Manyer Diyn pu Komemor Kaya ek so Lamizik
06.03.2025
Dan enn let adrese ar Jinnyor Minis Lar ek Kiltir, Hon. Veronique Leu-Govind date 16 Zanvye 2025, Mm. Veronique Topize, ki vev Reginald Topize, Kaya, finn rann li repons apre ki Mm. Jinnyor Minis ti kontakte li pu konn so pozisyon. Diferan lagazet finn met diferan brib depi sa let la. LALIT nu finn dimann Mm. Topize pu pibliye let la an antye, pu nu lekter. Isi konteni so let:
“Ser Mme Minis Veronique Leu-Govind,
“Mo pe ekrir sa let la apre nu konversasyon kan ou ti sonn mwa Mardi. Mo finn reflesi e osi koz ansam ar mo 2 zanfan, Azaria ek Lumiah, pu sa let mo pe ekrir la. Mo apresye ki ou finn vinn ver mwa antan ki vev Joseph Reginal Topize, Kaya.
“Mo truv dat le 21 Fevriye, enn dat dey pu lamor Kaya. Li osi enn dat ki asosye ar lemet ki finn swiv so lamor vyolan dan selil polisye. Anmemtan li asosye ar lamor lezot dimunn ki finn tuye pandan lemet, Berger Agathe, Neermal Ghoostia ek Michel Laurent. Alor, li pa vreman enn bon dat pu selebre lavi Kaya, ni so kontribisyon dan lamizik ek dan kiltir Moris, e mem dan kiltir Losean Indyin. Li enn dat plito trist. Li bizin rest dan listwar kuma enn dat pu komemor lefet ki ena dimunn ki sibir vyolans depi ofisye Leta, setadir britalite polisyer.
“Dapre mwa, kan mo mazine ki Kaya ti pran nesans le 10 Ut lane 1960 dan Camp Zulu, asterla apel Camp Shell, setadir dan Roche Bois, mo truv dat le 10 Ut apropriye pu selebre Kaya so lavi ek so lamizik, Lazurne Seggae. Anmemtan, lamizik Seggae ti pran nesans dan mem landrwa, e kan li ti pe res dan Site Roche Bois. So lekor finn antere dan Roche Bois. Deza lor sa ti Ron-Pwin dan lantre Site Roche Bois, ena sa memwar apropriye anform 2 lagitar, enn pu sinboliz Kaya, enn pu sinboliz Berger Agathe. Alor, mem si nu, setadir Kaya, mwa ek nu de zanfan, ti pe res Beau Songes kan bann gard finn tuy li dan selil polisye, mo truv plas pli apropriye, se Roche Bois pu enn memwar pu Kaya. E dat mo truv pli bon, kuma mo finn dir, se so dat nesans.
“Salitasyon,
“Veronique Topize.”
Dan LALIT, nu truve ki, dan enn fason byin zanti, Mm. Topize finn atir latansyon lor lefet ki le 21 Fevriye enn dat ki reprezant dey pu lamor Kaya, ki finn asasine dan selil Alkatraz kan li ti su sarz lapolis, osi byin ki enn dat otur dey pu lamor trwa lezot zenom tuye kut-bal par lapolis pandan sulevman apre lamor Kaya, Berger Agathe tuye dan Roche Bois, e Neermal Ghoostia ek Michel Laurent tuye dan Bambous. Sa dat la bizin marke, me pa kuma dat selebrasyon lamizik Kaya, pa kuma Seggae Day. Enn lot dat kuma dat so nesans, kuma Mm. Topize propoze, reprezant enn dat pli diyn pu komemor lavi Kaya e osi pli apropriye pu selebre kreativite so lamizik.
Dapre LALIT, le 21 Fevriye ti kapav vinn enn zur nasyonal kont vyolans ofisye leta kont deteni.
