rafah, parmi larwinn. E lerla tann Netanyahu menas zenosid par laswaf ek lafaminn. Sa bizin arete. Nu bizin met enn stop.
Nu bizin aret zenosid, e fer li asterla.
Leta Israelyin bizin pa zis aksepte enn sese-lefe me li bizin osi kit totalman tu teritwar okipe asterlamem, ki ICJ finn zize kuma lokipasyon “ilegal”, permet tu refizye return zot lakaz, e Israel e USA ek lezot furniser zarm kapav kontribye dan fon Palestinyin pu rekonstrir Gaza ek teritwar kinn detrir dan Wes Benk. Nu bizin sutenir lidership Palestinyin inifye ki ti met dibut par Lasinn, ek inifye tu muvman liberasyon ek parti ek lorganizasyon. Nu bizin lape apropriye. Ni zenosid ni propaz lager. Ler grav.
Nu 2 nivo Responsabilite
Pu kapav sutenir Palestinyin, nu bizin montre nu sutyin par aksyon kot nu kapav rasanble. SOMALP finn organiz ek kordinn deklarasyon konzwin, manifestasyon konzwin ek lezot aksyon konzwin fantastik. Nu bizin fer ankor plis asterla. E nu bizin inifye sa muv la ar zefor inifikater pu ferm baz militer USA-UK lor Diego Garcia kuma form parti enn muvman internasyonal pu ferm tu baz militer.
Dan reyn Trump, kan muv USA pu retir li depi Lerop pe koste, par duzenn baz militer US kapav byin vit ferme. Trump aster pe koz redwir par lamwatye, pe repete par “lamwatye” depans militer atraver enn lakor mityel. Li pe mem koz lor deniklearizasyon tu lafors arme, ankor par lakor mityel. Sa kalite lokazyon bizin pran li, ler inn vini pu azir a-la-baz partu dan lemond, ek kordine otan ki posib byin. Anu fer ferm tu baz militer, kumanse par baz lezot pei. Anu bes depans militer par lamwatye, ziska kup li. E anu demantel zarm nikleer enn sel fwa, pa zis kuma spesifye dan Trete Pelindaba pu enn Lafrik libere depi Zarm Nikleer.
Alor, nu bizin vit ena enn manifestasyon konzwin lor tulede pwin: lafin zenosid par Leta Israel, lafin lokipasyon ek lafin Aparteid, ek fermtir tu baz militer ki lane apre lane finn rann posib tulede lager ek zenosid. Pu ki later ki nu responsab zame ankor pa servi pu fer lager, zenosid, renndering illegal, ferm prizonye andeor kontrol sosyal ou tortir deteni andeor form kontrol sosyal.
Lindsey Collen
pu LALIT
Tradiksyon: CC ar kudme AA
