Kominike LALIT Apre Zur Vote Eleksyon Zeneral
10.11.2024
Dan enn reynion LALIT zordi tanto, kan vote finn termine, nu finn fer enn retrospektiv lor nu kanpayn elektoral.
Dabor nu finn felisit nu 6 kandida (Rada Kistnasamy, Sara Naraina ek Laval Yves dan sirkonskripsyon Nimero 1 GRNW ek Port Louis, osi byin ki Alain Ah Vee, Cindy Clelie ek Rajni Lallah dan Nimero 13 Riviere des Anguilles ek Souillac) pu zot kuraz e travay militan, akote lezot manb ki finn donn kudme dan sa 2 sirkonskripsyon la. Nu finn fer travay politik lor terin tulezur depi eleksyon large. E li finn extra interesan. Nu ti akeyir par dimunn dan enn fason salere, e inatandi.
Li finn enn travay politik inportan pu nu parti. Nu finn ofer lamas dimunn dan sa 2 sirkonskripsyon la enn vizyon kimanyer politik kapav ete. Ena dimunn tulde sirkonskripsyon ki finn donn zot nom pu rant dan LALIT. E seki nu finn aprann se enn gran nomb dimunn ule enn kalite politik ki pe rod kree enn nuvo sosyete. Ena enn reze ase dramatik pu sa kalite politik kot dimunn santi zot anprizone dan enn rol negatif – kot lamas dimunn ena enn rol zis pu tir enn parti politik ubyin lalyans dan puvwar, sa-mem. Zis BLD. Samem. Lerla regayn mem zafer. Dimunn napa kontan ki zot anprizone dan sa lozik la. Mem si zot tuzur anprizone ladan. E zot pli pa kontan, kan li akonpayne par zure grosye, vyolan ek patriarkal, kuma slogan prinsipal BLD.
Nu finn dekuver ki lamas dimunn byin sutenir nu program. Zot anvi Palestinn libere, baz militer Diego Garcia ferme, ki Moris refiz aksepte “lamone disan” par lwe Diego pu lokasyon, e dimunn ule enn politik agrikol kot guvernman fors tablisman pu plant manze lor enn proporsyon so later, kree anplwa, e asir deviz. Dimunn ule langaz Kreol dan Parlman, e kuma medyom dan lekol. Dimunn ule enn sel servis lasante gratis e iniversel, pa enn sistem kase an-de kuma MSM ti ankuraze – kot Guvernman donn su-kontra klinik prive.
E seki nu finn kontan osi, se ziska dernye zur kanpayn, LALIT ti kapav fer port-a-port byin kalm, kot dimunn resevwar nu avek enn latansyon inkrwayab. Nu finn etone ki pursantaz dimunn deza konn buku lor LALIT. Alor, nu finn ariv konn buku landrwa ki nu deza kone, me pli byin: La Tour Koenig, Cité Vallijee, Cité Grand River North West, Camp Chapelon, Canal Dayot, Cité Borstal, Camp Raket, Cité Richelieu, Pte aux Sables osi byin ki L’Escalier, Britannia, La Flora, Bois Cheri, Riv du Poste, Camp Diable, Riviere des Anguilles, Souillac, Benares, Batimarais, St Aubin, Tyack, La Sourdine.
E apartir dime, kan fini kawnting, nerport kisannla ki pu eli, li pu enn guvernman byin, byin danzere – apre enn tel kanpayn ki zot finn amene, kot enn finn abiz MBC e servi represyon, e lot-la finn fye, anplas lor enn program, lor enn seri odyo anonim ki, dan enn ton badinaz, pe devwal sertin krim grav – kuma tuy kikenn dan kaso, pel-mel ansam ar ti-palab isi-laba. Sa Missie Moustass la ki finn chalennj Guvernman, e li finn fer li par sey redwir lamas dimunn an “zombi” ki pu ekut enn anonim dan enn band-desine, enn anonim ki ena baking pa-kone-ki-pwisans, e vote lor baz seki li deside pu large zis avan enn eleksyon. Sa Guvernman sortan la finn sey redwir dimunn an “asiste”, ki pu vote lor baz tan mil Rupi ubyin tan mil Rupi. Tulde san amenn kanpayn lor baz enn program politik, ni enn vizyon sosyete.
Antuka, LALIT kontinye! Pli for ki avan.
