Sispansyon Rezo Sosyal - Kominike LALIT Nimero 2*
02.11.2024
Apre ki Guvernman Jugnauth finn retablir rezo sosyal zordi, Dimans 2 Novam, nu pankor kone exakteman kifer ti sispann rezo sosyal yer, alor sa vedir nu pankor konpran exakteman kifer finn retablir rezo sosyal zordi. Li pa evidan. Nu kone ki Linyon Reform finn met enn ka dirzans divan Lakur Siprem pu enn inzonksyon, e ki sa kapav finn zwe enn rol ladan.
Tu seki finn arive zordi se finn ena arestasyon Sherry Singh ek kat lezot dimunn dan kad bann rikording e piblikasyon rikording la. **
Alor, avek retablisman rezo sosyal, asterla tu seki nu ti truve lor YouTube, re-aparet lor YouTube – otan ki nu kapav zize.
Dan LALIT, nu truv sa seri rikording lor rezo sosyal definitivman enn fason malsin pu amenn enn kanpayn elektoral. Li kuma enn kanpayn “piblisite” kot enn personaz obskir apel “Missie Moustass” pe sey amenn lepep Moris dan bato. Kan nu dir li pa bon, sa pa vedir nu krwar li “bon” pu sansir li. Interdiksyon, li azut ankor enn nuvo zafer ki “pa bon” lor seki deza “pa bon”. Li agrav problem la. Seki nu dan LALIT dir tu dimunn bizin fer – ki li lapres, lorganizasyon travayer, parti politik ki rezonab, se pu ankuraz tu dimunn pu fer leswivan:
(i) Pa galup deryer dimunn anonim, nu-mem, e averti lezot dimunn pu evit sa, parey. Pa zis nu pu rann nu-mem ridikil kan nu swiv enn inkoni kumsa, me li kapav vinn danzere. U pa kone kisannla sa. E anplis, nu tu pa kone kisannla deryer sa dimunn la.
(ii) Bizin tultan poz u-mem lakestyon, e gard antet, kisannla pe profite depi sa travay la. Dan lavantaz kisannla li ete? Nu bizin fer nu lespri travay. Enn “seri tele-novela” ki pe gard tu dimunn an-sispans pu enn nuvo “epizod” li klerman enn form manipilasyon. Sa li partikilyerman grav kan li dan enn moman kle dan prosesis demokratik – kan nu pe swazir depite, e par sa swa la, nu pe osi determinn e Guvernman e Lopozisyon parlmanter pu 5 an.
(iii) Bann isyu de-fon, kuma posib konplo pu maske enn krim fer par polisye dan ADSU – sa nu bizin, kuma LALIT fer tultan, fer tu dan nu puvwar pu expoz li. LALIT, depi 1979, kan Serge Victorine gayn bate amor kan li su sarz lapolis, e lezot ka “high profile” LALIT finn donn kudme expoze, kuma Rajesh Ramlogun, Iqbal Toofany, e pli koni ki tu, lamor Kaya, Reginald Topize an 1999. LALIT finn gard enn “rezis” lalis tu dimunn ki nu kone ki finn mor kan zot dan kaso, su sarz lapolis. Li finn ariv 70. Tu sa bann ka la merit re-uver lanket. E nu tu bizin swiv Lanket Zidisyer dan ka lamor Mr. Jacquelin Juliette, kot DPP finn donn lord pu enn Lanket Zidisyer, kan lapolis pe tuzur dir zot pankor fini fer lanket. E dimunn ki finn fer rikording, li bizin vinn figir dekuver, dibut temwin, pa kasyet deryer enn seri “epizod” dan enn badinaz ase frivol. Li tro grav.
(iv) Nu bizin osi pa bet. Ena tu kalite lafors pwisan andeor Repiblik Moris ki pa dakor avek sa Deklarasyon Konzwin ant Premye Minis Jugnauth ek Premye Minis UK Starmer lor kestyon Chagos ek Diego Garcia, an okirans, lextrem drwat ek ladrwat dan UK (inklir but dan so laparey deta) e osi dan USA.
(v) Pu evit tom dan tu sa kalite pyez la, seki bizin finalman fer, se ramenn deba dan sa enn semenn kanpayn ki reste lor kestyon “program” politik. Ki nu depite, e nu fitir Guvernman, bizin fer lor kestyon zenosid ki Israel pe perpetre? E ki nu pe fer? Ki zot osi bizin fer pu fer ferm sa baz militer USA lor Diego? E ki nu pe fer deza? Ki zot bizin fer pu kreasyon anplwa? E ki nu pe deza fer? Ki zot bizin fer pu asir suvrennte alimanter? E ki nu deza fer? Ki zot bizin fer pu ki langaz maternel servi kuma medyom dan lekol ek dan Parlman? E ki nu pe deza fer? Politik li sipoze travay pli nob. Me, fode li otur aksyon ek refleksyon an-komin ver enn program pu amenn enn nuvo kalite sosyete.
LALIT
* Nu Premye Kominike li lor nu sayt www.lalitmauritius.org me pa finn resi poste lor Facebook swit a blokaz depi ICTA.
** Dapre Le Defi sa kat la se Nardeem Varsally, Jameer Yeadally, ex-konseye Minis Husnoo, Kaviraj Ramjuriah, enn Graphic Designer ki so fam travay Mauritius Telecom, ek enn ex-konseye Minis Callichurn apel Leevy Frivet. Le Defi azute, “Ils sont très proches de Sherry Singh.” Sa kat la dir zot pa konn naryin ladan. Lapolis finn fer lafuy kot zot lakaz, plis kot biro parti politik Sherry Singh, One Moris, parti kot Bruneau Laurette ti lider-konzwin avan li kite, ale. Ena sarz “Cyber-Terrorism” kont zot.
Lot zafer nuvo zordi, se Rakesh Gooljaury finn aparet. Eski li samem Rakesh Gooljaury ki ti ansyin konfidan Navin Ramgoolam avan li vire pu vinn enn zom Pravind Jugnauth? Lapres pa fer li kler. Antuleka si li sa, li tuzur enn personaz ki aparet enn-ku pandan derulman maguy “high profile”, e zordi pa enn exsepsyon. Sa ansyin lom-for Navin Ramgoolam ti fini vinn enn zom Pravind Jugnauth. Zordi li pe temwayne ki se Sherry Singh ki finn fer li ekut sa bann “rikording” la. Li pe akiz Singh fer santaz ar li avek sertin sa bann rikording la. Seki grav dan tusala, se dimunn ki ena sa kof-for rikording la, li ena kont Jugnauth ek so Lakwizinn, ki li truv itil pibliye zordi. Me, li ena posibleman dosye rikording ki kapav servi kan li vinn itil pu li lor parti Lopozisyon, osi, kuma Ramgoolam ek Bérenger, ki li pe garde. Ubyin kont nerport kisannla.
