BIZIN BOYKOT ISRAEL PU ARET SO ZENOSID: Kifer nu la divan Lotel-di-Guvernman?
05.12.2024
Konteni enn trak ki nu finn distribiye ar piblik pandan manifestasyon dan Port-Louis pu dimann Premye Minis donn pozisyon guvernman lor Boykot Israel kan Lasanble pe zwenn dime.
Konteni Trak....
Nu pe sutenir sa 11 dimunn ki pe tini bandrol.
Sa li enn parmi 3 aksyon ki enn grup “ad hoc” finn organize. Dan Riport Bak par manb LALIT ki fek returne depi Palestinn, Ragini Kistnasamy, ansam nu ti deside pu fer enn rankont pu planifye enn aksyon dirzans. Anfet nu finn deside pu fer 3 zafer: Premye, pu ekrir Asosyasyon patron lotel AHRIM, fer apel a zot pu fer enn demand formel a Lotel Maritim pu kennsel invitasyon a 2 grup Israel pu zwe dan festival kot zot.
Dezyem, nu finn ekrir let anba a Premye Minis pu li fer enn “Deklarasyon Premye Minis” lor linportans boykot Israel.
Trwazyem nu pe fer li enn devwar dibut isi pu fer sa lapel formel a nuvo Guvernman piblik e anmemtan pu popilariz sa lide boykot byin sible kont Israel la.
ARET ZENOSID
BOYKOT ISRAEL - KUMSA IZOL LI
LAME DAN LAME AR LEPEP PALESTINYIN
APEL PU GUVERNMAN PRAN POZISYON pu BOYKOT ISRAEL
Kopi Let nu finn avoy Premye Minis Navin Ramgoolam
Ser Premye Minis Dr. Ramgoolam,
Nu felisit u pu u gran viktwar, enn viktwar 60-0, dan dernye eleksyon zeneral.
Nu pe adres u sa let la konsernan festival lamizik Mystik Gardens ki finn fixe pu 7 Desam 2024 dan rwinn Balaclava, enn Sit Leritaz Nasyonal. Sa evennman la li inklir 2 grup mizikal Israelyin, setadir Vini Vici ek Omiki.
U deza okuran zenosid ki pe perpetre dan Palestinn kot fami antye e san okenn defans, finn masakre, e pe kontiyn masakre, par Israeli Defence Forces, IDF, dan Gaza, avek zarm furni par Leta Zini Amerikin. Pu u linformasyon e pu gard antet, sa 2 grup mizikal la finn piblikman pran pozisyon ar leta Israel, malgre zenosid ki pe derule.
Dan sa kontex la, nu fer enn apel a u pu fer enn “Deklarasyon Premye Minis” dan Parlman anfaver enn boykot kont Israel – ki li kote ekonomik ubyin politik, me osi kote spor, akademia, ubyin kiltir.
Onorab Premye Minister, nu espere u pu pez linportans nu reket kan u pran u desizyon.
Sinserman
Jean Marie F. Richard (Tel 52528375) ek Lindsey Collen (Tel 57816256)
pu Komite Ad Hoc ki Sutenir Palestinn, 3 Desam 2024
[Sa li enn tradiksyon an Kreol nu let]
