Zenosid Blog 58- Sanzman dan balans defors lant ki dir pu siporte ziska ladesant sibit ziska enn pwin baskil
27.11.2024
Balans pankor baskile. Zenosid par Israel kont lepep Palestinyin pe kontinye mem. Me balans pe koste pre ar pwin baskil, ar enn turnan. Seki pe arive dan Palestinn asterla pu afekte lemond antye. Lakur Kriminel Internasyonal (ICC) finn finalman tir enn manda dare kont lider Israelyin, Netanyahu ek Gallant. Trwa manb LALIT ti parmi dimunn ki finn met konplint divan ICC: Alain Ah Vee, Ragini Kistnasamy ek mwa. Warant azut enn pwa adisyonel dan balans kont zenosid ki Israel pe perpetre.
Sa lanter ki sak tigit pwa azute, enn lerla enn lot, ziska balans kont Israel baskile li tro lant pu siporte. Li fer ditor. Li fer ditor Palestinyin ankor plis. Me, li bles lezot dimunn usi. Dan mwayin ek alonterm, li pu usi fer dimal Israel. Israel okipe pu li fer limem ditor fatal, antan ki enn Leta, kan li pe dezenere e pe efondre anba pwa so prop krim.
Palestinyin dan Gaza ek dan Wes Benk inklir Zerizalem Les, Palestinyin dan Israel usi, ek Palestinyin ki viv kuma refizye partu dan lemond, pe kontinye sufer asterlamem. Anfet, nu truv, ek resanti, sa sufrans la tulezur. Lor nu lekran. Dan nu lespri, mem kan nu pe dormi, sa bann zimaz la ant nu. Sufrans pu sibir lasas par “lord” sadik etranz ki done par mesaz telefonn u depi panfle fane depi lao dan lesyel: “Kit sa zonn la, e al tel zonn. Tutswit.” Enn kosmar distopi ki organize par larme Netanyahu. Finn lasas Palestinyin depi zot prop later, depi zot prop lakaz e sa pe kontinye depi 76 banane. Swasant-sis long lane. Dimunn zot aryer granper ek aryer granmer, vini mem ziska bann nuvo-ne zordi, finn sufer, e ankor pe sufer, sa agresyon kontini la. Se pu sa rezon la ki de-tyer fami Gaza zot dan Gaza. Zot ti deza refizye ki finn forse pu fwir Palestinn. Me lasas la pli pir zordi ki zame avan. Israel pe infliz deplasman, lerla bonbardman ek kut bom depi tenk e zot infliz lafaminn lor bann fami, pli fami la mizer pli lafaminn la dezesperan. Israel finn kontinye asasinn lider Palestinyin partu kot li ule. Israel finn sitan bez fu, li mem tir lor negosyater Palestinyin avek ki li pe negosye. Tusa ti pu arete si zis USA pa ti donn sutyin aktif-sak zur ki pase- anterm larzan, zarm, kuvertir zeo-politik, ek fann mansonz lor medya Oksidantal. Sa kalite politik orib Amerikin pe fer ditor pa zis Palestinyin, me pe anpit Leta Israel, limem, e mem amenn USA pu al lor mod oto-destriksyon.
Antretan, Palestinyin dan Gaza pe bizin sirviv, kontinyelman lor later abandone, devaste kree expre par Israel so stok bom Amerikin destriktif ki paret infinisab ek bule kanon Amerikin, bal Amerikin ek blokis Lamerik sutenir. Pe fer Palestinyin mor san manze. Lerla fer zot sufer laswaf. Lerla pe detrir zot lopital divan zot lizye kut bom ki pe large lor zot par expre. E si, dizon, arive enn masinn X-ray sirviv bonbardman, pe fer Palestinyin temwin so destriksyon apre bonbardman, kut marto forzron, kuma enn dokter finn dekrir. Me, aster lamem, balans pe ariv pre ar pwin baskil. Tro lantman, buku tro lantman. Me pwin non retur pe koste. Israel pu perdi tu: dinite, loner, zom, tenk, sutyin, larzan, tusa. Israel aster so prop Premye Minis, Bibi Netanyahu, ena sarz ofisyel krim deger kont li, krim kont limanite, inklir infliz lafaminn lor Pep Palestinyin. Lakur Kriminel Internasyonal (ICC) finn, alafin, tir warant pu aret li, ek enn warant pu so ex-Minis Ladefans, Gallant. 125 peyi bizin aret zot si zame zot met lipye lor zot teritwar. Zot oblize dapre Trete. Buku peyi finn deza anonse ki pu aret zot. Kont-a-rebur inn kumanse.
Li pa zis warant ICC pu arestasyon ki konstitye kont-a-rebur pu kolaps Israel. Non. Pa ditu.
Larme Israel inn epwise. Pena ase solda. Petet 1,000 finn mor. 15,000 apepre finn blese. Nepli ena ase tenk. Nepli ena ase sperparts. Israel pa finn ankor atenn okenn so bann bi lager dan Gaza – mem apre enn-an enn aneantisman insanse. Li finn plito, reysi dan so bi lager inavwab pu lasas Palestinyin, uswa alternativman, kan pa pe kapav pus zot ver dezer Sinai, masakre zot – fam, zom ek zanfan, dimunn malad ek dimunn aze, nuvo-ne ek dimunn ki sufer andikap e oblize res lor lili – san distinksyon. E sa li form parti Israel so prosesis 76 banane kolonyal pu “debaras” dimunn ki viv dan Palestinn pu akapar zot later.
Me asterla, larme Israel finn epwize. Li andebandad. Li pe puri dan so prop imoralite. So solda atraver pos video zenosid, glorifye itilizasyon vyol kuma enn zarm deger, ki kondann zot mem pu imilyasyon fitir pu bann tel aksyon ek parol utrazan. Israel so ofisye finn blese e tuye par konbatan rezistans, ki pa mem ena enn sel avyon, pa mem enn tenk, me ki plito veye e atann zot vini, e lerla servi zarm ki zot inn ranze par zot mem, e depann pa plis ki lor zot prop kuraz ek langazman.
Solda Israel aster retisan pu return dan Gaza. Buku finn anpite e inkapab return dan larme. Lezot pe sufer lefe sok-bom depi zot prop bom ek taktik-sok. Tenk Israel nepli fonksyone, telman tulezur zot sibir latak par konbatan rezistans ki Israel finn koz manti par dir ki zot finn desime, ubyin finn sibir defet. Pa zis zot pankor gayne dan lager kont Hamas ek lezot konbatan rezistans, me inposib zot gayne.
Aster Israel anburbe dan enn lot lager ki li pa kapav ganye, lor so frontyer ar Liban. Israel finn fer gran tit lapres avek enn akt teroris demas, ki finn koz blesir par explozyon plizir milye telefonn portab ki apel “pagers” andan dan Liban. Aster, usi, olye konbat solda Hezbollah, Israel pe bonbard zonn rezidansyel Beirut, ankor enn fwa asasinn sivil san okenn pitye, pa pe konbat enn lager, me masakre inosan san pitye. E Hezbollah pe konbat kont zarm Amerikin vo milyon-dolar, avek enn koktel roket leze, mini-dronn ki anvole ba, ek inpe misil adaptab telegide presi, baze lor enn ki zot finn reysi desann, etidye ek kopye. Parfwa Hezbollah servi dronn-bomarse kuma prwa pu lokaliz enn misil telegide. Parfwa servi roket bomarse kuma prwa. Tandi ki Israel so Iron Dome ser, ek Lafrond fantezi David, Fles 2 ek Fles 3, ek Terminal Ot-Altitid Defans Teritwar (Thaad) finn agrandi lor enn prwa bomarse, ek lerla pena ase letan pu resarze, tandi enn misil telegide Hezbollah fofile ant. Lor later, antretan tenk Israel finn zis rant premye kelke mil dan Liban, ek finn perdi 49 solda lor sa frontyer la.
Antretan lekonomi Israelyin dan ICU. Par santenn milye sitwayin Israelyin finn fwir zot peyi. Larme Israel, etan done li konstitye esansyelman ar solda konskri ek rezervis, pe konstaman tir dimunn depi sekter travay ordiner dan lekonomi Israelyin pu servi dan larme. Israel finn usi met deor 160,000 travayer, ki Palestinyin, e sa azut lor mank travayer. Par santenn milye Israelyin finn bizin kit rezyon pre Gaza ek pre Liban, pu evit tir roket konstan. Ti lantrepriz finn efondre. Lindistri turism preske nil. Kisannla pu vizit enn zonn-deger? Kisannla pu ule depans zot kas pu enn vakans kot bizin sove al kasyet dan enn abri anti bom sak fwa ki Hezbollah avoy enn roket ubyin enn dronn lor zot?
Ek antretan, partu dan Lemond ena lapel pu boykot ek met anbargo kont Israel so marsandiz ki pe vinn deplizanpli for sak zur. Lekonomi Israel pe esufle. Lorganizasyon Internasyonal inifye gradyelman kont Israel akoz li pe komet zenosid, akoz li pe okip Palestinn ilegalman, akoz li pe pratik Aparteid, e akoz so mank respe pu sistem Nasyon Zini (UN). Israel pe afebli ek izole. Balans pe kumans baskil kont li.
Sa semenn la, USA ti, ankor enn fwa, res dibut laba kuma enn paria, servi so veto pu anpes aplik sese-lefe. Vot ti 14 anfaver sese-lefe, ek enn kont. Pov zom ki ti reprezant USA dan renyon Konsey Sekirite Nasyon Zini ti asiz laba parey kuma sa voler ki pe reklam “item kokin ki finn tonbe depi enn kamyon”. E lezot dan Konsey Sekirite Nasyon Zini finn santi zot lestoma finn devire ar so mepri evidan pu lavi Palestinyin ek so mepri kler pu mem sey fer sans, kan li amar limem par sey zistifye seki inzistifyab lor nom so Met, Joe Biden.
Konsey Sekirite ti pe sey gayn enn sese-lefe, dan sa mem moman dan listwar ki ICC finn tir manda dare kont lider Israelyin pu krim grav zot finn komet. USA, kuma lanpir pre pu kolaps e li ena tandans, pu fini par azir pu amenn so prop kolaps. Par servi so veto, USA finn fer enn pa divan pu amenn so prop ekrulman. Par denons ICC, linn fer ankor enn lot pa.
ICJ, lakur pli ot dan lemond, finn fini truv zenosid Israel “plozib” an Zanvye sa lane la. Lor sa baz la, li finn tir trwa “Mezir Provizwar” an Zanvye, Mars ek Me, ki viz pu anpes zenosid , ubyin aret li. Sak Leta ena pu pran aksyon lor la. Dan Moris, boner sa semenn la, LALIT finn al kit enn mesaz ar nuvo Premye Minis Navin Ramgoolam pu sutenir ka dan ICJ ki Sid Afrik finn mete kont Israel lor zenosid.
Enn lot ka separe ICJ kont Israel pu lokipasyon illegal finn infliz enn defet sever lor Israel boner sa lane la. Moris finn pran par dan sa ka la kont Israel. Zizman ICJ ti enn defet retantisan pu Lamerik ek Israel. Lokipasyon Israel finn zize kuma illegal, e finn ordonn Israel pu kit tu teritwar okipe. Aster, sistem Nasyon Zini pu fer so mye pu ranforsi sa.
Spesyal Raporter Nasyon Zini pandan buku lane, mem pandan bann syek, finn truv Israel kupab lokipasyon ilegal, ek Aparteid.
Sak aksyon par lamas dimunn partu dan lemond, par ti grup dimunn partu dan lemond, par etidyan ek sindika, par liniveriste ek artis, tu azute pu akseler pwin baskil dan balans kont Israel. Nu fer balans baskile tulede direkteman par nu aksyon, ek par met presyon lor nu Guvernman – kan nu fors zot pran pozisyon ek fer zot azir.
Antretan, konbatan rezistans lor terin finn epwiz larme Israelyin.
E pu tro lontan aster, Pep Palestinyin finn bizin sarye enn pwa tro lur dan sa konba la. Me zot konba li eroik, ek zot landirans enn mirak limanite.
Spere ki pwin baskil vinn vit.
Li depann lor nu tu.
Alor, zwenn. Azir! Pu asterla, vinn dan “Riport Bak depi Palestinn” manb LALIT Ragini Kistnasamy Vandredi 29 Novam 2024. Ragini fek returne depi Wes Benk, kot li finn partisip dan “prezans protektris” pu fami Palestinyin, ki setler vyolan ek militer violan Israelyin pe lasas zot. Riport Bak li kumanse 4.30 tanto ziska 6.00 tanto dan Lasal Konsey Minisipalite Porl Lwi. Li enn loner rar pu vinn ekut temwanyaz enn militant ki finn prezan lor later Palestinn. Ou kapav dibute ek fer enn diferans par ou prezans.
Lindsey Collen pu LALIT.
Tradiksyon: AA ek CC
