Zenosid Blog 64- Trump deklar piblikman ki US ansarz zenosid [Versyon Angle pibliye 14.02.25]
22.02.2025
Prezidan US Donald Trump finn fek dir piblikman kuma laparey Leta USA truv lokipasyon Palestinn par Israel, ek usi kuma zot finn truv sa lor plizir deseni. Li kumadir Trump finn lev enn vwal mansonz divan nu tu ek rann vizib “larealite”, e expoz fason ki Leta Zini, limem, diriz zenosid ki Israel pe komet. Lider Amerikin finn maske realite pandan plizir deseni. Trump finn devwal sa. Alor, fason ki LALIT truv realite Israel ek Palestinn vinn kler pu tu dimunn truve.
Trump finn dir byin for ki li ule “lape” atraver lokipasyon, expilsyon, anexasyon e, si neseser, destriksyon total kuma li dir par “les lanfer desene”. Lanfer net finn deza desene pandan reyn Biden. E, dan enn fason pli kler, antye lanfer finn desene avek fondasyon Israel kuma enn Leta Zwif lor later Palestinyin ki ti pe deza viv laba. Trump finn zis desir vwal mansonz. Se USA ki finn tutlong, permet Leta Israel komet zenosid. Trump kapav insiste lor enn seselefe, gayn enn, ek lerla anons so anilasyon iminan.
Enormite flagran Trump so propozisyon pu Gaza expoz enormite flagran proze kolonial Israel kuma enn Leta setler.
Pu ena enn Prezidan inpe fu kuma Trump ki ansarz, e pe okipe pu akimil ankor plis puvwar diktatoryal, enn sintom lanpir US ki pe grene. Enn fwa opuvwar, so aksyon pe akseler vites so degringolad. Plan vyolan Trump pe expoz vyolans ki tuzur ti ena: vyolans pu fer enn lepep antye disparet par masak ek deplasman forse, li enn lexanp kolonyalism. Israel li enn form anakronik kolonizasyon ki pe komet dan enn lepok kot finn ena enn reze iniversel kolonizasyon e dan enn lepok ki lopoze kolonizasyon: dekolonizasyon.
Wi, Trump finn anonse, ek refer parey ankor e ankor, inklir kan li ti pe lir depi skrip, ki li pu “met deor”, ek lerla met lanfaz lor deplasman permanan popilasyon antye depi enn parti Palestinn ki apel Gaza. Zis kumsa. Pena enn sel Morisyin ki pu kapav anpes limem tann eko Diego Garcia ek totalite Sagos, enn lot proze kolonyal anakronik ki apel BIOT. Dan so langaz, Trump finn demantel Gaza depi leres Palestinn (ankor enn fwa nu tann leko Sagos ki pe demantle depi Moris). Li lerla apel sa enn “dibyin” imobilye ki li pu “posede”, ek li pu fer seki li anvi ar Gaza.
Gravite sa deklarasyon la li dan enn fason kirye enn enormite pu de rezon kontradiktwar. Li grotesk, dan ek par limem, kan Trump propoz expilsyon forse 2.3 milyon dimunn depi zot prop later ek lerla kan li anons li pu repran kontrol lor Gaza, e si zot reziste, li pu “les lanfer desene”. Me seki ankor plis grotesk, seki so propozisyon li enn deskripsyon seki finn arive depi 1948. Israel ek USA finn reysi ekpilse par lafors par milyon Palestinyin depi zot prop later depi 1948. Lerla pran kontrol zot later, ek si Palestinyin reziste, lerla “les lanfer antye desene” kont Palestinyin. Alor Trump expoz enormite krim Israel ek Leta Zini – aktyel ek pase, pa zis so plan pu lefitir. Alor, li pa zis enn vwal kinn tonbe depi so plas kot li ti pe kasyet larealite, me se so kolaps ek bann “parwa, klwazon, nu lavi anba reyn kapitalism ki pe ekrule. Tu konpartiman, dan lespas zeografik, ek mem konpartiman ant lepase, leprezan ek fitir, pe kolaps.
Trump anons tu sa salte danzere – Mo dir salte parski menas Trump li, dan sa moman listwar, enn menas ki pe fer par enn lanpir anplin degringolad. Bom USA ek lafors militer Israel inn fer Gaza vinn enn “sayt demolisyon”, asasinn 50,000 dimunn, prinsipalman zanfan ek lezot non-konbatan, ek apre 15 mwa masak e destriksyon total, Israel ek USA pa finn reysi, pa finn kapav reysi, deplas Palestinyin depi Gaza. Zot pa finn reysi amenn defet Hamas. E zot pa finn reysi, mem pa par sa kalite lafors orib, pu repran tu solda prizonye.
Olye sa, par santenn milye Palestinyin finn mars long kilomet pu return dan lenor Gaza, buku pe kanp dan latant preker.
Oliye sa, Hamas ek lezot lorganizasyon rezistans pa zis lamem laba, me ankor laba ankor plis ki avan. Blinken sekreter Deta Biden finn admet sa dan so diskur depar, kan li dir ki, “Hamas finn rekrit otan nuvo militan ki li finn perdi”. Bi lager, ki Israel ek USA ti deklare ti pu “fini” Hamas. Dan larealite, larme Israel avek tu sa bom Amerikin 2 ,000 liv ki finn large lor fami Palestinyin depi avyon deger Amerikin lao anler, inn fini par sibir defet par larme Grup Rezistans Palestinyin apre 15 mwa masak sivil par Israel, 15 mwa krim Israel kont limanite, 15 mwa ki Israel pe komet zenosid. Militer Israelyin finn perdi ankor enn fwa. Tu seki Israel ek USA finn reysi fer se masak-anmas zanfan ek granparan.
Oliye sa, ena ankor 70 kaptif ki dan Gaza.
Premye fwa ki Trump finn fer enn deklarasyon lor so polisi kler ki Lamerik pu “posed” Gaza, Premye Minis Netanyahu ki ti pe asiz akote li laba dan Mezon Blans finn preske tonbe depi so fotey kan linn tann ki later zot kwar “Bondye finn promet lepep Zwif” pu anfet propriete Lamerik Trump! Alor, sa ti nuvo. Later ki pe met-sezi pa pu sezi, kuma abitye, par Israel, me sa fwa la par USA limem, zwer laflit ki donn ton lamizik.
Tusala pu dir ki vwal mansonz ki ti kuver krim Israelyin ek Amerikin finn rase anplas-anplas. Seki pli kler seki sirtu rol USA finn devwale. Savedir laliberte pu Palestinyin pli pre. Omwin nu kone avek plis presizyon kisannla klerman lennmi la ete.
Tu sa lafors onivo mondyal ki finn konplote avek Israel, ek seki finn refiz pu apel zenosid enn zenosid, enn fwa vwal desire, kumans gaga e kumans balans de lebra anpanik. Zot paret dekuyone. Kifer zot ti pe konplote avek enn proze osi terib? Parti Demokrat Amerikin, laplipar lider Eropein tu kalite bor politik – Britanik, Franse, Alman, Danwa – ansam avek zot lapres ki zot met sansir byin lur ek lake-medya ki remorke, ek diktatir Arab ek rwayom – tu kumans met aryer byin tar, ziska zot bat-an-retret, ek finalman konfront rezim fasis dan Israel ek seki fasis dan USA.
Konploter ti kumans, pu premye fwa, azir kumadir zot santi inkonfortab avek zot prop konplo pu komet zenosid. Ek zot bizin.
Letan mir, enn fwa ki zenosid finn ekpoze, pu nu Sosyalis ek lafors klas travayer pu mobilize ek fer nu Guvernman azir, pu kapav liber Palestinn depi sa lokipasyon kolonyal, ek les tu refizye return lakaz. Les Palestinyin, ek Israelyin ki dakor pu laba egal, pran desizyon ansam, ek prepar enn peyi kot tu dimunn egal.
Pep Palestinyin bizin nu. Zot sirviv zenosid, ek zot finn kone depi kumansman kot bom sorti, kot veto sorti, ek depi kot sa sa “deni zenosid” sorti. Dimunn ki niye zenosid, seki opuvwar dan lemond, zot ki soke. Zot nepli kapav niye zenosid. Me zot pus eye.
Alors, li moman pu nu konvink tu klas dimunn oprime pu sutenir Palestinyin.
Dimunn dan lemond antye ki sutenir Palestinyin ena activism, ki finn edik nu, pu planifye nu aksyon pu lefitir. Anu liste sertin.
Pep kuraze dan Yemen finn sutenir Palestinyin, otan ki zot finn kapav, militerman. Zot pare pu kontinye.
Hezbollah Libane finn, usi, mem avek gran lapert personel anterm asasinasyon ki finn komet par Israel-Lamerik ek teroris azir kuma fer exploz pagers dan zot lakaz, dan zot pos, ek dan zot ubyen zot zanfan zot lame, dibut ar Palestinyin. Parti politik Hezbollah ankor la zordi.
Ena aksyon direk byin kuraze depi grup travayer lemond antye ki finn kas lizinn zarm ki ena lyin avek Israel dan Langleter ek finn refiz les marsandiz Israelyin pas lepor kot zot travay. Aksyon ki montre ki zot militantism finn fini edik zot lor rol seki konplis avan mem Trump vinn opuvwar. Militan ki ankor la.
Sertin parti politik ek mem Guvernman finn reysi azir partu dan lemond. Lafrik Disid finn met ka dan ICJ, ek lezot peyi, mem Moris, omwin finn deleg avoka pu sutenir ka Lotorite Palestinn dan lekel ICJ fek ziz Israel so lokipasyon lor Palestinn “illegal”. Sa inportan parski li konfirm legalite grup larme rezistans dan Palestinn. Enn grup 10 ek ankor inpe peyi finn met dibut Grup Lahe pu kapav sutenir Palestinin anterm ICJ ek ICC zot zizman ek prosekisyon.
Finn ena Lokipasyon Kanpis Iniversiter ek ena grup sutyin Palestinn partu dan lemond, ki organiz aktivite ek organiz boykot kont Israel. Sa edik nu tu, ek nu aprann lor proze kolonyal bizar ki finn komet dan enn fason grav dan mem moman kot lemond antye de-kolonize: Proze Loksidan pu met Israel dominater lor later Palestinyin dan lane 1940, finn provok NAKBA ubyin seki apel premye zenosid kont Palestinyin. Wi, komye dimunn ankor plis dan lemond antye aster kone lor NAKBA? Nu tu finn aprann telman buku. Sa bann etidyan ankor la, pe prepare pu kontinye lalit.
Ena Raporter Spesyal Nasyon Zini (UN) Ms. Francesca Albanese, ki finn ek ankor onet ek kuraze dan so rapor, rapor ki lerla edik leres lemond – espesyalman kan konpar li par exanp, ar rapor- konplis Morisyen Pramilla Patten ki finn prezant Nasyon Zini, pu sit LALIT, “so konklizyon ek lanons reprodwir propagann Israelyin”, Raporter Albanese kuraze ankor la, pe denonse.
Finn ena individi staf Amerikin kuraze ki finn demisyone depi Departman Deta an protestasyon, savedir zot ti deza kone ki USA ti pe maniganse. Zot ankor pe kontribye dan lalit la.
Enn militer Amerikin kuraze ki ti apel Aaronn Bushnell zis enn an desela finn met dife lor li divan laport Lanbasad Israel dan Washington. Li finn ekrir ki se enn akt protestasyon pu “seki dimunn dan Palestinn pe viv dan lame zot kolonizater”. Li finn promet li “pu nepli konplis dan zenosid”. Li nepli la, me so aksyon pu res dan nu memwar.
Tu sa form rezistans kont kolonizasyon – lalit arme, protestasyon, aksyon, ka lakur ek priz pozisyon politik, vedir ki vwal finn deza tonbe pu buku, buku dimunn, byin avan Trump so deklarasyon revoltan. Me, lider US finn normaliz zenosid la. Biden ek Obama usi finn fer parey. Bush ek Clinton avan zot, finn usi fer parey. Aster Trump dir li for. Li ena enn listwar sa kalite kitsoz la. Rapel kuma li ti anons, dan so premye manda, ki Israel bizin zis vyol lalwa internasyonal e ofisyelman anekse Golan Heights Siryen okipe e buz so kapital dan Zerizalem?
Kan Trump anons fitir “propriete” Lamerik lor Gaza par, si neseser, “les tu lanfer desene”, Trump pe piblikman aksepte ki US li konplis dan zenosid. Kan li pe asiz laba dan Mezon Blans ansam avek Netanyahu ek kan pe fer referans a “sayt demolisyon”, li esey fer nu bliye ki USA ek Netanyahu zot mem ki finn fer sa, zot finn fer masakre dimunn ki viv laba, detrir infrastriktir par expre dan aksyon pu sey fors Palestinyin andeor Gaza. Netanyahu, ki ti bizin fini arete dan Washington akoz krim kont limanite, finn plito invite-doner akote Trump.
Byin vit, nu pu sirman tann lanons Trump pu anekse Wes Benk.
Nu bizin aret Israel. E nu bizin aret USA. Nu responsabilite isi dan Moris, bizin aret zenosid ek fer ferm baz militer Diego Garcia avan ki servi li, uswa re-servi li, pu komet zenosid.
Lindsey Collen, pu LALIT [Versyon an Angle pibliye 14.02.25]
Tradiksyon CC avek kudme AA
