Apel pu Prototip pu "Bicycle Lane" plis Santye Pyeton -- kuma "feeder" pu Rezo Metro
21.01.2025
Apel a: Minister of Land Transport and Light Rail, M. Minis Osman Mohamed,
12yem Letaz, Batiman Air Mauritius, Port Louis.
Dat: 20 Zanvye 2025.
Ser M. Minis Osman Mahomed,
Brans LALIT Cite Richelieu-Bambous pe lans enn apel a ou antan ki Minis Transpor nuvo Guvernman Lalyans Sanzman. Pu fer sistem Metro pli efisyan, nu pe fer sa apel a ou pu inklir "santye bisiklet-pyeton" kuma enn parti sistem "feeder" pu Metro. Nu pe propoze ki kumans ar Stasyon Metro Coromandel, ki so "park & ride" mars telman byin, e organiz sa kalite sistem "feeder" la ziska Fwaye FIAT, Petite Riviere. Nu deza ena enn traze fini diskite e trase depi plizir lane ansam ar abitan rezyon, mem ar bann eli Vilaz. Sa sistem "feeder" pu kapav, lerla, servi kuma enn prototip pu pei la, kot integre metro-bis-bisiklet-marse dan infrastriktir sistem transpor piblik.
Nu truve Program Elektoral Lalyans Sanzman dan Eleksyon Zeneral 2024 fer enn konsta lor nesesite enn sistem transpor ki asir "un déplacement sécurisé des piétons." E, propoz pu "Repenser, moderniser et passage au vert de l'industrie du transport commun; Réduire l'empreinte carbone de l'industrie;
Introduire des mesures incitatives visant à réduire l'usage de la voiture, afin de réduire la consommation de carburant personnelle tout en contribuant à créer un environnement plus propre et plus sain". E, Lalyans Sanzman ti pran langazman pu ena enn transpor piblik avek bis ek metro; transpor gratis pu tu dimunn; kontinye anplway kontroler bis pu ed sofer garanti sekirite ek
konfor pasaze, ant-ot.
Dan kad Metro Express avek so rezo "feeder" ek parking ki, avek rezon, ti pe viz pu diminye nomb masinn ki rule ar lesans/dyezel, e dan kad enn politik pu enn "Polisi Nasyonal pu Bisiklet" osi byin ki dan kad lasante fizik ek byinet pu lapopilasyon, nu dan Brans Richelieu-Bambous, lor nom LALIT, pe renuvel nu propozisyon, ki nu ti fer a guvernman sortan an 2020, pu enn proze kuma enn prototip pu pei. Dayer Konsey Vilaz Richelieu ti dakor ek sa propozisyon la. Ansam, nu ti sumet enn petisyon a Minis alepok la.
Nu propozisyon an 7 Pwin:
1. Konstriksyon enn santye dub - pu bisiklet lor rebor extern e pu pyeton akote dan rebor intern - depi prekot Foyer Fiat ki truv dan finisyon Petite Riviere (dan direksyon ver Gro Cailloux) tutolong terin kote lest Petite Riviere ek Cite Richelieu e Camp Benoit ziska Stasyon Metro Coromandel. (Get map google, atase). Fode pa ena okenn veykil motorize, mem elektrik lor santye la, e fode pa li krwaz okenn lot sime.
2. Amenazman plas an-sekirite pu "parking bisiklet" dan Stasyon Coromandel.
3. Deziynasyon enn seksyon enn saryo Metro kuma enn "park bisiklet" pandan vwayaz. Remarke ki ti deza ena sa dan ansyin sistem trin Moris. E li existe
dan lezot pei.
Sa pu tutswit enn fasilite pu tu abitan Petite Riviere ek Richelieu, sirtu travayer ek etidyan.
4. Kree Parking prekot Fwaye: Plan la bizin inklir parking pu loto dan kote Foyer Fiat pu ankuraz abitan depi Albion, Gros Caillous, Canot, Bambous, e mem pli lwin, par exanp, kit zot 4x4 ubyin lot masinn, mont zot bisiklet, swa marse, fer jogging, renning ziska Stasyon Metro Coromandel. Sa santye pu bisiklet ek pu pyeton kapav, dan enn dezyem tan, al pli lwin, dizon ziska Bambous. Deza ena kumansman enn santye bisiklet/pyeton ki Medine finn konstrir depi Bambous ziska Morl Cascavelle, ki pu ede avek extansyon sa fasilite la.
Sa devlopman ant Petite Rivière ek Stasyon Coromandel pu kuma enn prototip pu plan nasyonal.
Kan met anplas enn infrastriktir pu permet plis dimunn pu marse e sirkile a bisiklet, sa kapav zwe enn pli gran rol dan protez lanvironnman e enn mwayin rapid, pa kut buku larzan e enn fason fyab pu redwir emisyon fosil polyan veikil, e anmemtan kontribye pu amelyor lasante, ranforsi lekonomi e mem sutenir enn sosyete pli zis ek pli egaliter. Infrastriktir ki permet dimunn marse ubyin mont bisiklet, ziska ler, pa finn gayn priorite kan pe elabor stratezi transport nasyonal dan azanda plis larz sanzman klima, lanvironnman ek lasante lepep. Nu espere ou Guvernman pu koriz sa mankman la kan pe re-mazinn sistem transport piblik e pu konsider nu propozisyon.
5. Bizin re-met "feeder bus". Guvernman sortan ti kumanse avek "feeder" bus, lerla sa finn arete kan finn gayn Kovid ek so lok-dawn. Apre sa, malerezman pa finn repran li. Natirelman, li pu pran letan pu inform dimunn, e pu dimunn sanz labitid kolektivman.
6. Amenazman Stasyon Metro. Si amenaz otur Stasyon Metro avek fasilite, kuma finn anfet devlope dan enn fason organik otur stasyon Coromandel, sa osi pu ede. Deza finn gayn tu kalite zoli ti komers kuma marsan ki vann dilo koko, marsan legim ek fri, magazin linz, marsan samusa, avek so parking pu veikil, si met enn parking bisiklet feeder bus depi rezyon avwazinan li pu fer sa
but la vinn vivan e li pu ankuraz dimunn, asontur, pu vwayaz par Metro.
7. Servi infra striktir Metro aswar pu lezot saryo transport marsandiz. U pu rapel ki dan plan Metro su Guvernman Travayist (ki ti pu kut inpe plis ser) zot ti pu aziste infrastriktir Metro pu kapav servi sa mem infrastriktir aswar pu transport enn parti marsandiz depi Port Louis ziska enn ou de depo pli lwin. Sa bizin re-konsidere, parski sa, usi, pu dekonzestyonn Port Louis, enn kote, e li pu kontribiye pu ranburs det Metro. Nu kwar, sistem Metro montre nu ki avek inpe volonte politik, gran devlopman posib e kapav inplemante ase rapidman.
Si u anvi diskit sa propozisyon la - ki ena lezot laspe interesan ki nu pa finn inklir akoz lespas, li pu pli fasil pu explike an personn, fer nu kone.
Sinserman,
Laval Yves, Sarah Naraina, Ragini Kistnasamy, pu Brans LALIT
Richelieu-Bambous
