Kominike Lapres: Artis-kreater an Solidarite ar Lepep Palestinyin Kont Zenosid Israel
05.12.2024
Lar ek Poezi, Lar Krwaze:
Solidarite ar Lepep Palestinyin Kont Zenosid Israel
Pu Limanite
Pu Lape
Dat: Samdi 25 Zanvye, 2025
2pm – 5pm
Plas: Café du Vieux Conseil, Port Louis
Rezon: Finn ariv 14 mwa kot leta Israel pe detrir Palestinyin ek Palestinn – sirtu dan Gaza kot plis ki 45,000 dimunn finn mor, ladan 18,000 zanfan. Lakur Internasyonal Zistis (ICJ) finn fini dir ki ena zenosid plozib e ki tu leta ena devwar pu prevenir li; Lakur Internasyonal Kriminel finn tir manda dare kont Premye Minis Netanyahu ek so ex-Minis Defans (Minis Lager) Gallant pu krim de ger; e Madam Albanese an Oktob raporter spesyal Nasyon Zini finn dokimant zenosid ki pe derule divan nu lizye lor lekran.
Antan ki artis kreater, nu pa insansib a seki pe pase.
Nu anvi kree lespas pu ki ena expresyon artistik an solidarite avek lepep ki pe sibir enn zenosid.
Konteni:
Pu ena Slam, Poezi, lamizik, ena fwa an-form "lar krwaze" anform video u layv.
Sa evennman-la pu fer su lezid Solidarite Morisyin ar Lepep Palestinn (SOMALP) dan lekel ena ant-ot CTSP, MLC, FPBOU (federasyon sindikal); Muvman Liberasyon Fam (MLF), Ledikasyon Pu Travayer (LPT), ACIM (asosyasyon konsomater), Centre Idriss Goomany, ek Lalit.
Tu dimunn ki pe donn kudme, organize e partisipe pe fer li volonterman.
Partisipasyon artistik ziska ler
Parmi dimunn ki finn dir zot pu partisipe, ena Sarah Honoré, Tania Haberland, Dalia – enn Palestinyenn ki pu resit enn poem Palestinyin, poet Umar Timol, Nu Zwe, Rajni Lallah/Joelle Hosseiny.
Nu fer enn apel a tu poet, mizisyin, santer e tu dimunn ki ti pu kontan donn so kudme volonter pu kontakte nu.
Sarah Honoré
Tania Haberland
Rajni Lallah
Rama Poonoosamy
