Kan enn Lanpir Grene …
10.02.2025
Si tu aktivis politik alabaz pa pe futi konpran seki pe arive kote zeo-politik inpe partu dan lemond, inklir dan Moris, e si nu pa kapav fer nu lespri travay lor seki pe anfet arive, ni lor ki vites ki sa pe arive, se parski nu ena an-fas enn lanpir ki pe kolaps.
Lanpir konstrir lor plizir syek. Li tonbe pli vit, lor plizir deseni.
Alors, sa li tutafe nuvo pu nu. Nu pe truv lanpir Amerikin balote, kumansman so kolaps total antan ki lanpir. Sa pe arive asterla. Sa pu kontinye pu plizir lane, sirman plizir deseni.
E li pu dezagreab. E li pu afekte nu – nu politik, nu lekonomi ek nu sosyete. Se seki nu finn diskite dan dernye reynon komite santral LALIT, e seki nu pe diskite dan tu nu brans.
Sel “lafors” ase gran pu turn sa kolaps kaotik enn lanpir an kiksoz pozitif se enn klas travayer angaze, galvanize deryer enn program sosyalist – pa mwins. San sa, lemond pu fer fas barbari. Dan lager Israel kont Palestinyin, dabor dimunn dan Gaza, lerla dan Liban, Lasiri avan, e aster dimunn dan Wes Benk, zot tu pe deza fer fas sa kalite barbari ki enn siyn ki enn lanpir pe grene.
Nu bizin swiv degringolad USA (Leta Zini Lamerik), pu kapav konpran seki pe arive dan Palestinn. Kan Israel expoze kuma enn proze kolonyal dan so faz iltim zenosid, USA osi expoze kuma so furniser zarm e kuma so protekter. Parey pu Ikrenn. Pu konpran kifer Ikrenn pe perdi lager, mem li ena sutyin USA ek totalite so NATO, nu bizin konpran ki USA pe grene. Parey pu konpran lamonte pwisans Oryantal kuma Lind ek Lasinn e vites ki zot finn kree “BRICS” ki zordi pli gran ki G7, nu bizin konpran ki USA enn lanpir ki pe grene. Pu kapav konpran tu konfizyon politik lor sinp size UK pe bat anretret depi totalite Chagos parski lokipasyon US-UK ti ilegal, nu bizin konpran leral lanpir Amerikin, lanpir Oksidantal.
Lefet ki ena enn Donald Trump kuma Prezidan USA, li deza enn sintom kolaps lanpir Amerikin. Sinon kuma ou esplik lefet li finn eli, pa enn fwa, me de? E aster kan li opuvwar, sa prodir asontur, buku siyn ki nu pe travers lepok lafin lanpir kapitalis Oksidantal.
Ala sertin siyn, a-kumanse avek lekonomi USA:
1. Balans peyman USA li konpletman an ruz. Depans Guvernman US li konpletman an ruz. Konpayni Amerikin konpletman an ruz. Fwaye Amerikin andete ziska lagrin lizye. Dolar finn perdi so minmiz lor tranzaksyon internasyonal, e pu perdi so sipremasi ankor plis.
2. Donald Trump, mem si li finn eli an gran parti parski Joe Biden pa finn kapav kontrol inflasyon akur-term, aster pe inpoz tax lor inportasyon ki pu ogmant inflasyon dan USA akur-term, e sertennman amwayin-term.
3 Lor nivo internasyonal, USA pe atak so prop alye, mem sey detrir zot. Premye li finn servi enn atak terorist pu detrir infrastriktir enerzetik Lalmayn, esploz tiyo gaz North Stream – apre ki Biden finn piblikman menas pu fer sa, fer promes li pu fer sa, e kan li ti fini fer li, lerla so Minis Nuland ti piblikman anonse divan Hearing Sena ki zot finn efektivman fer sa. Lalmayn pa finn mem fer konplint. Me, Lalmayn an rwinn – ekonomikman ek politikman. Aster USA pe menas taxe Linyon Eropyin an antye pu tu seki li ule vande lor marse Amerikin, e apre ki Trump insiste lor kontribisyon total 2% depi pei Eropyin dan lakes NATO, li pe aster met seraz ziska 5% kontribisyon pu militer dan lakes NATO, kot preske tu pu servi pu aste zarm depi USA. Alors, alye Lamerik, Lalmayn, li usi, so lekonomi dan ruz aster. Li kareman an resesyon, e sa pu trwazyem lane aswiv. Lalmayn aster bizin sumet, aste so lenerzi pli ser. E depi kisannla? Leta Zini Lamerik, li-mem. E sa montre kimanyer USA – Biden ubyin Trump – tret so prop alye, Lalmayn.
4. Apre Lerop, Trump pe atak so vwazin, anpremye Kanada – menas pu anexe li kuma 51yem “leta”, e lerla Lamexik, ki li pe menas pu paraliz li, enn Leta ki deza sibir menas grav par reyn bann diferan geng.
5. Leta Zini Lamerik pa finn zis inpoz tarif lor so adverser ek lenmi, me usi li finn kareman inpoz sanksyon ekonomik – suvan sanksyon ilegal. Sa ena konsekans lor li-mem ki Lamerik pa ti atann, seki apel konsekans non-intansyone. Tulede, Larisi ek Lasinn, finn oblize asire ki zot vinn relativman plis indepandan depi sistem finansye kontrole par USA ek depi ot-teknolozi USA, swiv a tax (tarif) ek sanksyon telman grav. Kan Larisi ek Lasinn koste, nu gayn posibilite BRICS. Alors, USA riske perdi so monopol lor tranzaksyon internasyonal e.g. atraver sistem SWIFT kot labank ki buku Morisyin kone bizin servi pu resevwar larzan depi deor. Kumsa gayn de-dolarizasyon.
6. Anmemtan ki USA dan enn ladesant, antan ki enn lanpir, so alye usi pe tonbe. Lafrans finn, dan bann lane ki’nn pase, truv so larme kareman fu deor depi buku pei dan Lafrik. Li inkrwayab: depi Burkina Faso, Chad, Mali, Nizer, Senegal, e aster Kot Divwar. Lekonomi Lalmayn an lanbo, de-indistrializasyon pe donn bal laba. Lizinn Volksvagen finn menas lisansye 35,000 travayer. Kore Disid li dan enn kriz politik konpletman inatandi. Lekonomi ek sosyete Britanik pe efondre, e li finn perdi so dernye koloni Afrikin, ki form parti Repiblik Moris, BIOT, setadir Chagos.
7. USA finn permet enn leta Israel ek enn lobi pro-Zionist antrenn li dan zenosid orib kont lepep Palestinn. Tulede, Israel ek USA, finn rwinn zot repitasyon, tandi ki lepep Palestinyin pe emerze dan enn fason eroik. Parti kuma Hamas ek Hezbollah gard zot latet ot. Israel ek Lamerik truv zot izole, dan laont. Tu dernyeman, nu finn truve a ki pwin USA, depi buku lane, finn swiv volonte militer Leta Israel o-detriman veritab lintere USA limem – e sa, lor plizir deseni – dan Israel so stratezi “Clean Break” (Kasir Prop), e san ki lepep Amerikin vinn konsyan lor so letandi. An 1996 kan Netanyahu vinn Premye Minis pu premye fwa, Israel finn viz pu “sible” tu pei ki sutenir Palestinyin, vize pu kareman “take out” rezim la, setadir tir guvernman anplas par lavyolans, eliminn li, apre ki Israel finn realize ki li pa pu kapav gayn laviktwar kont Palestinyin par lavyolans militer direk kont zot. Sis lor sa set pei lor lalis Israel ki bizin “elimine” finn deza “elimine”, pu servi mem langaz ki zot servi, par USA. Sizyem ti Lasiri. Ti ena: Lirak, Lalibi, Sudan, Somali, Liban, Lasiri. Seki reste lor lalis Netanyahu, e ki sipor santral pu Palestinyin zordi se … Liran.
Aster, USA li lor rebor pu desid si pu al delavan avek peyi nimero 7 ubyen non.
Zeneral USA Wesley Clark an 2003, ti anonse ki USA ti deside ki apre 9 Septam 2001 pu swiv sa stratezi la, e li’nn efektivman fer sa.
8. USA pe viz kontrol total lor Lemisfer Oksidantal, mem si li retir li depi leres lemond. Li pe kumanse par Lamerik Dinor. Alors, li bizin kontrol totalite Lemisfer Oksidantal. Trump fini anons so plan: li kumans dan lenor net. Li pu “pran” Greenland (Groenland) depi Denmark. Li pu anexe Kanada kuma so 51yem “leta”. Kote so vwazin lesid, li finn menas Lamexik, e lerla dir li pu sezi kontrol lor kanal Panama. (Note ki Trump, depi kumansman, finn deklar enn leta dirzans lor frontyer Nor Leta Zini, e finn inpoz tarif lor Kanada! Enn zafer ridikil. Pena okenn “leta dirzans” imazinab lor sa frontyer la.) Pu gayn sa kontrol total lor Lemisfer Oksidantal, Trump pu sirman bizin retir limem depi dan lezot lager ki’nn deklanse par Joe Biden, kuma lager Ikrenn kont Larisi, enn lager telegide e finanse par pei NATO. Li finn kumans demay limem, par aret tu led US (USAid). Li usi ena lintansyon pu “fini” lager sanfin Israel kont Palestinyin – li pu sanse “pran” Gaza pu Lamerik, tir tu Palestinyin, park zot dan Lezip, Zordani ek sanse 10 lezot pei, e lerla Lamerik pu fer enn Riviera Fransez laba. Klerman Trump finn truv sa Plan 2035 tradir depi langaz Ebre, ki ti lor websayt Netanyahu depi mi-2024, kot ena “proze NEOM” ki kapav-et lekter finn truve anform reklam lor CNN depi sa lepok la. Sa proze la, kuma Max Blumenthal depi Grayzone finn explike, li anglob enn extansyon ekonomik Lakor Abram, kot Israel ek Arabi Saudit pu kree enn imans Smart City, grander Belzik, ki pu anglob Gaza, enn parti Palestinn, kumsidire an-pasan. Trump osi finn zet enn kudey lor liv 1981 par Meir Kahane, They Must Go. Lerla Trump finn anons a-ot-vwa seki lextrem drwat fasist dan Israel pe dir depi 40 banane. Zot enn kuran ki koni kuma “Apartheid tro bon”, alor zot viz kareman tir tu Palestinyin depi Gaza, West Benk, inklir Zerisalem Les – swa tuye, swa tire. Ala ar ki proze sa USA, sa lanpir ki pe grene, finn al asosye li.
9. Politikman, Trump aster kontrol pa zis Prezidans USA. Li kontrol Sanb Reprezantan ek Sena. Li kontrol Lakur Siprem ek so seri nominasyon dextrem drwat. Chek-ek-Balanns preske fini eradike. Trump pe ferm buku departman federal anmemtan, sispann brans antye Guvernman Federal dan enn sel lanwit, met travayer usi deor. Li pe reyne par Lord Exekitif, par kokin puvwar e par servi puvwar ki finn deza kokin dan lepase depi puvwar Kongre. Li fini ferm USAID. USAID pa zis fer bon ev, li. Li responsab enn gran rol dan “sanzman rezim”. Asterla, li pe menas fer parey ar Minister Ledikasyon. E li pe menas pu atak Penntagonn asterla.
10. Pu premye fwa depi reyn feodal, lerwa-larenn ek karst nob, manb Kabine Trump li kareman inklir gran patrona zot mem: proprieter Tesla, Elon Musk, ek lezot patron zean dan domenn teknolozi ki posed e rul nuvo sekter lanpir ot-teknolozik – Meta so Ofisye Exekitif an-Sef (CEO) Mark Zuckerberg (proprieter Facebook), patron Apple Tim Cook, patron Google Sundar Pichai, fondater ek patron Amazon Jeff Bezos. Sa grup gran patron kapitalist, zot ena pozisyon pli pwisan ki Sekreter Deta dan Kabine Trump. Alors, nu ena enn inifikasyon enn lider parti opuvwar (Trump) ek seksyon pli pwisan dan burzwazi limem. Zot pe reyne kuma enn sel.
11. Depi ki Trump ek so bann akolit niye danze ki planet Ter pe fer fas akoz polisyon kapitalist, sirtu so polisyon par prodwi petrol, lafin Lemond atraver kolaps eko-sistem ou klima limem, pli pre.
12. Erozyon sa demokrasi minim ki kapitalism finn permet pe amenn danze enn lager nikleer ankor plis pre.
13. Antretan, sertin seksyon “lafors degos” dan Lerop ek USA, ki dabitid ena bon pozisyon kont lager inperyalis, finn kareman sutenir USA so puse pu NATO rant dan Ikrenn pu anserkle Larisi, lerla afebli li ar lager, e ankor pe sutenir sa. Zot finn osi sutenir USA so puse pu sanzman rezim dan Lasiri. Sertin lafors “lagos” – kuma demokrat meynstrim dan USA, Les Verts dan Lalmaynn ek Travayis dan UK, finn fer lager dan zot prop parti kont manb Pro-Palestinyin, e ankor pe fer li, akiz zot swadizan “anti-semitism” kan zot kont zenosid par enn leta Zionist – alor zot nepli “Lagos” ditu. Sa usi, nu bizin rekonet. Li danzere si nu pa rekonet ki samem dimunn ki anfet tultan protez dimunn Zwif depi anti-semitism, zot pe akize det sipozeman anti-semit. Lager inperyalis finn ankuraze par seki nu ti atann pu opoz li.
Tusala pu dir, bann zafer pa tultan paret seki zot ete.
Nu tu, nu pu fer nu but pu azut dan lalis bann zafer “etranz” ki pe arive dan lemond Oksidantal, ki nu panse petet siyn ubyin sintom kolaps lanpir USA, kuma nu obzerve pe arive. Nu bizin swiv pu kone ki stratezi pu pli bon pu sap limanite depi danze sa lanpir an ekrulman reprezante.
Alors, kan dan LALIT, nu met fermtir baz militer Diego Garcia lor azanda politik, li parski nu bizin anpes nu pei amar limem avek bretel enn lanpir dan leral kuma USA ete. Li danzere pu nu tu. Pa zis Repiblik Moris, me lemond antye.
Tradir e met azur le 10 Fev 2025.
Edite pu taypo: North Stream (korize)
