Kominike LALIT lor derulman eleksyon
11.11.2024
Manb LALIT finn zwenn zordi pu met met ansam linformasyon nu finn gayne depi diferan rezyon. Depi yer swar ti ena buku tansyon kan pe transport bwat ver sant depuyman. Finn ena insidan byin grav pu derulman eleksyon. Ena band dimunn isterik asosye ar Lalyans Sanzman finn agres plizyer Senior Presiding Officer, britaliz ofisye elektoral, fuy kamyon e finn ostil kont fonksyoner ki pe sey return lakaz apre ki zot finn fer travay polling ziska apre minwi zordi.
Depi kumansman kanpayn elektoral, lider Lalyans Sanzman, Navin Ramgoolam finn dir piblikman ki si Lalyans Sanzman perdi, vedir eleksyon “trike”. Li finn kontinye sa kalite deklarasyon iresponsab-la tutolong kanpayn. Pli grav, lavey eleksyon, li finn fer apel a pa zis so kandida ek azan me osi a so “partizan” pu “res mobilize e vizilan divan sak sant de vot apartir se swar e dime swar” setadir lavey eleksyon ek zur eleksyon. Li finn fer sa apel-la piblikman lor baz ki li finn gayn “linformasyon” de muvman sispe dan sertin sirkonskripsyon, san presize ki ete sa. Se sa apel-la ki finn provok band partizan pu rasanble divan plizyer lekol e antrav derulman eleksyon.
LALIT truv li neseser pu denons iresponsabilite Navin Ramgoolam parski li met an-danze tigit demokrasi ekzistan dan kad demokrasi burzwa. Erezman pu sann fwa la, mazorite fonksyoner finn dakor pu vinn travay pu kawnnting. Si zot pa ti dakor, sa ti pu provok enn veritab kriz.
Nu byin trist ki ni alinteryer Ptr, ni alinteryer Lalyans zot pa kapav rapel li a lord: Navin Ramgoolam ki finn provok otan listeri onivo bann partizan.
Onivo LALIT, nu satisfe ki eleksyon ti derul byin yer ek tu prosedir ti fer dapre regleman.
Nu pu zwenn pu analiz rezilta ek ki so sinifikasyon pu lalit pli divan.
