Zenosid Blog 62- Enn seselefe dan ler kan Rezim Zenosid Biden pe al fini
19.01.2025
Israel ek Hamas finn tom dakor lor enn seselefe. Sa fraz la par limem vedir ki Israel pa finn reysi atenn so bi lager pu fini Hamas.
E zanfan Gaza, dan zot sazes konn sa. Zot selebre, sante ek danse, dan lavil kot zot reste ki anrwinn akoz bonbardman. Zanfan kone. Zot kone ki zot sirvi vedir ki Israel pa finn reysi. E esek Israel vedir ki zot pe gut laviktwar. Nu partaz zot selebrasyon. Malgre apreansyon pu fitir ki pe koste.
Apre 15 mwa zenosid, aster pe atann enn seselefe apartir Dimans.
Tu adilt dan lemond bizin kone, ek laplipar zanfan Palestinyin sirman kone, ki li pa enn zwe rapid avek enn viktwar rapid. Non. Non. Non. Li enn batay pozisyon.
Li enn long lalit, lor letan, depi 1948 e mem depi avan. Sa lalit la finn, e li ankor, enn seri konba pu enn pli bon pozisyon. Aksyon politik ek lager (lager li extansyon destriktif iltim politik) depann lor enn sanzman pozisyon konstan. Li enn kestyon kisannla vinn, apre sak muv, pli for – mem enn tigit – ou pli feb – mem enn tigit. E li enn sertitid ki zanfan kone kisannla finn izole, expoze, kondane, abize, otodetrir: Leta Israel ek so larme.
Premye Minis Israelyin Netanyahu, kuma li abitye, okipe pu sey retard sinyatir lakor konzwin. Li difisil pu li sinye. Li bizin siyn ansam avek samem Hamas li finn pretann li ti pe “efase lor map”, tandi ki anverite so bi se pu tuy intansyonelman e asasinn plis ki 50,000 dimunn –sirtu fam, zanfan, ti-baba-dan lebra, dimunn aze ek andikape ki finn expoze dan enn zenosid ki finn dire 15 mwa dan so form akselere. E lakor ki Netanyahu pe terziverse pu sinye, se samem Prezidan US Joe Biden, ki finn diriz zenosid depi Washington, tinn met lor latab kuma “propozisyon Israel” wit long mwa desela.
Rapel ki Israel lerla finn refiz siyn so prop propozisyon? Ou pu dir-- li kuma enn spektak-- kan lanpir US pe kolaps! E Biden ek Blinken ek Sullivan ek Miller ek Austin, lor plis ki wit mwa, finn kontinye alemem furni enn flo konstan bom mertriye Israel pu zot zenosid konzwin. Sa finn expoze yer. Get YouTube! Kozri lor perdi lafors pozisyonel.
Reporter Grayzone Max Blumenthall, ki dan dernye Blog, nu ti dimann dimunn swiv, ansam ar zurnalis Sam Husseini, ki ekrir dan medya meynnstrim, finn reysi akiz Sekreter Blinken dan so dernye sorti, divan totalite lemond medyatik ki ti rasanble divan li kan li pe kit pilotaz zenosid ki li finn dirize san pitye. Premyerman Max Blumenthall finn akiz Blinken ki li finn asasinn so bann kamarad, savedir lepep Gaza, e asasinn parmi zot 300 so koleg lapres. Li dir ki Blinken finn “koronpi par Israel”, seki inplike ki li pa ti pe azir dan lintere USA, me pu Zionis dan Israel. Li finn fini par dimande for e avek fyerte, “kuma ou santi ou kan ou pe kit enn zenosid kuma ou leritaz? Sam Husseini, enn zurnalis 59an, finn britalman tir li depi dan so sez, apre ki li finn deranz Blinken ar so kestyon. Li finn kontinye kriye for, kan zot pe ras li depi dan so plas e sarye li avek vyolans, seki lemond antye panse, apar serk propagann kolonizater Zionis, “Kriminel! … Kifer ou pa dan La Hay?”. Anfet bizin ena enn warant kont sa zom la, kuma ICC finn fini tire kont so koleg. Netanyahu. Kuma Prezidan Biden finn perdi so kapasite mantal, li anfet Sekreter Blinken ki finn diriz sa zenosid la depi Washington.
Alor, kot Israel ek Palestinn ete asterla?
Rapel, 7 Oktob 2023, seki Hamas ek dis lezot grup arme ti fer se pu fer lemond rapel ki Palestinyin existe. Sa ti sanzman dan pozisyon sa zur la. Palestinyin existe dan Gaza dan enn leta-syez ki Israel finn inpoze 17 banane. Zot existe dan Wes Benk inklir Zerizalem Les ki sibir Aparteid ki Israel inpoze. Zot existe kuma refizye ofisyel dan plizir peyi prinsipalman dan Mwayin Oryan. Zot existe. Sa viktwar la, dan batay pu pozisyon. “Nu, Palestinyin, nu pa finn efase depi map!”
Rapel, ki zis dis zur avan 7 Oktob 2023, Netanyahu finn dibute dan Lasanble Zeneral Nasyon Zini avek enn map montre Israel ansam avek tu peyi Arab san mem enn fragman Palestinn? Ou rapel? Palestinn finn “efase” lor sirfas Later.
Lerla dis zur plitar, Hamas ek lezot konbatan finn kas syez la, finn defons fennsing ki ti anprizonn zot depi later ki finn kokin depi zot granfami an 1948, finn amenn defet lor Larme Lokipasyon Israelyin, asasinn 300 solda. Palestinyin finn reysi, atraver zot konbatan, opoz zot lokipasyon, fizikman. Li vre ki 700 sivil ti asasine – buku par larme Israel kan zot ti bizin fors bann konbatan deor, servi “Doktrinn Hannibal”, ki vedir ki larme Israel donn lord solda pu asasinn Israelyin pu anpes zot servi kuma otaz, me usi buku par konbatan Palestinyin, e li vre ki asasinn sivil li enn krim deger. Me, lalwa internasyonal permet lalit arme kont lokipasyon ilegal.
E, par enn kut azar, Ziyet 2024, zizman ki ICJ finn emet konsern lokipasyon Israelyin, kan Israel ek USA an ful mod zenosid, finn deklare ki lokipasyon Israel dan Gaza ek Palestinn antye li “illegal”. Lakur Internasyonal Lazistis finn dimann Israel pu kit tu teritwar okipe, pu pey reparasyon, e pu akord ful drwa retur tu refizye. Enn lot manev defors dan lager pozisyonnman pu Pep Palestinyin. Leta Moris ena enn rol inportan ladan: nu finn sutenir ka la, anplway avoka pu ed ka Palestinyin.
Avan sa, kan Sid Afrik ti met enn ka dan ICJ pu enn lopinyon lor -- eski Israel pe komet zenosid. Finn ena trwa zizman preliminer, verdik dir ki ena Zenosid “plozib” depi Israel kont Palestinyin, e ki Israel bizin aret asasinn dimunn e les manze rantre, ek lezot Leta bizin aret furni zarm e plito met presyon lor Israel pu aret zenosid. Rapel Konvansyon li konsern “Prevansyon Zenosid”, ki vedir ki bann Leta ek individi ena devwar pu deside si ena risk zenosid e pu azir pu anpes li, ek pena pu atann 15 ziz deside, ki ena “zenosid, kan linn fini tro tar. Leta ek individi ena pu denons “zenosid” kan nu truv li pe arive, ubyin mem si ena risk li arive. Sa zizman preliminer la finn sanz balans defors konsiderableman, met USA dan enn pozisyon ki li pe al kont so prop lalwa federal kan li finans, arm ek inyor delibereman sa zenosid plozib la. Leta Moris bizin aster zwenn Ka Sid Afrik kont Israel pu zenosid. Li tar. Me pa tro tar.
Tu peyi dan lemond, eksepte USA, finn fer apel seselefe. Mem Israel so bann alye pli ferm kuma Lalmayn fer onte ek konplis UK, finn apel pu seselefe. Tulede Israel ek USA zot pozisyon dan lemond zame finn tonb osi ba lor letan. Tulede zot repitasyon an dezord. Sa usi, sanz balans de fors kont Israel ek kont Leta Zini Lamerik. Zot pozisyon pli feb.
Hamas pankor sibir defet. Ni sa 10 lezot grup la. Zot manb ti parmi zanfan ki ti pe sante ek danse lor lari Gaza. Zis pu dir “Nu ankor la!”
Hezbollah, ki finn atak Israel pu ede pu tir presyon depi lor Hamas, finn afebli, li vre. Me li pa finn perdi. Li ankor laba. Politik Liban, sepandan, asterla kontrole depre par USA, sa li vre. E Israel ena larme andan Liban, e konstaman defye seselefe ki finn siyne ar Hezbollah.
Lasiri, ki su rezim Assad ti sutenir Palestinn ek Hamas, finn ranverse par USA, Latirki ek Israel, ki finn konzwitman met HTS (Al Qaeda ek lider ISIS) opuvwar, tandi ki Israel finn expann so lokipasyon enn parti Lasiri, USA finn gard enn larme 2,000 solda pu mintenir kontrol lor parti Lasiri ki ris ar so petrol ek so lagrikiltir, ek Latirki pe travay pu kontrol sa parti Lasiri kot lepep Kird reste. Alor, sa larwinn zeo-politik Lasiri, ki finn deza ravaze par diktatir Assad, li enn sanzman pu lepir pu lepep Palestinn, omwin akur-term ek mwayin-term. Me, Israel ek USA ek Latirki pa kapav fyer zot rol dan destriksyon Lasiri, alor kuma zot kapav kwar ki zot dan enn pli “bon pozisyon”. Zot destriksyon finn expoze.
Konbatan Houthi dan Yemenn finn res ferm dan zot sutyin pu Palestinyin. Zot anpes bato Israelyin ek Amerikin servi sa parti lamer ki pu zot. USA ek Israel lerla bonbard lavil dan Yemenn, ziska aster. Ankor plis masak par lanpir Amerikin ki pe kolaps. Savedir plis laont pu USA ek Israel, ki pe komet zenosid tandi ki Yemenn pe sey anpes sa zenosid la.
E aster, anplis zenosid, Israel pe sey ris Lamerik dan enn lager kont Liran.
Rapel, mem si li kasyet, li finn vinn “viral” aster -apre Trump finn re-twit Profeser Jeffrey Sachs so kozri resan dan Liniversite Cambridge ki finn fer sa referans la – ki an 2001, apre 9/11, Israel finn donn USA enn lalis set peyi ki li ti ule USA invair pu inpoz sanzman rezim. Ti apel sa “Fraktir Kler” an 1996 kan Netanyahu ti vinn Premye Minis e ti invant li. Zot ti ule ki USA “ranvers” peyi ki sutenir Palestinyin, parski zot ti deside ki li ti tro difisil pu Israel amenn defet lor Hamas ek Hezbollah. Sis peyi dan sa lalis set la finn deza “retire”, pu servi zot langaz, par USA, sizyem li Lasiri: zot ti: Lirak, Lalibi, Sudan, Somali, Liban, Lasiri. Sel ki reste lor lalis Netanyahu, e li sipor santral pu Palestinyin … Liran.
Alor, akurterm, Palestinyin ena moman dir pli divan, divan bann lennmi telman pwisan, telman san pitye, e dan enn tel kolaps moral ek zeo-politik. Zot bann moman nu bizin swiv depre. E nu bizin realize ki nu rol ete dan ed pep Palestinn, dan sa batay “pozisyon”. Nu, dan Moris, kuma enn pep, nu bizin mobilize pu fer ferm baz militer lor Diego Garcia. Se kumsa ki nu kapav ede pu afebli sa lanpir ki pe grene la. Li pu kolaps dan enn fason inprevizib, parfwa glise, lerla tonbe – lor plizir zur, mwa ek lane – me li inevitab. Nu bizin ede pu kree volonte pu sosyalism dan lavenir – partu – e savedir afebli sa lanpir Loksidan la, so NATO ek evit, dan tu fason, atase a sa lanpir ki pe grene. Avek negosyasyon Sagos, li enn moman kot ena buku danze.
Lindsey Collen,
Pu LALIT.
Tradiksyon AA ek CC.
